[愛行山] 挑戰泥漿 399

今個月最後一次行山了, 是行麥徑第三段,
由我家去北潭涌的集合點, 是一個很痛苦的過程,
西鐵, 東鐵到旺角, 轉 van 仔去西貢市中心, 再轉半個鐘先一班的 94 入北潭涌, 兩個幾鐘......

於是寧願貴D, 揸車去沙田, 泊低架車再轉的士入去,
本人駕駛技術未精, 實在唔敢揸入西貢一帶,以免後面形成長長的車龍 XD

尋晚落完雨, 雖然今日唔洗行瀑布咁, 但就變咗行泥地, 滿是大大的泥氹, 想唔踩根本冇可能.....
45度的上斜, 有些朋友行一步, 跣返半步



除了泥路, 仲有泥天梯.... 好高呀......



不過行完上星期最 harsh 的大帽山, 一切都變得比想像中容易
今年行山, 其實真係感覺到自己的耐力好咗,
雖然我都唔係行得快, 但就一路上幾百米都可以唔洗停低, 唔似上年咁好快就心跳氣喘行唔郁~
其實這個夏天都算懶, 又因常常落雨, 星期一至五根本非常少去跑步~
希望九月開始會勤力返D 啦~



上到頂, 局高臨下, 好果好天氣有一朵朵的白雲, 一定靚到絕!



下面有雲啊!!



其實我們就是在雲中, 100% 的濕度, 抹汗是完全徒勞無功的



行過了一個又一個的山頭, 到了最後的雞公山~



之後就落返去, 但真係太濕同太多好滑嘅泥, 今日連好多expert 都跣低晒,
我一直覺得都跣跣地的 New Balance 波鞋, 原來也不算太跣,
行細步點, 小心點就可以

落到去水浪窩, 見到其他行山人仕個個都自備拖鞋, 唔洗 up 住對濕晒的臭腳, 羨慕不已!!!!
可惜我乜都帶齊, 係冇帶襪....... 但雙腳同鞋襪都滿是泥, 決心要除鞋拎去洗乾淨~
之後就赤腳穿回鞋, 點知因為鞋太濕, 磨到起水泡  >.<
驚驚喇, 下次最緊要帶襪呀!!

[愛美食] 丼丼屋食堂

星期二晚, 約了波比的姨丈同表妹喺屯門食飯,

唔想又去酒樓, 姨丈又麻麻地西餐的情況下, 一齊去了食丼丼屋食堂

真係唔睇 openrice 都唔知有間咁嘅嘢, 就喺三樓屈人寺對面

有飯有麵有小食, 老人家都一定有D 嘢啱食~

先點了這個燒玉子, 暖暖又滑滑, 只是調味重手了一點

咖哩吉列芝士豬扒卷飯, 嘩, 流心芝士的效果好澎湃, 讚呀! 不過要快快趁熱食先最好味~ :)



滑蛋吉豬飯, 我又是嫌蛋裡落得太多味醂同鰹魚汁, 有點過咸......



叫丼飯, 加 $25 有新地, 叫了兩杯宇治金時, 十分好吃~

[愛住家菜] 焗呀焗

早幾日, 買了幾個薯仔, 有一晚整咗車打芝士吞拿魚粟米焗薯, 很簡單, 但十分美味!
吞拿魚同粟米係開罐頭就得, 加D 日本蛋黃醬, 就已經好好食~
食唔晒, 仲可以用來夾麵包, 一舉兩得~



剩返的薯仔, 今日放工後整到變薯蓉,
加點 blue cheese, 和牛, 火腿, 香草/鹽/胡椒,
焗佢 20 分鐘就得, 藍芝士一路焗一路好香, 香死人,
芝士的鹹香味配上淡淡的薯蓉, 就是天作之合!
免治和牛焗到少少脆, 拌薯蓉吃又是一流, 這個組合絕對值 1000分啊 XD



今朝仲煲落了猴頭菇人參雞湯, yummy yummy!!

簡單就是幸福

星期天, 一早醒了, 尋日爬了大帽山後, 雙腳酸痛, 痛到瞓得唔好
於是早早的去了碼頭搵 Daddy 飲茶, 好好的天氣



行行行, 竟發現在望海觀音那邊有個小花園, 有人好有心機的種了一排排不同的植物,
望望一片的綠油油, 心曠神怡





到茶樓飲茶, 聯邦的食物款式多, 最好係有即叫即煎的薄礃同糕點,
看著這一櫃的點心, 好有兒時飲茶的感覺, 其實我喜歡舊時的手推車多於現代的點心紙~



一個簡單的星期日, 就是很滿足, 人最緊要知足常樂~

晚上同朋友傾開婚姻問題, 一個我一直都不看好的男人, 以性格不合提出離婚,
單方面的努力挽留, 有用嗎?
我想話九年前你都知道她的性格啦, 要是不合, 為何一早又要開始, 現在又要結束?

男人嘛, 沒了不會死, 只是女人要些時間去學會習慣回到一個人,
這段時間, 可能要花很長, 但總有一日會過
他選擇離開, 是他看不到她的好, 這種人不值一提
女人, 希望可以堅強一點, 有些事不能強求, 尤其是感情事

再戰 931m x SONY TX30 防水相機 試機超好用!

今日波比先生陪我行山, 話驚我天雨路滑 PK 喎~
不過有人又冇防跣的行山鞋, 尋晚為了今日行山, 特登走去買了對成九舊水的, 這就叫做「未見官先打八十大板」......

今日全部相都用SONY TX30 防水相機影, 超滿意呀!
佢又薄又輕, 放喺腰包隨時拎出嚟都好方便~
一推蓋就開, 一推蓋就閂, 色準好好, 又識得認人面之後用人面的光暗去測光, 唔會背景光而面部暗,
太耐冇用會 ZOOM 的 DC仔 (平時 GF2 一係用定焦鏡, 一係用好遠的ZOOM 鏡), 覺得ZOOM 呢個功能實在係太美妙了!
初時一向都覺得 SONY 嘅畫質唔夠 PANASONIC 好, 點知又唔係喎, 真係令我對 SONY 完全改觀~

今天的行程是由荃灣出發, 行去城門水塘 - 針山 - 草山 - 四方山 - 大帽山
六點時, 雷雨交加, 心想唔係嘛....... 又變行溪??
感恩到真係出發後, 只是灑了一兩場雨, 不過好濕好大霧, 大到廿米以外乜都睇唔到
好了, 我們上山喇!!



比上年快了半個幾鐘去到針山, 我今日好勁呀, 冇話要企定定嚟抖, 一上就上到頂!
繼續行行行, 開始進入草山的路段



嘻嘻, 行行吓見到好多牛牛食草, 好開心!!



點解行行吓, d 牛會停低晒???
哈哈哈, 原來係行前面的牛忽然間痾 VV, 其他牛好攪笑地又會知喎, 所以停低晒等佢, 仲飛機耳 XD



攪掂再行了~
香港地日日見住高樓大廈, 難得見到野生的動物仔, 真係令人好開心~



完了草山的一段喇! 而家對鞋都仲完好



之後落山, 波比話佢呢款鞋真係唔錯, 不過佢都跌了一鑊, 反而我冇跌過



去到第八段前的涼亭休息, 超多蜜蜂, 每拎一樣嘢食出嚟都會即刻俾蜜蜂摟, 無奈!



呢個位長期都有馬騮坐陣, 等你哋留d 嘢俾佢食



之後才是最痛苦的一段, 上大帽山了, 一路要爬升五百幾米



好不容易上到群山的山頂, 開始橫向行, 但我開始 FEEL 到唔妥......
還記得上年行到呢度, 造就了人生第一次抽筋,
今年好邪, 去到同一個位, 同一樣的雙腳四頭肌又抽筋.......
上年有團友有 SPRAY 借用, 今年冇了



面對 70KM 的陣風, 個人隨時俾風吹到跌, 又要企定定拉筋, 仲要繼續上, 又要好似攀石咁喺巨石中穿穿插插, 真係好有挑戰性......
霧很大, 大到看不清前面去路, 又唔知道仲有幾耐先到頂, 是意志力的鍛鍊




行完山路, 去到 60 度傾斜的石屎路, 又一挑戰, 每上幾步, 又想抽......
我於是發明了個新行法: 打橫行, 好似蟹咁行, 好慢先上完嗰一段長命斜!
好不容易, 上到大帽山山頂了, 931m 高, 非常感動, 坐低拉拉筋~



看看錶是兩點鐘, 其實都比上年快好多,
波比本身好想去川龍飲茶, 但落去要成 45 分鐘, 嗰度三點就收工了, 明年請早......
一路落, 由九百幾米落返三百幾米, 其實對雙腳的負荷都好大, 繼續行一陣就抽一陣

最後, 2:30pm 落到大帽山郊野公園, 個洗手間算乾淨算大格, 換了全套的衫舒服晒!!!
食串燒賣就同團友 say goodbye, 佢哋仲行埋入元朗, 我就真係要抖抖了,
行落埋川龍搭小巴, 去荃灣食 tea!!!



搵呀搵, 誤打誤撞的入了雲貴軒, 發現呢度有好正的下午茶!
每人 $32 有齊晒我最鍾意的西多、炸魚柳、牛油豬、叉燒辣米線, 紅豆冰仲要整得好好, D 豆夠晒林, 讚不絕口, 不枉此行呀! :)

[愛住家菜] 麵豉黑豚肉鍋

連續兩晚都做到好晏又要開會, 今日長期 sick leave 王又 sick leave, 使到有個 after work meeting call off 了,
哈, 竟然返到屋企煮飯了~

有了一田在屯門荃灣, 實在令我多了機會買到不同的食材,
前晚買了盒黑豚肉, 之前又買了盒麵豉



所以呢, 就整咗個 麵豉黑豚肉粉絲鍋,
其實我都唔知呢D 日本麵豉的份量點預, 都係不停試味試到啱~
D 黑豚肉好滑又帶點爽, 真係唔錯呀!!




大橋街市嗰檔好好食的鹵水店「巴香坊」, 而家做起咗, 成日都好多人, 想買都買唔到
今日難得見到少人, 等咗一陣, 買了麻辣大腸、牛筋, 仲有雞翼, 樣樣都好好味呀!

抽獎運

前星期報了台灣的太魯閣馬拉松, 是在花蓮的峽谷中的馬拉松, 很想去,
今日公佈抽籤結果, 大概三分之一機會抽中, 結果是兩個人都抽唔中 =.=
失望.......

希望東京馬拉松會有好消息啦.....
同埋諗緊好冇報12月的台北馬拉松

尋日終於又敗家, 買了部防水相機 SONY TX30
我仍喜歡 GF2 鏡頭的sharp, 但很想要一部影近遠都得, 又輕便又防水, 去旅行去行山都唔洗重到史的
玩了一晚, 感覺非常之好, 仲有好多 effect 玩, 白平衡同測光比 GF2 優勝~

最後一隻順興行皮蛋了~

[愛行山] 再訪麥45

休息了兩星期, 今天又出動行山了!
一早就失眠, 五時多雷電交加, 落大雨仲擔心唔知行唔行到,
但雨中行都是訓練的一部分, 他們都會堅毅地風雨不改地練習, 我也應該支持!

今日行長途, 著了 2XU, 更可保護雙腳, 上次落雨行, 成腳都係泥的感覺太核突了!



由馬鞍山的大水坑站出發, 上麥徑第四同第五段,
其實都是開始時落了場大雨, 之後就都唔洗開遮了, 感恩



不過雨後成了好多溪流, 感謝團友的幫助先過
(借朋友的相片)




雨後又超超超跣, 我有一吓都差d 仆親, 上年仆咗一鑊, 都真係好有陰影!



點知, 後來真係有意外, 我的師妹同事真係跣到跌倒又擦損了手腳, 睇到都痛,
因為就 EXACTLY 係我上年跌親嗰種, 又流血又腫, 肯定有排痛,
在山中, 只可用僅有的水同膠布處理咗傷口先



在獅子亭食完午餐, 我就陪師妹離隊, 行返沙田她家了, 否則得佢一個人真係唔放心~
其他朋友還繼續操, 行到城門啊~



回家, 覺得自己超臭, 簡直係惡臭...... (今日本來叫波比拎衫出來俾我換)
搭車有位都唔敢坐, 怕臭親人哋.......
下次真係史都帶件衫好了! >.<

[愛住家菜] 紅酒炆牛肉

這星期有一天去了 QE 上 TRAINING, 早早便回到家, 可以煮好餸,
話說波比阿妹去旅行買了支紅酒俾我哋, 但波比又唔會無啦啦喺屋企飲酒, 就俾咗我用嚟煮餸,
於是, 我就用佢嚟炆牛肉!!

用了 LC 煲, 先炒香乾蔥同蒜頭, 再落已汆水的牛肉炒香, 
然後加入紅酒同埋一粒日式牛肉汁塊,
慢火煮十分鐘後, 我再加入紅蘿蔔、磨菇、雞翼, 慢火炆了一個鐘, 
中途留意要加水, 最後打個獻令汁變杰就得喇!

第一次用紅酒煮餸, 出來的味道很獨特, 有點酸, 有點濃, 配紅肉的效果實在不錯!!
個汁用來拌意粉吃, 都好夾o架! :D

[愛住家菜] 鵝肝意大利包

話說尋日有個老公好勤力咁幫我抹到個廚房好乾淨,
所以今晚就獎勵佢: 整咗個鵝肝和牛漢堡車打芝士意大利包

烘得脆脆的麵包, 加上煎得脆脆的鵝肝,
油入浸滿包包, 耐唔時一次的放肆, 總叫人興奮~
自己整, 成本都係 70大元, 出去都食唔到咁正啊~

[愛住家菜] 放我半天假 - 台式貢丸麵線

個風竟然打得成, 有半天假期, 其實已經很滿足~

尋日已經去超級市場買定食物, 萬一打足全日都有嘢食,
返工前又未係好餓, 又清清廚櫃, 見到包買咗好好好耐的台式麵線, 就煮咗佢!

其實我們都超愛台灣的阿宗麵線, 濃濃的蒜頭同刺激的辣味, 實在令人欲罷不能!
在香港, 現在的八方雲集都有得食, 不過好重味精~

這包麵線, 唔記得喺邊度買, 只記得大概 $14 一包,
先把麵線同大地魚湯料煮十分鐘, 再落辣油, 打埋個獻就完成,
個味道係有九成似阿宗的, 配埋貢丸, 仲有前兩日整定的鹵溏心蛋,
簡單的十級美味啊!!!