斤斤計較

成個星期都冇煮到飯, 因為日日都遲走, 是因為有同事 sick leave D 病人睇唔晒,
可以 hea 做早走, 但我同同事都好彩未到 hea 的層次, 都想盡量睇埋D 症先走

周局長話醫生斤斤計較, 我都鄧前線醫生不值,
連續返 n 個鐘頭, 冇休息, 大壓力,
其他工作的人都可以準時放工, 但係醫生臨放工的時候無啦啦有新症上到嚟, 都要收埋先走得
我都明D 病人家屬都要返工, 但係要 6 pm 收工的醫生 6pm 後見佢, 一講又講成個鐘唔肯走,
呢D 時間, 醫生冇得計返, 醫生都係人, 都 deserve 準時放工去照顧家庭同有自己的生活
醫生做到 OT 晒, 冇病人會欣賞,
醫生跳槽去私營市場, 真係無可厚非, 人工高, 返工時間穩定, 唔洗挨生挨死,
都係打份工o者, 我會覺得在公院留得耐的醫生, 都好有一份令人佩服的堅持

手術室, 產科的都係, 唔通收工就唔洗做埋個手術/接生埋個 B, 咪又係要做埋
講到產科就仲唔明, 點解D 兩個都唔係香港人, 可以嚟香港生仔,
用政府的資源, 其實唔只係生嗰吓, 仲有長遠的教育同醫療,
老實說, 我個部門D 兒科症排到年年聲, 有好多都係大陸人的子女,
如果唔係佢哋, 香港人的子女就可以排快好多得到「應有」的醫療服務了~

這個社會的政策, 太多令人困惑的地方

半晚偷閒

今日, D 病仲嚴重咗, 係咁流鼻水, 鼻塞, 喉嚨痛, 聲沙.....
一路見 case 一路抹鼻, D case 又大部分都病, 大家一齊交叉感染!

13 個 out-patients 都好乖咁嚟齊, 仲有 3 個係 voice cases......

唉, 6 點幾走, 煮唔到飯之餘, 波比先生話因為食咗一個唔好食的晚餐而唔開心

最後老婆出馬, 帶佢去一間元朗新開的 cafe,
專業咖啡師調配的 mocha 同 siphon 咖啡, 真的很專業, 好有水準,
咖啡濃香而清甜, siphon 咖啡唔洗糖唔洗奶, 都好好飲~
之後, 有人就開心返喇~

勁眼瞓藥

哎呀, 今日起身無啦啦病了,
喉嚨好痛, 又流鼻水............
估到 book 唔到即日的 staff clinic, 於是搵返上一兩次睇完醫生的藥食啦

點知食完真係勁眼瞓, 企喺度寫寫吓排板都瞓得著咁滯...........
好辛苦先頂完一日的工作 (無辦法啦, 已經有同事 sick leave/放大假緊, 我好難再請假)

放工搭車諗住終於都有得瞓啦, 點知有個阿太係咁好大聲地講嘢,
講足全程, 攪到只可瞓吓醒吓

夜晚波比先生陪我去食粥, 喺我病嘅時候, 呢個波比先生都幾乖嘅, 仲會分擔吓家務!

尋晚已因為夜放工寫唔到 thesis, 今晚點都寫 D D 啦, 2800 字啦, 開始見到家鄉喇 :P

老公外賣

繼續閉關, 免得嘥時間出去食 lunch, 波比先生買外賣

屋企對面間日本店, 買急凍食物就買得多, 買佢的飯盒都係第一次, 原來都好有水準!
中午時段更加好特惠!

咁靚的魚生飯, 都係三十幾蚊!



波比的焗葡汁雞扒飯, 有水準過出面D 茶餐廳, 都係廿幾蚊



叫多個炸魷魚鬚, 正呀!



埋單八十幾, 仲送兩個湯, 咁平, 波比問我係咪以後都唔洗煮飯~

40% done

我份 thesis, 坐咗足足一日喺電腦前面, (有部分時間係上網遊玩)
終於都總共嘔咗 2000 字, 仲有 3000 字....... 仲要寫多幾耐先寫得晒?


原來 5000 字真係幾多, 真係有D 擔心究竟有冇咁多嘢寫呀?

心煩

唉, 放咗幾日假o者, 返嚟做到死咗.......
每一日都煮唔到飯咁滯, 不過呢兩晚堅持下都煮到簡單的一餐,
因為真係唔想出去食, 我呢排, 真係肥咗好多, 唔講得笑................

新同事到了, 希望下星期開始有好日子過啦!

不過面對四月份, 考試、交 paper、工作上又有大單嘢要開始做, 唉..........
諗起都好煩........ 所以個 blog 要不定期休息, 實在冇乜 mood 寫太多字

Day 4 & 5 - 終極和食

最後的幾餐, 沒有再叮泰菜, 因為想吃的都已吃過了, 很滿足
此行發現 Siam 一帶有很多似乎很不錯的日本菜, 見到日文的餐牌及食物的相片, 覺得應該幾正宗

去完 JJ Market 當晚, 去了 Siam BTS 站下面的一間叫 Chabuton 的日本麵店, 很旺場
點了一個豬骨湯拉麵, 及一個辣肉醬豬骨湯拉麵, 把湯送入口的一刻, 覺得冇嚟錯了!
厚厚油脂的豬骨湯, 甚是日本的味道, 用上幼麵條, 幾夠彈牙



一口餃子絕對要大讚! 那皮造得很很很薄而脆, 一口一隻剛好



我點了一杯可樂, 其後發現..... 有人主動走來添飲, 哈哈哈, 太暢快了! (來曼谷多日第一次飲汽水)



我會給這家麵店很好的評價, 是在香港也難吃到的優質日式拉麵~

到最後一日了, 沒什麼節目, 都是在 Siam 一帶閒逛和買手信,
唔知食咩早餐好之際, 遊蕩下入咗酒店對面的一個商場, 又無意間發現地庫有好多嘢食,
喺其中一間小食果汁店, 竟然見到有..... HONEY TOAST!!!!!!

即刻好開心呀, 因為佢仲賣得好平, 係 Siam Paragon 的靚靚 cafe 一半的價錢咋!
二話不說坐低點了我們的早餐!

先來了 Cheese Hot Dog, 嘩, 喺香港邊有舖頭會俾咁大 pat 芝士你o丫,
暖暖的芝士腸仔和麵包, 太好的開始



主角 Honey Toast 出場了, 好開心好開心!
厚厚的多士, 好脆好鬆 (唔知用咩麵包), 滲滿了牛油的咸香和蜜糖的甘甜, 再加上同時混一口雪糕食,
又冷又熱又咸又甜, 多種層次的感覺, 好正, 係好好味呀!!!
一小份還要 share, 實在好唔夠喉啊!!



之後我們去了 Siam Paragon supermarket 再掃貨, 又去咗買 6 個 Donut 呀!
第一日食過好正嗰間呢~

返酒店 check out, 就去 Big C 掃生果,
好瘋狂地買咗芒果、蜜瓜、番石榴、香蕉 (蕉都買? 波比先生話想試吓喎....)
重到死, 行去 Isetan 打算食好正宗的日本吉烈豬扒, 點知....
勁多人, 大排長龍 (應該真係好正), 我哋要趕飛機, 唔可以等喇.....

最後退而永其次, 去了大戶屋, 好彩都冇令人失望,



佢的豬扒又鬆化, 又唔會好油, 真係幾有日本的水準!



我要了滑蛋豬扒飯, 都係脆卜卜的好食D~



返到酒店, 就起程去機場了

Check in 時, 見到我們本來 13.5kg 的行李, 變了32.kg,
磅一磅波比的大背包, 有 10 kg!!!!
嘩, 買了 total 30kg 的東東, 好似係買得最重的一次, 泰瘋狂了~~~

全卷完, 多謝收看

Day 4 - JJ Market

今日一起身, 拉肚子.......... 哎呀, 怪自己連日來實在吃得太瘋狂了嗎?
好彩, 出門口以後, 都沒有大礙喇 (幾擔心去唔到 JJ market)

今日終於出去食早餐 (早兩日都係食麵包), 去咗 Siam Paragon food court,
本來想食食家介紹的 Honey Toast, 但肚痾完即刻食雪糕, 好似過份咗D......

所以都係點D 正常D 嘅食物, 我叫了一個朱古力香蕉夾餅, 簡易而美味



波比又食咖吔多士, 呢間的咖吔超濃椰子味呀, 波比被我感染後, 也愛上了咖吔這食物



為了要有足夠體力去血拼, 食多個豆沙餅先!



搭 BTS , 去到約 11:30am
三年前來, 因為太早到所以好多舖頭都未開, 所以今次特登遲少少先到啦,
點知今次又好似遲咗D, 去到已經人山人海



波比先生收獲超豐富啊, 反而我冇買到嘢~

最開心係搵得返三年前的一間鞋店, 當年波比喺呢度買了一對真皮人手造的皮鞋,
好好著, 之後鞋爛了, 香港用唔到咁嘅價錢買返咁好的品質
今次一心想搵返間鞋舖, 行了大半個 JJ Market 都見唔到, 唔知係咪我哋走漏眼了......
有點失落之際, 點知, 行行行, 忽然間俾我哋見到喇, 係同一個老闆呀, 係佢喇!
老闆識係用好流利的普通話同我哋對話, 好殷勤地介紹同俾波比試穿,
最後波比買了兩對鞋, 有人好開心呢~



行到 3pm , 我哋去了柯多柯市場食嘢, 原來係可以經地鐵的 2 號入口,
穿過地鐵站和商場, 從3 號出口一出就係, 唔洗好似上次行地面的又熱又曬又大塵

今日已經係第4 日, 我都未食到好想食的榴槤啊.....
嚟到本來好開心啦, 點知..... 買咗..... 都唔好食嘅........ 淡而無味......... 好失望呀........
或者而家唔係榴槤的季節啦, 下次要食, 都係夏天嚟好D



波比期待以久的燒大頭蝦, 上次兩個人食咗 10 隻 (當然冇咁大隻), 滯咗....
今次淨係俾佢買 4 隻好喇! 因為真係好大隻!!



D 膏多到...... (Another version is: D 膽固醇高到.....)



仲有串燒魷魚同埋串燒豬肉! D 汁辣到噴火.....



食完嘢, 返去行多個 round, 波比又買到嘢





行到 5pm, 太攰了, 要返去酒店又抖抖先!

前幾日凍到日日要著褸, 我帶晒D 太陽眼鏡、防曬、扇、毛巾都用唔著,
今日見天文台話 "Cool" 得 20 度, 我都乜都冇帶啦!
估唔到今日出到嚟, 熱到成三十度, 個天文台D 預測好唔掂囉, 有幾吓真係又熱又焗到我暈暈地...
最後買咗把扇, 一路行一路撥, 先頂得順.........

Day 3 - 地道泰食物

玩完就梗係要食啦, 搭的士去食水門雞飯! 等咗好耐喇!

真係好彩今次旅行買咗張 Happy micro SIM 卡,
69 baht 就可以有 600 分鐘上網, 我用嚟上 GPS, 上 newsgroup 搵料都好方便,
搭的士時, 咁啱俾我發現有呢個 post

http://www.thailandfans.com/forum/viewthread.php?tid=79241&extra=&highlight=%A4%F4%AA%F9%C2%FB&page=4

嘩, 實在太感動喇~~ 上次去食水門雞, 好多香港人, 但都冇英文/中文的餐牌,
所以唔識叫食物, 只係識指住人哋碟雞飯叫兩碟,
今次發達喇! 可以想食乜就叫乜, 唔洗得個恨字!

先來兩碟細的雞飯, 那個醬汁實在令人回味, 如果有得一樽樽咁買就好了!



叫咗一碗鴨肉燉冬菇湯, 原來有胡椒去煲, 一流!



嘩~~~ 波比先生好鍾意食的泰式豬手呀, 好入味, 超正!



食飽飽, 去行 Platinum fashion mall, 買咗好多嘢呀:
衫啦, 裙啦, 銀包啦, 行李牌啦, so happy~~

行到中場休息, 落地下的 Swensen 食雪糕,
雪糕、朱古力 Brownie、香蕉、威化, 全部都係我至愛的食物呀!!!



Total 行咗三個鐘, 返歸了~ 路程有點遠, 返到去攰死咗...... (由 10am 行到 5pm)
瞓個覺再去搵食!

晚餐去咗 Silom Complex 地庫的 Banana Leaf 食泰北菜,
旅遊書話有蟹肉炒麵, 但係去到都冇嘅?!?!
不過好多地道泰菜, 唔洗失望

先來一杯好堅嘅荔枝冰, 好多果肉



呢個先係正真的冬蔭公嘛, 好辣, 濃郁的香料味正是我所尋找的!



呢個炸雞好多人叫, 真係好好食,
雞肉雖然唔係滑, 但卜卜脆加埋酸酸地的醬汁真係好開胃!
食到停唔到口!


高潮所在: 炸魚!!! 其實我哋都唔知係咩魚, 但見到人哋的好正就叫了!
好大條呀, 加埋D 蒜蓉辣椒好惹味, 又唔多骨, 十個美味!


話咁快, 食晒, 辣到噴火, 哈哈哈!


食完去行 Silom 夜市, 不過冇咩睇
Suan Lam Night Bazzar 已經執笠了, 攪到夜晚都唔知去邊好,
返歸早抖, 聽日要大戰 JJ Market!

Day 3 - Dusit Zoo 探探動物仔

第三天, 半晴半陰
繼續地失眠, 6am 又醒了.......

今日去 Dusit Zoo 探探動物仔, 波比其實較想去 Safari World,
不過問過三年前帶我哋去的 tour guide, 而家收得好貴啊
而且睇的動物其實都係同 Dusit Zoo 差不多, 我哋又唔太大興趣睇佢d Show,
所以最後還是近近地去 Dusit Zoo 好了

好多相, 喺 fb 有得睇

伸脷的為食河馬先生!



傻更更的河豬



搶食羊咩咩



洗唔洗懶瞓成咁? (我同波比先生講: 「都幾似你平時瞓覺個 pose 喎!」)



懶瞓黑熊



懶瞓的水中大河馬



佢會定時浮個鼻哥窿上水面抖氣, 嘩哈哈!



餵咗三種動物, 上次嚟都未有餵動物玩啊,
第一種係魚, 好恐怖好大條的魚,
一掉舊面包落去, 成群魚嚟搶呀~~~



第二係餵羊咩飲奶, 成棚羊一齊咩咩咩, 好攪笑!
第三係餵大笨象, 差D 俾佢d 口水噴到呀~

三小時動物園之旅, 好開心~
天氣冇尋日咁凍喇~

Day 2 - Flower Market > Wat Pho > Museum of Siam > Khao San Road > Big C

吃完 buffet, 開始今日的行程,
去得河邊一帶, 就游船河去第六站落, 去 Flower Market 行吓



三年前的遊記都介紹過呢度, 唔多講了,
不過今日落雨, 地下又濕又污糟,
諗住去酒店食 buffet 要打扮得 elegant 點所以穿了斯文的靚靚平底鞋, 最後, 鞋就報銷了 >.<



嘩, Sea of mango!!!



波比當然要買返D 啦!



下一站係 Museum of Siam, 已經用 GPS 睇住嚟行, 點知都行過龍,
不過又錯有錯著, 行到去 Wat Pho, 本來從無諗過去的地方, 有意外驚喜

一些泰國的傳統建築, 原來好宏偉,
站在前面影相, 好震撼的感覺~







之後睇住 GPS 利返去 Museum of Siam,
哈哈哈, 去到諗住俾入場費時, 個職員竟然話: Free admission after 4 o'clock
哈哈哈, 賺晒!!!

呢個 Museum 都幾有趣呀, 介紹泰國的歷史,
我們去旅行, 不會只顧吃喝 shopping, 還會想了解一下當地的風土文化,
這個旅程, 比之前兩次到最谷都見識到多了和深入了,
不得不講句: 真係讀萬卷書不如行萬里路, 用一點時間, 看看不同地方的人的生活, 真會獲益良多

離開博物館, 本來打算搭的士去 Khao San Road,
但從 GPS 睇嚟, 行去都係 2km 到, 不如當散散步, 欣賞一下同圍的風景

Khao San Road 對我們是一個新地方, 因為都幾偏僻, 無啦啦你又唔會搭的士嚟行一轉,
今次都係 plan 開行程, 發現都「算係」順路, 先納入行程之中
呢度係外國人背包客的天堂, 長街的兩旁都是酒吧, 全部都係鬼佬喺度飲啤酒吹水,
有一些大路的攤檔, 又有好多 local tour 的旅行社,
走進其中一間, 我都有D 心動想 join local tour 去睇 waterfall 同埋火車橋, 因為呢D 都係平時自己去唔到的,
不過波比先生好像不太感興趣, 所以最後都冇 join 到了~



本來今晚打算喺呢度一間好有 resort feel 的餐廳食飯, 不過時間太早又唔知點 hea 好.......
於是都係返返 Siam, 去了 Big C 掃貨, 嘩, 買得好瘋狂啊.........
晚上其實都完全冇肚餓嘅感覺......... 不過點都要食D 嘢, 就去了 Central Food Hall,
蠔仔煎蛋, 好脆!



呢度D 豬手飯唔錯o架!



終於第一餐有冬蔭公食喇, 不過麻麻地............ 似開味精多D...........
呢個 Food court D 食物, 比早幾年差了...............



行咗成日, 超超超攰............

四週年快樂~ :P