活在仙境中

今朝一起身, 見到窗外朦晒, 打開窗一睇, 好大霧, 乜都睇唔到, 即刻閂窗! D 水氣入晒屋就麻煩了!
當霧散了一半, 再睇睇, 遠處的山和樹仍然藏在霧中, 好似去咗仙境, 活在雲上咁, 好有趣!



晏咗放工, 本來想偷懶唔煮飯, 但屋企又有湯, 又想食住家飯多D,
於是極速整咗個沙爹牛肉雞脾菇, 混醬後好惹味呀~

立體豬頭紅豆蛋糕

新年前喺一田買了一 set 豬頭矽膠模, 今日終於都幫佢開光喇!
呢 set 嘢都貴貴地...... 慳家老婆竟然都肯掏荷包買, 一定有佢嘅原因!

今次係第一次用矽膠模整蛋糕, 發覺真係好好用!
成兜拎出焗爐, 冚隻碟上去, 一反轉, 慢慢將蛋糕脫模,
一D 都唔黐, 一脫就好完整地脫咗個蛋糕出嚟!



登鄧, 好立體, 好可愛的豬豬頭紅豆蛋糕就完成了!
如果加點紅色素, 將蛋糕變成粉紅色, 一定更可愛!



呢兩隻仲加咗朱古力做眼, 朱古力粒的大小剛剛好, 有好神!
望住你, 你點捨得食咗佢?



其他的造型都好 cute, 隻隻對眼都唔同的, 哈哈哈!



好滿意今次的作品, 下次仲可以用嚟整馬豆糕紅豆糕桂花糕~

鬰金香之馬灣遊

好耐冇二人郊遊, 波比先生提議入南丫島食海鮮, 但老婆嫌車程船程又耐又貴,
反建議不如入馬灣走走, 因為我發現了馬灣近來有我最愛的鬰金香, 仲要係種在地上的鬰金香

搭西鐵去到荃灣, 發現D 船要半個鐘一班....... 仲要啱啱送船尾........

入到去, 差示多一點了, 一落船就見到傳說中的鬰金香, 不過已開到尾聲, 有D 謝了, 有D 花瓣亦搖搖欲墜
下年冬天如果有, 一定要早D 入嚟!



趕去 Oma's Kitchen 食個 lunch, 係波比好鍾意的德國菜!
半開放式的餐廳, 門口的座位就在沙灘邊, 但已滿座了....... 今次坐入面啦~



叫了一份烤德國豬手, 嘩~~~ 超大的份量!!! 波比睇到已經好開心!
豬手唔會太咸, 皮夠脆, 伴酸菜絲同青瓜食好開胃! 十個正!



好多好多! 好彩波比冇食早餐, 否則應該食唔晒!



我的德國捲腸, 一拮落去, D 肉汁都必出嚟, 好真材實料, 腸內絕對無添加其他成份~
要大讚那個薯蓉, 係用薯仔自己磨蓉的, 不是開薯蓉粉,
加了牛油, 好香, 好飽都要食晒!



之後去馬灣公園走走, 但好曬好熱, 著住兩件長袖衫又唔除得嘅我, 有熱到發滾的感覺......
所以都冇晒心機行



今次行到島的西北面, 見到活生生的桂花, 好香! 好想返屋企整桂花的甜品~



行到去馬灣的漁村, 有魚排有好多雀仔~





在馬灣兜咗一個圈, 太熱了, 都係走人喇~



等船時買了大大粒荔枝啫喱, 好夏天的感覺呀~~

想當年

好忙好忙, 見完全日滿晒的 out-patient, 真有點虛脫的感覺......
尋日睇咗個 B, 我一掂佢個口, 佢就嘔咗一大攤奶出嚟, OMG!!!!!
師兄見我手足無措, 即刻幫拖, 真係唔該晒~
一個會睇B 同餵奶的男人, 哈哈, 覺得師兄對住D BB 時好有趣~

呢幾日又唔知係咪作病, 頭痛, 周身唔舒服, 晚晚返到嚟都好攰, 瞓到死咗咁............

差唔多時候, 又去做負離子,
由 7:30pm 攪到 10pm, 髮型師好有心機整, 仲送埋個焗油俾我, 都只係收我 $250!
元朗的生活, 真係有時會意想不到的平~

之後去食麥當奴, 放低手上的一本參考書在一邊, 忽然想起以前讀大學的日子,
日間做 OL part-time, 放工後返圖書館讀書, 到圖書館收工先走,
一個人去食麥當奴, 差不多十一點先返到屋企,
回想多年前這些日子, 哈, 好難理解, 當年自己是怎樣過的..........
實在狀態不復當年, 而家對住書本, 只會............ 恰眼瞓..........哈哈............
所以只要在白天讀書啦, 老了唔捱得夜呀~

通漲

其實我想話, D 通漲對一般小市民都真係影響好大,
每天買餸就知, 菜又貴, 肉又貴, 醬油都貴,
兩個人的餸菜, 不是吃得特別豪的日子, 其實都唔平,
好彩我第二日可以帶飯, 慳返D!
不過, 比起出街食都一定平D , 而家D 茶餐廳, 兩個人食晚飯都差不多要一百大元落樓,
乜都加, 就係人工唔見佢加!!!

預算案只有些小幫助, 無啦啦入 $6000 落 MPF 真係唔知佢做乜?!
如果呢 $6000 係幫打工一族的話, 點解唔免我哋 6 個月的 MPF 供款, 政府用 $6000 幫我哋供咪好囉~
真係吹漲!

我同波比先生講:「而家D 食材咁貴, 睇嚟你都要餐餐食豆腐青菜了」

返兜韓國年糕, 今日加咗波比指定的日本蟹柳,
呢個波比先生唔靚唔食, 十幾蚊包的蟹柳話人唔好味, 一定要食廿幾蚊包的,
呢D 就係由細個俾阿媽縱壞晒的港童成人版!



自己冇時間煲湯, 有時會買鴻福堂的老火湯,
近來發現原味家作的湯原來好得, 非常真材實料,
呢個奶白色的湯, 你就知道有幾堅!
不過好貴, $50 真係只可以耐唔耐一次~

煲劇中

有一日行一田超級市場, 見到韓國辣醬, 就想起整韓國年糕

想記上次去韓國旅行, 凍到結冰的天氣, 食一口辣辣韓國年糕, 真係好暖好滋味
今次自己動手整, 拼埋蝦肉卷一齊食, yummy~~~
不過太太太多....... 聽日仲有排食呀............



呢排夜晚好忙睇電視呀, 睇到<<魚躍在花見>>, 真係好想去日本, 日本日本...........

見到呢排間間 airline 去日本的機票都淡季超抵價, 真係有D 後悔,
點解我咁早訂晒機票酒店去泰國....

Body check 同樣的道理

同病房的姑娘講:「唉...... 其實最好都係唔好睇我, 睇咗就一定 fail」

有一D病人, 佢的病係會慢慢好返的, 呢D 人俾我睇, 一次比一次好,
有一D病人, 明知佢的病一定唔會好, 仲會一路一路差, 根本係冇得醫.......
唔睇由自可, 俾我睇咗, clinically 我要 state the fact, 事實就係話佢唔合格,
咁唔合格咁點呀? 咪.............囉............

就好似 Body check 咁, 你唔無啦啦走去 check 就咩都食得,
身痕 check 完發覺呢樣又高嗰樣又高, 最後乜都唔食得..............
咁當然, 唔食係對自己身體好的, 將來你患心腦血管病的機會都細D
有D 人唔信邪, 否認自己有病, 到有一刻, 病得好嚴重冇得返轉頭, 真係恨錯難返

唔叫我睇, 就「咩事都冇」囉,
雖然係一個自欺欺人的情況, 但有D 人仍十分喜歡活在自欺欺人的世界

繼續辣辣辣

天氣回暖少少喇, 不過都仲係凍凍地, 又煮吓辣嘢先!
又煮麻辣水煮魚呀, 仲有索汁的鮮腐竹同埋芽菜, 好麻好辣呀!



我一路都覺得腐竹應該係D 好健康 (大豆造) 好有營養的食物,
點知今日睇報紙, 有營養師話腐竹先係致肥原兇, 真係佢係由一層的豆油造成, 唔係嘛............

跑@青衣

朋友以為我哋會去跑渣馬, 冇呀, 太早起步了, 真係要三點幾就起身, 自問真係冇咁嘅衝動....

反而因今晚要返奶奶度食飯, 就黃昏時同波比先生喺青衣跑步
原來青衣係一個跑步的好好地方, 沿住海邊跑, 有海風冇汽車廢氣, so good~~
先在奶奶家附近一個新起的公園跑咗少少, 個公園好鬼死靚啊, 不過因為要計時所以冇影D 靚相

之後跑咗去運動場, 好多人呀~



再沿海邊跑返去屋企, 返到去就有飯食, 正!



今日 download 咗個 iPhone App 去計跑步的距離同時間 , 勁好用!
跑新路線會更有動力~

Mr. Big

原來人係好矛盾~
要學返的時候就想唔洗返學, 唔洗返學的時候又覺得自己太得閒......太無聊.......
(哈哈, 就係因為咁先去讀個 Master)
 
好不容易的起心肝, 一個下午半 hea 之下, 終於都寫完了一份 Case Report,
仲有一份要寫, 不過要睇返一堆藥名....... 聽日先寫啦............
完了呢兩份 Report, 就要寫我份畢業論文喇, 希望去旅行前可以完成, 免得心掛掛~
 
黃昏去跑跑步, 波比去了踢足球, 好難得我一個人都有心去跑吓~
天氣咁凍, 其實真係唔想出去,
不過呢如果突破了「出門口」呢個關口, 其實出到去又唔太凍o架咋!
不過真係唔好彩, 跑到去屏山輕鐵站時, 落雨............
又衰冇帶八達通, 我身上只有張一百蚊, 望住架輕鐵想搭都唔得...........
唯有冒雨跑返去元朗廣場, 去書局行咗陣, 再唱錢搭到最後一班小巴返屋企咋, 否則真係大鑊....
 
今晚叫咗 Mr. Big 外賣, 係元朗的一間外賣 pizza 店,
我哋成日都見到佢的外賣電單車, 一路都好想試吓!
 
$95 的二人餐, 好豐富啊!
先有一個辣肉 pizaa, 如果肉同芝士再多一點會更好




炸雞才是主角, 在 openrice 見到人哋D 相, 見到D 咁脆的炸雞皮, 真係好吸引!!!
炸雞的肉好嫩滑, D 皮脆到你明知好肥好唔健康, 都欲罷不能的要連碎都食晒佢囉~~~



仲有一個海鮮闊條麵, 味道唔錯, 不過嫌太少汁同埋有點乾



整體而言都唔錯, 唔洗郁有咁多嘢食, $95 好合理~

一點情

在這家醫院打滾了差不多三年, 見到一D 病人, 其實大概估到佢仲有幾耐日子,
有一個女病人, 情況都不妙, 眼都張不開, 只見她胡言亂語地說著一些話,
說話中, 多次對女兒重複:「妳阿爸呀? 我好掛住妳阿爸呀, 我真係好掛住妳阿爸呀...」
當一個人可能走到生命的盡頭, 「我好掛住...」這些平時不易講出口的說話, 都會洶湧而出,
或者佢好想先生可以來見佢最後一面, 但似乎先生都是行動不便, 不易到醫院來

每日都見好多呢D 情況, 使到我會成日幻想一下自己死前的一刻, 究竟會是怎樣?
我會寧願那過程快一點, 因為離留的那個時段, 實在叫人最傷心.......

今日同一個女兒傾到應否將媽媽送進安老院, 女兒哭了,
她是一個好孝順的女兒, 但因為柏金遜病的媽媽情況慢慢地差,
即使她已盡心盡力地照顧, 都已經實在十分困難, 穿衣洗澡換片, 也是十分困難地完成,
她很愛錫媽媽, 其實十分不捨與媽媽分離,
政府已多次派了政府資助的安老院舍俾婆婆, 女兒都拒絕了,
但政府現給予最後一個機會, 如果女兒都拒絕, 就沒有政府位,
當將來萬一要入住, 就要負擔高昂的價錢, 兼且未必找到有質素保證的護理安老院

兩難中, 究竟去或留, 邊一樣係對婆婆好?
女兒叫我俾一點意見, 我也只可從客觀角度說出自己的一點睇法,
其實心中點都係唔想婆婆去的, 再好的護理安老院, 都點夠親女兒照顧得好,
但現實情況, 照顧問題又為女兒帶來很多的壓力、擔心,
每一個選擇, 都有 pros and cons, 人只能作一個自己認為不會後悔的選擇, 而不是最完美的選擇~

滿屋麻辣

又係講返上次去深圳, 除了孜然粉、水煮魚調味包, 另一收獲就係一個麻辣湯底包,
在香港我哋都買過幾次小肥羊的麻辣湯底包,
不過成 $25, 只係一D 辣椒一D 辣油, 值唔值真係見人見智
深圳的超級市場有多款打邊爐的湯底包, 我們選了一款叫「努力餐」的, 只係 RMB6 的價錢,
見包裝都唔錯, 希望唔會有咩恐怖嚇人的成分在內啦~

開爐, 試味, 唔錯喎, 落咗大半包已經好夠味, 好夠麻呀, 食到變孖膶腸咀...........
不過都幾油, 你睇D 菜就知!



又有打邊邊新嘗試 - 黑豚腩肉! 覺得好過食肥牛呀, 因為雖然話係腩, 但其實又唔係好肥,
那些脂肪層爽爽的, 口感同味道都唔錯!



每次打完麻辣邊爐, 都會成屋麻辣味.....
入到睡房都好勁麻辣味..... 行到出 lift 口都好勁麻辣味............
哈, 引死隔離屋!

泰 hea 遊倒數四星期

嘻嘻, 好耐冇寫過旅行嘢喇 (澳門遊記爛尾中......)
等等等, 等咗好耐, 曼谷之旅仲有四星期咋, 未出發先興奮!

講吓酒店先, 之前住過 Grand Centre Point Hotel & Residence, 其實覺得好好,
但係加價加到飛起, 09年只是 $620, 而家要 $1100! 貴到傻咗!
搵咗好耐 Siam 附近的酒店, 企理D 嘅全部都要近千蚊,
今次話晒係結婚週年之旅, 我都唔敢 book cheap 酒店費是一陣俾波比少爺話我安排不周,
所以最後 book 咗 Novotel Bangkok on Siam Square,
呢間酒店最正就係近, 喺正 BTS 站前面, shopping 完唔洗行漫漫長路先返到酒店, 真係好重要的!
仲有就係喺正 Siam Paragon 對面, 去超級市場買完嘢食, 行兩行就返去到開餐了, 諗起都爽呀!

五天的行程, 諗完又諗, 改完又改, 皆因今次已經係第三次去曼谷了,
其實D 景點已經係去完又去再去....... 想發掘一D 新地方, 但 info search 咗好耐都搵唔到咩新地方....
算吧, hea hea hea 又是另一種旅行的方式

今晚又孜然喇! 孜然羊肉炒金菇!

大合奏

今日又去咗睇 BB, 好攪笑, 上星期睇過的 BB, 一星期後成個樣唔同咗, 簡直係唔認得佢!
在BB 箱前研究咗一陣究竟係咪佢?! 對完有名的手鈪仔先 verify 到身份,
佢真係超大隻 B 呀 , 全個 ICU 最肥最大隻就係佢囉!
上星期佢得幾日大, 已經覺得佢好大隻,
都唔明白, 咁大隻 B 點可以由個阿媽度走出嚟...........

更攪笑的係, 全場有二三十個 BB,
有一個喊起, 其他 BB 就跟住一齊喊, 嘩嘩嘩, 全場一齊喊, 好似大合奏咁,
嗰個情景真係好難忘~哈~

今日都繼續好凍呀, 要煮D 熱辣辣食物先得!
屋企有包素翅擺咗好耐都未食晒, 今晚就煮埋去 ( c9 仔成日都為清理雪櫃的剩餘食物好頭痕)
呢個熱辣辣的雲吞雞湯翅, 食完暖笠笠呀~

情人節超級大餐

今日為咗準時收工返屋企準備大餐, 中午爬完個飯盒 1:30pm 就衝上病房, 快快睇完晒所有症,
真的可以準時收工,  go go go!

這個情人節晚餐真的超級豐富呀, 去片!

先有磨菇忌廉濃湯, 真係要慢慢切菇粒去煲, 味道太好了, 仲濃過出面飲過的~



頭盤 (1) 之美國太平洋石蠔 - 麥兜都想食
大隻, creamy, 正!



頭盤 2 - 三文魚腩刺身 - 超肥美



三文魚腩放在鑊上煎一煎, D 魚油溶化了, 正到爆!


 
主菜 - 和牛出場喇! 係波比先生負責煎的!
難得今晚係由老公煮嘢俾老婆食呀!



見牛肉標咗好多牛油出嚟, 加埋D 菇呀豆呀落去煮呀煮, 唔洗調味都超好食!



仲有心形和牛漢堡, 太厚, 中間好難熟添, 要煎完再煎先得~



第一次用呢對麥兜杯, 感覺好 sweet!


Cheers! 情人節快樂~~~



波比先生話「我買唔到禮物俾妳呀......」
唏, 洗乜禮物吖, 一齊就已經係最好的禮物了~
留返D 錢同我去旅行好了~ :P

開心探 B 團

今日去咗舊同事屋企探 B, 好開心, BB 好叻叻呀, 開始識得講嘢的 BB 係最攪笑的~
這個新年探了兩個 BB, 兩個媽媽都係為 BB 而犧牲了工作的偉大媽媽,
自己湊真係好唔同, 兩個 BB 都又叻又聽話又乖, 這就是「家教」, 相信兩位媽媽都會為自己的兒子好自豪
有點樣的家長, 就有點樣的小朋友, 我工作咁多年見證了無數例子

跟住同波比先生行行大埔新開的一田 (其實都唔算新了), 個超級市場好正呀~~
如果我住樓上就好了~~ (所以好期待 YOHO Town 快D 起好個商場, 相信有機會有同類的大百貨公司)

好開心又買到D 調味料呀, 今個星期又有好餸食了!



去奶奶度食完晚飯, 波比又去踢波喇 (落雨都踢, 話極都唔聽)
我就忙去日式超級市場度買和牛! 聽日情人節喇, 要食大餐呀! (藉口)

睇返由 2004 年開始咁多年 2 月14日的 blog, 想睇返咁多年來我們的情人節點過
(好慶幸「從小」就有寫 blog 的習慣, 最早期還不是叫做 blog, 我是用 Dreamsweaver 寫網站的, 係去到 2007 年之後才寫 Yahoo Blog, 之後再搬來 Blogspot, 而家睇返以前的 blog, 可回味過去的日子, 真的很不錯)
我們也有點老夫老妻了, 不會太過緊張呢個節日, 不會同人迫去食搶錢的情人節大餐,
更覺得不應該只是情人節才對另一半好, 才肯花心思,
原來每一年都係簡簡單單的過, 但好似..... 有點簡單得過份, 而且原來咁多年都冇在家食過一餐難忘的晚餐,
哈哈, 唔怪之得我一D 都諗唔起之前的八個情人節係點過啦!

今年開始, 我每年都會悉心為波比先生準備美味的情人節晚餐,
使波比先生成為好口福又幸福的老公~

今晚趕到去超級市場, 見到D 靚嘅貴嘅牛肉都俾人掃得七七八八,
就只剩下這一件是我心中所想要的雪花和牛, 價錢係貴不過都算啦, 一年一次o者!
仲有見到特別為情人節而造的心形和牛漢堡呀! 唔洗諗就買埋喇!



明晚餐單:

磨菇忌廉湯

冷盤: 三文魚腩刺身、美國太平洋石蠔

主菜: 鑊仔即燒即食 - 佐賀和牛、心形和牛漢堡、帆立貝

甜品: 蕃薯糖水 (哈哈, 無啦啦有個中式糖水, 係波比先生話要食喎)


期待中

食食食之 Big Gathering!

嘩, 過咗呢個新年, 肯定會暴肥......
因為日日不停地食食食, 要清埋屋企全盒的食物, 親友送來的糖果餅乾水果, 雪櫃內的賀年糕品.....
星期一至五又冇做運動, 慘喇~~~~~~~~~~~~

今日到波比大學同學的團拜, 由下午食到半夜!
多謝朋友帶來的 agnes b. 朱古力, 睇到咁靚已經唔捨得食



跟住一行9 人去咗小肥羊打邊爐, 這班男人的食量實在太太太恐怖!
不停的叫食物, 又真係食得晒嗰度先驚!!!
我都不知不覺, 食吓食吓, 應該食了好多好多, 多到有D 胃痛仲頂胃!



羊架真係好好食, 有朋友食咗四件!



返到去, 共打咗 12 圈麻雀 , 打到半夜好眼瞓...............

半夜三更, 又再食, 係慶祝一二月生日的朋友
哈, 希望大家今年開開心心, 仲有快D 減輕吓我哋派利是的負責喇!

我的 Passport

到小婉子家拜年, 十分雀躍的傾傾旅行事~ 我們都太愛去旅行喇~

聽日就要去換特區護照, 因為快到期了,
不經不覺, 這本護照陪伴了我十個年頭,
初頭的七年, 其實冇乜點用過, 都係去到婚後的三幾年, 我哋先放肆地去旅行,
因為當年晨早就孭住層樓, 又要儲錢結婚, 到婚後才可以咁放肆咋~

唔知聽日會唔會收咗呢本舊護照, 今日先同佢拍照留念!
望住這三年的印記, 想去去旅行的開心事, 心情都特別好~

3 次日本 + 1 次韓國



再 2 次日本 + 3 次泰國



仲有好多次台灣, 原來冇打印的

講來講去都是東南亞的地方, 係呀, 我又唔係對歐洲太有興趣,
想過去澳洲歐洲等地, 但一見到 >8hr 的航程, 就立即打退堂鼓喇!
我實在太怕坐飛機了.......... 叫我坐咁耐飛機, 等如叫我去史.............
所以我諗我哋都至多係 repeat 又 repeat 地繼續東南亞

星期五唔煮飯, 波比先生最開心啦, 有得出街食!
去咗旺角, 發現火車站駁去花園街的天橋下面, 有一間叫「麵一」的日本拉麵店,
好似好日式啊, 就試試啦!
不過有點失望, 湯底絕對不是日本正宗的, 好明顯係開濃縮湯底的味道......
麵條尚可, 彈牙~

白汁薯仔肉丸

今日又見咗一個阿 B, 有一個好可悲的遺傳病,
明知過唔到兩歲, 明知身體會一日一日的差,
見到佢全身的肌肉根本都冇力, 連想喊都冇力時, 心入面的難過, 很難形容

懷胎十月的小生命, 看著他一日一日的流逝, 對媽媽來說, 是何等的難受
「身體健康、快高長大」是理所當然的願望, 但對某些人, 其實是奢侈的願望
*********************************************************
今晚收工好攰, 因為日頭忙得太緊要,
簡單的煮了白汁肉丸薯仔, 哎呀, 唔記得加香草添............

餵奶奶之成功篇

今日又去睇小肥 B, 今次老細俾我落手了!
自己抱, 自己餵一個只得 3 日大的 BB, 餵時同餵完要掃風,
成功令到佢 burp 咗一啖氣, 原來係好有滿足感~ 好開心~
餵完奶再塞返佢入氧氣箱, Mission completed!!! Yeah~~

咁細個 B, 如果冇咩事其實已經返得屋企,
終於都明白D 朋友講, 拎個咁細嘅 B 返屋企的恐怖法,
未經專業人士指導下, 真係唔知點抱點餵奶點沖涼~

BB 病房的姑娘個個都似好年輕, 但都架輕就熟, 俾我就始終係雞手鴨腳囉............. 有待學習!
舊老細以前教我時, 叫我:「妳生個就知點抱o架喇」
哈, 可惜我都真係冇生仔的打算, 想學也無從入手....
我都有諗過去上D 陪月員班, 唔知得唔得嘅呢? 哈哈哈!

多謝 Cora 姐前排去新加坡時, 買咗包肉骨茶的香料俾我,
今晚整咗, 其實應該係今朝整, 返工前煲好再放入真空煲, 煲咗成 12 個鐘,
返到屋企就飲得, 好好味呀!

話說我都係喺泰國飲過一次, 那次的印象唔太深刻,
今次自己煲, 反而一飲上癮,
香料同藥材的味道, 加上胡椒的味道, 辣辣地, 原來係好暖胃,
網上睇睇先知D 人通常好凍的時候就煲, 飲完就好溫暖!

正呀, 希望我喺香港都搵到香料包, 可以再整啦!