[我美食] Caffe HABITU the table Saturday Brunch

如果"宅" 的意思是"喜歡待在家中", 那麼其實我也很「宅」,
星期六日, 我總喜歡留在家, 但波比先生總嚷著要外出

星期六, 波比先生話研究咗好耐, 好難先 book 到近期好多 blogger 介紹過的 Caffe HABITU the table Saturday Brunch
我話: 「D 嘢食我全部都識整啦, 我喺屋企整俾你食咪得囉」「搭車過海咁遠食餐飯, 嘥時間」
這其實是很典型的完美型人的想法, 我們很 task oriented
不過見波比盛意拳拳, 最後都係陪佢去食啦




這個 brunch 呢, 我想話其實真係唔算好食...... 除了那件 scone, pasta 同 banana pudding 較好~
不停的出漏食物, 俾漏果醬, egg benedict 的荷蘭汁整得完全唔似應有的味道, 都覺得大打折扣....
吃過一次便好了, 唔會推薦俾朋友啦!!





食完飯, 步行返 HKU 借書, 二十九度, 熱到身水身汗.......
附近變了很多, 證明我倆人也老了很多喇~

當我多了一小時

家吓星期一五返小醫院, 揸車返工又近了一半的路程, 每天慳了一小時的交通時間
其實, 一個鐘真係做到好多嘢

返工前多了半個鐘, 我可以煲了紅菜頭蘋果水, 又晾埋衫, 仲執一執屋先出門口,
由出門口計, 25分鐘就可踏入醫院, 真係好爽!



放工後, 雖然成六點半先走, 但又可以七點鐘返到屋企, 煮埋飯 7:30pm已有得食,
如果返大醫院又六點半走, 返到屋企都八點了 >.<

今日仲有時間, 整個手造芥末黑椒牛肉漢堡, 又配吓紅色蔬菜, 很健康~



返小醫院, 真係壓力都少咗好多, 冇咁多煩人的 admin 事情, 睇 case 就睇 case,
簡簡單單, 很喜歡~

[豬車主人] 失驚無神旺角之行

今日真係嚇餐死呀, 我下晏瞓醒晏覺, 忽然間諗吓諗吓, 驚覺星期三上午要開 team meeting, 但我又好似 book 滿咗成朝門診!! 

真係死喇, 我而家星期一/五又唔係返大醫院, 所以聽日攪唔到改期,

我亦都絕對唔敢遙控我個 clerk 幫我改, 因為佢真係得罪人多稱呼人少,

咁急先改期, 一陣遇著D 唔好相與嘅病人就真係好大鑊喇!!!

所以, 我用十分鐘就出門口, 飛車返醫院攪掂佢!!

好彩, 星期日公路唔多車, 安全高速地 35分鐘返到去!

唉, 算係攪掂咗喇!

但又一大挑戰, 就係要揸車出旺角, 如果唔係今晚 book 咗枱食母親節飯, 我又揸咗架車出去, 我諗我呢世都唔會揸車出旺角!

好彩有波比先生同行, 幫我睇定朗豪坊的停車場都唔算難泊, 就出發去啦,

點知, 又俾 google map 老點, 開機時明明 plan 咗行 A 路, 點知行行吓佢又 auto 轉咗教行 B 路,

攪到我又完全冇心理準備之下, 去了一個又係呢世都唔會無啦啦揸車去的地區 >.<

D 貨 van 佬真係黐線, 行我後面, 一齊打左燈 cut 線, 佢 cut 得我快少少, 就踩油去唔俾我 cut 仲 bu 我, 真係冇咩事唔好出九龍

好彩, 後來都順順利利入到朗豪坊了~

我們去了八月軒食飯, 其實係高級版美心, 食物很精緻, 不過我係覺得好多餸都過鹹.....

最後點了很招牌的拿破倫, 係呀, 呢度係中菜食店, 但有好多西式甜品, 

同D 老人家嚟, 食到D 平時佢哋冇機會食的甜品, 都幾好啊!

講吓我樽酵素仔仔, 今日 Day5, 好多泡泡呀,
開一開俾佢吸吓新鮮空氣, 好勁酒味呢!

[愛美食] Lunch buffet @ 九龍酒店倚窗閣

等咗今日好耐喇, 為了幫考完試的人慶祝 (藉口), 我們一行 4 人到了九龍酒店的倚窗閣食 buffet
本來用 Openrice coupon 已有 85 折, 但一去到, 職員話而家恆生信用卡做緊 75 折,
嘩, 真係超超超抵呀!! 有埋生蠔又多甜品, 加晒一都唔洗$240, 絕對值得推介!!

食物質素大家都好滿意, 同行的三人食力非常強勁, 應該只有我一人係蝕本的 XD



食飽飽, 行去海港城睇 Rubber Duck!
其實前年我哋喺大阪都見過佢了, 不過冇呢隻咁大,
成個尖沙咀真係迫人得好恐怖!!! 好似全個香港D 人都嚟晒咁~

在海港城前面的大道, 完全迫唔到去海邊....... 又入唔到商場,
於是繞了個圈, 上到二/三樓停車場, 都仍然係超多人, 但都影到幾張靚相~
見到好多小朋友, 更加睇得超興奮~

一只鴨仔, 為香港人帶來了歡樂, 真要多謝他的爸爸~



最後仲陪朋友在海港城睇 Audi 車展, 嘩, 歐洲車的設備同 design 真係 high 好多,
但價錢亦都貴太多了~

[愛健康食物] 豆漿麥皮

Day 3 的水果酵素, 嘩, 多咗好多汁, D 水果就跌晒落嚟,
仲有好多泡泡, 是酵素呼吸產生的, 應該今次都 ok 成功喎! :D



一個人的晚餐, 如何吃得健康?
自從上次俾 body check 的護士話完, 我有認真諗過自己的早餐洗唔洗改一改~
一向我都係食麵包 + 醬, 但護士一口就話咁唔得, 除了 carbohydrate 其實冇營養, 咁佢都啱嘅,
一日得三餐, 但要食夠不同的營養素, 其實好頭痕......
護士叫我食包都要夾三種唔同顏色的蔬菜, 但晨早樓樓, 我真係唔多想食菜.......
轉而睇睇其他都有營養的食物~

其實波比朝朝都食麥皮, 但我又嫌麥皮食完好快肚餓,
一輪研究之後, 發覺動動腦筋, 都可以整到好味又飽肚的麥皮~

今晚我就用豆漿去整麥皮, 再加入烘得香香脆脆的杏仁片、合桃粒, 仲有亞麻籽,
再加入幾粒黑朱古力攪勻, 就成了健康又好味, 含多元營養的麥皮了,
味道唔錯o架, 會試試用佢嚟做早餐先!

[愛健康食物] Fruit Enzyme Day 2

第二天一起身, 見到樽水果酵素多咗D 汁, 好得意!



放工後去上堂, 由兒童腦科醫生主講的一系列講座,
不過第一堂的內容其實我讀 Master 時都聽過了, 希望之後幾堂會好聽D~

波比先生等埋我落堂, 同埋一齊上堂的師妹去食 Hotdog,
雖然都好食, 但都係好掛住以後哈迪斯的肉醬熱狗~

[愛健康食物] 開壇 - 水果酵素自家製

五一假期, 我去了一家私家醫院「出診」
十幾年前, 當我仲係讀 U 時做 part-time 的舖頭經理中咗風, 我的舊同事就想我去探吓佢睇睇有咩幫手~
假日冇嘢做, 二話不說就出咗去~

有時呢, 我唔係話私家醫院唔好, 如果計護士的服務同態度一定比公院優勝,
但醫生方面, 真係唔敢講~
公眾或者有個謬誤: 做得私家醫院的醫生都勁D
我想話唔係, 如果專科醫生通常都係好 D , 但普通科的可能也是毫無經驗的 fresh grad

朋友就是一種較少見的中風, 我呢幾年都係見過 4 個 cases,
但對腦神經科有認識的人, 一聽D 徵狀其實會即刻諗係中風,
但朋友睇的第一個私院醫生好似完全聯想唔到呢方面的問題, 叫佢去睇耳鼻喉.......
這一來, 就完全延誤了數小時黃金時間的治療......

這種中風帶來的問題都幾難攪, 我只可解釋那 MRI report 的內容, 讓佢對自己的病同 prognosis 有較深入的了解,
Counsel down 的同鼓勵的, 治療的方法都一一講晒, 唉, 希望佢早日康復啦~

回家, 好多嘢做呀~
今晚除了煮飯、整麵包、煲紅菜頭水俾波比先生, 仲開壇作法 - 整水果酵素, 即係前幾日喺大學老師家飲嗰D

其實我都知道有呢樣嘢好耐, 但真係要飲過, 有人證實過先相信它的好處
製作方法網路上多多的是, 用任何水果都得~
大少奶都有整過呀!





水果風乾後, 一層層的放入已消毒的樽, 加入黃糖、冰糖、蜜糖,
封好保鮮紙等一個月就可收成, 好緊張呢!

[愛住家菜] 煮場作客

一年一會, 今日約埋師兄同事, 一齊上了大學老師的家,
而家有車可以揸車去, 實在好方便!!!

下午去到, 睇睇老師整玉桂提子 scone, 好香好鬆好好味!!
後面係佢整嘅蕃薯麵包, 好軟呀! 搽 cream cheese 真係一流!



呢杯嘢勁呀!! 係老師自己浸的什果酵素, 加埋梳打水飲, 完全好紅酒 feel!
近期好 hit 浸酵素呀, 攪到我都想整返樽! 酵素據聞超有益, 對身體好好啊!
不過D 酒味都幾勁, 我只飲到一小杯, 否則驚又全身出風癱~



幾個人一邊整嘢食一邊吹吹水, 話咁快就到晚飯時間,
好豐富呀!!!!!!!!!!!!



先出場係老師整的檸檬香草烤雞, 檸檬令人好開胃, 完全冇了雞的油膩感~
D 雞汁拌飯一流!
老師同我一樣都係 Jamie Oliver 迷, 呢個雞就係用 Jamie 的方法整, 真係得!



我就整咗泰式雞翼, 不過今次買的魚露竟然係好辣, 大家都辣到噴火, 哈哈哈!



又係 Jamie recipe 的黑椒焗新薯, yummy!



我整的檸蜜三文魚, 因為老師的家好健康冇易潔鑊, 煎魚攪到散晒, 變了炸魚, 哈~



仲有老師的香茅豬扒, 用新鮮的香茅整, 好入味好正呀!!
我試過幾次用新鮮香茅, 硬係出唔到D 味, 老師就真係整得好好呀~



哈哈, 好有口福的一日啊!

[愛住家菜] 紅菜頭湯

今日又是放大假, 在家執屋同睇書,
去買餸之餘, 終於去買了好耐冇食過的粉仔! 夠辣好刺激!
不過論味道的話, 都是置樂那檔好食好多!



今日又去攞咗個 body check report, 一切正常, 係D 白血球太低, 低過 normal range
Nurse 問我係咪好易病, 其實又唔係過, so far 身體其實都好少病痛~
我話我有做運動, 又日日三餐都好健康, 多菜少肉, 有奶有豆漿, 點解會咁低? 可能因為我工作壓力大掛~
姑娘叫我每日要食三種唔同顏色的蔬菜, 又要有兩份水果

返來睇返D 資料, 要食多D 紅紅橙橙的食物, 如 carrot, sweet potato, pumpkin,
當然仲有好多其他營養素要補給~

一日得三餐, 邊食到咁多........

不過咁啱今日煲了個好啱嘅湯, 就係紅菜頭紅蘿蔔薯仔煲瘦肉,
紅菜頭可降血壓呀, 今日一早就煲定俾波比飲~
哈哈, 我舊老細長期煲俾佢老公飲o架, 日日都見佢帶一兜返醫院, 超健康~
味道有點草腥味..... 不過都可接受, 下次加舊薑睇吓會唔會好D~
我都希望煲多D , 波比D 血壓就唔洗擔心啦~

我們的新玩具

話說老婆忽然間見到人哋用 iPad 嚟 show D 訓練教材俾病人, 真係好似幾好用,
於是就心郁郁想買部 tablet

不過唔想買 iPad , 因為過嘢實在太麻煩
行 Android 的睇過幾款, 最終決定買 Nexus 7,
你話係咪新款? 都唔係啦, 上年出了
做乜唔等新款? 唉, 夠用就得啦~
我都真係實用居多, 唔係用嚟玩~

用落真係幾滿意, 32G 都係二千頭, 7" 好揸手, 夠輕日日帶出街都得!
Processor 快, 電好襟用, 畫面靚~

而家用得最多就係睇 reference book 同 journal,
有時 d/l 咗 online journal 吓吓 print 出嚟睇真係好麻煩, 而家放晒入嚟, 每日返放工一日一篇, 自我增值~

又放咗好多俾病人睇的教材入去, 一按就 show 出嚟好方便!
仲有擺咗兒歌, 去睇 BB 病人時, 播返一兩首 calm down 佢哋好有用
如果有時間, 好想同波比先生整個 App , 用來教病人~ (哈哈, 其實 Play Store 上有一個波比寫的 App o架, 不過冇生意 XD)

後來波比先生見到我用得咁開心, 一星期後就忍唔住買咗部 iPad mini,
而家日日玩得好 happy~