豬欄生活

2013年3月29日星期五

[愛跑步] 靜英英 x [愛美食] 三聖海鮮興記

假期的第一天, 約埋鄰居去了大棠跑步,
今日好大霧呀~~

來回跑了 12km, 可能好多香港人去都晒旅行, 今日第一次冷清成咁, 沿途都見唔到單車, 又得好少人~

因為路面濕滑, 今日第一次著了之前去北海道買的 Gore-tex 跑鞋去跑,
Adidas 嘅跑鞋其實真係好唔錯, 著了兩對都好舒服, 甚至覺得比 Mizuno 的更舒適~

回家洗白白後, 去食飯喇!
終於都有機會載 Daddy 去吓唔同地方, 佢好易暈車浪, 已經多年冇離開過自己住的地方附近~
今日初試帶佢去三聖食海鮮, 十零分鐘的路程都 ok 喎!
再下次可以去吓黃金海岸同埋市中心啦, 佢應該好多年冇去過了~

波比負責去了買海鮮, 然後就拎去上次大讚的興記煮

豉油王大蝦碌, 勁正, 多肉又好多膏, 殼都食埋!!

豉椒蟶子, 嘩, 好好呀, 拆晒殼咁炒, 好惹味, 不過咸咗少少~

清蒸石斑, D 肉好鮮味彈牙, 真係平時食唔到咁好食~

仲有蝦醬通菜, 佢哋用的蝦醬香而唔會太咸, good!!
埋單六百幾, 算好滿意的一餐呀~

2013年3月28日星期四

好多日冇 update, 其實係因為個 flickr 相簿壞鬼咗, 成個星期都 upload 唔到相片,
問題終於都 fix 了, 又可以寫喇!

Happy Holiday 前席, 相約了波比的同事在灣仔的祥正食飯,
呢間小菜館好多明星都幫襯, D 嘢真係好好食!! 好夠鑊氣, 又足料!
個咕嚕肉真係好食過高級酒樓的, 仲有個炸烏頭魚好特別、香口美味!
叫了十幾個餸, 每人都係 $160, 抵呀!!

今次 gathering 的目標是討論吓大家的沖繩之旅, 全枱的人都係買了 HK Airlines $690 機票去,
哈哈, 咪多得波比先生周圍宣傳囉~
不過祥正太嘈了, 根本傾唔到偈, 就轉場去飲嘢,
這間叫 Otto 的樓上餐廳, 很有情調, 侍應又非常之好人有禮貌, 好值得讚讚!

我點了心太軟, 有個 Sorbet, 不過兩樣都過甜了.....

但流心效果算唔錯!

波比先生同朋友就開紅酒, 不過師奶仔真係唔適合夜蒲, 一到 10pm 就眼瞓到不得了........
回家時瞓到死豬咁囉...... 下次太夜的活動, 都係唔可以預我喇~ 好彩聽日唔洗返工~

2013年3月26日星期二

[愛美食] 和牛盛宴

今晚得到波比同事的邀請，作客品嚐 M7和牛，波比先生最開心
我負責準備了自家烘培的芝士法包，仲有蟹肉磨菇忌廉湯

同事好識食又識煮，近來自家製了一種叫黑蒜的東東，據聞有抗氧化之用
請我哋試吓，味道非常的有趣，竟然是甜的，
似果醬，完全唔覺得佢係蒜頭，遲啲我都學吓自己整先得

重頭戲是 M7 牛扒，真係超超超正，肉質嫩，濃牛味，很多牛油，極品啊
還有藍青口，我從來都唔鍾意食青口的，覺得好靭，似橡膠
但原來呢隻藍青口好唔同，很鮮，肉質彈牙，好味呀
最後還有 auntie 自家製的芝麻糊，太滿足的一餐了

2013年3月24日星期日

[愛跑步] 元朗越野賽 x [愛美食] 鬆 cafe (Chow Chow Cafe II)

來到三月尾, 長跑賽事都差不多接近尾聲了~
我們報名了的最後一個比賽, 就是這個元朗越野賽

這個賽事一點也不簡單, 因為是要跑山啊!
不過頭幾名有盆菜食, 好吸引!

報到後下了幾陣雨, 使我不敢帶手錶/電話, 怕浸濕了就要報銷.....
準時九點開跑, 應該唔夠二百人, 用打鑼鼓的形式開始比賽, 好攪笑!

長長的大棠山路, 然後再不斷上山, 我都知好 harsh, 但比我想像中更 harsh.....
不斷的高度攀升, 使我氣喘及心跳得厲害, 仲有想嘔同暈的感覺.....
上完第一段樓梯後, 頂唔順要企咗喺度抖, 否則我相信我真係會暈, 要 call 直昇機.....

停了一陣令我大落後, 之後入了山路, 前後都冇晒人, 驚!!
跑山真係要好小心, 一唔覺意跣腳就真係會碌落山啊!!
今次真係超辛苦, 冇帶錶令我唔知自己速度, 又唔知跑咗幾遠, 仲有幾遠....
漫無目的地跑, 真係好想史......

最後的 1km, 真係有點捱返來的! 時間是 1hr7min, 真係慢, 下年如果再參加, 真係要練多D 上斜~~

有 K66 都算好快返到屋企, 感恩!
今日唔曬, 但D 汗流到吧吧聲, 整個人濕透了, 超恐怖~
沖完涼舒服晒, 就出去搵食!

睇 Openrice 發現波比好鍾意食的 Chow Chow Cafe 開了分店, 就在教育路
其實去兩間店都係遠, 今日就試試新舖啦~

呢度開業兩個多月, 室外座位比室內的多
服務員依舊的態度親切又有禮~

點了兩個午餐, 南瓜湯同雜菜湯都好足料

我很喜歡今日的食物, 因為我好怕出街食, D 調味會好重,
呢度的湯和肉, 調味都剛好, 很健康的感覺~
牛扒要五成, 真係有五成的效果, good ar! (因為太多舖問完你幾多成, 其實整完都係過熟....)

呢個薯條外脆內軟, 十級好食!!
在陽光下吃午餐, 是星期天的享受啊~ :D

2013年3月23日星期六

[豬車主人] 豬車出城記

星期六, 今日難得豬車出城了!!
咁耐我都未自己揸過出九龍呀, 因為真係唔熟路, 而且總覺得九龍好難搵到地方泊車~

今日的第一站, 是荷里活廣場, 今日有個和味拉麵節, 一蘭拉麵都有份參加, 捐 $40 就可以有拉麵食~
揸到去荷里活廣場, 算好順利呀!
不過泊位就差D 撞到個尾落條柱度, 真係太大意, 冇睇一邊鏡, 差D 又跌幾千蚊 >.<
D 位其實都幾窄呀, 不過佢有個綠悠悠泊車優惠, 只要出示一件綠色的物件, 就有三小時免費泊車, good ar!

上去到商場, 已經勁多人排緊隊, 因為我哋趕住兩點鐘參加一個大昌車主會的活動,
所以唔可以慢慢排喇....... 唯有等一蘭在香港開店再試啦~

於是上咗 Food Republic 食 lunch, 台式的, 普普通通啦, 點都唔夠真係喺台灣咁好食

韓式的就唔錯~

之後揸車去九龍灣的大昌行, 因為停車場超多車等緊位, 一上車就趕住開車走唔想阻住人, 唔記得咗開 GPS 先......
咁就大鑊喇, 行錯路, 兜咗一陣先去得到目的地......

去到已經兩點, 先有一部分講解汽車檢查同部件認識,
對於我哋呢D 乜都唔識嘅人真係幾有用!!

之後就係實習堂, 有大昌的師傅教換軚同睇自己部車的車頭,
同場仲遇到兩個揸 Note 的朋友, 交流吓心得, 幾好啊!!

5pm 完了, 經漆咸道揸返青衣食飯, 大塞車, 要 sip 位~ 今次終於冇行錯路了! (上次波比揸, 入錯線去咗油麻地.....)

回到元朗, 在市中心放低了波比先生, 佢買咗近期至愛明師傅甜品,
呢個焦糖燉蛋整得超好, 好厚的焦糖脆片, 個燉蛋又好 creamy! 差不多每星期食一次!
個椰王燉西米加湯圓, 唔太甜又好香椰子味, 正呀!