已經半年

今日是六月的最後一日, 即是話, 2010年已過了一半,
你如果曾訂下 2010 年的大計, 現在又完成了多少?

我的 2010 年, 暫時還算過得很好, 希望可繼續~

今日天氣很好, 放工時望著藍天變黃昏日落, 好靚, 心情都好好~

前幾日為了整芝士蛋糕, 買了一瓶酸忌廉, 但買了先發現原來幾日內就到期 =.=!
為了用咗佢, 四出搜尋有咩食譜, 最後都係冇一個食譜太啱心水.......
原來酸忌廉是可以用來整焗薯, 又或者焗蛋糕都得,
講起焗薯, 我就 associate 到忌廉薯餅 (想起了去日本的超好味 creamy 薯餅), 但又唔想炸,
諗諗諗, 呀, 不如整個焗牛肉忌廉薯蓉酥吖!

很簡易, 就是 牛肉 + 忌廉 + 薯蓉 夾入酥皮度焗咋嘛!
ayia, 不過餡料唔係好夠咸 (因為我好怕太咸冇得救, 所以通常放鹽都好輕手),
第一次焗酥皮的菜式, 先知原來酥皮面要掃蛋汁的!

登鄧, 整好! D 酥皮焗完好好好香呀~~~


嘻, 加點茄汁/ 咖哩汁食就正呀!



好想下次再整酥皮菜式, 我真係好鍾意酥皮類食物的!

「都係想妳開心D o者」

今日好多嘢想記

先嚟向 Cora 姐祝壽, 生日快樂, 開開心心, 考試順利, 話咁快就升呢變 Master 喇!

不過真的開始發現, 到了今年, 真係唔好祝人「年年有今日」了........
很難想像, 我衣櫃裡的麥兜衫, 還可俾我著多幾多年 (應該話幾時唔好意思再著)
很難想像, 到了一個開始好似驟然老得很快的年紀, 當有了這個字頭, 點講都係好似好老....
忽然間, 好想將一切停在 2010 年我生日之前,
似乎生日後, 好像背負多了很多包袱, 心中不禁好焦慮......

原來人, 真的會怕老, 亦都會怕死.....
當你走過了成日去飲囍酒, 身邊頻頻有人結婚的幾年,
就會走到不停有人生仔, facebook 佈滿 BB 相的幾年,
再過多十數年, 也許就是不停去大酒店躹個躬的幾年, 這就是常見的生老病死~

今日睇門診, 難得見到一個80 歲都好精靈的伯伯,
為人風趣幽默, 當我好認真地問佢病情時, 佢竟然同我講了些好抵死的爛 gag,
「阿伯, 你對眼睇唔睇到嘢呀?」(白內障)
「睇到上面, 睇唔到下面」
「吓?」
「妳(口罩)上面眉清目秀, 下面(口罩內)就睇唔到, 應該都係靚女」
「阿伯, 我同你講緊正經嘢呀.....」
之後仲話:「唉, 妳日日睇咁多病人, 我都係想引妳笑吓, 想妳開心D o者」

是的, 日日有你咁好的病人, 我會人都開心D~

繼上次煮了青咖哩, 今晚煮了泰式紅咖哩, 發覺個真空煲真係好好用,
D 薯仔煲一煲再用真空煲焗吓, 就已經好林好入味了!



呢排煮得多, 食得多, 又帶飯帶得多,
肥史了............

今晚食西餐

每逢一落雨, 醫院的 Canteen 就會多人到迫爆, 因為平時會出去食嘅人都唔出去,
咁就好慘喇.....
Choice 1 - 燒味部: 排咗成 30 人, crazy , 等到碟飯我都夠鐘開工了....
Choice 2 - 兩餸飯: 好少少的餸都賣晒, 得返D 瓜炒瓜同青菜.......
Choice 3 - 西式碟頭飯: 本來是最穩陣的牛扒飯豬扒飯, 但係都賣晒!!!!
最後, 叫咗最少人等的碟頭飯部, 一款叫「蝦醬雞粒豆腐飯」,
成碗都係得豆腐, 得幾粒雞囉, 冇味, 真係好垃圾, 又一次覺得食 Canteen 真係好折墮囉......

唉, 所以未放工都諗定今晚一定要煮餐好, 聽日一定要帶飯!

今晚好開心呀, 第一次煮意大利飯,
早兩星期特登去 CitySuper 買了意大利米, 煮係幾花時間, 但都唔算難煮,
配了栗本菇、蜆肉、蝦仁, 一路煮已經聞到香噴噴, 健康又好味!
波比先生好鍾意, 竟然食飯唔食餸~

一包三十幾蚊的意大利米, 可以煮兩至三次, 下次試吓煮蕃茄味?





今日又好幸運地見到有豬仔脾賣, 都好耐冇見過了, 立即買啦!
香草焗豬仔脾, 最開心係拎住成隻嚟齒!



聽日有返個人食的飯盒了!

再接再厲之檸檬芝士蛋糕

上星期的芝士蛋糕, 未做到理想的味道,
仲有大半舊 Cream Cheese 未用, 今日再整多次~

今次醒喇, 跟D 人氣 blogger 的 recipe 造, 總比上網亂搵的 recipe 可靠掛!
今次冇落麵粉, 只是 cream cheese 同 sour cream 為主, blogger 亦話唔好焗咁耐,
加了少少檸檬味, 好快就焗完喇!!

今次出來的效果好好多, 好 creamy 好滑呀,
影相前, 波比先生懶勁話幫我切朵士多啤梨花喎, 哈, 真係服咗佢~
有人成日話自己識整甜品, 但咁耐都未整過俾我食囉, 幾時先有第一次呀??????

今次波比先生的 comment 比上次好喎,
佢話呢個有去日本食的北海道入口即溶 cheese cake 的水準! 嘻!



我已經開始閉關讀書喇~
尋日已經上完 Year 1 的最後一堂了, 好嘢!!
仲有 12 日就考試喇, 真係唔好懶喇!

簡易午餐 - 洋蔥牛柳粒

通常星期六我哋都唔會喺屋企煮飯, 因為波比先生一定嚷著要出街食,
不過今日落大雨就唔好出去喇, 喺屋企煮啦~

上星期有一次煮牛肉, 醃得唔好, 攪到D 牛肉勁 un, 嘥晒......
今次醒喇, 冇落錯調味料喇, 醃得剛剛好,
終於都有好嫩滑的感覺了~
食的時間加一點點日式燒肉醬, 甜甜地好好味!

祖國攝影團?

好忙好忙, 但總算一齊努力清晒所有 case 了!

星期五, 休廚日, 我們約了肥仔去食餐好,
當然想起了令人回味無窮的名寶石餐廳, 好彩早去, 7pm 已經冇晒位!

最愛的鵝肝牛柳, 兩樣都超讚!!!



波比先生的紅酒燴羊膝, 炆得好夠林, 好入味, 正!



講起不如搵個 weekend 一齊去個祖國的影相 trip, 好喎!!!!
不過一係要暑假去, 一係就要等我出咗下學年的時間表先知邊D 星期六唔洗返學呀~

祖國其實有好多風景好靚的地方, 不過永遠都係擔心食住唔安全唔好, 所以唔敢去,
見過有D 攝影為主的旅行團, 一路都好想參加, 唔知有冇機會?
http://www.goexpo.com.hk/

白汁煮青口

乜唔係應該整白酒煮青口咩?
哈, 冇呀,  屋企冇白酒, 亦唔想為咗煮個餸買支酒返嚟
(我雪櫃都有支擺咗成四五年的紹興酒, 就係煮咗一次餸就擺到而家...),
所以整白汁好了~

青口是澳洲入口, 非常的肥美同鮮味,
波比先生讚 good 之餘, 其實唔係好鍾意食青口嘅我都覺得唔錯呀!



呢排雖然好似可以準時放工, 但其實真係好忙, 其實我D 工作係未做晒咁走,
只不過係唔 urgent 的 admin 嘢就等吓囉,
病房的 case 睇唔晒都冇法o架, 少咗一個人又有人放大假, 真係多 case 到我做到 7pm 都係唔會睇得晒, 我已經喺 office hour 內好盡力地睇十五六個了, 仲可以點?

或者以前老細講得啱: 你日日做到死, 夾硬做晒D 嘢, 人哋(高層) 咪覺得既然你哋少咗個人都做得晒D 嘢, 點解我要俾返個人你哋, 點解我要加人手俾你?
冇人會知道係你自己做到 7pm 冇 OT 計而做晒D 嘢o架,
反而你做唔晒 D 嘢, 俾人嘈, 最好病房就向高層投訴, 話我哋三日都未睇到個 case,
咁人哋先知道我哋唔夠人手, 先知我哋的苦況,
不過 suffer 的, 就係 patient 囉~

終於在我的 Tx Room 有部電腦了, 方便好多~
我的寫字枱係咪好「古色古香」呢? 而家真係想買都買唔到~
我間房仲有D 木 + 籐造的櫈添.....

香草燒雞脾

香草, 還是第一次用來煮餸,
睇到靚仔廚師煮乜都落一堆香草落去, 整完又好似好好味咁, 於是好想試試!

去邊度買? 喺元朗買原來都有點難度, 最終走到 Citysuper,
見到好多種類的香草, 一樽又一樽好靚又好 pro,
先買了最入門的 Rosemary



雞脾要尋晚醃定, 除了香草還落了點黑胡椒,
焗的時候, 放了薯仔片在底, 吸盡雞肉汁的味道!

一路焗一路聞到好香, 嗰種香味, 咪就係 Taste 燒雞的香味, 原來就是 Rosemary 的香味~

完成了!!!!!!!!!!!!!!!



嘩, 都算好滿意, 雞脾其實可以再咸一點, 不過健康的話就唔好食咁咸喇~
下低的薯仔真係超超超正, 波比先生係刮埋個盤咁食, 食到停唔到口 (好似薯仔變了主角)
因為吸收了雞和香草的味道, 真係 very good!
不過, 查實又幾唔健康, 因為浸滿了雞油, 算啦算啦, 一餐半餐............ 食咗就唔好諗!

明天要繼續準時放工, 繼續整好餸!

台式肉燥飯

今日試試整台式肉燥飯, 真係好開心, 因為整得好成功, 味道有九成相似,
波比先生好鍾意食肉燥的, 每次去台灣食店, 佢都必叫肉燥飯多肉燥,
而家我識得自己整, 波比先生可以在家都食到, 食幾多都得,
見到佢滿意的笑容, 我都好開心呢~

睇相顏色沒有出街食嗰D 咁深色, 莫非要加點老抽?

\

是日另一精選係 - 冬蔭公炒魚蝦蟹(柳)
都係近來睇食譜先知冬蔭公醬原來除咗煲冬蔭公湯, 連炒餸都可以用,
加少少魚露釣吓味, 出來的味道都唔錯幾得意, 好泰式的味道! 又是很開胃!



每煮一種新的味道, 都是期待又興奮,
老實講, 煮了六年真係好多簡單菜色都已經煮到爛.....
翻炒再翻炒後, 前一兩個月開始真係好頭痛唔知煮乜,
每一日放工搭車就要諗定煮咩, 真係好大壓力諗到頭都痛............

而家作多點新嘗試, 反而有了點曙光似的, 對煮飯冇咁驚恐喇!

七年之聚

我們畢業已七個年頭了, 好難得今次約得算好齊人, 一齊開開心心 gathering!

七年之癢, 外界人睇我嚟的工作好似好好做, 或者我哋睇對方的工作好好做,
但真係有苦自己知, 唔同 setting 都有唔同的困局,
一齊出嚟的時候, 吐吐苦水減減壓, 是很大的得著!

轉工, 可以話好易, 又可以話好難,
當有了相當的年資, 開始對工作性質及回報都有了一定的要求,
要找一個「理想」和「可以長雙廝守」的地方, 的確是不容易~
或者求安於現狀, 也算是不錯, 世界上根本冇完美的工作

很開心的 gathering 和生日會, 希望快快有下一次啦~

美味安格斯牛大發現

今日, 受朋友所托, 去了看看人家的小朋友有沒有一些我的專業範圍內的問題,
排政府的 assessment, 有時真係排到天光都未排到,
查實我都唔係好清楚佢哋俾 case 做 full assessment 的準則.....

政府有的錢, 就去咗起錨,
學榻樹意外逝者的家人話齋, 應該用錢的地方就唔用囉!!!
貼到成條路都係 banner, D 人就會俾你催眠到起錨呀? 傻嘅咩!!!

下午就會合波比先生, 在旺角搵食,
有人話想食花園餐廳, 但點知俾我搵到好正的一間扒房, 連 openrice 都冇資料的,
佢賣安格斯牛扒, 牛扒來了, 真係好堅喎, D 肉質真係正嘢囉! 仲超大塊!
佢有把用來切牛的利刀, 上面仲刻住 Certified Angus Beef 添喎~

不過, 餐湯同餐飲就幾唔得.......

有興趣就約我食飯, 等我帶你去啦! 個位置好難形容~



那個小朋友的媽媽好客氣, 錢我就一定唔會收o架, 又唔係做咗D 乜,
於是佢送了一大袋家人種的荔枝同黃皮, 好正好甜呀,
仲要係標榜冇農藥冇催熟劑, 多謝晒~

Good Morning 之杏仁檸檬海綿蛋糕

食咗 5 日, 終於都食晒星期三整的芝士蛋糕喇........ (唉, 我都話食好耐先食得晒....)
咁就可以整第二樣蛋糕!

今日簡簡單單, 整海綿蛋糕好了, 可以當早餐, 可以帶返工食, 應該會易D 食晒!

整了我最愛的檸檬味, 又加了我好鍾意好香的杏仁片,
焗喇!



脹起喇!



嘻嘻, 話咁快就整好了! 開心~~
朝早可以食了熱辣辣香噴噴的蛋糕, 真係好開心唷~

Master course 倒數中

不知不覺, 上到 Master Course Year 1 的尾二一堂,
這個學年快完了, 我快有返幾個 free 的星期六了!

不過, 也收到 e-mail, 要準備下一年的內容,
有 practicum , 睇唔同 specialty 的 clinic, 還要寫 case report! (唔知會唔會撞到我D patient?!)
要上兩科 statistics and research method...... (想起了 VC),
還要開始想想要寫份 Paper 的 topic 了........

有同學都話覺得有點被騙, 明明是 MSc 不是 MPhil, 點解要寫 paper?
寫得 paper 點解我唔去讀 MPhil?
哈, 冇辦法啦, 肉隨針板上........

消暑涼伴 - 泰式雞翼

三十二度的天氣, 要消消暑,
整個涼伴菜式先!

向來波比太太都唔會為咗一個餸買五六樣調味/配料, 太麻煩了,
而且D 肉買 $20, D 調味要買 $40 , 實在不合符「麥太經濟原則」,
橫豎食物落了胃部之後, 都係殊途同歸, 吸收成營養o者, 何必為了味道花太多精神?!

不過終於都明白, 有D 味道不是靠那些包裝醬料可做得到,
還是要左溝右溝才能做得出餐廳食過的那種味道,
為了尋找一些味道, 今日就開始破例吧~

買了 6 種配料去做這個雞翼,
酸酸甜甜超好食, 夏天食真係好啱, 好開胃!!!
放在雪櫃凍食都得, 波比先生睇波又肚仔餓就啱晒喇~

今天天氣很好!

很愛現在的家, 看到的一片天空~

不知不覺又半個月

返工的日子, 時間過得很快,
星期一二忙個癲, 星期三通常會平靜D, 星期四做 X-ray, 星期五很快完~

今日見了兩個 Difficult cases, 攪到尋晚係咁發惡夢, 好似冇瞓過咁.......
好彩, 順利地見完了, thanks GOD!

見了一個聽障的男孩子, 中學生的年紀, 小學生的談吐,
為人好純品, 好乖, 好有禮貌,
我還以為這麼乖巧的男孩子已一早絕了種,
香港的男孩不就是只顧打機上網被父母寵壞冇禮貌到乞人憎的嘛? (我見得太多)
總覺得有聽障的人, 人品較乖巧,
或者是因為他們聽得少, 聽不清, 所以沒有機會去學壞, 還可以停留在一個純潔的世界裡,
作為父母, 你想要一個聽不到的乖孩子, 還是一個聽得到的壞孩子?

原來還有三個星期, 我又考試了!
哎呀, 要開始讀書喇..... 謝絕遊玩三星期.....

黃金蝦

黃金蝦呢個菜色, 話說之前喺大排檔食過一次, 超好食!!
找來了食譜, 今日自己試吓整,
用了蝦仁, 免了剝殼的麻煩,
沒有先炸一炸, 只是半煎炸, 為的是健康一點,
味道都好好味, 咸蛋黃好香, 加埋好爽的蝦肉真係好正呀!



我的健康飯盒



迷上了睇 Jamie Oliva 的PodCast 煮餸 video, 搭車時最佳消遣!
不過呢幾日天氣真係好熱, 喺廚房煮餸, 覺得自己喺個焗爐度咁,
一路煮, 一路滴晒汗.....

我的第一個芝士蛋糕

woo, 美好的假期, 一早就去咗買餸同買材料整蛋糕,
天氣熱到- 牛油拎到返嚟都溶了!

咁多種蛋糕之中, 波比先生只係較鍾意食芝士蛋糕, 有埋芒果佢就仲開心!
所以就整了芒果焗芝士蛋糕啦!
只是從網上找來 recipe, 盡量揀個少牛油少糖的,
當見到一個蛋糕有D 要落 100g 牛油, 1 杯糖, 真的覺得太肥了...........

第一次用了買咗成年幾都未開光的打蛋器, 一打, 飛到周圍都係....... \(*o*)/
加晒材料, 焗喇!
嘩, 睇住佢慢慢脹起, 好緊張!



焗好了!


加埋超甜的菲律賓大芒果, 完成了!



下午茶時間食返件, 賞心樂事~
不過味道同喺街食的有點唔同, 哈, 落得太少糖同冇落 Sour Cream?
下次再試試其他的 recipe 先~ :P

今日去咗行書局, 買了本烹飪書啊! 好多菜色都好想整啊!
仲喺間蛋糕材料店買了材料, 下次要整檸檬蛋糕!

晚餐就煮咗紐西蘭牛肩肉



還有北海道牛奶汁吞拿魚意粉 + 多菜



太美滿的一日了, 美食不一定要外出尋找, 自己煮反而仲多樂趣~

有假放, 真好!

今日見了個新 case, 個阿媽..... 勁似王祖藍!!冇錯, 係個阿媽似, 我望住佢, 點解可以似得咁緊要, 完全係王祖藍扮緊女人個樣!!!
我懷疑他們是兩兄妹, 不過媽媽不是姓王, 太離奇了!!!

師弟返埋今日, 就會去 15 日北海道! 可唔可以帶埋我去呀???
借了部 DSLR 俾佢, 希望佢影多D 靚相返嚟, 下年我可以大條道理去啦!

今個星期實在開心, 返兩日放一日,
今晚約了波比的大學同學去睇波, 先去了 Pokka Cafe 食飯,
地方靚就靚



但係D 食物愈來愈退步, 一個意粉/飯都要 $80-100, 但係材料製法實在求其,
只是改一個好長好似好複雜的名字, 但出嚟真係「虛張聲勢」, 攪得不中不西不日,
扒餐的伴碟菜又竟然有豆腐, 你話係咪 O 咀?!

較為正常D, 只有甜品和咖啡.......
我諗冇必要我都唔會再幫襯!



上到肥仔家, 等開場的時候我已經勁眼瞓 (人老了真係好早眼瞓),
真係頂唔住瞓著咗!
睇咗半場葡萄牙我就走了, 太悶, 同埋驚太夜冇車返屋企,
下次再睇過啦!

有營生活

上星期六的 Master course 課堂, 請了營養師主講其一課,
好有得著, 了解了更多正確的飲食知識同埋澄清好多坊間的謬誤,
自己買餸時, 會更加識揀應該煮咩先至健康~

另外還提到要控制糖尿病、高血壓、高膽固醇的飲食,
聽完真係發覺原來好多食物都真係好唔健康,
以上的病, 一得咗就真係手尾好長, 正所謂預防勝於治療, 由仲後生開始注意多D 好!
日日喺病房見到呢D 病人, 你就會知佢哋真係有幾慘......

由今日做起, 食 Canteen lunch 時唔好叫嘢飲,
明明有雙蛋都係食一個蛋黃好了,
今晚食飯盒, 都唔好嫌煩, 去買多半斤菜, 煮D 嚟食同帶飯~

哈哈, 不過留咗D quota, 夜晚都是敵不過新買的 Espresso 咖啡同埋波比阿姨日本手信的誘惑...



有金泊喺件餅到?! 太浮誇了...... 我哋一定唔會買呢D 手信......

夢寐以求的焗爐

小時候我會想第時大個, 要有一個靚廚房, 這個已經實現了多年,
另外還希望有一個焗爐, 可以焗蛋糕焗麵包,
家中有一個已用了六年的小多士焗爐, 剛剛壞了,
今日終於的起心肝去買返個, 今次買咗個大焗爐,
是我擁有的第一個可以調節溫度, 可以焗到一個蛋糕的焗爐, 太開心了!

不過現實是, 波比先生不愛蛋糕, 焗了也是嘥氣, 我不想一個人要鯨吞一個大蛋糕....
但用來製作一些焗的菜色, 還是十分合適的!
想起燒雞、焗 pizza、焗龍蝦、焗飯意粉、焗牛油金菇, 真係正呀!
我會煮多D 好餸o架喇!



呢排喺元朗食到唔知食乜好.......
今日新嘗試, 由屋企行咗去 YOHO Town 後面, 好順福嗰頭搵食,
嘩, 原來嗰邊好多嘢食o架!!!
想去一間 cafe, 點知 full 晒......
見到有幾間泰菜館, 揀咗一間入去, 全部侍應都係泰國人呀!
叫咗個泰式海南雞飯, 雞的份量唔多, 但係味道好得, 好正宗, 個汁最正宗!
泰式咖哩牛: 咖哩好香椰汁味, 送飯一流, 攪到我食咗好多飯 (=.=) 肥........
連飲品, 兩個人都係 $56, 抵都爛呀~~~

原來住 YOHO 都幾好喎, 不如............

老公集體失蹤事件

由尋日開始, 發生一連串的老公集體失蹤事件,
剩低老婆一個人食飯, 一個人瞓覺,
打電話搵到老公, 點知背後傳來一陣又一陣的歡呼和慘叫聲,
似乎老公都身處險境... 身中劇毒.....
老公都因為一隻杯而中毒, 呢隻杯, 就係世界杯!

嗯, 好在我都就嚟考試了,
老公睇波的時間, 我都可以閉關讀吓書~
呢段時間, 唯有我同麥兜相依為命啦~~~



係呀, 呢兩日得閒, 將一D 我舊有的遊記搬咗嚟 Blogspot, 左邊的分類可搵到
重溫相片, 讀著一篇篇的遊記, 人都開心D~

榮休宴

波比阿姨結束了多年的公務員生涯, 咬長糧享女福, 哈哈, 所以要賀賀佢,
多謝阿姨請我哋食飯, 潮江春的環境同食物都一流,
席間波比一班老表講起大家的無聊趣事, 笑到肚痛!

大虎蝦超好味啊!!!

慶功 - 第三擊

哈哈, 我們又以慶功為名, 去豪食一餐,
今次係慶祝好朋友終於都讀完了佢個 Master, 仲攞到 Distinction!!! 點可以唔食返餐呀?!

本來想去食日式放題, 打去 book 啦, 咩話, 要十點先有位?
唔係化.... 唔好玩啦.....

想食日本嘢, 唯有去食質素一向穩定的板前啦~





還有太多, 好滿足~

試試芝士蛋糕, 嘩, $18 得咁細舊......
不過味道都OK, 但似雪糕多過似蛋糕!



又係時間催逼吓好友快快攪結婚的事,
唉, 都唔明白點解有女孩子可以咁唔緊張自己的婚禮........
又或者佢覺得, 錢解決到的問題就唔係問題掛?

在病房睇緊一個 Demented 的阿婆, 電視機終日播著「起錨」的廣告,
問阿婆「吞晒未呀?」, 阿婆接著電視廣告說:「起錨咯」
我「吓!?」 阿婆「起錨呀」
啞咗.............

我又暈喇...

唉, 都差唔多成年冇大發作的 vertigo, 今日忽然間又來了!
都是怪那懶瞓的波比先生, 瞓瞓吓 /maang1/ 走咗我個枕頭嘛? 個頭瞓得唔夠高好易出事......

還好 book 到 staff clinic 即日睇, 不過都是 symptomatic 的開了止暈止嘔藥俾我,
係啊, 暈到想嘔......
睇完醫生 3:30pm 早走了, 早走的感覺真好,
沒有人迫人的搭車, 慢慢的行一行超級市場, 回家途中仲欣賞到一片藍天白雲,
如果一星期有返兩日可以 3:30pm 放工, 你話幾好 (妄想中)

今日無啦啦俾隔離老細 refer 咗個 case 俾我, 問我可唔可以教佢讀唇,
因為那個病人無論戴了任何助聽器都冇用, 都聽唔到, 年齡唔算大, 考慮緊會做手術,
讀唇?! 都冇話唔得嘅, 我都話唔得, 咁醫院仲有邊個教得?
但係, 會變咗教 IPA 同 phonetic 嗎???

八年前的今天, 我們第一次見面,
如果今日唔係唔舒服, 我們又應該借故慶祝一番,
在家煲了粥, 有青菜同金菇牛肉, 清清淡淡, 平平安安的, 八個年頭~

何價?

今日在病房聽到, 有個病人走了....... 很是心寒..........
因為在 A 病房住了好耐都相安無事, 因為這個病房的都是一些很盡責很一絲不苟很 top 的護士,
有一日轉了去 B 病房, 第二日就死了, 仲要係死於很離譜的原因......
點解有時 D 護士可以咁得閒聚埋吹水去邊度食去邊度玩好,
但病人明明有需要都完全唔理.....病人就死佢都唔理...........

我還太記得那個病人對我點點頭, 對我說話的聲音,
愈想, 愈心寒..........

我工作的醫院, 有幾個病房的護士真的很好,
但亦有些很不濟, 我最討厭到那些病房, 看到那些人的咀臉

抵咗

今日忙到史, 有個 patient 用了好多時間去睇, 但都值得的,
因為 4月上了個 course , 學識咗有D 方法, 原來可以幫到某一D 問題的病人,
就因為幫到, 所以可以唔洗插條喉, 好感恩自己上咗嗰個 course 今日可以幫到呢個病人~
又覺得幾千蚊俾得抵咗!

放工返屋企, 檢視一下仲有冇蟲蟲,
廳同書房 ok 了, 睡房仲有少少,
買咗支據聞超有效的驅蟲劑, 噴呀噴, 希望聽日真係冇晒!

久違了的 Delicatessen Corner

今朝晨早起身, 繼續清潔, 終於都抹晒成屋D 牆喇,
呢兩日真係抹到傻咗, 又頸痛, 又膊頭痛......
為咗慰勞吓自己, 今日請波比先生去食 buffet

餓到死死吓, 1pm 出到尖沙咀, 去到海港城食 buffet 的酒店, 點知..... 冇位....... 唔係化......
於是睇睇朗廷酒店的 L'Eclipse 啦, 唔係嘩, 有人開完 conference 似乎包了成個餐廳......
波比先生又攰又餓, 行都冇力.......
於是我就提議去 Holiday Inn 的 Delicatessen Corner, 是一間食德國菜的餐廳, 佢D 德國腸好好味o架!!
去到, 冇人嘅, 環境好靜, 好舒服, 有一半都係外國遊客~
都好一段時間冇嚟咯, 有D 侍應我都仲認得,
叫了一份烤德國咸豬手, 勁好味呀~ 超脆呀~ 波比先生超開心! (有人終於開始有返電)


我的豬柳 set lunch, 左邊嗰堆, 唔係飯o黎o架, 我都唔知係咩,
texture 好攪笑的, 好似食緊發泡膠粒, 好輕, 唔似係 carbohydrate, 又唔似係豆,
總之好得意!!!



最愛係可以自己走去蛋糕櫃揀一款蛋糕, Tiramisu 正呀~ 好似好耐冇食過了!



飯後咖啡, 好香濃!



雖然食唔到 buffet, 不過今日的 lunch 都令人好滿足, 開心返!

之後大鄉里第一次行 K11, 都冇咩睇嘅,
再去旺角遊蘯 (要等今晚同波比 family 食飯呀), 行到好攰, 又食!
食了 Häagen-Dazs 的 Mini Lover Boat, 嘩, 都幾貨不對版.......
雪糕球又細, 擺位又求其, 上次喺沙田食都唔係咁o架喎! 同張 sample 相完全唔同喎.....

唉, 不過都係旨在有個位坐吓, 算啦~



返到屋企, 盡行滅蟲行動最後一個 step, 就係整D 驅蟲包都掛起佢,
掛咗幾包, 希望有用, 希望唔洗再煩啦!
如果唔係, 我哋真係要搬o架喇~~~

我要請鐘點

唉, 已踏入夏天啦, 點解屋企都仲係有霉霉, 呢排仲要有D 蟲蟲的踪跡, HELP!!!!

今日大半日都係喺度抹牆同滅蟲,
同波比先生講埋如果攪唔掂, 係咪要搬?!

呢個時候, 好想真係請返個鐘點,
好朋友一個人住, 佢一出嚟做嘢就已經請鐘點幫佢打掃, 佢一早都叫我請了~
可惜佢嗰個 $80/hr 太貴喇~

上網 search 吓資料, 原來而家 average 價都要 $65/hr,
嘩, 咁好賺?! 第時老咗做吓都唔錯喎!
但睇人話好難搵到個好, 有D 做得求其, 有D 做兩做已經唔係做得好都話要加人工......
唉, 都係睇睇有冇朋友介紹啦!

我哋兩公婆, 又唔係完全冇時間打掃嘅...... 不過...... 係懶囉............
同埋要抹牆/抹窗/洗雪櫃呢D 大工程, 一年頂多做一兩次o架咋!

唉, 呢兩日都係要自己努力攪返掂先啦!

什麼是生不如死

去了燒傷部, 睇咗一位 23% 嚴重燒傷的男士,
被紗布扎住了整個上身, 只露出少少的眼睛和咀巴,
已住了一個月醫院, 但我還能見到眼睛旁燒爛了的肉還在滲出血水,
佢講的說話我真係要八成靠估, 但慢慢都溝通到,
佢話真係生不如死, 扎住咗個個人已經一個月了, 完全唔郁得, 水都冇得飲滴, 真係好辛苦~
佢又話叫天不應, 叫地不聞, 冇人理佢......

我都好明白佢真係好慘... 爛肉的劇痛已一個月了,
唯有安慰佢:「唏, 你睇唔到咋, 你隔離房好多病人都係好似你咁, 冇得急架, D 肉係要時間慢慢好慢慢生返, 我之前睇過幾個病人開頭都好似你咁扎住晒, 真係要兩三個月時間先好得返o架, 忍耐吓啦」

唉, 有時寫咗排板, 叫護士要咁咁咁幫個病人, 但係好多都草草了事,
病人渴得緊要, 都唔幫手定時去俾D 水佢濕吓口,
我寫了佢唔做, 我都係冇辦法的...

至抵精明眼

作為一個師奶, 每當買嘢買得抵咗, 就會覺得好自豪~

今日行完街市, 忽然間聽到把聲話:「廿五蚊隻雞」
師奶仔於是倒後行睇睇咩事!
唔係嘩?! 真係廿五蚊隻雞, 真係有點難以置信!!! 原來係新開張的燒臘店~
於是買咗隻, 返屋企波比先生都話味道唔錯啊! 好抵喎~~~ hehe~



今晚仲煮咗柱侯支竹秀珍菇牛肉, yummy~~

因為整親個膝頭哥, 成兩星期冇跑步了,
今晚再跑返, 還可以啦, 仲有少少痛......
不過近來真係太過大魚大肉了, 唔做返D 運動, 真係過唔到自己.....