豬欄生活: 7月 2012

2012年7月31日星期二

[愛住家菜] 馬來海鮮炒飯

今日用了尋日食剩的餸炒飯,
用了馬拉咸蝦仔、蝦仁、鮮魷, 最緊要係落馬拉蝦米辣椒醬, 炒起好香, 香死隔離喇, 哈哈!

另外發現大橋街市有好嘢, 話說嗰度有幾檔鹵水檔, 今日試試幫襯一家人開的新店,
有個小妹妹應該放暑假嚟幫爸爸媽媽手~
呢檔有口水雞, 醉雞, 蒜泥白肉添! 不過我今日先試鹵水~
小妹妹問我腸要肥定瘦? 牛展要林定爽? 洗唔洗加麻辣?
爸爸就用心的切呀切, 你睇, 仲有幾多蔥同埋莞茜!
返到嚟, 波比大讚好好味呀~ 係呀, d 麻辣真係好惹味呢, 正呀!
我以後都唔會幫襯舊嗰檔啦, 個老闆娘寸寸貢, 有次仲俾d 唔新鮮已變壞的生腸我呀, 哼!

2012年7月30日星期一

[愛住家菜] 全焗晚餐

星期一, 知道一定會遲返到屋企, 所以尋晚買定餸準備定, 今日落車直跑返屋企煮飯!

為了慳時間, 今日第一次用焗爐的上下層同時焗嘢, 都 ok 喎, 當然食物唔可以疊太高啦

呢味芝士焗牛尖腸肉丸西蘭花, 其實唔難整,
所有材料用水烚三四分鐘至熟, 放到焗盤上,
加少許鹽, 灑上 Mozzarella 同 Parmesan cheese 去焗, 焗到食材乾身同埋芝士變香口就得,
最後灑一點 Hungary 辣椒粉, wow~ 我覺得自己很 Jamie Oliver 啊!
下次再整, 可以落多D 芝士添 (不過芝士貴呢!)

前兩日波比叫我買鹽焗雞粉, 今日就整喇,
不過覺得麻麻地, 呢隻雪藏雞味道麻麻地, D 鹽焗雞粉又唔係好知要落幾多, 驚太咸所以落少少, 但又唔多夠味,
全用焗爐焗, 上面灑了一層麵粉, 焗完竟有脆炸的效果喎!!

今個星期目標: 日日都煮到飯!! 上星期日日出街食, lunch 又要食 canteen, 肥死了!!

2012年7月29日星期日

消暑, 差啲中暑 x Salomon 背囊

今朝好感動呀, 我前所未有地星期日唔會六點就醒, 奇蹟地瞓到八點, 我諗係新的日立小涼伴的功勞!!
佢真係好靜, 又夠凍, 瞓得好舒服~
今日仲換埋新窗簾, 用了遮光布, 拉埋真係冇乜光入到嚟!!
哈哈, 希望呢兩項措施可以幫我渡過炎熱的夏天, 日日都有覺好瞓啦!!

今日又完成一創舉, 就係由我屋企跑去屯門碼頭, 用了1小時50 分跑這 12.7km ,
好慢, 因為今日真係勁熱勁曬, 完全頂唔順呀..........行咗好多次囉~
仲有因為我個腰包仔袋咗兩件衫, 好重, 不停的撞落我個肚, 攪到好唔舒服~

有見及此, 今晚的起心肝去買跑步背囊!! 呢個星期都睇咗幾間行山專門店, 係到今日先搵到個好啱心水的!
我要有左右都有袋啦, 入面唔可以太細啦, 因為平時返工都可以用
可以放到水袋, 呢款連埋 1.5L 的水袋, 你話夠又唔係好夠, 不過佢最出面有個袋又可以放水, 好 ok 呀!!!

後面都好緊要, 條帶要有墊啦, 背脊位有頂起可以透氣散汗啦,
腰位有得扣埋, 仲要兩邊都有小袋仔可以放吓紙巾同電話,

呢款真係好得好啱心水呀! 雖然都有點貴, 但係我日日都用, 點都抵返掛, 嘻嘻!
好想快D 再去行山呢~

2012年7月28日星期六

[食記] Boston 1 Seafood and Grill

今朝有師傅嚟裝好日立小涼伴了, 之後忽然間發現唔記得咗入錢去供樓的戶口, 拿拿林出市中心攪~
攪完都係 12pm, 就來個 early lunch,
記得前幾日都提過馬田那邊有好多高級西餐廳, Boston 1 Seafood and Grill 就係其中一間,
晚市實在貴得冇乜可能嚟食, 後來發現原來佢都有 set lunch, 波比先生就要話嚟試試~

入到去未係好多人, 靜靜地, 座位遠望蝶翠峰同埋遠山景, 很開揚舒適

點了兩個 set lunch, 先來了西蘭花忌廉湯, 很 cream 的味道, 讚~
仲唔會小氣的每人有兩件小法包, 不過烘得脆多點會更好~

先來了我的三文魚 ($78), 我同波比先生都激讚好食!
唔知佢係咪半煎炸呢? 外層超脆呀, 仲要個魚皮都非常脆, 但入面D 肉又好嫩唔乾喎, 非非非常好食!
究竟點整o架? 我自己煎過都做唔到咁好食的效果......

之後是炭燒肉眼扒($98), 上面有香草牛油, 溶化後令牛肉多了油香感,
不過牛扒太熟了........... 明明佢話整 medium rare 俾我哋, 點知係 9 成熟囉...........失分!

另一大滿意是有甜品跟, 吃完 holiday lunch 後, 有擺得咁靚的甜品, 係咪好開心呢?

同場加映, 成個足球咁大的菠蘿包,
話說食完 lunch 趕出街, 發咗個麵糰又冇時間分割再第二次發酵 (要用多一個小時呀),
咁大個麵糰, 整咩好?? 哈哈, 諗起好耐冇整菠蘿包, 包臭粉要快D 用埋佢,
於是整咗好大塊菠蘿皮撻上去, 焗完就收得工!
焗完見到咁大個, 高到拎唔到出嚟, 整爛咗少少個皮添呀.......
中間切開, 用來整菠蘿油, 好正呀~~

[墾丁遊記] 月光咖啡 x 煙花 light painting

上回提到去完貓鼻頭, 跟住開始風雲變色, 因為有雙颱風正移近台灣, 聽日起就會連日大雨,
感恩我們已完成了墾丁所有的戶外行程, 關山看日落雖然沒有了, 但都已經很滿足~

下雨沒事幹, 就請潘先生帶我們到恆春市, 怎料一下車就傾盆大雨.......

於是我們找間咖啡店坐坐, 享受一個悠閒的下午~
此行另一大得著, 就是到訪了很多優秀的咖啡店,
雖然只是巧遇, 卻印象深刻, 它們每一家都有其特點, 這家是木傢俬, 田園的感覺,
很厲害, 有愛爾蘭咖啡啊!
愛爾蘭咖啡是一種含有酒精的咖啡，於Joseph Sheridan在1940年代發明。^[1]。傳統上，愛爾蘭咖啡是由熱咖啡、愛爾蘭威士忌、奶油、糖混合攪拌而成。

做法：
Ａ．將愛爾蘭威士忌放入專用咖啡杯中，點燃酒精燈，再倒入熱咖啡。
Ｂ．最後於咖啡表面裝飾一層鮮奶油。

簡單一杯 Cappuccino , 看看生活雜誌, 多麼的寧靜寫意

然後, 潘先生帶我們到海角七號的阿嘉的家
講真, 呢套戲悶到我睇咗少少就 delete 咗...............
所以去到拍個照就好, 入面有好多付費的項目真係一D 興趣都冇...........

之後去「出火」, 是一個有天然氣從地下滲出的地方, 地面會自然的著火

右下有人焗爆谷, 不過旅遊書話唔好呀, 危險~

天開始黑, 去了我們的最後一站, 小杜包子!

NT25-30 的大包, 熱辣辣! 好新鮮!!
不過我們還很飽 (3pm 才吃飯啊!), 買了兩個外賣好了~

感激潘先生還帶了我們去大型超市買煙花,
否則我們真的不知道哪裡有得賣, 亦不知道該買哪一款呢!

回到酒店先休息一下, 之後我們又到墾丁大街找吃的~
太累了, 沒有影太多相,
這燒粟米很 Q , 但我們還是喜歡吃傳統的口味,
小杜包子又軟又多餡, 好好吃, 不過可惜我們等了一段時間才吃, 芝士沒有流動感, 否則應該更加正啦!

食飽飽, 我們去放煙花了! 好開心呀!!!
落樓過馬路就係, 地點好方便~

之前研究過點樣玩 light painting, 最好用腳架, 但我哋怕麻煩同埋都好大風, 冇用了~
用手動 mode, 快門 set 10 秒, 嘩, 好成功呀!!! 不過唔識預畫幾大個囉, 攪到好迫咁!

牛呀!!

波比先生畫的豬呀!

遇上一對年青的港人夫婦, 還帶了一個好可愛的小朋友,
我們一齊玩, 佢買D 煙花勁好多呀~~

A sweet and unforgettable night~ :P

台灣遊記 2012 之高雄墾丁台北
[高雄遊記2] 金礦咖啡、自助新村、瑞豐夜市
[高雄酒店推介] 康橋商旅六合夜市中正館
[高雄遊記] 壽山動物園 x 港園牛肉麵
[墾丁遊記] 恆春、港口吊橋、龍磐公園、台灣最南點 x 包車導遊推介
[墾丁遊記] 海岸飯店 - 墾丁大街夜市
[墾丁遊記] 鵝鑾鼻
[墾丁遊記] 墾丁森林遊樂區 x 放牛牛
[墾丁遊記] 阿興生魚片 x 貓鼻頭
[墾丁遊記] 月光咖啡 x 煙花 light painting
[墾丁高雄遊記] 海生館。東港華僑市場
[高雄遊記] 咖啡林咖啡。夢時代。花月嵐拉麵
[高雄遊記] 第五天打風日
[台北遊記] 超正上引水產 x 台北美食
[台北遊記] 花博會場 x GaBee 冠軍咖啡 x 輔大花園夜市
[台北遊記] 最後一天的動物園及貓空纜車

2012年7月27日星期五

[愛住家菜] 心有靈犀 x 大飯糖

星期五, 終於可以正常時間返到元朗, 一定要在家吃,
為了慶祝 Happy Friday, 我打算給波比小驚喜, 就是買了 Tasmania 生蠔,
點知波比回來, 佢又拎住兩袋嘢話加餸, 原來佢去了元朗西鐵站新開的爭鮮買壽司,
哈, 我剛剛都有諗過好冇買埋三文魚腩刺身俾佢, 好彩我冇買o者, 否則就 double 了!

爭鮮的食物, well, 我覺得麻麻啦~ 三文魚下面是一大舊蘿蔔絲墊高D 三文魚, 啞咗.....

簡簡單單, 炒了個黑椒什菌牛肉天使麵拼闊麵,
D 闊麵炒完好似干炒牛河, 哈哈!

上星期整的三文魚腩豆腐冬瓜湯, 清清甜甜, 好多魚油呀~

今晚終於都冇落雨可以去跑步喇! 我話想跑去食甜品, 又俾波比先生估中咗我想去食洪水橋的大飯糖!
這就是心有靈犀嘛~ :P

即慶約埋阿姨姨丈一齊食, 跑完有嘢食真係特別開心!!!
榴槤大菜糕, 個自製榴槤雪球好好味啊~~

2012年7月26日星期四

繼續冇飯日

連續好幾日冇煮飯了, 因為都太遲放工,
塞車遲返冇得煮,
今日送車尾改搭巴士, 成 7 點先返到元朗, 又唔洗煮啦.......
唯有去食我們都好欣賞的街坊食店「金記燒臘」, 算是滿意的攪掂一餐

這陣子也就著工作的問題想呀想,
人到了不同的年紀, 所追求的東西也不同,
衡量了很多方面, 發覺自己實在應該轉到一間近屋企的醫院工作,
不過也已錯過了今年的招聘了, 希望如果遲D 有位, 我應該一定會 apply~
不過有這個決定之前, 實在要好好編排, 將一些我專門負責的治療快快傳授給其他人,
否則我話要走, 實在會令老細措手不及!

2012年7月25日星期三

[愛跑步] 久違了的跑步機

成個星期都落雨, 咁即係唔洗練跑啦!?
但係下星期有比賽喎, 唔練真係有D 擔心............
於是今晚獨個兒去了會所做倉鼠, 跑我最唔鍾意的跑步機...........
都真係有好多年冇落過 gym room 了, 因為要錢o丫嘛! 慳家老婆覺得點解做運動要錢先?!
而且我真係覺得跑步機係超勁悶, 今日好彩有飲食男女陪我o者,
不過一路跑一路睇住D 嘢食, 真係愈跑愈肚餓囉...............
希望快D 好天返啦~

2012年7月24日星期二

[食記] 老公請食飯@花雪

話說老公公司出 bonus, 又有藉日去食返餐!
元朗馬田那邊愈來愈多高級餐廳, 有些食蠔的要 $300+ 一位, 實在未捨得去試~
見到一間叫花雪的, 裝修都好高格調, 又唔算多人, 啱晒我人撐枱腳呀~

呢度啱晒我哋呢D 食肉獸, 所有肉類海鮮都有, 鵝肝、美酒、生蠔都有,
見到有一大家族的人在聚餐, 不停開 wine 又食鵝肝, 夠豪呀~

我們叫了兩個 set dinner, around $200@
老闆同待應都好有心機介紹, 先來了龍蝦湯, 真係好唔錯, 仲有龍蝦肉呀~
不過可惜冇麵包送, sell 我哋加 $35 點蒜蓉包, 我同波比先生都心想: $35 夠過隔離金桃麵包買幾條咯.....

我的鵝肝醬牛扒同埋波比的羊架都好正啊! 欣賞羊架是用西式的煮法, 加了麵包糠去焗焗~\
配菜都有心思, 值得一讚~

不過最失望的是法式焦糖燉蛋, 一食入口實到呢.............. 完全 O 晒咀..........
難為有個待應仲走埋嚟問我好冇食, 我都不妨實話實說, 太硬了, 一D 都唔 creamy.........
是人生食過最唔掂的焦糖燉蛋
一間好餐廳, 似乎即磨咖啡是必要的, 但係佢竟然沖咗兩杯似係東南亞牌子的即溶咖啡俾我哋囉........ 就是沒有美好的結尾而實在失望..........