豬欄生活: 9月 2010

2010年9月29日星期三

福岡 Part 3 - 海の中道海浜公園

第二日在福岡, 早餐是超鬆軟卷蛋, D cream 好滑, 真係好好食, 好想帶返香港
波比先生有蘋果蛋糕, 都唔錯!

我們都很喜歡大自然, 去旅行一定要到郊外走走, 要看在香港看不到的風景
今日, 我們要到海の中道海浜公園, 是一個旅遊書冇介紹的地方, 在福岡的旅遊網頁見到,
那裡不同時節, 有不同的花卉, 可惜今年太熱, 否則我們應該見到鬰金香

又是搭巴士, 可能因為是閒日, 冇乜人!
到站都係得我哋落車

經過沿路有一大片波斯菊, 好靚啊~

到了到了, 成個公園都冇人咁濟囉...........幾萬呎地方, 我們似包場, 沿途見到不超過 10 個遊人

好好天, 每一個角度都係好靚的風景!

最開心是可以餵鴨仔, 成班走晒埋嚟, 好攪笑呀!!!

又見到袋鼠!! 上次去曼谷見到的, 全部都瞓晒覺唔郁, 今次終於見到 D 會跳跳跳的喇!
左邊嗰隻真係袋住個仔o架, 好得意呀!

仲有河豬, 其實我哋可以行入去, 但佢哋太熱情了, 攪到我哋驚驚唔敢入....

呢隻係咁咬個籠, 好傻呀佢個樣!!!

仲有好似卡通片入面嘅馬, 好靚仔啊!!

真係曬到死, 我不停的出汗抹汗, 把幾多防曬都抹掉.....
呢日之後, 變咗賓賓.........

話咁快就影咗兩個鐘, 好怱忙地趕埋呢個景點, 好靚的摩天輪呀~~

太熱頂唔順, 搵個涼亭坐吓 --> 野餐! 嘩哈哈哈!!
今日是八月十五中秋節啊, 老婆帶了自製的月餅, 仲有尋日買的巨峰提子嚟啊~
多寫意的行程!

睇睇地圖, 多得入場的嬸嬸介紹, 我哋先冇 miss 到最後的景點,
係一個好多花的地方, 好靚~~

12pm, 只逗留了兩個半鐘, 我哋就要走了,
因為要搭 12:18pm 的那班車呀, 要趕住返天神食和牛 lunch 呀....
否則其實呢度真係好靚, 好應該要慢慢行, 行上一日都不算多!

2010年9月28日星期二

福岡 Part 2 - 吉列豬扒 - 地道超市掃貨

話咁快就返到天神, 已經係八點幾, 即刻去到 Solaria Stage 商場的 basement,
成層都係食店, 間間都想食呀~~~~~~

其實我一早已經上咗日本版 openrice 睇定 http://r.tabelog.com/
揀咗要食這間 博多とんかつ処 的吉列豬扒 , 因為今年去大阪冇食過啊!

入到去, 有個店員竟然識得講好流利的普通話, 介紹了唔同的餐 (因為冇中文/英文餐牌啊)
我點了豬扒 + 炸蝦, 隻蝦真係太好味了!!!
絕對係新鮮蝦唔係急凍蝦囉, 因為蝦的鮮味, 竟然可以久久留在口中!

波比先生的 1.5 倍吉列豬扒, 我都唔明佢做乜叫 1.5 倍份量咁博....
最後食完, 我哋兩個個咀入面都損晒, 因為實在太脆太勁了!

食完發現同一層竟然有超級市場, 去買了蛋糕同巨峰提子

返酒店放低戰利品先, 酒店下面有好多「屋台」, 即係夜晚先開的大排檔, 好有風味

本來我哋星期四打算食呢間小金, 佢好出名炒拉麵,
點知星期四去到....... 休息............
後來先知佢係星期四/日休息, 好傷心!!!

再出發, 我們去了一間很地道的超級市場,
旅遊書同 newsgroup 都冇介紹的, 係我自己上D 日本網站搵返嚟,
因為係俾 local 人買嘢, 所有嘢都賣得比大丸/三越的超級市場平
我見到啱啱買咗的蛋糕, 喺度平 30yen 囉.......

雪糕入面有蕉!
波比先生很想買這款 Qoo, 佢話屋企冇 (我哋屋企除咗麥兜, 又有好多 Qoo)
但老婆話太貴, 唔准買, 拍照留念啦!

最後, 睇吓我哋幾癲!!!
波比先生好似天旱咁買咗十幾罐咖啡囉!
又買咗 CC Lemon - Zero 版, 之後三日有排飲!
仲有杯麵同拉麵, 最特別的係阿蘇 (九州的一個地方) 4.5 牛乳!
北海道 3.6 就聽得多, 咁 4.5 又有咩唔同??
試過之後, 都係好濃的奶味, 可能 3.6 已經好好飲, 4.5 又唔差得幾多~

呢個神戶布甸係喺貴超級市場買的,
上次去神戶, 真係覺得佢D 布甸好正, 今次又買到, 算是十分幸運!
真係神戶食過的那種超滑滑味道, 好滿足!!!

福岡 Part 1 - 一蘭拉麵- Marinoa City

別人問:「九州最出名係咩呀?」
「梗係拉麵啦!!!」

拉麵痴的波比伉儷, 一嚟到福岡第一個活動, 當然是去食一蘭拉麵了!!
第一次食一蘭拉麵是在東京, 但九州福岡先係佢嘅發源地啊! 點可以唔食?!
又嚟剔剔剔時間!

用方形木盒裝著拉麵, 係福岡店獨有

一貫的一蘭風味, 麵彈牙又香蛋味, 超級豬骨濃湯真係 ichiban!!!

食飽飽, 我們就出發去 Marinoa City (Outlet) 掃貨,
要搭巴士去, 之前都好擔心搵唔到個站, 點知一去到就見到了!
去咁多次日本都係搭過一次巴士咋, 驚唔識搭唔識落車,
但日本人真的很貼心, 只要上呢個 website, 就可以 search 到你要搭的巴士幾點有車,
搭幾多個站, 預計幾點到達等等資料
http://jik.nnr.co.jp/cgi-bin/Tschedule/menu.exe?pwd=gb/menu.pwd&mod=F&menu=F

去到巴士站, 好驚唔識截車/走車,
但實在太先進喇, 福岡的巴士是有 GPS 系統, 站內有電子顯示板, 顯示你架巴士仲有幾多個站到,
實在太方便喇!!!

順利地上咗巴士, 上車要拎一張飛仔, show 返你喺邊個站上車, 因為有分段收費!
搭半個鐘先到 outlet, 沿途欣賞一下福岡的景色, 幾好天啊!!

去到 outlet, 嘩, 實在係乜都想買囉......
D 家居用品實在係太靚太可愛了...... 不過又實在太貴!
波比先生買到波鞋 (哈, 差不多去親日本都買波鞋), 恤衫,
我就買到個 Polar Bear 月曆送俾波比先生,
仲有好 cute 的矽膠烘焙模呀! 係可以入焗爐的!

那裡還有個摩天輪, 坐上去可以欣賞福岡夜景,
但我們還要回天神食飯掃貨, 所以冇坐喇, 影影相都好開心!

巴士站後面仲有間好靚的教堂, 大概係俾人結婚行禮用的~

去到車站即刻有車, 用盡一分一秒, perfect!!!

2010年9月27日星期一

上海最終回生煎包 - 到著福岡

第三天的旅程, 又晨咁早就醒咗,
七點幾就同波比先生出發, 食我哋喺上海的最後一餐,
由酒店走一個街口, 就到了旅遊書都介紹的「蔡記生煎包」,
平到喊, $3.5/四個囉, 加埋杯 $1.5 的豆漿, 呢餐 $8.5 攪掂, 喺日本食個包都唔得呀.....

如書上所講, 呢度的生煎包底層好脆, 不過就唔夠小楊生煎咁多肉汁, 肉而且較肥,
不過都是另一番風味,
豆漿好濃豆味, 正!

打算 8:15am 離開酒店, 見仲有成半個鐘, 就又到外灘走走,
行便利店, 買了我好鍾意的國產海南椰汁啊 (香港好難買到)!
在外灘拍拍照就走了~

我哋搭地鐵再轉磁浮, 不過走咗車..... 一等要 15 分鐘,
其實唔轉磁浮繼續搭地鐵的話都應該已經到咗機場, 真係搵嚟攪.....

比原定時間遲了到機場 check-in, 幾驚冇得一齊坐,
點知好好彩, 班機唔 full, 又有窗口位之餘, 隔離位仲要冇人,
而又食咗近年咁多個 trip 之中, 難得要一讚的飛機餐!!
魚柳飯好食之餘, 有我最鍾意的紅豆糕!

最正係呢一兜伴菜, 有海蜇, 芥末八爪魚,
右下角的是福岡出名的明太子, 被昆布包住, 味道好特別好掂呀!!
可能因為這班機上 90% 都是日本人, 招呼也好一點??

只需要 1.5hr 的機, 就可以由上海去到福岡, 真係好方便,
而且對怕搭飛機搭到腰都痛的我來說, 咁樣分開兩程機搭, 其實真係舒服好多!

下面見到九州, 是鹿兒島嘛?

看日本的海是多麼的清澈, 怪不得愈來愈多人要去沖繩玩水上活動

飛機準時起飛, 準時降落, 見到飛機入油啊, 有趣!

這個福岡機場, 分開國際線同國內線的 terminal,
我們拎晒行李後, 要搭 shuttle bus 由國際線 terminal 去國內線的 terminal

之後就搭地鐵, 5 個站, 只需 250yen 就去到酒店了, 真係平到笑!
無論去東京去大阪, 淨係機場去市區通常都要 1000-2000 yen 囉!
因為這個機場好似以前的啟德機場咁, 座落市區內, 所以減省不少交通的時間同費用, 真係 very good!