2016 沖繩 - 再見美國村 x 逛 outlet

第五天，準備返香港，四點幾機，兩點幾要到機場，即係一點要走
呢朝食完早餐，又同小豬嘜行海邊
小朋友就是很簡單，爸爸媽媽陪著，行吓，睇吓雀仔，行吓樓梯，已經很快樂

爸爸趁小豬嘜小睡時間, 去了跑步同浸溫泉, 對爸爸來說是很難得的享受啊!

酒店的 coupon 未用完，我哋就去了一間手信店用埋佢，幾盒手信變杷免費, 真係好抵啊

跟住 check out 出發，本來想去 sir 那出名的長滑梯，但冇時間了，直去了 outlet

嚟過兩次，都唔知呢度有小小的滑梯玩，小豬嘜玩到唔捨得走，媽媽就去了最後血拼
午餐喺度食咗間魚介拉麵，好食喎!

還車好快，去到機場上機都順利，話咁快就返到香港了！

媽媽此行玩得好開心 (希望爸爸都係)
絕對冇七個月大的旅行咁辛苦了
小豬嘜可見到好多新事物，很留心地觀察，探索，
短短幾天，行路進步了很多，因為就是每日不停的俾佢行吧
慚愧的，平時即使都盡量陪佢，已日日去樓下玩，但爸爸有工作，媽媽要煮食，大家要做家務，可能因此少了給她練行的機會了

小豬嘜去完旅行，講嘢又叻咗，發多咗好多唔同嘅聲音，
回程當日是一歲生日，
一歲人仔，已經自發講到十多個單字，又識得做手勢去表意(媽媽教咗佢幾個常用詞的手語)，媽媽其實好驚訝，又好感恩

學語言，真的先要擴闊生活經驗，再有合適的語言刺激，
這令我不停反思平時教家長同教小朋友的方法
如果冇見過實物，淨係睇住本書或圖片或玩具學，有用嗎？
爸媽唔陪伴，唔溝通，玩手機，小朋友會學到嗎？
我或者都要改變，與其花好多時間直接教小朋友，而家長唔返去練習
倒不如花多啲時間直接訓練同教育個家長，改變個家長，我深信咁樣先會令小朋友有最大的得益

下年九月就返 N 班，返學後，爸媽就再唔可以咁自由地同你去旅行，只可以等勁貴又勁多人的學校假期去，相信會很沒趣
哈，媽媽還是很想帶妳遊遍世界，讓妳知道世界很大很新奇很有趣

2016 沖繩 - 行沙灘 , Shopping!!! x Aeon Rycom mall x グルメ迴轉壽司市場

第四天，又係酒店的早餐時間，
喺餐廳旁邊竟然養咗次隻馬騮仔同大海龜，咁都得？!
早餐食物選擇好多好正呀，仲有個 kids corner, 全是冇調味的白烚食物，超好呢

望住個沙灘同海食早餐，真係好正!
食完早餐，就同小豬嘜去行沙灘
小豬嘜第一次踩水水，點知有啲驚驚要爸爸抱
行沙灘冇抗拒，但又少少驚要捉住爸爸

小豬嘜小睡完，我哋就去了間沖繩麵店食午餐
酒店送了四張 600 yen 的 coupon, 喺美國村某啲舖頭可用
嚟咁多次日本，我都未喺度食過豬軟骨，原來真係有啲，炆得又稔又入味，好食啊

跟住我哋去咗睇 blog 有人推介的一個購物區, 揸車過去都係十五分鐘 (Tel: 098-942-8505 )
嗰度有 Uniqlo、Daiso大創、Aeon超市、SHOE PLAZA(鞋）、驚安の殿堂.
就係喺呢度, 我哋買到一對 asics 一對 mizuno 波鞋仔俾小豬嘜了, 超開心!

Daiso 就買了好多日用品呀, 同埋整 bb 飯糰神器, yeah~~~
呢幾間舖, 慢慢行真係可以行半日都得, 可惜小豬嘜唔耐煩, 爸媽只好快行快走啦

之後我哋就出發去 Aeon Rycom mall
去間間有吊床的 cafe 歎杯茶，咁啱小豬嘜瞓咗，我同爸爸難得的有抖吓嘅時間
不過唔係好耐，佢又醒了。。。
我哋上次來，趕到死，都冇好好行過
今次其實都係趕，不過起碼同到小豬嘜睇魚魚，行了 bic camera 同 好快睇了 Toysrus



我哋又趕住走喇，要去西松屋呀，最後血拼呢
不過近美國村呢間原來好細，上次嗰間好好多

呢啲就係此行買俾小豬嘜的戰利品喇, 其實都唔算好多咋~





好似冇咩做過，返到酒店已 七點？！
小豬嘜又瞓，醒來已九點幾
附近的食店好多已關門，爸爸好鬼失望，
點知呢個時候，媽媽想起睇 blog 見好多人推介一間迴旋壽司店グルメ迴轉壽司市場(グルメ回転すし市場)，去到竟然仲開緊 (Tel: 098-926-3222 , 11am-10pm)
簡直係爸爸絕望中的大喜訊！

果然名不虛傳，食材新鮮，又多款，超超超好食, 太肚餓所以冇影相了,,,,,
我哋此行雖然去唔到漁市場，但嚟到呢度都真係好滿足，估唔到的幸運

2016 沖繩 - 名護動物園, Hotel Beach Tower

第三天，食完酒店早餐，我哋就 check out, 搭 monorail 去 DSF mall 攞車
去到俾啲勁誤導嘅 signage 老點，拎住兩大件行李遊花園。。。

去到 orix counter, 唔洗排隊，勁快攪掂!
今次租的車，可能會係 Note 或 Aqua,最後俾咗架 Aqua 我哋，太好了，因為個車尾箱大啲呢，同埋 hybrid 車好慳油

終於開始我哋嘅自駕遊了！
第一站係去名護動物園，因為嗰度有好多小豬嘜最鍾意嘅雀仔，又有豬呀狗呀羊駝呀，睇得小豬嘜好開心!

之後一兜返架車上少少，就係人人話沖繩必到 的 birthday 兒童用品店
佢啲衫仔真係靚過西松屋，但都貴啲
仲有餅餅呀，即食嬰兒食品呀，真係太多款了，之前小豬嘜未食固體，都未咁留意，
今次發現日本的嬰兒食物真係好正囉！
媽媽又掃了唔少啊！

跟住我哋去了對面的 Coco 咖哩屋食飯，
小豬嘜又食咗好多飯飯呢

跟住就去呢兩日住的 Hotel beach tower check in
呢間酒店在美國村海邊，住了望海的房間太正了
好 baby friendly, 入住時送了一大堆 bb 用品，有尿片，有齊唔同日本牌子可揀，早知我唔洗買
又有條裝奶粉，和光堂 bb 餅等等
酒店隔離有個溫泉世界，不過我冇浸呀，爸爸去了兩次，話唔錯喎

附近就有好大間 Aeon mall, 當晚就係喺嗰度買玩具，同超市買菜俾小豬嘜
爸爸唔知做乜腸胃唔舒服，呢晚就冇出去食了

2016 沖繩 - Naha Main place x 國際通

第二天，我們先到酒店的餐廳食自助早餐
帶住 b ， book 連早餐的酒店 package 實在太重要，因為有蛋有包包有水果
每樣食少少，已夠寶寶半天的營養所需
一讚日本的豆腐真係好好食，好濃豆味，小豬嘜都十分愛吃
沖繩的超甜菠蘿，絕對是小豬嘜至愛，食咗四日，食到舔舔脷

我們去了附近的 24小時 Max Value ,即Aeon 超市買食物俾小豬嘜
我帶 bb 去旅行會有點堅持，唔會想攪到佢食唔到新鮮健康的食物
所以即使係麻煩都好，我都好堅持每日要有新鮮蔬果俾佢食，帶了砧板刀刨廚具一堆，再買埋個一人煮食爐，都在所不計
來到日本旅行，其實算方便，超市內有各色各樣的瓜菜水果，蔬菜好多已洗得好乾淨，蕃茄又甜又好味，我們這幾天都買了幾次煮俾小豬嘜食
我們又買過魚生去烚，只是病完仲有點拒食的小豬嘜唔多欣賞。。。

之後小豬嘜小睡，爸爸就好爽咁一條友去咗國際通的 Starbucks 歎咖啡
有了小豬嘜之後，爸爸真係犧牲晒呢啲優質生活，難得一個人的清靜悠閒，唔知幾時先再有

今日的唯一行程，就係去行商場，因為要買煲來煮小豬嘜的食物
搭兩個站 monorail 就到，好方便
去到電器店，竟然只有一款爐，仲都幾大個。。。
不過都要買啦

行玩具部，買了會行的小狗玩具，點知開頭玩時小豬嘜驚驚，笑死我
童裝部好多靚衫，但忍手留返去西松屋同 birthday 先買
最想買對波鞋俾小豬嘜，睇啱款又冇碼。。。
爸爸好期待同小豬嘜著親子 asics 波鞋呢

帶住小豬嘜行街，真係行得勁慢，好快已三點鐘，小豬嘜又要午睡。。。
好好彩暗到佢瞓覺，咁我哋終於有餐安樂茶飯食
我們去了吃吉列豬扒，是香港難找的美味
不過未食完小豬嘜就醒咗 (O 晒咀)。。。
起身我哋俾咗啲白飯佢食，佢真係勁鍾意食日本米

再行行超級市場，買了好靚的士多啤梨同食物就返酒店小睡了

跟住我哋再出發行國際通，帶了小豬嘜去牧志市場睇魚魚，又去埋驚安之殿堂睇魚魚
然後本來想食 Steak 88 牛扒，點知太夜已收工。。。
改去爸爸同事推介的 Sam's kitchen
因為已好夜又冇乜人，好似包場咁
廚師喺面前即製鐵板燒，味道唔錯份量又多
不過始終唔係和牛嘅級數，此行食唔到難忘的靚牛，還是有一點點的遺憾

回酒店我同小豬嘜當然要瞓
爸爸仲好好精力再去行驚安殿堂
第二朝見到佢買咗好鬼多嘢返嚟，真係服咗佢

突如其來的沖繩生日之旅

十二月的沖繩遊記還未寫完，話咁快我們一家三口又去完沖繩返嚟!

今次去都好突然，
話說半年前已用 asiamiles 換了 24-28/4的福岡機票，諗住同小豬嘜去旅行慶祝生日
出發前個幾星期，熊本地震，餘震不斷，帶住 bb 實在唔敢搏，
於是想改機票去第二個地方，

17/4 打上 hotline, 暫時只可以 22/4或之前出發的機票免費改航點，
考慮了半日，都係改啦，都願意俾 10000 miles 做手續費改沖繩，
點知 CS 姐姐超好人，話幫我 hold 咗沖繩機位先，俾多兩日時間等睇吓會唔會改 policy可免費改先 confirm，

19/4 再打去，打了成個 lunch time 先有人聽，好幸運，CS 話個幾鐘前剛出咗新指引， 6/5前出發都可免費改機票，真係好好彩!!
不過怕小豬嘜頂唔順搭太耐飛機(其實係我哋頂唔順。。。)，所以改了去最近的沖繩

咁短時間又去，會唔會冇嘢玩？
絕對唔會囉，因為上次根本真係冇咩玩過。。。

好好彩，港龍其實得星期日四六有機去沖繩，咁啱 match 到我哋本來的日期，保險同 wifi 蛋唔會浪費，
好好彩，book 了的 酒店都可 free cancellation,
好好彩，好順利地 book 了兩間沖繩酒店，係就係貴啲，但住落都讚揀得啱
好好彩，咁趕 book 車本來都超貴，三日要二萬幾円!
媽媽鍥而不捨地搵呀搵，終於搵到 orix 有個優惠， 28/4 或之前還車只需 14000円，哈太抵了！

一切都好順利地安排晒，我們出發了！

有了第一次旅行的經驗, 今次準備得好好多, 去得舒服好多了!

[執行李篇]
用返上一次的 BB 用品清單, 再加加減減,
有了上次的經驗, 帶少好多嘢, 因為知道有D 嘢帶到過去都唔會用

而家冇飲人奶, 相對要帶的水多咗, 帶了 4L 過去, 五日仲飲剩少少

[搭飛機篇]
今次都係揸車去機場, 冇上次咁正, 要泊二號停車場了,
到機場時小豬嘜仲瞓緊, 於是喺 T1 落客區放低了爸爸同行李, 諗住叫佢 check in 先,
平時 check in 睇 passport 就得, 原來幫 BB check in 一係要見到 BB, 一係要有埋張 e boarding pass 先得架,
好彩可以 forward 個 email 俾爸爸~
但又話佢一個人 show up check in 只可將行李落晒佢個名 (我都唔係好明….), 好彩兩件行李唔過 30kg, 地勤話夾硬幫我哋做喎……
下次都係帶埋 B check in 冇咁煩~

等小豬嘜醒咗, 去會合爸爸, 再去 Vison Data counter 攞wifi機,
因為本來係去福岡又冇揸車, 所以先會喺香港租wifi機, 但真係收得麻麻地…….
喺日本本地租的收得好好多!

之後就出境, 餵小豬嘜食飯飯,
其實此行去得成, 都要讚小豬嘜叻叻, 上星期病了, 如佢仲有咳咳我就諗住唔去了, 好彩佢出發前幾日已好返晒~
不過病了之後, 絕食, 應該係俾人餵藥餵到驚咗, 俾嘢佢食佢完全唔開口……
去旅行都驚佢唔食嘢就慘…….
好彩出發前一兩日開始肯食返嘢, 即使出發嗰朝好趕, 我都要煮好一壺有肉有菜有蛋的食物俾佢, 小豬嘜好乖乖食晒先上機, 媽媽都放心晒了!!! T.T

今次訂機票的 CS 好 helpful, 一早幫我哋劃定位,
回程坐到第一行, 去程應該是坐第五行 (因為佢話第一行冇晒),
不過好好彩, 我 online check in 時發現第一行冇人坐, 試吓改, 點知又改到了! 太好吧!
第一行前面的 leg room 當然闊好多,小豬嘜有時想落地企吓都得,
不過起飛降落時就唔可以有袋放地下, 成堆玩具奶樽食物就係咁攝晒喺我同爸爸個位度……

2.5小時的機程, 睇吓圖書, 玩吓玩具, 食吓餅餅, 睇吓Youtube歌仔 (特別鳴謝爸爸幫手 d/l), 冇扭過計, 就過了,
順利得令我感到難以置信!!!!!!

此行頭兩日住國際通附近, 所以冇揸車
尾兩日住北谷美國村先有揸車

一去到唔揸車的好處, 是唔洗折騰大半日後, 都仲要再攪成個鐘攞車
今次搭 monorail 去到牧志站, 十五分鐘就到,
好慶幸冇帶 bb 車, 因為小豬嘜又唔係好肯坐, 而我哋又要揹住佢又推住兩個 30吋已經好係嘢!

我們入住的 Daiwa Hotel (ダイワロイネットホテル那覇国際通り) 真係超正, 喺牧志站連住條天橋行兩分鐘就入到 lobby,
入口仲有個兒童玩具閣呢!
職員又送咗兩個吹 BB 俾小豬嘜, 佢鬼死咁鍾意!
市匿酒店的房間一定唔會大, 但係好整潔, 地方都夠用!

放低行李後，我哋又出發行國際通，
小豬嘜每次見到汽水機都要撳吓先肯走，因為平時姨婆常常帶佢喺樓下撳飲品呢
成條街勁多汽水機。。。
每次都停一停，真係好唔得掂。。。

見到舖頭前的狗公仔，又超鍾意，唔肯走

我們還未吃正式的午餐，雖然想去食暖暮拉麵，但嗰度太細又迫，其實好難帶住要落地走來走去的小豬嘜去。。。
於是去了康龍拉麵，都係一家好出名的拉麵店，當時得幾個客人，又有空位俾小豬嘜行吓，雖然我同爸爸要輪流食，但可以喺日本的拉麵店食到個麵，其實真係一個大突破了!

一路行，爸爸以前最鐘意喺食店試食，
估唔到今日，可以帶住個囡，一人一舊年輪蛋糕試食，真係好鬼 sweet

行行吓，見到有舖頭有魚魚，小豬嘜又睇得好開心啊

行到街尾，就係一間百貨公司，行了地庫的超市，又買了點食物

本來想行返酒店，點知一出百貨公司就落大雨，好個門口行幾步就去到 monorail 站，一落車行天橋就返到酒店，唔洗 dup 雨，又一次覺得呢間酒店好正!

2015 沖繩三人行 - 滑翔傘, 沖繩動物園, Aeon Mall

第三天的行程, 是先有個特備節目, 再去動物園, Aeon Mall, 返那霸取馬拉松選手包

波比先生生日, 媽媽湊住小豬嘜, 真係好耐冇機會行吓街, 所以買唔到生日禮物俾佢
於是就想俾個surprise佢: 神秘飛天之旅!

出發前已電郵約好了這間滑翔傘公司, 但一路都冇話俾波比先生聽
一早食完早餐, check out 了, 就揸車去到東岸的一個地方, 到了先話俾波比先生聽你而家要玩飛天傘呀, 好驚喜吧!
10000 Yen 玩 15 分鐘, 抵唔抵見人見智, 但帶住小豬嘜, 來到沖繩我哋又潛唔到水, 呢個可能係爸爸的唯一娛樂了!

去到個職員用英文簡單介紹了, 就著好裝備, 由教練陪同下, 爸爸chur一聲就飛咗上天喇!!
爸爸用 re 影咗好多相, 在天上看風景真係好正啊!
我同小豬嘜呀, 就喺沙灘度行吓, 同狗仔玩吓呀!
爸爸落返嚟, 都話好正呀!
















下一景點, 就係動物園 (沖繩兒童王國(沖縄こどもの国)), Tel: ０９８−９３３−４１９０
此行的景點都係為小豬嘜而設的,
媽媽雖然好努力地一早計劃好小豬嘜的作息同餵食安排, 但有時時間不易掌握,
在去動物園途中, 先發現因為車程遲了, 遲咗開奶, 唔知有冇餓親小豬嘜, 媽媽真係唔開心呢……..

到了動物園, 好好天, 好多動物睇, 不過D 大大隻嘅豬牛馬羊因為都唔係好郁, 所以小豬嘜其實冇乜反應…..
佢最開心的, 就係睇雀雀, 成大群雀仔又飛又游水, 睇得佢超興奮, 又拍手掌, 又好肉緊地大叫, 笑死我!!
動物園內, 仲有D 兒童機動遊戲, 媽媽第一次同小豬嘜坐旋轉木馬呀, 又係超開心 (不過小豬嘜唔知發生緊咩事 XD)
沖繩的十二月, 就算好曬都係出少少汗, 好適合帶小朋友戶外活動呢!
上次六月來, 熱好多呢!















動物園玩咗個幾鐘就走了, 因為小豬嘜要瞓覺了!
我們揸車去 Aeon Mall, 好多車位, 泊完就衝入商場涼冷氣,
又已經兩點幾, 我同爸爸都未食飯, 去咗食 food court, 食真係冇得講究架喇, 不過有個燒牛肉餐都真係幾好味!
Food court 太嘈, 好快小豬嘜就俾小朋友的叫聲嘈醒咗………….
我哋好快食完就去行Toysrus!!! 呢個都係重點行程呀!
喺嗰度又買了D 即食粥仔, 仲多款過西松屋啊!
好多玩具都好靚好想買, 但係個喼冇位啦………..
最想買架輕身 BB 車, 但冇我想買嗰款啊………..
買到件聖誕衫俾小豬嘜, 好靚好鍾意好開心!

呢個 Aeon Mall 係沖繩最大的 shopping mall, 但好可惜今次除了Toysrus, 我都完全冇機會行其他舖頭….
望住個超級市場好想入去都冇得入……..
點解? 因為小豬嘜未瞓夠呀….. 有D 扭眼瞓, 於是媽媽抱住佢, 坐喺商場的梳化椅度, 等佢好好的瞓返大半個鐘,
帶 bb 去旅行, 就係咁了……..
點解唔上車瞓? 呢個小朋友要好靜先瞓到囉! 一陣上到車一郁又醒返就大鑊了……..
呢個時候, 是爸爸的 free time, 去了日本的 QB 剪咗個髮 (哈, 喺香港湊囡湊到想去剪個髮都唔係易事….來到日本, 終於有點時間了)
又去了 Mont bell 行行, 買定聽日跑馬拉松的 gel~
以前去旅行, 最鍾意行動運用品店, 而家已冇呢支歌仔唱了……..
小豬嘜, 妳幾時大個, 可陪爸媽去行山呀?

呢個 mall 有個大魚缸, 又有魚魚睇, 小豬嘜又好開心呢!



小豬嘜瞓醒, 我們又起行了, 係要趕返那霸市, 波比先生要去取馬拉松的選手包~
回程又塞車呢, 沖繩的路成日都塞呢~

我們要去 JAL City Hotel check in 先, 第三四晚改了住這間在國際通上的酒店, 因為方便爸爸跑馬仔, 只需行就去到起點了, 我同小豬嘜又可以一落酒店就同到爸爸打氣!
呢間酒店, 喺跑馬仔日子, 貴到好過去搶, 以前嘅我哋, 一定唔會住囉…..

我開始有D 病, 又頭痛, 又好似傷風咁…….. 好唔掂…….
我同小豬嘜喺酒店休息, 爸爸就自己去了馬拉松會場攞選手包







夜D 時, 我已經超唔舒服, 要爸爸買晚餐返酒店食, 但係, 日本唔同香港, 食店都係冇得叫外賣的!!!!
爸爸買到的, 只係 Starbucks 的麵包……..
其實諗落都真係幾淒涼…….. 第一次去旅行去到病啦, 冇飯食啦, 下面成條街想行都行唔到啦………
我的第三日, 就係咁完了