古力布丁

從前, 有一個老公激親老婆,
跟住, 個老公就整咗個朱古力布丁去氹返老婆,
點知, 落咗勁多糖, 甜得滯.............
又唔識用個焗爐, 攪到布丁皺晒皮..........
好彩, 味道還可以~

宜家新焗模

好耐冇整過用模的麵包, 鬼咩, 之前用的方包模, 黐到阿媽都唔認得,
明明話係防黏, 但真係次次都洗餐懵!

早兩日在 Ikea 買了個新的焗模, $39 真係好好多呀,
雖然都有少少黏, 但都算可以較完整的甩到模, 清洗都唔難, 真係好感動~

Sogo 再血拼

星期天, 清晨五點幾肚痛痛醒了 >.<

同屋企人飲茶, 很享受一次過吃多款不同食物, 尤其是芋角這些很花工夫, 自己一定不會做的食物~



波比去跑馬地踢波, 我同佢一齊出去, 獨自去 Sogo 再血拼,
見就嚟去台灣, 買定多D 防曬旁吓身都好~



去睇了廚具同超市, 但竟然冇收獲.............冇辦法, 太迫人了, D 人係咁撞, 真係覺得自己返咗大陸.......

最後去行 CitySuper, 好冷清, 反而行得好舒服~
返屋企已經五點幾, 又煮飯了~
今晚煮了香草雞腿, 哈哈, 乜個煮法原來咁似蘇師父今晚在電視教的?
還有在 CitySuper 買的羊肉豬肉腸, 不過味道有點過咸,
腸仔呢D 嘢大家都唔好食咁多呀 , 高鹽份, 唔多健康~ 我都係幾個月先會買一次呢~

友相聚

時晴時雨的星期六, 去跑 + 行了 10km,
中途在洪水橋的大發奶茶王食個早餐, 沙爹牛麵是有心之作, 有菜又有洋蔥
最攪笑係一到 11am, 成間餐廳忽然間滿晒人, 因為大家都趕在早餐時間完結之前, 歎返個靚早餐~



回程已落微雨, 去街市買咗好多嘢回家愈落愈大,
一踏入屋苑有蓋的地方, 就下傾盆大雨! 實在好幸運!

一個下午忙忙忙, 波比負責清潔, 我焗了 10 個麵包同埋一個蛋糕,
蛋糕是請朋友吃的, 難得我和大學同學約到 gathering 探 BB~

看人家的 BB 真係大得快, 轉過眼就 10 個月大了,
波比先生似乎很得小朋友的歡心, 見到小朋友的笑容實在很心甜

車品品 - 食好味及人情味

波比先生部 Galaxy Nexus, 用了唔夠兩個月就壞 Mon...... 真係..........
今日放工去到朗豪坊的維修中心幫佢拎返部機, 人山人海(證明了 Samsung 的質素.....)
維修人員二話不說交帶了已換過晒零件, keep 返單有壞再嚟整過, 哈......

我們從朗豪坊行去大角咀的車品品, 一試這間有二百幾個好評的本土名店~
明明前面只是有 4 個人, 卻等了半個鐘?!
原因係見到廚房入面, 得一個人做嘢 (大概是老闆的阿媽), 她那與世無爭的慢速度, 實在令人佩服....
樓面亦是得老闆娘一個人, 落單傳菜收錢都係佢 , 真係啞咗......



不過老闆娘的確好好禮貌, 大家都好禮諒佢忙到踢晒腳, 乖乖的等~
入座點菜後, 又是等上半個鐘.........
第一個菜來了, 是無鉛的溏心皮蛋, 真係好正呀, 雖然味道是比一般的淡一點~



接著的是魯肉餃, 是自家包的, 餡料甜甜很有台式味道, 撈麵加了大量蝦籽, 實在惹味~



車仔麵, 其實料都是買回來的, 抵讚的是湯底沒有重味精~



咸檸碧, 又是很真材實料, 好多粒桔仔~



不過老實有D 唔夠飽, 叫了一個魚肉翅同4隻皮蛋外賣~

等上一小時去食值唔值, 真係見人見智,
可以說的是這間是用心去做菜的小店, 每一個食客都是開開心心離開, 會同老闆娘說拜拜,
這樣已經是很成功, 在香港我實在沒有去過一家店老闆是這麼多笑容, 人客也這麼多笑容呢~

八一蕃

今日波比來了接老婆放工, 一齊去咗荃灣的八一蕃食魚湯米線~

其實這個米線很讚, 魚湯奶白色濃濃的, 一碗入面, 有十幾塊豬膶, 真係平靚正!
但係另外叫了一個辣子雞就中伏了............
所有辣椒都炸到燶晒, D 雞係要搵先搵到,
細粒到根本好似係D 頭頭尾尾唔要的碎炒埋一碟, 真係好垃圾囉........... 所以未必會再幫襯啦~

北海道乳酪雪糕

今晚去跑跑步, 回程時波比告訴我他帶了一百蚊同八達通, 可以獎勵吓我~

唔想食糖水咁飽, 記起 OK 便利店有款好 Kawaii 的乳酪雪糕, 捉了波比去試試~

我們選了原味, 畢起來似軟雪糕的質地, 有少少酸少少甜, 很開胃~
不消五分鐘, 咁又食咗 230cal, 要努力跑埋返屋企...............

滿足的星期一: 粟米斑塊 x 台式肉燥

一年都唔會開幾次油鑊炸嘢, 但今日忽然間好想放肆一下,
於是整咗粟米斑塊, 還有波比先生幫手製作,
炸得脆脆的魚, 加上濃濃的粟米蛋汁, 非常下飯!


睇食尚玩家, 又攪到我的台菜癮起, 決定整台式肉燥,
點知行勻係個街市, 都冇冬菇賣?! 咩事啊?
咁唯有掉D 粟米落去啦~
今次整得波比大讚好食, 嘻嘻, 要寫低我嘅秘方先!

1. 蒜頭、乾蔥各三瓣切碎, 蝦米切碎, 落鑊炒香
2. 加入豬肉碎炒炒炒
3. 當豬肉開始熟, 加入適量的水, 一小粒冰糖, 一茶匙五香粉, 適量胡椒粉, 一湯匙老抽, 一茶匙頭抽
4. 之前都講過, 要好食的話, 還可以落一湯匙的花生醬, 會使肉燥變杰, 香香超好味!
5. 細火煮半個鐘, 或者我係煮10分鐘再放入真空煲內焗焗佢, 總之三十分鐘有得食, 味道超讚呀~~
今次煮到很理想的杰度, 又是超下飯的, 很滿足的一晚~

提升層次

為了提升一下波比肥豬的層次, 做隻高級D 嘅豬, 今晚帶咗佢去聽管弦樂,
7pm 出到中環, 嘩.......... 洗唔洗大雨到黑雨咁呀..................
雙腳完全踩晒水咁行, 大半對腳濕透了................ >.<

去到大會堂的高級版美心餐廳, 可以望住 IFC 食飯, 唔錯~



我叫的什扒餐, 很美味, 有齊豬羊雞煙肉腸仔, 款款的肉質都唔錯呀~



不過波比的牛柳餐就唔多掂了........
先係落錯單, 補單後等了半個鐘先到, 已經差不多開場的時間了........
攪到大家只可把牛柳塞進胃趕快埋單走人, 唉...........

今晚是香港醫會學管弦樂團的音樂會, 請了一個很出色的中學生小提琴 Solo,
他的琴技簡直是出神入化!
不過波比肥豬實在唔太識得欣賞, 以免悶到佢瞓著失禮, 睇了大半場我們就離開了~

如果我有一個小朋友, 我會讓他去學小提琴, 那是一個未完的夢想呢~

Sogo Thankful Week 敗家之旅

今日見咁好天, 打算同波比在尖咀食飯後, 去西九長廊 + Elements 行吓,
先去了 Al dente 食 lunch, 環境寧靜, 食物高質素, 是很理想的午膳地點~



食飯時在 facebook 發現波比的幾個朋友都在尖咀, 於是就各自各精彩, 佢去買波鞋, 我去 Sogo 血拼~

考慮緊好冇趁 Sogo Thankful Week 減價, 買個高速煲,
但睇過D 資料, 加熱、煮、排氣加加埋埋都要半個鐘, 其實我煮一餐飯通常都係半個鐘內攪掂,
即係唔點幫到我平時煮飯, 只係可以令平常日子, 整到D 應該要炆幾個鐘的餸同老火湯
另一問題, 就係冇地方擺啦, 我其實已經有好多煲喇..........
最後, 都係放棄了~

點知睇睇吓, 見到 HABA 都有 promotion,
話說一向都唔護膚的我, 開始覺得自己D 皮膚愈來愈差, 愈來愈多斑了,
幾個月前開始用了 SK II 又用了 Shiseido, 但都唔覺得太 work,
我上個月開始用了 HABA 的Triple White Brightener, 覺得幾 ok 喎! 真係好似白返少少~
於是就心癢癢, 想買了佢部導出導入 ion 機加強護膚的功效,
而家減咗價, 終於都忍唔住買了!

返到屋企, 急不及待試了導出又試了導入,
導出方面, 我覺得用完D 毛孔細咗, 希望長期用, 可以令鼻上的毛孔黑頭 byebye 啦~
導入方面, 我覺得D White Lady 真係可以留喺面上好耐, 唔似平時搽完就唔見咗咁~
美白效果, 當然唔會即刻睇到, 希望 keep 住用真係有效啦~


我還是第一次去感受 Sogo Thankful Week 的威力, 去到迫到度度都打晒蛇餅!
香港人還是大陸人都好似唔洗錢咁搶呀搶!
付款的人龍長到幾十人, 我放低了信用卡只好周圍逛逛,
去到超級市場, 嘩...... 俾錢條人龍繞了一圈排返到入口處,
見人太多, 我都唔敢慢慢睇, 只係睇了急凍海鮮部, 見到北海道帶子刺身好抵啊,
1kg 賣 $239.9, 比我們對面的日本食材店仲平, 好多人買~
開心史波比啦, 因為食材漲價, 我都好耐冇買過呢款帶子了, 佢今晚一人獨吞了六大粒呢~



另外又買了 $69.9 的法國羔蟹, 真係意想不到的好吃!
真係超超超多羔, 當中綠色的羔比紅色的更濃味又滑, 食到唔停得口!!!



已經食咗一半, 都仲有咁多, 真係好過份呀!!!
平時買一隻新鮮蟹都到 $80+ , 呢隻蟹絕對物超所值, 值得回購!



不過當然雪藏蟹的肉一定唔會滑, 但拆出來都好多, 我星期一的飯盒多美滿!!



今日吃了太多美食, 夜晚要乖乖去跑步,
今個星期跑了三次, 算是勤力的好開始吧!

black n white

如果你有睇過三色收費電視的為食台, 應該對甜心先生唔會陌生,
今晚是 Happy Friday, 特意去了佢開嘅甜品店試試佢嘅手工甜品

一件小小的蛋糕, 都索價四五十元, 其實都有點貴, 不過真係好花工夫的, 賺這個錢絕對不易,
波比點了冰咖啡, 上面的朱古力蓋是用黑朱古力做, 如果是熱飲的話, 會慢慢溶掉應該另有一番滋味,
咖啡有點酸, 但飲得出是上好的品質, 上層的奶泡非常的棉棉厚厚, 加起來很好飲~

我要的 70% 朱古力甜點, 朱古力味很濃, 又唔會太甜, 不過慕絲層未係夠想像中的滑, 可待改進~



原來有名的車品品就是在這家甜品店隔離, 哈哈, 決定下次先去車品品, 再嚟呢度食甜品!

元朗一圈

今個月, 話咗要的起心肝跑多D 步,
今晚由屋企出發, 圍了元朗一個圈, 差不多十公里,
運動場好好好多人, 好熱鬧呀!
運動場那邊的住宅, 真是退休的 Dream House, 閒閒地都 800呎起, 寧靜 , 公園景, 三百幾萬有交易,
是可惜交通實在好唔方便, 否則真係好想搬過去~

天熱開始熱, 跑到真係標晒汗, 波比更是不停有汗從衫上滴出嚟 (一條汗路.....)
尾段去了泛后甜品, 飲杯清涼的西瓜汁, 真係好爽呀~

元朗芝脆雞

話說有個老公今晚扭計唔食飯, 要出街食~ (哈, 有時去到一星期的中段, 老婆都會想偷吓懶嘅~)
於是試咗元朗新開的芝脆雞

在醫院我都叫過好幾次芝脆雞外賣, 因為比 Pizaa hut 好食
元朗的還是第一次試, 那裡有堂食, 哎呀 , 早知唔洗拎餐死啦......
為了平一點, 選了外賣自取, 由那裡行回家, 都要成 15 分鐘啊~

返到屋企, pizza 林咗添, 好彩我有焗爐可以焗返熱佢!
這是大的環遊世界批, 最多材料的, $66,
翻焗之後餅底脆脆, 夠多芝士, 不過配料實在唔太多同冇乜味道......



好吃的, 應該是它的招牌炸雞, 喜歡那很麵粉的脆皮, 雞肉又唔會乾曬,
兩件實在有點唔夠喉! 下次要去堂食, 仲有D 三十零蚊的 pizza 飯意粉餐啊~ 值得一試!

台式蚵仔煎

台菜癮還未完, 第一次整蚵仔煎,
在街市買了半斤蚵仔, 返到嚟又用鹽又用生粉浸同洗,
然後用蕃薯粉同埋生粉開水,
先煎蚵仔, 再落粉漿, 然後落菜絲同埋三隻蛋, 完成~~
加埋個自己調的甜辣醬, 整好了~

味道是似, 但仍有改進空間:
蚵仔熟了縮到好細粒, 下次買一斤會較好
依食譜書的粉漿, 似乎太多了, 下次落少D
多蛋的話, 應該會更好食~
得閒要再整過!

臘味糯米飯 (附食譜)

咁熱的天氣, 唔係應該整冷麵咩? 點解整咗糯米飯?

哈, 因為呢排 plan 台灣行程, 見到好多想食的台菜
好想整糯米大腸, 但洗腸好麻煩...
又想整筒仔米糕, 但邊度搵咁多筒仔?
最後, 見都係糯米整的, 就索性整臘味糯米飯

整完一次, 發現原來都唔係咁難整, 更加唔明白點解去美心酒樓有時會整到咁難食.....

食譜:
1. 半斤糯米浸5-6小時
2. 蝦米冬菇浸兩小時, 切粒
3. 美心瘦臘腸、蔥切粒
4. 用易潔鑊, 加油, 爆香蔥粒蝦米冬菇
5. 加入糯米炒炒炒, 不時要加水, 加一湯匙生抽, 一茶匙紹興酒, 一茶匙五香粉, 炒約五分鐘
6. 如果想整生炒糯米飯, 其實可以繼續加水同炒呢個過程, 直至糯米熟透; 但咁熱天時, 再炒我會熱死, 於是後半段用蒸的方法, 中火蒸 40 分鐘, 每隔15 分鐘要翻一翻D 飯, 同埋要灑水

糯米飯整好了, 超開心興奮呢~~~
自家製, 冇肥肉, 健康好多; 味道調得剛剛好, 沙巴的蝦米又一次發揮了它的咸香效果~
糯米粒粒分明, 唔會過爛, 又唔會過硬, 真係好鍾意呢~
太後悔點解冬天時唔整吓呢~

第二回 - 元朗青年節長跑賽

五月已經成三十度, 入夏前最後一個長跑比賽了!
我又冇參加呀, 每次一見到跑呢度, 見到條大斜路天橋, 就唔想跑...... 都係影吓相好過~

今日有 1.5km 同 3km 親子組, 哈哈, 見到有爸爸陪住個女跑, 一路喺後面幫佢影 video, 做人父母真偉大呀!




波比是跑 8km, 嘩, 今日慢到我以為佢又受傷,
原來佢話太熱了, 又係呀, 成 30度跑步真係好攞命, 最後好似37分鐘到返到嚟~

換完衫, 行去麥當奴食個早餐抖抖, 一坐低就落傾盆大雨!!! 好彩行得快咋~



今年的比賽暫告一段落, 我哋報咗11月的神戶馬拉松同埋下年 4 月的倫敦馬拉松,
唔知抽唔抽到呢? 下個月有結果喇~

超激讚之龍皇母親節飯

今晚慶祝母親節, 一家人來了熾哥開的龍皇酒家,
睇了 openrice 的食評, 好似冇乜人讚, 有D 擔心, 但食完真係人人都讚不絕口,
我想同 JW Marriott 一樣, 嚟得呢度食飯的人, 係較年長一輩, 並非 openrice fans 已矣~

是晚由波比發板, 有人食過好多次喎 (以前成日有客請食飯)
這個叉燒, 實在不得了, 我想話係我生平食過最好食的叉燒, 肉質嫩得難以置信, 外皮燒得剛剛好~
三層冰燒肉同叉燒一樣, 都係要預訂的!外皮超脆, 下層一D 都唔肥, 好難得!
燒米鴨又係我生平食過最好食的燒鴨, 它的皮又薄又脆又唔肥, 肉質又是超嫩的, 根本覺得自己不是在吃鴨肉!
叫了個豬肺湯, 好鮮甜, 豬肺好滑好好食!



蟹肉炒蛋白又是一絕, 生拆的蟹肉真係好鮮味, 配上蛋白是難以形容的夾 (我要返屋企試整!)
後面的千頁豆腐, 味道沒什麼特別, 但見到廚師的刀功, 實在讚嘆!



最後, 還有一窩龍皇海鮮泡飯, 用濃湯浸著, 加入了鍋巴脆脆的, 有帶子又有蝦, 十分的美味呀~~



這真是超水準的一餐, 是近年食過最好的一餐中菜, 值得推介呀~

Awfully chocolate

工作過後, 常常都想獎勵自己, 那天經過了朗豪坊的 awfully chocolate, 買了一個 cupcake,
是超想像的美味, 上面的慕思超滑, 朱古力味濃得很, 絕對是朱古力迷不可錯過的美食啊~

$28 有點貴, 但間中獎勵自己一下, 還是需要的~

中日燉牛肉

上次整過日式燉牛肉後, 仲有D 調味塊剩,
今次再整, 不過中日合璧,
用了一塊燉牛肉調味塊, 兩湯匙磨豉醬, 仲有八角兩粒, 鹽適量,
燉煮牛肋條, 用大火煮 30 分鐘, 再放入真空煲煮到放工, 加入薯仔再煮15分鐘,
好林, 好入味, 呢個味道超讚呀!
牛肉汁好似食台灣牛肉麵那種味, 攪到我第二日要煮個拉麵撈吓D 汁食~

魷魚筒釀飯

逢星期二返到急症醫院, 像被人追殺般! 不停被病房問幾時睇阿 A, 幾時睇阿 B,
都是兒科病房的 call, 唉....... 近來兒科的症多得攞命..........

今日搭到村巴放工, 換了一架旅遊巴, 座位好坐過以前嗰部一百倍, 還有頭墊的,
頭頂還有像搭飛機一樣的燈, 哈, 好感動~ 以後唔洗坐到腰都痛咁返嚟~

早陣子整咗呢個魷魚筒釀飯, 是因為想起當年的八佰伴美食廣場是有過這個菜,
我用了蝦乾仔 + 切粒的魷魚鬚炒飯, 再釀入去, 面頭界花, 然後拎去煎,
一路煎, 魷魚筒縮小, D 飯係咁必出嚟, 好攪笑.....
最後配上鰻魚汁, 還是做不到當年那個味道, 但都係好有趣好味的一餐~

7E 咖哩王 x Holly Brown

嘻嘻, 今晚又同年青同事 secret gathering!
一行六人去了重慶大廈的咖哩王, 好好好多年冇嚟過了~
多人食飯的好處, 就是可以乜都叫D, 咖哩唔算好辣, 香料味重, 好味!



飯後介紹了大家去我至愛的 Holly Brown, 雖然 6 個人迫在一張小枱子,
但有傾有講好開心冇所謂啦, 傾到 11pm 人哋收工先走,
下次再聚要一齊去食德國菜!

被困

今朝簡直係搭西鐵返工嘅人嘅惡夢, 美孚站供電中斷,
上咗車被困走唔到, 企咗足足一個鐘先去到荃灣, 已經係九點, shxt!!!

一出西鐵站, 幾十人打蛇餅等的士, 我跑跑跑, 跑到去如心廣場等, 都要等十幾架,
好彩 9:30am 都返到醫院, 之後就好似打仗咁, 一早睇咗幾個 BB, 忙到個癲婆咁, 想史!

放工6:30pm, 已經攰到煮唔到飯, 唉, 呻完, 早抖!

年度西貢遊

我們家距離西貢實在太遠, 一年只會去一兩次,
今日見沒有事忙, 就去了過悠閒的下午~

吃了一個激氣的西餐, 唉, 不提也罷.....



之後到海邊走走, 除了一如以往的漁家艇仔, 仲見到有海膽賣,
$150 一兜, 有人真係夠膽生食, 唔係化...........



行行行, 看看人家的小狗, 太多狗太可愛了~
不少得的, 就是去食有名的西貢菠蘿油, 幸運的有位坐呀, 真係太太太好味,
我一定要研究到點樣整到咁香鬆脆的菠蘿皮呀!



又在發我們的退休夢: 買間村屋, 養養狗, 我整吓麵包, 波比先生沖吓咖啡, 招呼吓朋友, 多麼的美滿~