真係旅遊節目唔好亂睇, 睇完會心癢癢, 然後敗家出血去排除萬難去一趟!!
那一集見到莎莎去了北海道的雪祭, 是個夢幻世界, 被深深吸引住了!!!
上年 9月頭, 在新聞組見到有人話新年的北海道機票已經好難買, 所以就同波比先生傾傾, 決定了去就買票了
決定日期: 上網研究咗一輪, 原來北海道唔同地方都有雪祭, 但大家開始時間不一,
先要決定你去睇邊個, 再能決定你的行程日期,
例如札幌大通的在 5/2 開始, 小樽的在 8/2 開始, 層雲峽的就1月至3月都有
而去過的人, 都建議喺雪祭開始的頭一兩日去睇, 因為雪雕冰雕都較完整, 未會變黑/溶化
買機票: 去札幌而家得 CX 有直航, 其實搭 JAL 東京轉機都得, 不過來回冇咗兩日
淨買機票, CX 唔憂做所以都唔會平, 2月頭差不多六千
睇睇吓都係買 CX Holidays 的 Package 抵,
本想買 2 日札幌 + 1日層雲峽的套票, 但酒店已冇房,
所以要買4日 3夜札幌, 2個人夾埋 $16500, 個價其實都算 ok!
訂酒店: 今次旅行, 因為撞正雪祭是旺季, 所以好多網站 book 酒店都唔平,
最後搵到 JTB 的網站, 係日本一個好有規模的旅遊網站,
Search 過幾間酒店, 價錢都比 Jalan/ 樂天 平, 不過要識睇少少日文, 最後好順利地 book 到其餘兩晚的酒店喇!
買裝備: 波比夫婦大鄉里, 都是第一次到落雪的地方, 所以要好好準備!
雪褸 - 之前提過去花園街威記買, 好得, $280 真係正, 根本唔洗千幾蚊買 Columbia
雪褲 - 等咗好耐 bossini 七折, 買了一人一條, 都係百幾蚊, 好夠暖! 防水真係好緊要, 有一日我唔係著雪褲又遇上大雪, 條褲的雪溶咗後濕晒, 凍到我史!!!
冷帽要買包到耳仔的, 手套呢, 其實戴咗根本用唔到相機, 所以其實暖包會實際D~
暖包 - 去到日本買白兔仔牌就 ok, 真係暖足一日!
鞋 - 同波比買了 Adidas 的 Gore-tex 防水鞋, $700 真係冇買錯, 因為有幾日行雪地, 真係成隻腳塞入雪堆中, 唔係對鞋防水, 真係凍到彊!!!
鞋底亦都特別選了多紋防跣的, 但去到發覺, 其實幾多紋, 行在市中心的半溶冰路都係跣到好似玩雜技咁....... 所以, 小心D 行好過, 唔好急~
太陽眼鏡 - 上網研究過, 在雪地反射了紫外線, 很傷眼睛, 會有雪盲症,
去到我深深體會到那紫外線的威力, 因為我對眼一向對紫外線很敏感, 即使唔太光的日子但紫外線強, 我對眼都會 feel 到而睜唔開.......
有一日玩雪, 戴了平時戴的全視線, 幅眼鏡變到前所未有的黑柒柒,
另一日去動物園戴了 con, 雙眼就是痛到睜唔開, 好彩波比有太陽眼鏡借俾我戴, 否則真係玩唔到~
所以去的朋友, 都記住要帶返副合適的太陽眼鏡啊~
暖水壺 - 哈哈, 近年去凍的地方都必備啊!
上網: 今次又係幫 Vison Data 租 wifi, 呢間嘢應該俾 commission 我哋啦, 我哋介入咗不下十個朋友用~
相機: 諗咗好耐好冇買部三防相機, 有D 人話天氣太凍, 普通相機D 電會捱唔住,
又話落雪會濕會壞, 不過睇咗好多 model 都唔啱, 因為影出來的 quality 一般, 又冇得揀對焦點~
最後, 我竟然是買了支諗咗幾年都唔捨得買的 20mm 1.7 鏡頭俾我部 GF2,
因為好多雪祭都係夜景, 我覺得大光圈係好重要 (上次京都影夜楓就係影唔到)
最後, 我覺得呢個決定都係啱嘅, 不過太大風雪時就真係拎都拎唔到部相機出嚟, 咩鏡都冇用....
三防相機, 真係有佢嘅價值, 就係唔怕濕可出拎出拎入, 再去的話, 真係應該考慮買!
************************************************************************
好了, 出發喇!
平時我們買平機票, 一向都唔會有得預先揀位, 今次買正價機票, 原來是可以的!!
但我到 online check-in 先知, 真係好無奈, 去程已經冇晒位揀, 兩個人要分開前後行坐....
不過好彩 5 小時的機都唔算難過, 而且我坐第一行, 可伸伸腳, 讚!
去咁多次旅行, 第一次有酒店的接機服務, 真係好攪笑呀, 有人舉住我個名嘅牌!
哈哈, 國泰呢個 package 跟的酒店真係好好, 叫 Sapporo Excel Hotel Tokyu, 有埋接機服務,
有個勁似唐唐的哥仔來帶我哋去上酒店車, 幫我哋推行李, 全程笑容十足,
坐的竟然是 8 人車, 我哋包車咁, 唔洗一個鐘就去到酒店了~
Sapporo Excel Hotel Tokyu 雖然唔係喺最繁榮的薄野/ JR 札幌站, 係位於中島公園站,
但因此房間就好大, 係我去過咁多次日本, 唔計溫泉酒店的數一數二最大!
而且其實行去薄野都係 1km 到, 大家都知我哋鍾意行路, 其實好 ok~
每朝仲有自助早餐, 真係得呀!!
我們的房間向北望, 見到電視塔同埋 JR Tower~
已是四時多, 開始我哋嘅行程了!
第一個任務就係去JR 站買旭山動物園號車票!
一出酒店, 見到好可愛的 Winnie the Pooh 啊!!
然後就是第一次踏雪, 行去中島公園地鐵站好近, 不過要在雪地行, 行得慢, 不過真係好得意好興奮!!
上次來北海道是跟團, 今次自由行, 第一次搭札幌的地鐵~
我們去了 JR 札幌站西口的綠色窗口, 買了兩套旭山動物園套票,
包來回札幌至旭川的特急列車, 同埋去動物園的巴士票, 同埋動物園的入場卷,
最緊要的是加 710 Yen 轉搭旭山動物園號 , 呢架特別班次列車唔係日日都有, 係星期六日同旺季先有, 每日一班來回,
今次有得搭, 實是幸運!!! 因為是三日後的班次, 其實好驚 full 晒就冇o架喇, 等 n 年後再嚟啦~
不過一D 溝通上的問題, 本來只打算去程搭, 點知職員賣了來回都搭~
買到了車票安心晒, 就去搵食喇! 咁近, 梗係去車站上面的拉麵共和國啦!
入面有幾家出名的拉麵店, 兜了一圈, 見到呢間最多人, 通常入去都冇錯!
叫了一個時令野菜拉麵, 菜o者, 有咩好食?? 但我想話本土產的新鮮野菜, 原來真係可以好好食~
鮮甜爽, 就係咁簡單~
我的味增拉麵, 麵質很彈牙, 好吃!
還有這個鍋巴送, 有趣~
日本的店都好貼心, 有籃又有衣架俾你掛衫~
在外邊逛逛, 有D 好古老的場景~
之後我哋去咗行 ESTA, 入面有 Bic Camera, 有 Loft, 臨近情人節, 有好多超可愛的甜點 DIY package 賣
哈哈, 送一包, 心意明晒~
波比最愛的 One Piece, 不過佢好乖, 睇吓冇買~
去到地庫, 有一超級市場, 買了割引時段的 Toro, 正呀!
仲有 puff , 好 creamy~
行完街街, 我們就慢步去大通公園
不停覺得好跣, 行得要小心, 先經過了時計台, 上次都冇到過啊!
我支新鏡的大光圈係正, 不過唔夠 wide, 今晚影景有時都要靠波比的 DC 仔~
之後就是大通公園的雪祭會場 - http://www.snowfes.com/
有十幾段行, 有D 加埋燈光效果, 真係嘆為觀止!
呢個超巨小丸子真係好可愛!!
一路行, 好凍, 負幾度......
行到一半已經俾D 食物檔吸咗埋去........
嘩嘩嘩!! 唔好爬出嚟呀!!!
我們點了呢份, 正!!
再行一陣, 已經 10pm, 日本人永遠都好準時開工同收工
我們繼續行, 由大通行去薄野, 見到好靚的冰雕, 不過聽晚先認真睇同影相~
返酒店前, 最開心當然係行便利店~
返去到整返個芝士杯麵, yummy!!!
第一日完~
