[愛住家菜] 煮場作客

一年一會, 今日約埋師兄同事, 一齊上了大學老師的家,
而家有車可以揸車去, 實在好方便!!!

下午去到, 睇睇老師整玉桂提子 scone, 好香好鬆好好味!!
後面係佢整嘅蕃薯麵包, 好軟呀! 搽 cream cheese 真係一流!



呢杯嘢勁呀!! 係老師自己浸的什果酵素, 加埋梳打水飲, 完全好紅酒 feel!
近期好 hit 浸酵素呀, 攪到我都想整返樽! 酵素據聞超有益, 對身體好好啊!
不過D 酒味都幾勁, 我只飲到一小杯, 否則驚又全身出風癱~



幾個人一邊整嘢食一邊吹吹水, 話咁快就到晚飯時間,
好豐富呀!!!!!!!!!!!!



先出場係老師整的檸檬香草烤雞, 檸檬令人好開胃, 完全冇了雞的油膩感~
D 雞汁拌飯一流!
老師同我一樣都係 Jamie Oliver 迷, 呢個雞就係用 Jamie 的方法整, 真係得!



我就整咗泰式雞翼, 不過今次買的魚露竟然係好辣, 大家都辣到噴火, 哈哈哈!



又係 Jamie recipe 的黑椒焗新薯, yummy!



我整的檸蜜三文魚, 因為老師的家好健康冇易潔鑊, 煎魚攪到散晒, 變了炸魚, 哈~



仲有老師的香茅豬扒, 用新鮮的香茅整, 好入味好正呀!!
我試過幾次用新鮮香茅, 硬係出唔到D 味, 老師就真係整得好好呀~



哈哈, 好有口福的一日啊!

[愛住家菜] 紅菜頭湯

今日又是放大假, 在家執屋同睇書,
去買餸之餘, 終於去買了好耐冇食過的粉仔! 夠辣好刺激!
不過論味道的話, 都是置樂那檔好食好多!



今日又去攞咗個 body check report, 一切正常, 係D 白血球太低, 低過 normal range
Nurse 問我係咪好易病, 其實又唔係過, so far 身體其實都好少病痛~
我話我有做運動, 又日日三餐都好健康, 多菜少肉, 有奶有豆漿, 點解會咁低? 可能因為我工作壓力大掛~
姑娘叫我每日要食三種唔同顏色的蔬菜, 又要有兩份水果

返來睇返D 資料, 要食多D 紅紅橙橙的食物, 如 carrot, sweet potato, pumpkin,
當然仲有好多其他營養素要補給~

一日得三餐, 邊食到咁多........

不過咁啱今日煲了個好啱嘅湯, 就係紅菜頭紅蘿蔔薯仔煲瘦肉,
紅菜頭可降血壓呀, 今日一早就煲定俾波比飲~
哈哈, 我舊老細長期煲俾佢老公飲o架, 日日都見佢帶一兜返醫院, 超健康~
味道有點草腥味..... 不過都可接受, 下次加舊薑睇吓會唔會好D~
我都希望煲多D , 波比D 血壓就唔洗擔心啦~

我們的新玩具

話說老婆忽然間見到人哋用 iPad 嚟 show D 訓練教材俾病人, 真係好似幾好用,
於是就心郁郁想買部 tablet

不過唔想買 iPad , 因為過嘢實在太麻煩
行 Android 的睇過幾款, 最終決定買 Nexus 7,
你話係咪新款? 都唔係啦, 上年出了
做乜唔等新款? 唉, 夠用就得啦~
我都真係實用居多, 唔係用嚟玩~

用落真係幾滿意, 32G 都係二千頭, 7" 好揸手, 夠輕日日帶出街都得!
Processor 快, 電好襟用, 畫面靚~

而家用得最多就係睇 reference book 同 journal,
有時 d/l 咗 online journal 吓吓 print 出嚟睇真係好麻煩, 而家放晒入嚟, 每日返放工一日一篇, 自我增值~

又放咗好多俾病人睇的教材入去, 一按就 show 出嚟好方便!
仲有擺咗兒歌, 去睇 BB 病人時, 播返一兩首 calm down 佢哋好有用
如果有時間, 好想同波比先生整個 App , 用來教病人~ (哈哈, 其實 Play Store 上有一個波比寫的 App o架, 不過冇生意 XD)

後來波比先生見到我用得咁開心, 一星期後就忍唔住買咗部 iPad mini,
而家日日玩得好 happy~

[愛住家菜] 鹹檸檬元朗黃油烏頭

今日很忙, 臨時被老闆指派去開個 lunch meeting,
又話有 light lunch provided, 攪到我明明有飯盒都冇帶,
點知因為做 case 遲咗 15 分鐘去到, 就乜都冇晒.....
開完會仲要我好趕咁去 Canteen 食個咸到死的飯...... 好掛住屋企個飯盒 :(

放工我堅持準時走, 行行街市想食魚, 見到D 烏頭都幾靚喎!
我從來都未試過喺屋企整烏頭食o架, 原來都唔難整, 街市阿姐仲送咗個咸檸檬俾我,
連埋薑蔥一齊蒸, 9分鐘就得
第一次見識到元朗黃油烏頭, 真係好多黃油o架!!
好滑, 又少骨, 好好味!!! 值得再整呀~~

[愛住家菜] 新開始 x 再炆豬軟骨

今天, 第一天返新的醫院~
之前因為返一日的醫院太遠, 位置太唔方便而買車, 估唔到買完車幾個月, 竟然又轉返一間近屋企好多的醫院~
這家醫院超多車位, 一去到就即刻俾到位我, 唔洗好似我返開的大醫院咁要輪十幾年!
由屋企揸車返, 我行龜速都係 20分鐘就到, 快得令人感動!!!
其實唔揸車都得, 搭車都係半個鐘就返到~

小醫院, 睇症其實冇難度, 不過係好多 admin 嘢有D 繁複
少人的地方, 冇咁多 politics
第一天好順利地完結, 放工仲有隔離 department 工友姐姐整的啫喱做甜品, what a good start :)



今晚食炆豬軟骨, 今次又比上次成功呀, 由尋日下午就開始炆



炆到D 軟骨變晒啫喱狀, 入口即溶, 好多骨膠原呀, 正呀!!

[愛跑步] 屍橫遍野

星期天, 又約了鄰居去跑大棠山,
波比先生同鄰居跑得快, 我腳傷只是慢慢的走走,
點知落雨過後, 跑到入較為深山的一後, 見到一隻又一隻....... 史青蛙.......
都是被車轆輾平了半隻攪到血肉模糊但我又仲認到佢係一隻青蛙的屍體,
見到一隻.....兩隻.... 都算了,
當我見到第三隻, 實在嚇到在深山中尖叫了出來, 太太太恐怖喇!!!!!!!!
並且嚇到本能的調頭走, 但路途中又會見返頭先嗰兩隻......

好了, 唔行往水塘的一段, 我改跑去石崗的一段, 諗住呢段大半路又乾D , 應該冇喇掛,
點知跑跑吓, 又見到, 唔係化.......
於是都係返歸了

原來燒烤場的一個位, 可以見到咁廣闊的景色啊~
有元朗、天水圍, 仲有深圳添!

[愛美食] 元朗彩晶軒

嘩, 我今日 3:40am 就失眠了......
又係因為我太攰, 8:30pm 就瞓, 攪到作息時間好亂 @.@

等到波比都起身, 就出去跑跑步, 超難得的好好天呀!!
最熱時有成 29度, 黐咗線......

不過唔知點解, 左膝前幾日開始痛, 但我明明偷懶咗成星期冇跑, 都唔知點解會整親??
所以今日其實都係超慢跑, 再行了兩圈公園



睇白鴿、魚魚、烏龜、狗狗, 是我的快樂 Sunny Day~



回家沖涼後, 同波比去飲茶, 好耐都冇試過兩個人撐枱腳飲茶了!
西鐵站的彩晶軒, 食物好特別好靚, 不過都幾貴呀~
生煎叉燒包



這個超攪笑, 是腸粉包住蘿蔔絲酥, 好脆, 但有點油膩



珍珠雞, 真係一口一個, 不過偏乾

[愛住家菜] 避風塘茄子 (附食譜)

有時見到報章的美食介紹, 帶來了煮食的靈感,
今晚就煮了個西餐, 新嘗試整咗個避風塘蟹肉茄子

其實唔難整, 茄子又有營養

食譜:
1. 茄子洗淨開邊, 落鑊細火煎香切面的一邊兩分鐘
2. 茄子反轉再煎, 加入 100ml 水轉中大火, 煮到水份收乾, 盛起備用

3. 用蔥粒, 蒜蓉, 馬拉蝦米辣醬起鑊
4. 加入已拆的蟹肉同埋已炸的蒜蓉, 炒至乾身
5. 將炒完之蟹肉碎灑在茄子上, 完成



這個炒法, 很香很美味呀!
配埋黑椒豬扒, 同埋健康的蕃茄粟米, 就是我的健康西餐~ :P

[愛住家菜] 日式溫泉蛋冷麵 x 韓式人參雞湯

星期四, 放了一日大假, 其實都係清清假, 想悠閒地過~
但一早 5am 又失眠了 /__________\

起身打點了波比的早餐同恤衫西褲, 我就開始我清潔之旅~
間屋又係咁發霉, 好恐怖!! 今日又漂白水又火酒咁抹, 抹了好耐......
之後執屋, 又執咗成個上午~

下午去了吉豬島逛逛, 準備今晚的大餐~
先有這個日式溫泉蛋冷麵, 溫泉蛋是參考 KC 的製法
http://gourmetkc.blogspot.hk/2013/04/kc.html

不過可能因為我D 蛋係喺雪櫃拎出嚟, 唔記得咗先回室溫才煮, 所以比想像中較生,
波比就好鍾意, 但我都係想熟D~



在逛 Taste 時, 見到有新鮮韓國人參賣咁攪笑?
買了兩支來煲雞湯, 我還擔心參味太濃, 只落了一支, 點知原來唔夠, 下次都係要打孖落先得!
加了些玉竹同紅蘿蔔, 個湯好清甜~



見波比尋晚好乖, 喺我一早瞓咗後, 自己都有抹晒洗手間的霉霉, 今日就獎吓佢食正嘢!





甜品還有美心的芝士蛋糕, 不過美心真的很 cheap, 近來竟然把芝士蛋糕內的一部分用了海綿蛋糕去填充,
我明芝士貴, 但又慳得幾多呢?? 咁攪法以後冇人買, 佢仲蝕!

[愛美食] 正宗上海生煎皇@ 旺角

近來真的很很很忙, 無限的工作及鎖碎事, 使到成日都遲放工
很多日, 回家攰得食完飯 9 點都未就瞓覺 z.z

有一天同波比先生去到旺角金雞一帶, 諗緊食咩時, 見到有間正宗上海生煎皇,
入咗佢試試, 有麻辣紅薯粉, 值得一讚是每種配料都俾得好足,
豬大腸尤其美味, 內裡的油脂也算清得乾淨~
不過紅薯粉好似河粉咁粗嘅? 好難夾..... 好跣.....



小籠包就真係要激讚呀, 廚師的手藝是香港少有的超水準,
搓得外皮薄到同上海食的有得揮, 夾起來是透光的,
內餡極多肉汁, 真係做到上海的九成水準! 估唔到!



生煎包都係必試呀, 下面煎得脆脆, 入面又係好多汁~



再讚是食物唔會太咸, 唔會好味精, 合我心意~

離開時見到好多剪報, 先知道原來呢間店係由樂隊 Bliss 的 Oscar 開 (不過我完全唔知佢係邊個...)
這個年青人亦令我諗起林子善開的龍鳳茶餐廳,
大家都是制作認真又好食, 唔似好多食店俾垃圾D 客人食, 值得再訪, 值得推介!

難過....

雖然工作了這麼久已看透生老病死,
但見到一個小朋友由出世到歲幾都住醫院, 由患病變好返可以返屋企,
上一次見佢都像個小公主般討人喜愛,
再惡耗般的突然患病及帶來終生的殘障, 她媽媽的冷靜面對令我很不好受.....

見到她無助的在病床上掙扎, 雙眼已因腦創傷令到看不清轉不動,
全身痙攣性彊硬, 動一動她就痛到哭,
最可憐的是哭不出聲.....

究竟, 是誰將惡菌傳了給她?
她的腦創傷又因何而成?

[愛美食] 蘭芳園

星期天, 記得波比先生上次同我去太空館睇北極熊心時, 話過想睇有個瑪雅族的電影 (嘩, 波比幾時變得咁高層次?!)
我: 瑪雅族有咩好睇呀.......
佢: 佢哋好犀利o架
我: 點犀利?
佢: 係佢哋發明咗個 「0」(即係零呀)
我: 吓...... 個零有幾勁呀.......?

今日見冇咩做, 就買咗飛同佢睇
睇完, 兩個人都呆咗.......
全套嘢只係講瑪雅族的神話, 一D 都冇講佢哋嘅古蹟同發明.....
波比睇睇吓仲瞓著咗.........
睇完同波比講: 「回水」

之後有D 時間, 去了重慶地庫個商場, 試試久仰大名的蘭芳園
呢度扮到好懷舊的裝修, 好有趣





坐低點食物至送到, 唔洗五分鐘, 好有效率
先試招牌奶茶, 非常之濃郁的茶味, 超喜歡! 怪不得咁多人讚好!



荷蘭腸熱狗, D 沙律醬就是一種兒時在茶餐廳嚐過的味道, 已久違多年, 令人吃得津津有味!



奶油豬, 個包好鬆軟又好夠脆, 落煉奶一點也不吝嗇, 再讚~ 好滿足的下午茶~



之後見到隔離舖新開的人氣日本拉麵店, 完全抄足一蘭的格局, 搵次要去試吓先得!

[愛烘焙] 最愛甜品之一: 麵包布丁 (附食譜)

去酒店食 buffet, 我最想食的就是麵包布丁,
今日見星期六冇街去, 就動手自己整~

原來 recipe 簡單得很:
1. 200ml 牛奶 + 2隻蛋 + 30g 糖 + 一小匙玉桂粉打勻
2. 隔篩倒入容器內
3. 焗盤注入一碗水, 放入焗爐預熱 180度10分鐘
4. 將麵包切小片, 放入蛋漿中, 加入適量提子乾
5. 入焗爐焗 25 分鐘即成



食後感: 很夠滑, 不過真係應該用法包整會好D, 因為正常的方包太林了, 沒有咬口呢~
而且食落覺得好似差咗D 乜咁......
諗諗吓就係牛油味, 酒店食的總覺得好肥, 因為往往是超重的牛油味呀!
下次應該牛油揸法包先去焗, 要再整好D!

當完美型遇上活潑型

今天不用上班, 去了上 training, 是關於 EQ 的 training
最有趣的部分, 是一個性格分析的環節, 原來我是一個十分完美型的人

理性、有條理的類型。有原則，有毅力，能夠自我控制，完美主義。完美型力圖保持高的標準和質量。他們總是注重細節，希望提高生產率。他們還慣於激勵他人提升自己，變得更加有效並且做正確的事情。由於他們有很強的條理性，他們對自己及他人會變得過於批判。他們不喜歡浪費和粗心，這一點可能會使他們變得無論大小巨細都去插手，而且沒完沒了，會做出令人喪氣的批評。在他們的最佳狀態，他們能夠做出正確的判斷，明智的決定，成為道德的模範，非常負責任。

回家同波比先生做測試, 他是個活潑型人

是一個很開朗的性格，喜歡玩，話特別多，有幽默感，很熱情。活潑型的另一面特點是：不注重細節、直率、喜歡陳列有説服力的物品。活潑型跟完美型是兩個極端的性格，這兩種性格是不可能同時在一個人身上看到的。因此這種類型的人社交容度很大，人情數量多，但人情的質量並不一定高。

測驗說的性格很中:
我很喜歡思考, 計劃很周詳(想好了一星期的菜單, 計劃旅行, 計劃去購物時如何最便捷地去五家商店買到十皮嘢), 想到很多細節 (老細俾文件我 comment, 總想到很多),
但壞處是有時想得太多, 杞人憂天, 很容易焦慮
所以, 我很頂唔順波比先生的粗心大意同沒安排

我對自己及對別人都很高要求, 這想來也是, 一係唔做, 一做我就要盡力做得最好!
對自己的工作高要求, 我接受唔到D hea 做害病人的害群之馬!
波比先生活在我的魔爪之下, 實在可憐! 哈哈!
怪他做事偏偏求求其其, 做完就算, 不理 quality~ 晾件衫啫, 話咗佢好多好多年, 都總是晾唔好, 皺起一舊晾三日都唔乾....
現在我明白了, 他是活潑型, 他的世界的 norm 就是這樣.....
我考試求高分, 佢考試求合格,
我對刮花了自己架車好在意, 佢就安慰我有乜緊要, 
我對影每一張相, 都總很有要求, 波比總沒法影到我心中的要求 (不過已進步很多)
我做事很講效率, 佢做事慢吞吞, 要催要話要鬧先做完少少事
我講效益 (計算過究竟兩個人揸車平D , 定搭車平D, 我才選擇), 波比就隨心而決,
我不喜歡浪費, 討厭浪費時間做一些無效益的事 (如打機), 很討厭浪費食物的人! 
波比先生就是天天在做這些事, 死未 *o*
我愛守規則, 波比愛挑戰規則, 質疑點解要守
我覺得他無聊, 他覺得我太認真!
我總是很緊張, 他總是很輕鬆~
這就是我們的分別

究竟兩個原來很極端性格的人, 點樣可以相處十年多??
哈哈, 這或許解釋了我們這十年很多時都有意見分歧, 很多吵吵鬧鬧, 我總覺波比很多事情做得唔好
現在我明白, 這是他的性格,
不過亦唔代表, 我會接受一些冇質素的事情,
我沒打算將他變成完美型, 不過希望他能有返正常的要求, 做事好一點囉~
呢世佢就冇得揀喇, 我 kindly advise 佢下世唔好再娶個完美型老婆咁慘囉~

課堂中, 還 group 了同一型格的人一起坐,
超有趣, 我同座上客的思想很的似得很! 大家也是實事求事的人, 唔接受到少少錯, 看見人就像看見自己~

哈哈, 這是有得著的一天, 而且暫時放低忙碌的工作 (係呀, 否則都唔會成星期冇 blog 出), 讓精神抖抖!
Lunch time 去了九龍城的大婆牛肉麵, 牛肉同雲吞都好食, 但個湯唔得啦, 做唔到台灣牛肉麵那種味道, 失望......



6pm 已返到元朗, 去街市買了超大隻的扇貝呀, 嘩嘩嘩!
加牛油、黑椒、檸檬汁炒炒炒, 好好味!



我還煮了之前從北海道買回來的拉麵呀, 有間叫一幻的, 勁多人排隊所以食唔到,
買了兩個佢出的麵回來, 真係好好食, 個湯底很特別, 是有點干貝味的, ichiban!

[愛美食] Happy Hour @ Outback Steak House

星期二晚, 約埋師弟妹去食 Outback, 慶祝師妹考完試~
4 個人來食好好呀, 因為可以叫多D 食物~

買一送一的啤酒, 男人們至愛~



師弟有高級版的 outback 卡 (我有的只是普通版), 都幾好啊, 有洋蔥花送, 仲全單 85 折~
至尊漢堡十分 juicy, 是近月來食到最好食的漢堡!
芝士薯條是波比最愛~ 甜薯就真係永遠都咁好食, 超滿足啊!

[愛美食] 現代自修室 Pacific Coffee

有一天, 我和波比先生晚飯後找地方歎杯咖啡,
走走走, 來到新世紀的 Pacific coffee, 入口細, 但內裡大, 環境舒適, 仲有唔少梳化椅~

最有趣的, 是有 4 張如自修室的枱櫈座位 (相片中間), 有電掣有 LAN 頭, 哈哈哈, 走苦讀學生路線很聰明啊~
我們這一代, 中學高考會考時, 就是每天七點幾去中央圖書館的自修室排定隊,
九點鐘開閘放豬入去, 一人一格, 唔郁得唔嘈得唔准食嘢, 努力的讀讀讀! 讀到夜晚食飯先走~

讀大學時每天埋首在大學圖書館, 好多時我都讀到 9pm 先離開~
烏燈黑火, 慢慢走落那長長的斜路, 再去上環搭巴士返屋企~
星期六, 也是要在圖書館先讀得專心~

而家的一代學生, 可以好有錢, 連鎖咖啡店裡, 一枱二枱都是攤開晒 pointpower handout 疑似讀書的學生,
不過其中又有好多人其實在 Whatsapp/ Candy Crush/ Facebook............
我一直都仍然覺得連鎖咖啡店很貴, $40 飲杯嘢, 其實夠我去食碟飯, 或者買一餐餸!
所以, 都是波比先生喜歡, 我才奉陪~
這些年輕人, 除非自己有做 part-time 養活自己, 否則就是用父母的錢, 去過一些有點過份奢侈的讀書生活,
這一代年青人, 吃好住好, 有幾多明白父母賺錢辛苦......



這天晚上, 我沒點咖啡, 反而是被這小兔蛋糕吸引,
是古力香蕉蛋糕 - 我最愛的 combination 啊!! 很多蕉, 唔太甜, 讚~



同場加映: 波比難得送花俾老婆, 有一日他在銅鑼灣工作, 放工後偷偷去了 Tony Wong 買的~
這黑古力的味道十分讚呀, 超濃呀, 唔捨得之下, 分了三日慢慢食

[愛美食] 自駕午餐@金壘餐廳

星期日, 膽粗粗學人揸車去食飯, 目的地是在錦田 (差不多是嘉道里農場)的金壘餐廳

睇了 Google street view, 見到餐廳有六個車位, 附近都有錶位,
一路揸去都順利, 但入到去, 啞咗.....
雖然仲有一個位, 但夾在兩架泊得衰衰的車中間, 根本唔夠闊入......

原來除了那六個位, 隔離的一個場都係佢, 有七八個位,
但 Shxt! 得返最入的兩個位, 窄到死, 架車埋到去, 根本好難轉到 90度再塞入去.....
波比扭了幾手軚, 根本前後都得好小位再扭, 條 bumper 一係摌上一級樓梯, 個尾又好驚撞到泊咗嘅車......
非常狼狽及不知所措之際, 有個好心人幫我哋咋!!!
佢好勁咁扭前拄後咗四次, 終於可以將架車扭到入去個位, thanks god!!!

唉..... 真係驚到個心都離埋, 都唔明點解食餐飯攪到咁驚嚇.....

終於都入到餐廳, 那裡有露天座位, 其實好好 feel, 有唔少外國人, 不過又有人食煙, 所以冇坐~

坐室內, 地方好寬敞, 兩個人坐超闊卡位, 十分舒適

點菜, 呢度原來冇 lunch set , 所有食物都係正價叫, 有D 貴~

湯很 creamy, 包就夠暖同軟綿綿



人人都讚呢度的豬手, 我們都是為了豬手而來~
波比選了焗的, 不過我其實有D 失望,
$188 的價錢, 所謂的焗只是稍稍焗返熱, 個皮一D 都唔脆, D 肉就 ok 嫩啦,
但真係冇咩特別, 絕對物非所值......



煙三文魚闊都就唔錯啦, 幾掛汁, 不過以百幾蚊的價錢, 又唔係有咩咁特別.....



呢度如果唔係食佢嘅露天環境, 其實真係名過其實......
揸車離開時, 要穿過一架法拉里......真係啞咗....... 過時真係勁驚囉.......
唉, 其實我又一次後悔, 買呢架車係咪真係太大架呢?
新手駕駛, 早知真係買架 March 先啦.............

[愛美食] 人氣爆燈 -金坊泰國菜

今晚慶祝朋友生日，約埋去了荃灣的金坊泰國菜食飯，
呢間舖頭好犀利，長期都幾十人喺門口等位，如果唔係朋友指定想食，都未必有機會特登走來試

我哋約 6:15pm， 希望早啲唔洗等，點知去到都幾多人，
6:30pm 入到去，叫了八餸一湯好快就上晒菜，我哋五個人迫喺張四人卡位，張枱擺到滿晒食物唔夠位。。。

味道方面，真係好正，全部都煮到真正的泰國風味
個冬蔭公湯好夠酸夠辣，夠晒多香料的味道, 南薑、香茅等等落得好足


泰式生蝦, 每人兩隻都唔夠喉



個芝士蝦丸，芝士流晒心，蝦丸彈牙又香脆， 開埋邊食得方便



海南雞, 雞夠滑, 個汁又係好正宗


串燒燒得好香口，沙嗲汁調得濃稠重花生味



燒鱔嘅肉竟然係爽爽彈彈的



個蒜蓉包又係好得呀，好脆超多蒜蓉, 點咖哩食一流

咖喱炒大蜆，個咖喱唔辣竟偏甜，哈，可能係個湯太辣了



之後有甜品送，個芒果糕幾好食




另外叫了千層糕就幾滯
個芒果黑白糯米好好食呀，啲椰漿好濃，芒果又甜，可惜食完咁多嘢，已經冇晒戰鬥力，否則真係好想 KO 埋佢


整體食物真係非常好，難怪長期長龍，但大家都甘心情願去等啦！