Shopping SuNdAy

星期日, 又因為發惡夢瞓得唔好, 晨早就起o左身

頻頻 check e-mail, 但間清境民宿同埋旅行社都仲未覆我有冇房, 煩...

去屯門食 lunch 之後, 行行市中心, 被芝士蛋糕吸引了食個 tea,
波比先生最緊要有咖啡嘆 (近來星期日佢常常嚷著要飲咖啡)

同埋有得打機

o黎緊一星期好多節目, 都係煮唔到飯居多,
買定一系列的波仔飯帶返工食!
因為 Canteen 的食物仍時好時壞

嘩, 今日係出血日呀~

買o左架遙控九巴俾謙謙做生日禮物,
又買o左個類似 Barbie 公仔送俾醫院的小妹妹

下晝同波比先生一齊出旺角, 去o左義順食o野,
雞蛋鮮牛治的蛋同牛都好滑滑,
木瓜牛奶超足料! 杰到o丫.....

食飽飽佢去踢波, 我就去o左逛商場,
我諗我都有一兩個月冇認真行過旺角了, 旺角太迫人了,
你完全唔覺得經濟有幾唔好

此行查實係想買條姊妹裙, 去o左唔少舖頭,
但其實來來去去都係o個間廠o個 d 款

豬太對條裙有幾個要求啦:
(1) 要有吊帶: 冇身材的豬太恐怕 low cut 裙會係咁跌....
(2) 唔好透啦: 我見過人o地 d 姊妹裙雪紡料勁透, 真係入面著乜都睇到晒,
真係唔明白點解 d 人可以咁著.....
(3) 簡單就得喇: 哈哈, 結婚o個個又唔係我, 無需要著到咁行!
之前去飲, 見過 d 姊妹著到好行, 加埋整過皇冠o係自己頭上面!
真係睇到我滴晒汗....

睇o左好耐, 深色的款(一定唔透)我覺得好似唔太適合, 淺色的又覺得好透,
最衰係好多舖頭都冇得試, 點敢買呢

後來去到一間舖頭, 見到一條係香檳色的, 似係絹的質地唔透啊,
睇落冇乜 cutting, 但就係我鍾意的 plain,
老闆又俾我試上身, 太好了!
一試呢, 嘩, 好 fit 好 fit呀, 我覺得就係佢喇!!
於是毫不猶豫地買了~
不過其實呢條裙我o係第二間舖頭見過, 白色又冇得試, 但係賣平成半有多!!!
呢度係就係無啦啦貴 double, 但係我行o左咁多間真係搵唔到呢隻色,
明知佢係賣貴o左都算啦~

姊妹裙呢家o野, 我諗最緊要係著得舒服又方便,
如果為o左自己扮靚連行步路都就住就住, 咁點做o野呀?!
當日我希望幫朋友仔影好多靚相, 應該要身手敏捷地左攝右攝啊, 哈哈~

勝利牛丸

住o左元朗咁耐, 都係第一次去食勝利牛丸,
人人都話好出名, d 人由第二區入o黎食, 究竟有咩咁吸引呢?

我o地見佢長期都好多人, 夜晚我o地放工o既時間佢已經收工唔做生意,
真巴閉!

佢全店得牛丸同牛腩粉麵賣,
單拼同雙拼都係 $19/碗, 我當時叫個雙拼啦!

我要讚 d 牛腩真係炆得好好, 好入味, d 腩汁撈落 d 河粉真係超正!
反而牛丸我覺得冇咩咁特別要特登o黎食喎, 係就係好彈牙o既,
但好食過佢o既我都食過~

哈, 不過碗麵都算細碗, 波比先生食完都唔飽....

食完飯, 去行書局, 終於都買到台中地圖喇, yeah~

book 酒店有阻滯.... 就係想 book 的酒店星期六已經 full 了....
我睇過幾間, 網上 check 過星期六都 full 晒呀,
而家唯有試o下貴 d o既酒店啦,
我o地去韓國泰國台北都未洗 book 咁貴o既酒店呀...
查實去台中, 絕對貴過去台北,
不過想睇靚景, 要付出代價的

向台中出發

波比先生去o左哈囉喂 BBQ,
豬太一人的 dinner, 去o左元朗廣場斜對面的車仔麵,
$13 一碗有咁多樣唔同o既餸, 真係點捨得搬離元朗

之後去書店睇睇旅遊書,
係啊, 我o地 12 月又飛喇, 今之的目的地係台中, 點解係台中?
你睇o下呢個 website 你就會明白了

http://cingjing.com.tw/cjcjha/hotelbest/hotelbest.asp

此行一大吸引之處, 係去清境住好靚好靚的民宿,
見到 d 相, d 雲係o係你腳下o架, 實在太不可思議了!

o個度仲可以睇綿羊, 同埋有大片草原添!
冬天最凍的時候, o個度係會有雪o架~~~ 我真係唔知原來台中會有雪囉!!

另一 mission, 就係o係台中市飲飲食食啦,
台灣o既夜市實在係太吸引喇!

不過自由行一大問題, 就係我搵唔到一本好詳細介紹台中o既書,
買o左一本, 睇過兩本, 都係得好少篇幅, d 地圖又唔清楚,
交通指示更加係冇.... 台中又冇捷運, 我諗我o地都係不停搭的士居多~

而家仲搜尋緊好酒店, book 埋酒店就可以切實地 plan 行程了~

Return to normal

呢幾晚係咁發惡夢, 真係好驚o既惡夢,
工作壓力太大嘛?!

今日終於都正正式式的 full team 工作,
嘩, 星期一3:30pm 就睇晒 d case,
我o黎o左半年都未試過, 實在係一大創舉!
師妹幫到手睇 in-patient, 相信大家都會舒服好多喇!!!

開始有時間整理一下做 therapy 的工作, 有好多o野可以睇深入 d,
而唔係日日趕清晒 d in-patient, 咁先係正常的工作 pattern 嘛!

所以我立志日日都要搭到村巴放工,
做一個煮飯的師奶先得!

終於都苦盡甘來嘛? :)

至正 Hot Pot @ Home

上星期話同 HSBC 信用卡換o左個電磁爐, 今日去o左攞,
今晚即刻用o黎打邊爐先得!

今日下晝搵 cafe 飲o野搵唔到之際, 撞入o左一間o係新 B 仔對面街,
綿綿冰隔離舖的新開日本食材店, 叫做「小樽」,
入面有好靚o既裝修, 老闆絕對係有 taste 之人, 賣的都係日本入口的食材

最吸引的, 係凍肉櫃入面的原隻松葉蟹、蟹腳、超大帶子、海膽、大蝦...
仲有我o地都有食開o既日本烏冬, 調味料等等,
好似將 CitySuper 的最正貨品搬o左o黎咁!
元朗正需要一間咁o既舖頭呀, 有質素的日式食物, 元朗絕對有市場

見我o地拎住個電磁爐, 老闆介紹我o地買呢個火煱湯底 ($49),
辣味麵豉湯, 好正啊!

有菇有丸有日本蟹柳

滾呀~~~ 呢個爐好掂呀, 好快就滾起, 調教火力又好方便!
都未試過o係屋企打邊爐打得咁爽! (之前的爐好鬼死慢...)

戲肉所在: 老闆推介的安格斯雪花肥牛

我可以話俾大家聽, 真係超超超好味!!
係我咁大個女食過最好味的肥牛!
平時去酒樓食o既一 d 都冇得比, 小肥羊o個 d 我都覺得唔錯, 但都唔係佢o既級數!
入口嫩滑, 牛味十足, 雪花的分佈算平均, 一 d 都唔 "un",
YUMMY~~~

極力推介俾元朗人, 一定要試o下
我o地都會再幫襯啊!
有o左個爐咁方便, 即使我遲放工煮唔到飯, 都可以成日打邊爐了, 呵呵呵~

生唔生? 搬唔搬?

今日兩公婆討論著搬屋的問題, 如果趁樓市跌換樓, 其實係為咩呢?
因為好抵唔買就笨?
因為近 d 返工, 唔洗我來回搭 3 個鐘o既車?
換大 d 嘛? 而家六百幾呎又好夠住喎!
因為第時小朋友, 想佢有好 d o既校網? 我諗呢個係主要原因

再講到小朋友, 我話第時要請工人, 唔係邊個湊呀?!
點知波比先生話點都唔會請工人, 因為佢唔鍾意同陌生人一齊住,
你估我鍾意咩? 不過如果要生就一定要請o架喎,
再唔係就好似朋友的朋友一樣, 擺個女o係托兒所啦

波比先生話搵阿姨姨長幫手湊,
我話咁你為o左個校網你一定會搬出九龍,
你搬o左出去又點可以叫住屯門的阿姨幫手?
再者, 我覺得小朋友係自己要生的, 邊有可能生o左叫阿姨幫我湊?
所以我都係覺得自己俾錢請工人最 reasonable!
而且真係邊好意思咁麻煩人o架?!
阿姨而家不知幾 happy 成日周圍去玩, 咁辛苦先養大兩個表妹就o黎出晒身,
叫人幫你湊 B 攪到人o地想去玩都唔得, 我就冇咁厚面皮喇!

如果決定點都唔請工人, 真係要住近阿姨姨長, 咁即係繼續留o係元朗,
唔洗搬啦?

哈, 以上一切我一向心中有數, 不過原來波比先生一 d concept 都冇,
成日淨係諗住搬就搬, 唔知連帶有好多問題

講講o下, 生o左o既教同養都係好大o既問題,
最後的 conclusion, 傾傾o下都係唔生嘛?
哈, 似乎呢個問題係一個 loop, 好難搵到個 perfect 的方案
是否應該繼續二人世界?
安於現狀, 沒有沉重的供樓壓力, 鍾意幾時飛就幾時飛, 鍾意去玩就去玩

星期日想o係元朗搵個有靚咖啡的地方,
諗o左好耐.... 原來係冇.....
最後去了 McCafe, 竟然換到小丸子公仔, 好得意

老富昌

呢個星期過得好唔容易,
波比先生繼續話好唔鍾意我呢份工, 因為見到我做到好辛苦,
比起上一份係辛苦好多, 但起碼係我鍾意o既o野,
但無可置疑, 的確對家庭生活有好大o既影響

星期五, 完成了一星期的辛勞, 我請你食返餐好o野,
少少補償平時成日都陪唔到你啦

相識是緣份

朝八晚七的工作, 累死人.....

放工一個人, 走到麥當奴想吃限定的醬汁豬柳飽, 不過已經售罄...
不如吃開心樂園餐, 換個小丸子公仔, 怎料也換完了,
原來, 有些事, 錯過了就沒有了

一生人或許要錯過很多東西, 要後悔很多次, 還有沒完沒了的遺憾,
才明白什麼叫珍惜和把握,
有些東西可能很短暫, 但懂得珍惜的人, 即使失去, 都會無悔無憾的,
因為擁有著的每分每刻, 你都珍惜過, 真切地感受他的存在過,
總好過到失去才知重要的人, 永遠帶著悔疚過日子

回憶, 往往是最甜也是最苦,
好好整理過後, 埋藏在心中, 已是最幸福,
能共患難的, 是最羨煞旁人關係

年尾炸彈第一擊

收到了 Laura 的請帖了, 超靚,
超鍾意呢種簡單花紋的西式請帖

星期四返學, 理論多於實用,
沒太大興趣聽之時, 拿出醫院的未成完工作做做做,
返工的時間實在唔夠用

星期五去學化妝, 畫o下畫o下幾好玩,
最攪笑係黐埋假眼睫毛, 自婚後都未試過化咁濃妝,
不過我都係鍾意唔化妝舒服 d

o係 HSBC 的獎賞天地睇o下有咩好換,
最終換o左兩樣好有用o既o野,
因為係 HSBC 的長期客戶, 用積分換禮品時有折, 勁抵!

呢個電磁爐, 用o左 12000 分 + $312 就換到喇,
仲有埋個煲送, 為入冬打邊爐做好準備, 諗起都興奮!

仲有呢個打蛋器, 用 25800分就換到喇!
我想要個打蛋器好耐咯, 可以用o黎整蛋糕, 正呀!!!

波比先生話取貨之後, 佢用o黎整 Cheese cake 俾我食喎,
大家拭目以待啦!

Enjoy our time

我o地有 2 張 $100 Pizza Hut coupon 就o黎到期,
於是今日就去o左 Pizza Hut 食 lunch

開心廣場的 Pizza Hut 新裝修完, 而家的 Pizza Hut 間間都裝修得好靚,
寬闊的座位, 時尚的佈置, 感覺似係高級o左好多咁

價錢呢亦到貴o左好多, 幾隻雞翼要四十幾蚊我覺得真係有 d 過份...
我o地叫o左兩個 Set lunch , 另加 $8 改酥皮湯

整體食物都算好好味啊, 而且愛呢間o既座位有陽光射入o黎,
坐o係度食個飯或者食個 tea, 都係賞心樂事!

埋單 $132, 如果唔用 coupon, 真係覺得偏貴啊~