豬欄生活

2013年8月14日星期三

[2013 沖繩夏日遊記] 最終回 - 那霸市暖暮拉麵 x 跑跑步 x Bambohe 燒肉放題

第四天接近尾聲了, 去完魚市場, 就揸車返酒店 check in,
酒店竟然 upgrade 了我們的房間去最高層的 suite 房, 有小客廳之餘, 仲有衣帽間, 所以這行程真的感恩處處!

我們放下行李, 就揸車去還車了, 多謝這架陪了我們三日的 Note 仔,
三日安然的過去了, 沒有炒車沒有刮花, 實在是超級鬆一口氣!
我們先去油站入站, 嘩, 揸咗三日都係入咗三千幾 yen 油, 真係抵到爛,
連埋我租車的 8000 yen, 整個自駕遊都是一萬 yen 多啲啲/三日, 又舒服, 又去好到多地方, 真係超值呀!!

我們選了去 OTS 的 DFS 店還車, 點知去到, 先發現租車的單據留了在酒店 *o*, 點算呀????
日本人實在太好了, 佢打電話去取車的中心問了一堆問題, check 過我架車冇大損傷就算, 實在非常之好,
在香港的話, 一定迫你返去拎返張單再來攪過.......

DFS 那裡, 全是名店, 冇嘢行,
不過過對面的商場就幾多嘢睇, 個超級市場好大, 又買了好多嘢,
然後在 Starbucks 坐坐, 過一個悠閒的黃昏

之後我哋搭 Monorail 去牧志站, 去食一家九州拉麵
這家叫暖暮的拉麵店, 本地人的評分也很高, 入到去, 見到香港人都識嚟食

叫了一個辣味增拉麵,

濃厚的湯底, 麵條是波比喜愛的幼麵, 又香蛋味, 好正呀 (諗起都好想食 T.T)

另一碗是豬骨湯底, 嚐到重膠質的口感, 好正!! 這家真是超推介給要去沖繩的朋友啊!!!

買了一個蜜瓜返酒店慢慢嘆, 去不了北海道一嚐夕張蜜瓜, 這個也很香甜好味~

最後一天, 第五天了!! 2pm 就要去機場, 幾個鐘都唔知去邊好, 於是就 plan了個跑步之旅~
吃了個MOS burger 早餐就出發, 哈哈, 呢度咁多人著 hawaii shirt?

跑過了冇人的國際通

鑽入了民居, 看到有趣的小屋和庭園

就是跟著 google map 一路跑跑跑, 愈跑愈高, 目的地是末吉公園

哈哈, 其實我都唔知呢個公園係點? 真係齋看 google map 就向著這地方跑呀跑
原來入面有不少古蹟

跑了 6.63km, 我們就在市立病院前站搭 monorail 回酒店

買了一日乘車票, 搭三次已經好抵

看著列車在高架的路軌上行駛, 好有趣~

回酒店沖涼換衫, 又搭 monorail 去國際通, 去了一家叫 Bambohe 的食店, 吃燒肉放題

這食店是旅遊書介紹, 但真係的麻麻....... 雖然我明, 1100 yen 唔可以 expect 有咩質素,
但食物是 ok的

問題係個燒烤網很快便黐著食物變黑, 這餐吃了很多致癌物......

好彩有甜點搭救

最後, 圓波比心願, 去了同路飛影相呀! :P

2013年8月13日星期二

[2013 沖繩夏日遊記] 美國村 x ぎょれん鮮魚卸売市場

玩完 Bios Hill, 我都一路向南，駕車到美國村

本來是藍天白雲，行行吓變得頃盤大雨，係大到差不多完全睇唔到路，好恐怖
因為其實有個颱風吹緊嚟，咁多日都好天，算是非常感恩了

順利地泊了車在吉之島的停車場，落車只行了幾十米，也半身濕透
我們到美國村搵食，只得幾間食店

最後選了間吃燒餅的，因為見到好多疑似明星簽名，好似好人氣咁啊
點了一份蛋包炒麵同一份燒餅，初時以為有得自己燒，點知係整好晒
不過見到師傅純熟地炒炒炒，邊看邊吃特別美味

吃飽飽就周圍逛，行了藥房有唔少收穫
其他地方就不大興趣了，因為都是賣衫褲鞋襪的多
但看看這裡的建築是有趣的

行埋Aeon Mall, 嘩。。。賣啲嘢好舊款。。。
係喺超級市場掃咗好多貨，食材居多，因為當時八算實在覺得好抵啊

之後又開車，二十分鐘就返到那霸市了，去埋自駕的最後一站 - ぎょれん鮮魚卸売市場

呢個魚市場就在那霸市內, 不過唔揸車就有點難去,
我們去到, 幸運地唔洗扭 s 位都有空位泊, 之後就衝入去搵食

有好多好多唔識的魚賣呀, 款款都好想試~

最後買了幾盤, 再走返上車食,
呢D 生蠔大概 300yen 一隻, 嘩, 超級的甜美, 唔會過咸海水味, 由口中直滑到喉嚨, 讚!!

Toro, 有少少筋, 不過成盤咁食, 成口都魚油, 好美味啊!!!

仲有唔知咩魚, 總之就係鮮甜啦, 點解咁好食o架????
食埋呢餐, 就唔知幾時先再有咁新鮮的魚生食了......

[愛住家菜] Stuffed mushroom

早兩日去了逛 V City, 嘩, 所有舖頭都拍烏蠅....... 除咗D 食肆,
食肆就間間都大排長龍, 連和民都要排晒隊都真係幾令人 O咀.......
睇嚟我哋都要過幾個月先可以食這邊鳥華的分店, 如果想食, 都係出返尖咀啦......

行超級市場, 冇上次咁迫人了, 買了些餸, 尤其滿意一 PACK兩隻的大菇,
今晚整咗個 stuffed mushroom, 有好多材料o架, 例如: cream cheese, mash potato, corn and salmon
係準備材料嗰吓有D 複雜, 焗就其實加少少水, 焗 20 分鐘就 ok

好大隻, 拎住當漢堡包咁食, 超滿足,
D 材料味道好夾, 落了好多芝士尤其正, 個菇又十分 juicy, 波比先生大讚啊!

七夕節, 還整了個芝士蛋糕, 完滿 :)

2013年8月12日星期一

[愛住家菜] 薯仔雞翼

星期一, 繼續熱到傻, 放工返到屋企, 未煮飯就要整返杯雪糕 cool down 吓!
我覺得Nestle $4 的雪糕, 其實味道不比幾十蚊的哈根大師差~

很簡單的晚餐, 有加了辣的薯仔雞翼, 同埋大澳蝦醬蒸肉餅, 是我最愛的家庭味道~

2013年8月11日星期日

十年之約

星期天, 一起身好想食西多 (傻的嗎?)
爬起身後, 就整咗個雙拼西多: 紅豆蓉拼奶醬, 嘩哈哈, 係咪好邪惡呢?! XD

之後去跑步, 今日好唔得呀, 成三十四度都有, 跑唔夠 1km 已經喘晒氣,
想跑 10km 來回實在頂唔順, 唯有跑到去南生圍就搭船仔返屋企
在碼頭見到三隻羊咩咩, 有隻仲好 BB好可愛,
一問船家羊的來歷, 佢竟然話係有幾個南亞人養嚟食的, 唔係嘛......

下午, 去了個很開心的約會, 約咗好好好耐先約到呀! 就是我同大學同學的十年之約~
哈哈, 不過其實係我們一年一兩次的 gathering o者,
十年人事幾番新, 這十年, 真係過得快到好似眨眼咁

暫時還是得一人携童出席, 看來其他人也要加把勁,
又或是大家都好似我咁, 玩極都未玩夠呢? 兩個人的生活, 真係太自由自在了~
兩歲小朋友, 說話實在太可愛了, 逗得我們這班 ee 們捧腹大笑~

十年過去, 也看看大家的工作,
其實我只知自己算幸福, 因為雖然工作量係多, 但 case 的惡哽程度算低, 有得放星期六日,
工作非常穩定, 一半時間可準時放工, 將來老細仲話俾我全時間返晒最近我屋企嗰間醫院,
如果唔係人工低咗截, 實在係冇走的理由~

見到同學有的都好辛苦, 一星期去多過唔同地點工作, 工作又唔到自己揀, 就知道實在要珍惜自己的幸福~
上星期咪話關於去大學教嘅, 其實諗咗一星期, 又同個老細 clarify 咗好多嘢, 最後其實興趣不大...
問題其實要返星期六 full day, 因為要做 clinical 嘢,
而家我同波比先生都係返星期一至五, 如果我變咗返星期六, 咁每星期得一日可全日見面, 好慘....
人生有幾多個十年o丫, 一年就係咁見了少 52日, 我仲有廿年要返工, 就見少了成千日....
星期六, 想同朋友行吓山, 同朋友食吓飯, 乜都唔得, 好慘......
而且開頭個老細係同我講返 9am-5pm, 點知我同佢 clarify 先知係 9am-6:30pm, 嘩, 差咁遠?!
其實就係一星期 44hr 唔包食飯時間, 嘩, 咩世界呀?
而家連我醫院啲阿嬸都改晒 44hr 包食飯啦, 堂堂大學教職員你同我講唔包?
咁我即係一星期返多咗 5hr, 一個月返多 22hr, 即係返多成三日!!!
計來計去, 都係個返工時間好唔啱我, 所以都係算了,
錢係搵唔晒的, 我還是較看重同家人朋友的關係同相處時間~

晚上同屋企人去食板前, 呢板海膽幾得喎, 好 creamy, 信得過係日本直送呀~

2013年8月14日星期三

[2013 沖繩夏日遊記] 最終回 - 那霸市暖暮拉麵 x 跑跑步 x Bambohe 燒肉放題

2013年8月13日星期二

[2013 沖繩夏日遊記] 美國村 x ぎょれん鮮魚卸売市場

[愛住家菜] Stuffed mushroom

2013年8月12日星期一

[愛住家菜] 薯仔雞翼

2013年8月11日星期日

十年之約

About Me

大件事

回到過去

分類

搜尋此網誌

最愛瀏覽