帶住B 去旅行又一唔同, 就係 book 酒店時, 而家會 book 埋包早餐的, 因為一早真係唔想仲周圍煩食早餐
呢間酒店的早餐都好好食, 好多款, 最好有好多生果, 又會食到一啲平時你唔會無啦啦自己買一包嚟食的蔬果呀~
終於得閒影吓間房, 好大, 張床好大, 七個月已爬得唔錯的小豬嘜喺床度又爬又碌超開心!
食完嘢, 又到小豬嘜瞓覺時間 (係! 佢每日六點起身, 九點又要瞓過…..)
佢瞓緊時, 其實我好忙, 要泵奶, 洗無限的奶樽同奶泵, 執好佢出巡的跟身物件……. 永遠時間都唔夠用…….
第一次帶佢去旅行, 好彩係全自駕遊, 我真係唔敢想像要拎佢住幾袋的片呀, 玩具呀, 食具呀, 如果要自己搭車會係點…?!
我哋此行係冇帶 BB 車的, 因為遊覽時總喜歡抱住佢, 佢瞓時可喺私家車度呢~
好了, 小豬嘜醒了, 我哋就去第一站: 西松屋血拼!!
沖繩冇 Akachan, 但有好多間西松屋 http://nishimatsuya.com/list.php?cid=47
我們去了名護店, 因為在去北部的途中都算順路
小豬嘜出世咁耐以嚟, 著的九成都係西松屋的衫衫, 爸爸去了兩次日本掃貨俾佢呢!!
今次媽媽終於都有份去了, 真係勁勁勁期待呀!
入到西松屋, 真係會流血不止!!
買咗好多衫衫啦, 食物啦 (好方便的即食粥仔), 玩具啦, 食具啦, 日用品啦……
全部都太靚, 又平, 全部都唔洗諗就買~
多謝二萬幾 yen………. 塞滿了車尾箱……..
(都未見過爸爸買嘢買得咁落力, 個囡真係寶貝囡......)
下一站, 就係去美之海水族館, 當然之前要去醫肚, 就去了上次都食過的海邦丸
什錦刺身定食, 仍然係咁好食啊!!!
食飯時, 小豬嘜又瞓了, 都算有餐安樂茶飯食
不過冇帶 bb 車的代價就係一路抱住佢瞓一路食囉.......
食完嘢, 媽媽要泵奶俾小豬嘜, well 我還是第二次喺街上泵奶, 仲要係喺車上面, 用餵奶巾遮住就泵, 望住個海泵奶, 人生只此一次 :P
出街泵奶最麻煩的, 就係泵完要清洗用具,
泵完都唔夠食, 又要同時開奶粉, 真係人都癲........ 好彩爸爸都算幫得手
食埋奶, 去到水族館都已經四點幾...... (係呀, 帶住b, 今日淨係去咗一站就已四點幾.....)
好似上次咁, 又有入場費退返, 超好!
揸成兩個幾鐘車, 由南到北來這水族館, 就是因為知道小豬嘜好鍾意睇魚魚!
果然, 佢入到來這魚魚世界, 睇得好開心, 睇到拍晒手掌!
雖然媽媽揸車係辛苦d, 但見到個囡咁開心, 即時覺得乜都值得~
除了水族館, 出面的公園同海邊, 淨係行吓都覺得好舒服,
可惜我哋時間有限 (係呀, 揸車返酒店又兩個幾鐘), 所以只係夠時間行一陣就走.......
當妳大個d, 我哋再嚟, 到時要同妳玩耐d!
回酒店的一程車是幾難捱的, 小豬嘜唔肯瞓覺, 又塞車...............
坐得唔耐煩, 爸爸都攪佢唔掂.....
返到酒店, 第一時間整即食粥仔俾小豬嘜食, 這次是小豬嘜第一次食粥啊! 之前都係食米糊咋!
估唔到佢勁鍾意食呢!
休息一陣, 今晚決定唔出去, 喺酒店旁的 POSILLIPO 餐廳食飯
呢間係一間好靚, 好有情調的歐陸餐廳, 用沖繩的食材, 配西式煮法, 食物都超美味啊!
隔離枱係一家日本人, 睇落好有教養又識英文, 又有個大 BB,
個媽媽同婆婆同小豬嘜玩得好開心呢! 哈哈~
食完飯行幾步就返到酒店, 太方便了! 帶住B 真係唔想又搭車又泊位攪好耐先有飯食呢~
Day 2 就咁完結, 好似冇做過乜, 但其實已經攰死人了.................
