[愛住家菜] 法國羔蟹焗飯

之前咪有次買了 Sogo 的法國羔蟹好好味嘅, 但好日都唔會經 Sogo,
上星期去開吉之島, 見到都有, 買了一隻 $88

今日連埋D 菇菇粒掉落去煲飯, 煲完D 飯好香呀!!!



超超超多羔, 不過上次的羔較 creamy 啊~
今日又拆埋蟹肉, 仲煮咗白飯魚炒蛋, 聽日個飯盒正呀!

[愛行山] 團友相片篇 + 後記

呢兩次行山, 好多位都想影相, 但係團友行得太快了, 要跟進度實在影唔到,
在 facebook add 了其他團友, 有一個團友好好, 影咗好多相, 借D 嚟 post 先!

我們就是這樣在山涯邊行.....





睇落真係有D 恐怖, 唔小心差錯腳就會碌落山



前面仲有 n 個山等住我哋...........
今次帶咗把長遮當行山杖用, 超好用!



上山了, 痛苦之開始



就係上幾百級呢D 石級





深入山中



好齊心



跟住人行真係有好處, 自己行一定冇咁快, 一定會 hea 好多

尋日落級唔小心 PK 咗一嘢, 好彩冇損傷, 是 pat pat 有點痛, 多謝團友關心
本身咪左腳膝頭整親, 都好驚尋日會加劇傷勢, 好彩帶咗護膝, 一路都冇痛, 係有少少唔舒服,
點知愈行愈順, 行完之後, 隻腳竟然唔痛了!!! 咁都得?!

行成6 個鐘, 真係好攰, 今日起身, 覺得成個人都輕了, 個肚腩仔唔見咗囉~
做運動其實真係好好~

[愛行山] 23公里長征之旅

今日又行山, 好恐怖, 要行二十幾公里, 究竟行唔行得完呢?

波比先生尋晚去買了個水袋, 今次行山用大家都覺得非常好用,
想飲水就開條喉一吸就得, 唔洗下下除背囊拎水樽咁麻煩



人齊就出發了, 今次我的同事都冇來, 得我同波比做代表~
由大水坑站出發, 徐徐上山~ 行了好一段車路就入山路~



走了個多小時就上到茅坪, 見到牛牛呀, 勁興奮!!



抖一陣就再行, 嘩, 跟住就辛苦了, 不停的上山呀!
今日最高上到 509 米!



超辛苦到上到山頂, 又見到牛牛, 哈哈~



今日天氣都好好呀, 唔太曬, 又有風, 好舒服!!!



再又落又上, 再死的感覺, 但好多勁人一D 都唔會喘氣, 彈吓彈吓就上到山.....
去到山上又抖一抖, 食返舊冰水蜜桃先, 好正o架!!!




同 d 團友吹吹水, 先發現原來佢哋好多個都曾經係 180-210 磅的肥仔/佬,
嘩, 真係完全想像唔到囉!! 佢哋個個都咁 fit!?!
原來個個都係做運動後開始瘦, 有D 仲由肥佬變了大隻佬, 真係勁呀!!
波比都曾幾何時係 180磅大肥仔, 佢好有共嗚~

再行呀行, 流了一公升的汗..... 好彩帶得夠水~




行行吓唔見晒D 團友, 但我又一路行啱路o架喎



去到午膳的食店, 見到佢哋咁快到晒? 冇可能o架?!
原來佢哋走了捷徑, 比我們登少了一個山, 唔係嘛...... 我頭先行得咁辛苦, 原來可以唔上去o架?!



之後都係跟返人行好D, 又上, 上獅子山!!!!
D 梯級好高, 好難行, 行極都有....... 想死...........
好難想像, 自己走到比 ICC 還要高好幾倍的地方~ 望到全個九龍~



上到山頂的天氣監測儀~



好不容易, 走到青沙公路上方, 有想過好冇收工, 但仲有一段唔行又好似好可惜, 死就死啦!!
再行就是九龍水塘同城門水塘




行上金山, 超超超多馬騮, 未試過一日見到過百隻馬騮, 有好多 BB 好可愛!
但大家要小心, 因住佢哋會偷襲搶你手上的食物



第六段麥徑都仲要上山, 唔係嘛, 我真係已經冇晒力了.......
但知道就完喇, 史就史啦...........
終於, 我們於 4:25pm 行完了第6段, 太感動了!!!
換件衫, 可以返屋企喇!!!



如果有人同我講, 佢由馬鞍山行去荃灣, 我會以為佢講笑,
但今日, 我們真的用自己雙腳, 由馬鞍山經獅子山行到去荃灣的城門水塘, 真係好瘋狂呀!!!

今日我的感想是: 有啲嘢聽落冇可能, 但唔試過真係唔知, 原來有恆心同毅力, 是可能完成到的!



我們散水了, 搭小巴去荃灣市, 去了吃一間叫津滿的車仔麵, 果然好食! 不過係冇紅豆冰, 有點失望

[愛住家菜] 清蒸瀨尿蝦

前幾日食完嗰個超呃錢的巨大瀨尿蝦後, 始終心有不甘,
今日去買餸, 純粹睇吓好冇彩有冇收工減價, 俾我見到幾十蚊有4 隻!!!
買回家清蒸, 就吃到美味的鮮和甜, 簡單就是最好!



搣開最細嗰隻, D 肉真係好靚, 似唔似異形喺度爬山?



不過波比就慘了, 今日冇帶電話之餘, 放工不幸地被老細捉住了,
我煮好晒餸呆等, 又打唔到俾佢,
佢成八點先打電話俾我話而家走, D 餸菜都凍晒了.............噢...........

[愛住家菜] 芝士肉醬焗薯 x 肉醬 ncahos

話說早幾日買了幾個美國焗薯, 整完沙律後, 留返兩個要今晚整焗薯食!

成日睇 TCL 台的美國食品, 好羨慕那濃濃的芝士汁, 一淋就淋喺 hot dog/ burger 上面,
今晚我不計成本, 煮了一個濃濃的芝士汁!! 好正!



焗了薯 (哎呀不過失手, 焗得唔夠林), 倒上今朝一早餚定的肉醬 (加了 bay leave 超美味),
再倒上芝士汁, 嘩嘩嘩, 好正呀!!!! 真係食得好開心~

這令我諗起大學時代, 難得返 HKU campus 上堂, 就會去食 Super Sandwiches 的芝士焗薯,
那時候還好像 $16, 愛不釋手~ 而家已經賣到 $30 了, 好多好多年冇食過喇~



另外想起了波比先生說過喜歡吃 Nachos, 就去了百佳 superstore 買了一包,
用來點肉醬食真係好開心, 不過下次買到淡的原味就更好~

[愛住家菜] 特濃日式咖哩雞翼

日式咖哩耐唔時就會煮一次, 大家知道想味道濃香一點, 該加什麼呢?
答案就是咖啡了! 很多地方的咖哩, 也會加入咖啡去煮, 煮完真是有一種獨特的香味, 大家不妨試試~

[愛美食] 金山海鮮酒家

同波比妹妹慶生, 波比提議去這間在佐敦的金山海鮮酒家,
本來大部分食物都覺得唔錯, 炒蜆又肉厚, 燒鵝真係皮脆肉嫩



豬肺湯清甜, 焗蠔就比波比上次食細咗



有蛋散送, 鮑魚 OK



但最後埋單後, 先發現呢兩隻瀨尿蝦收咗我哋 $400,
嘩都黐線o架, 去西貢食都唔洗啦!?!?!





本身係叫另一款瀨尿蝦, 係個侍應話呢款係「巨大」瀨尿蝦, $27/兩我哋先試,
但上菜時, 呢兩隻巨大瀨尿蝦細到我啞咗, 邊有 14兩咁重呀???
我上次喺屋企煮嘅仲大過佢多多聲啦!!!
我一路都好唔鍾意叫呢D 計重量的海鮮, 今次真係出事喇! 完全覺得呢間嘢係黑店囉, 以後都唔會去呀 >.<

[愛美食] Our Wonderland x 叮噹展

今晚約了同事 gathering 同慶生, 好開心的一晚
我們去了尖咀的 Our Wonderland, 叫了一個 8 人餐, 勁勁勁多嘢食, 食到飽到行唔到
一班人/兩個人都好適合嚟呢度, 不過可惜限時兩個鐘要交枱, 同朋友想吹水吹夜D 都唔得~



肉醬炸薯角, 真係very good!



這裡的 pizza 超好食, 水準仲高過街上的 pizza 店,
是超脆的薄批, 水牛芝士香到震!!





今日還買了蛋糕上去, 幫三個同事慶祝生日, 但係真係太飽了, 連我自己都食唔晒件蛋糕,
仲要再食甜品, 又係朱古力蛋糕, 仲有朱古力雪糕, 甜死同肥死了!~



之後我們到海港城影叮噹, 已經係十點幾, 仲好多人, 不過已經冇 facebook 其他人D 相咁爆, 算係都影到幾隻~
同朋友嘻嘻哈哈, 超開心的一晚呀~

[愛住家菜] 鵝肝牛肉漢堡 yummy yummy

上星期行山時, 發覺左腳膝頭好像有點唔妥,
到星期一跑步, 一轉方向就直情覺得痛, 哎呀, 真係閉....... 又整親......
所以已經好多日冇運動, 今日都有行山團都冇得去......

又唔想成個星期都唔郁, 今日唯有踩吓單車陪波比跑步, 點知踩到回程時爆軚,
都唔明點解呢架單車明明已經係大牌子又唔平, 但係我已經換過起碼 4 次軚, 真係慘......



星期六自煮午餐, 哈哈哈, 是有點奢侈的鵝肝牛肉漢堡,
因為呢幾個月不停想食好食的漢堡, 即使 MOS burger, Triple Os, 甚至 Main St. Deli 的, 同我心中的味道還有距離,
見有時間, 不如自家製啦!

其實很簡單: 牛肉碎、蒜蓉、洋蔥碎、鹽、胡椒、辣椒粉、黃芥辣拌勻,
鵝肝切粒再拌勻, 不要切得太碎, 因為鵝肝溶化了就什麼口感也沒有
最後加一湯匙麵包糠再拌勻



搓成漢堡的圓形, 開最小的火, 用易潔鑊煎漢堡, 不用落油, 因為鵝肝會出很多油



每面煎三分鐘, 最後一分鐘時放上芝士
麵包入焗爐烘 6 分鐘至金黃
漢堡煎好後放到包上, 完成!!!



趁熱食, 超超超正呀!!!
有肉汁, 有鵝肝香味, 不過我就食到鵝肝粒, 波比話佢嗰個食唔到, 可能溶晒咯~
仲有新鮮的洋蔥蒜蓉 ,有點辣同爽, 好夾!



另外又整了蘋果菠蘿薯仔沙律, 好似健康D 啦~ :P