豬欄生活

2013年7月11日星期四

[愛住家菜] 粟米蓉蝦滑

波比太太最鍾意一味餸入面, 有幾種唔同的材料, 那麼就可以一次過吸收到不同的營養

這一個粟米蓉蝦滑, 是先將紅椒粒粒拌入蝦滑中, 再分小件煎香,
然後在加入粟米蓉同埋滑豆腐煮煮煮, 完成~

帶飯返工, 有齊紅橙黃綠, 夠晒健康喇掛! :P
返小醫院的日子, 開始有得用蒸籠去蒸飯, 所以又買返個金屬飯盒,
蒸的飯真係好食過用微波爐叮嘅好多, 軟綿綿, 又充滿水份, 同埋覺得自己唔會咁易生 cancer 囉~

2013年7月10日星期三

[愛住家菜] 豉椒炒蜆

近來返大醫院的日子，都真係好遲放工
返到去，總有一大堆鎖碎的事要處理
日日都被人激到噴血，當面鬧人出 email 鬧人，但啲白痴嘅人嘅錯誤都仲係日日新鮮日日精彩，我都真係冇眼睇。。。。

今日都唔理喇，點都要返去煮飯
有時間行行街市，就是好美好的事情

波比有次見到街市啲蜆好靚話想食，今日就買了一斤黃蜆，都好大隻啊
豉椒炒蜆，個汁撈埋飯真係開心

2013年7月8日星期一

[愛住家菜] 芝士焗茄子

星期一, 6:15pm 就返到屋企, 努力地洗車, 因為泊醫院成日都有 D 植物跌落嚟, 攪到一點點, 出去洗都洗唔甩
前日買咗支美光洗車液, 今日真係要用人手逐點咁摔, 終於都乾淨返晒 (感動!)

尋日已買好餸, 今日有 wasabi 手撕雞, 又焗了這個芝士蒜蓉茄子,
蒜蓉茄子先用錫紙包住焗15分鐘, 打開灑上芝士碎, 再焗 15 分鐘就得, 芝士真係配咩都會好食o架~

仲有日式麻醬冷麵, 清涼夏日餐~

2013年7月7日星期日

跑跑吃吃星期天

星期天, 好好天氣, 去了南生圍跑步, 超美的景色, 清新的空氣,
這是住在石屎森林的人體驗不到的生活, 也是我很愛住元朗的原因~

見到好多蜻蜓, 今次偷聽到人講, 呢D 係蜻蝴先啱, 佢對翼係好似蝴蝶咁, 有黃色黑色o架~
一大圍在飛飛飛, 壯觀!

之後同波比先生去睇壞蛋獎門人二, 明明買了 3D 場, 去到 3D 壞了得 2D, 啞咗....
不過而家D 動畫真係靚得好犀利, 2D 其實都好立體, D 衫D 物件的 texture 畫得同實物一樣!

夜晚同波比的 U-mate 食飯, 去了「滿江紅」食四川菜, 好得喎!
估唔到喺香港都食到咁嘅質素, 同返大陸食的味道有九成似, 仲冇咁油添~
個水煮魚真係好正呀, 桂花魚冇骨, D 肉又唔會散晒, 夠新鮮魚味~
個辣子蝦都好好食, 不過係D 蝦太細隻~

之後再去「瀰月屋」食甜品, well............. disappointed............
四五十蚊的甜品, 其實都係成本唔洗五蚊的蒟蒻類, 冇味, 冇質感.... 只有 gimmick

味道..... 真係冇一樣講得上係好食囉..........

令人最啞的, 係叫咗個綠茶心太軟, 第一個來, 已經唔流心,
換了第二個, 都係唔流心......
成五十蚊食一舊只有綠茶味又唔算好食的蛋糕, 我完全唔明點解咁多人會幫襯....

2013年7月6日星期六

[愛美食] 金田長壽司

今晚約了一班大學時代做 part time 識的朋友食生日飯,
壽星女選了尖沙咀 Austin Road 的金田長壽司, 不過去到先發現....... 其實即係元朗嗰間.......
我們 4 人當中有 3 人都係屯門元朗人...... 早知唔洗特登出嚟食......

好多人聽到元朗都會淨係知道有長壽司, 不過我想話真係元朗人係唔會咁傻咁排一兩個鐘食田中,
因為元朗仲有好多其他好吃的食店~

今晚呢度亦有點限時限刻, 食 1.5小時就要交枱

最好吃的, 絕對是這板海膽, 鮮甜的程度可媲美日本的

這個軟殼蟹沙律, 沙律的部分有點薄弱..... 平時食開的大兜好多!

帆立貝又厚又美味, 甜蝦都好正, 不過其他所謂的長壽司就麻麻.....
雖然長, 但薄到張紙咁......
竟然有牛油魚, 不過味道完全唔得..... 太掛住墾丁嗰D 喇 >.<

金菇牛肉卷竟然意外地好食, 因為是鐵板上, 熱辣辣又滿滿甜甜的汁, yummy!

[愛跑步] 長跑訓練班第一課

波比先生等咗今日好耐，今日係長跑班的第一堂
出發時，忽然落大雨，本想跑過去都跑唔到，最後拎埋遮又遲了，唯有揸車
感恩去到好多位泊，一入到去就開始了

先 jog 了兩圈，再做熱身，
教練在第一堂先教如何放鬆肌肉，令到跑時更省力，
然後跑了半個鐘，一班廿多人，有啲都係跑開的好勁，
本來我最憎跑運動場，因為悶到嘔，但一班人跑有啲推動力，半小時都算快過
不過見到波比先生，實在好攪笑。。。點攪笑? 去佢個 blog 度問吓佢 XD

上完堂，去永年想買車仔麵，又係超超級長龍店一間，長到我哋都未幫襯過
去到點知太早未有麵，得腸粉，
買了三十蚊，啲魚蛋真係好正喎，因為我估係打魚蛋時已經加入了調味料，所以好好食呀

2013年7月5日星期五

[愛美食] 元朗的美味吉豬 - 勝亭

前排睇雜誌, 介紹了一家元朗新開的小店
老闆之前在帝苑酒店稻菊做過, 而家開店賣炸豬排, 聽了呢個 background, 心想應該唔差, 所以就來試試,
7:10pm 已經要等位, 因為舖頭真係好好好細.... 得 5 個座位, 迫到進出都有困難呢~
好彩唔係等好耐就入座, 可以等待時先落單
但得老闆同一個學廚在煮食, 見佢哋好忙好忙, 忙得團團轉, 但食物還是等得有點耐, 因都是即叫即製~

此店供應不同吉列類的飯, 又有拉麵
想要款特別啲, 就點了一客芝士吉列豬 ($38)
不過, 芝士不是我預期的流心狀, 反而似是芝士醬/牛頭牌芝士粒粒的質地, 肉有點薄, 不過味道還不錯~

之後是咖哩吉列豬扒飯 ($48), 要讚讚豬扒做到肉嫩 juicy, 不過咖哩汁有點浠, 同在日本吃到的始終有點距離

今晚我最想讚是, 不是吉列, 反而是豬軟骨拉麵,
雖然拉麵有點過林, 湯底也一定不夠行出一條街的焰拉麵咁好

但係深愛豬軟骨的我, 難得找到此種煮到啫喱狀的豬軟骨, 醬油的味道也充分的滲入去, 真係十分喜歡~

不過因為此店細, 座位對著廚房, 實在很熱..... 食到一半已開始不停滴汗......
但整體而言, 都是值得再幫襯, 因為我見到老闆同我一樣, 很用心去煮食~

2013年7月4日星期四

[愛美食] 名寶石 x 梁記餃子

嘩, 用提子浸酵素原來好鬼勁, 一晚已經出咗好多汁
呢幾日狂噴泡泡, 有埋木瓜嗰樽簡直係成層泡, 嚇親人!!

早幾日波比先生喺公司攞獎, 話要食餐好, 就去咗太子嘅名寶石
論食物呢度真係永冇失手, 個三文魚牛脷焗飯的牛脷超超超林又入味, 焗飯是正宗的炒飯底,
波比的紅酒燴羊膝更是超讚, 兩大隻, 啖啖肉多到食唔晒, 肉是很嫩滑的, yummy!

在花園街買了個手動風扇仔, 覺得好有趣, 環保唔洗用電, 攪一個圈已轉好耐,
炎炎夏日, 實在是恩物~

呢幾日好忙, 有新同事返工, 真係教到我 O 晒咀....
日日都遲走冇飯開...... 在元朗又搵到新嘢食~
這間梁記餃子在元朗廣場那邊, 賣的都是自己包的雲吞水餃, 水餃就有九款之多
長期都見好多人, 但搬來了咁多年, 先第一次食~
點了兩個米線, 排骨同雞翼都 ok 啦,
另點了一碟什錦炸餃, 八隻都唔同餡, 即叫即炸, 超脆, 食到唔停得口~
餡料呢, 我又唔會話係好好味, 但夠新鮮同足料啦~
有時食飯, 就是喜歡這種街坊舖街坊口味

2013年7月3日星期三

[愛美食] Tea buffet @ 都會海逸 Promenade

放假的日子, 好難得約得齊我的好同事 gathering!!
選了都會海逸 Promenade 食 Tea buffet~

準時 3:30pm 到達, 已經好多人等緊安排入座, 我們被安排了坐落地玻璃望維港景的八人長枱, 很滿意~

一開波, 大家攞了一人一碟三文魚, 這裡的質素很好, 甚至比早兩天在九龍酒店吃的更肥美~

然後是熱食, 其實呢個 tea buffet 真係好得, 好多食物, 我們只挑了自己喜歡的, 但都多不勝數!
其中我覺得最好食的, 是叉燒酥同埋越南春卷, 哈, 我都係鍾意香口食物~

我把肚子的空位都預留給甜品, 因為實在太太太多選擇了!!!
這裡的 Macaron 出奇地唔過甜又好食, 後面是杏汁燕窩~
呢排仲有刨冰食, 可自己選水果呀、爆珠呀、珍多呀, 好開心~

在到西點, 芒果拿破倫正, 仲有疑似日本爺爺蛋糕的焗輕芝士蛋糕, 又有我最愛的麵包布丁, 真係滿足了好多好多願望!!

招牌的小葡撻同埋小 scone 又香又脆, 有個榴槤糯米卷好特別啊!
Tiramisu 又夠 creamy 夠酒香, 反而是焦糖布丁唔得~

超開心的 gathering, 可惜佢兩小時就趕人走, 走落尖東想搵忌廉哥, 點知佢唔喺度添.....

2013年7月2日星期二

[2013 沖繩夏日遊記] チサンリゾート沖縄美ら海 x 海邦丸

第二天浮潛完, 就揸車去連住兩晚的酒店 - Chisun Resort Okinawa Churaumi
這家酒店在北部的水族館旁, 不過其實諗返起, 第二天和第三天的浮潛都在中部, 實在應該住在中部先啱,
但這家酒店的網頁又提供了早割優惠 , 連住兩晚只需 JPY 20600,
仲送埋兩張水族館的入場劵 (JPY 1800 x 2), 一天的自助早餐,
Early check in, late check out, 卡啦 OK 1 小時, 網球場 1 小時, (雖然這4項也用不著),
就是覺得超抵, 所以 book 了~