四餸一湯

自從我發現如果我換定衫一夠鐘就放工, 其實係可以有機會搭到村巴的,
今日又再作嘗試, 都真係 OK 喎!

6:35pm 返到元朗, 可以慢慢行街市, 慢慢買餸, 多麼的開心~
今晚整咗四餸一湯, 其中又有新菜: 第一次整椒鹽瀨尿蝦!!!
嘩, 成功呀, 又辣又入味, 兩個人食晒一斤都唔嫌多, 嘻嘻!



不過老老實實, 當然唔好意思日日都咁準時走啦~
雖然一方面睇, 準時走係應該同埋冇問題,
但當 i/c 日日最早返又最遲走, 你會真係唔好意思要入佢間房拎鎖匙去鎖自己個房門同走人囉...

未見官先打八十之旅行準備

嘩, 呢兩日有點失控地買嘢.....
月尾出糧後群症發作!

買咗好多去旅行的東西, 超強勁防曬、蚊怕水、濕紙巾 --> 教協買好平!
今日又喺行山用品店買咗兩件衫, 可以防曬又快乾, 戶外活動/平時跑步都好啱用!

仲買咗 http://www.laroche-posay.hk/ 呢個牌子的護膚品,
佢講到真係做過 study 去 prove 產品的效用, 似乎有D 理據,
試試, 睇吓黑頭同毛孔問題係咪真係有改善先!

終於都搵到你

市面上有關布吉的書似乎唔多, 度度都係得長空出版社嗰本,
始終想買返胡慧沖寫的泰國書, 感覺會真係 local D~

搵咗好多間書店都冇, 終於喺教協搵到呀!
一千零一本, 仲只係 08-09 年版, 似乎佢冇出新版?? 因為真係度度都冇, 真奇怪~
覺得佢的小貼士真的唔錯, 所以都係買了~

布吉之準備篇

一想到有得去旅行, 真係人都開心D!

大概的行程也諗定了, 不過第一次去D 冇鐵路搭的地方自遊行,
計落原來要租車/ 搭的士都幾貴~

仲要因為我亂咁求其 book酒店, 而家先發現酒店喺一個較靜的沙灘旁,
附近冇 mall 冇大街, 全部一排過都係酒台同酒店,
想去 shopping 真係唔多方便, 吓吓都要搭車都遠遠地.... 哎呀...........

去之前要練返吓游水, 好耐冇游過了!
仲有多謝小 V 借出潛水鏡俾我哋 practice 一吓先!

好努力地刨資料, 想去買本布吉書, 點知千色店嗰間 cheap cheap 三聯得一千零一本布吉書,
仲要係不知名出版社的, O 晒咀.....

Local tour 已 send e-mail 去 book, 睇笨象、撐艇仔、浮潛、餵魚, 好豐富!

睇緊防水相機袋, 可以只係用得嗰一次, 上網搵到百幾蚊個都算 ok!

我愛準時放工

嘩, 今日好 happy! 因為超準時放工, 跟住跑呀跑, 可以搭得到早嗰班村巴!!!
實在令人太感動了!!!
從未試過 6:30pm 可以返到元朗囉!

所以今日有時間買D 靚餸, 煮餐好嘅俾波比先生食,
有五個餸, 其中有羊架, 又有釀冬菇同茄子, 聽日的飯盒好豐富啊, 真令人開心~~

睇呀睇布吉的旅遊資料, 好忙好忙!

泰興奮 - 我們又要飛了!

話說老婆睇緊7 月份去長隆動物園的資料, 兩日一夜都二千幾

跟住同 Eva 傾開, 諗諗吓搵個星期五放假, 星期四晚飛的話, 都可以去個東南亞喎!!!!

於是睇睇睇, 嘩, 暑假的 packages 貴都史...... 我哋都三年冇喺暑假去旅行了

見到師妹啱啱去完蘇梅返嚟, D 藍天白雲陽光海灘好正啊!

忽然間, 網上有 promotion, 只是今朝一路食早餐時睇到,
等波比先生起身, 問佢意見, 佢都肯喎! 嘩, 只係十數分鐘, 我們就決定了!
去一個從來冇諗過會去的地方  - 布吉呀!!!  (係呀, 無啦啦由番禺變咗布吉)
我會好好讀書, 考埋個試就有得飛喇!
嘩嘩嘩, 第一次陽光海灘的假期, 第一次唔知嗰度有咩玩就決定去,
第一次連酒店都未做好資料搜集就 book, 第一次可能冇行程齋 hea 之旅!!!

哈哈, 總之係放假, 係離開咗香港 , 有個乾乾淨淨, 舒舒服服的地方過幾日就好了~
想起泰國的美食, 真係流晒口水, 仲要係夏天, 一定有好多新鮮水果呀,
BigC 我哋嚟喇!!!

今晚咁啱係整泰式青咖哩雞, 嘩, 真係唔錯, 可列入本年度撚手小菜之一!

打麻雀

今個月 take 多咗好多 Pedi cases,
見咗兩個 K1/ K2 的妹妹, 真係好可愛好 cute~
K1 的通常係最可愛的年紀!
同佢玩遊戲打骰仔, 佢唔係好明點打, 跟住問我:「即係好似打麻雀咁呀?」
哈哈哈, 係咯, 真係估唔到 K1 妹妹識打麻雀唔識咩叫打骰仔!

今晚煮了蒜蓉辣椒大頭蝦, 正啊!

紅豆冰

不是週末, 都可以嘆杯紅豆冰,
唉, 對自己一日的辛勞總算有點交代~



買了份禮物俾一個要離開的人,
一個人如果一畢業就在一個地方工作, 一工作就廿多年,
要走的一刻, 會是多麼的不捨嗎?

快D 去貨先得喇!!

我問問波比先生:「你知唔知屋企仲有幾多個日本杯麵呀?」
「10個以內啦」
「點只呀, 仲有廿幾個呀!」
你唔快D 清晒去, 休想下次去日本有得買咁多!

哈, 無可否認, 剛剛的日本之旅真係狼咗 D,
我們鍾意食, 但其實又知唔係好健康唔會成日食, 所以D 貨好難清!
唯有放假的日子, 係時候要去去貨!

今日試了沖繩限定的味道, 不過好得意, 點解開咗仲有一層又有D 窿嘅??



睇圖畫話要焗完熱水後, through d 窿窿倒返D 熱水出嚟,
但點解要倒?? 呢個又唔係撈麵? 真係唔多明白....
唔通係過冷河??
哈哈, anyway, 食得就算了, 是鹽味, 清清地唔錯!



美好的週日, 忽然間好想食一件好好味的朱古力蛋糕,
想去 TST/ Elements 的咖啡店, 但又懶得去咁遠,
忽然間想起元朗有一間搬了大舖的曲奇蛋糕店, 就拉著波比先生去試試!

嘩, Rocky Road Cheese Cake 非常之好, 濃濃的朱古力味, 入面仲有唔少 nuts 同朱古力碎



Iced Cappuccino, 不是主打咖啡的店子, 算是做得唔錯了!
味道是偏苦少少的, 啱晒波比先生!



呢間舖頭最特別係歡迎狗狗幫襯, 入面有狗狗都可以食的曲奇同蛋糕o架,
仲有好多狗狗客人的相片,
我哋仲見到一隻貴婦狗同兩隻牧羊狗添, 超可愛~

有咖啡 Cake 狗狗, 很開心的一個下午!

悶到爆中醫課

好天了一日, 今日又落雨同落雨



今日開始 Master 的新一科, 是中醫科,
第一堂講基楚理論, well..... 但係好多「理論」都好令人 O 咀, 點講都講唔通,
Professor 自己都話有D 見解古人話係咁解就咁解,
中醫完全唔識睇腦嘅病同外科嘅病, 因為佢哋完全唔識解剖學,
腦有病 (中風/生 cancer) 佢哋都會全歸咎於個心有病 (心主宰人的一切),
嘩, 咁即係死得啦........ 人哋如果腦出血中風, 你仲開D 行氣活血藥俾人, 仲唔死快D?!

三個鐘聽完都唔知聽咗D 乜, 只覺得有好多嘢都係夾硬話係就係,
完全冇說服性...... 仲要考試? 真係唔知點溫!

最攪笑前幾堂有人問我們醫學院一個很權威有名的 Prof. 醫生:「其實針灸對中風復康有冇用?」
Prof. 老實不客氣地答: 「如果唔做 OT/PT 淨係針灸, 我哋知道冇咩用, 冇 study prove 到有用」
有D 人去做完針灸話有效, 根本可能係 OT/PT 的效或 spontaneous recovery 囉,
但中醫就將復原歸納於自己的功勞~
又或者我都明嘅, 一個半邊身癱了的病人, 總覺得有D 嘢做吓會好D, 是心理上好D~

夜晚同波比先生的大學同學 gathering, 有人有得打 2010 World Cup 就最開心!

幸運海洋公園一日遊

今日是滿載了幸運的一日假期, 天氣很好, 我們可以去海洋公園了!

不過出發之前, 家中發生了一些很恐怖的家居問題, 好彩用了一小時算是 settle 了!

我們 9:30am 出發, 到新元朗中心食早餐,
10:10am 離開餐廳, 大家估估我們用了多少時間到海洋公園??
嘩, 快到唔信, 只係 50分鐘咋!!!
西鐵真係去邊都咁方便, 25分鐘去到紅磡, 再搭了兩個站的 171巴士, 已經是海洋公園門口!
雖然遲了出門口, 但都是預算內的 11am 到達, 太好了!

本來今朝打算去教協買平D 嘅入場劵, 而家當然冇啦~
點知喺我哋排排吓隊的時候, 排我後面的一個媽媽忽視間話佢有贈劵, 用 $200 一張賣俾我哋好冇,
嘩, 當然好啦 (教協都要 $205), 賺晒呀, 你話係咪充滿幸運和感恩呢?



原來上一次嚟海洋公園已經係四年半前的事了, 嗰次處處都係大陸人迫到死, 是唔太好的經驗.....
隔了多年再來, 又有另一番新氣象,
環境變得靚了, 多咗好多花花草草, 影相都開心好多!
再冇咁多大陸人, 秩序亦覺得好好多!

波比先生的全景相, 天氣是多麼的好, 原來今日係 2010 年最熱的一日, 有成 32 度......
我帶咗 4 包紙巾都抹汗抹晒, D 汗係抹完又不停不停的浸出嚟, 好恐怖!!!
太後悔點解唔帶條手巾....







好多設施, 做咁多年香港人都睇過玩過,
特別 D 嘅, 係點都要去探探熊貓安安佳佳!

好攪笑, 佢食完嘢會自己拎條毛巾「抹咀」







有D 好靚嘅荷花, 不過...... 臨走時竟然唔見晒......
唔係有D 咁缺得嘅人摘咗呀.....



第一次搭「海洋列車」, 冇乜人搭嘅?
原來真係冇乜特別........ 唔係貪新鮮的話, 都係搭吊車吹吹風開心好多!



水母館, 第一次睇, 好靚, 不過勁迫人!



午餐又幸運地找到座位坐一坐



最後我們坐了熱氣球升空



上到半空, 你都咪話唔驚........



一路都見到黑雲, 估唔到一玩完熱氣球, 就真係落出雨!
嘩, 真係好好好彩呀, 否則排咗成個鐘冇得玩就真係好唔開心.....

6pm 回程了, 波比先生攰得好似其他小朋友一樣, 瞓到死豬咁.....嘻~
有時睇動物睇得咁開心, 話要去長隆再睇喎,
好啦好啦, 等我考埋 3rd sem 個試, 放暑假時同你去啦!

麥兜開倉 + 傷心酸辣粉

又係一年一度的麥兜大開倉呀!
本來都冇咩想買, 點知波比先生扭計話一定要去, 仲要飯都唔俾老婆食要去咗先 =.=!
好啦好啦, 去啦~

地點在旺角家樂坊隔離的一幢商廈的 24 樓, 都算方便 (以前鑊鑊都要過灣仔華潤),
開倉的場地其實好細, 但貨品都算齊全! 有D 今年先出的新貨都有, 當然冇舊貨減得咁多啦~
波比先生買了佢話想買好耐的食雞脾麥兜 ($328 --> $150)
見到畢業麥兜, 心諗我出年點都會買一隻啦 (唔會畢唔到業掛), 所以又買埋 ($150--> $60)
隻屎撈人, 送嘅! 哈哈哈!



仲有好多家庭用品呀, 全部都好抵!
雜誌架 ($60), 浴廉 ($60), 鏡 ($30), 水壺 ($35),
T-Shirt 真係抵到爛, $130/ 2 件!!!!! 嘩, 我上年仲買緊百幾蚊件o架!!!



全部嘢夾埋 $530, 有報紙 coupon 平 $50, 即係 $480 咋~~~ 嘻嘻, 開心!

之後發現原來有名的傷心酸辣粉在登打士廣場開了分店,
終於都有機會去試吓喇!!!

招牌酸辣粉, 小辣都已經好辣, 點解有D 人可以叫大辣o架?



口水雞 - 嘩, 浸住隻雞D 辣油真係........
D 雞係幾滑, 唔錯, 不過麻辣到其實食唔到雞味!
之前食過川菜的口水雞, 都唔洗咁多辣油去浸住o架??



因為太辣了, 叫個唔辣的雞絲冷麵降降溫, D 醬料撈得好平均, 味道都唔錯,
不過其實冇咩特別要賣 $23?



今晚的戲肉呀 - 水煮魚!!
一片辣椒同八角堆著水煮魚片,
不過食落, 麻麻地啦...... 可能因為之前喺大陸食過真係好正的水煮魚, D 魚片應該係一塊一塊好爽的,
但呢度的係就係好入味, 但煮到D 魚肉霉晒, 一夾就爛.......
Well, 得個樣冇咩水準~

放假先嚟落雨

今朝都仲同波比先生傾緊星期五去海洋公園好, 定離島海鮮團好,
點知下午就落狗屎般天昏地暗......
星期五都預測會落雨, 噢...... 邊度都唔洗去??

黑雲黑雲快D 走呀!  >.<

兩個同事的 B 女都病了, 希望佢哋都快D 好返!
其中一個媽咪本來買了機票聽日去旅行的, 如果 BB 未好返, 可能成個 trip 要 cancel,
媽媽真偉大, 我話俾著係我, 我應該會照去, 哈哈哈!

Critical period

這個月份, 真係好忙好忙.............
好討厭嗰D 冇責任心的 out-patient, 唔嚟又唔通知聲,
我見住一大疊 in-patient referral 未睇又去唔到睇, 坐喺度呆等D 唔出見的 out-patient,
有時連續兩個都唔嚟, 我把幾火走上去病房睇 in-patient 先, 叫文員如果有 out-patient 到先 call 我落返嚟!

之後一兩日, 又會收到呢D 不負責任放飛機者的 Fax 話想再約期, 又要俾期佢哋, 簡直係浪費資源!
我會睇睇佢有冇話咩原因嚟唔到, 有D 我知道 urgent 的, 下個月啦,
唔 urgent 的, sorry, 三個月後你嚟就嚟啦!

如果我們 cluster 有 20 個人手, 多到我可以懶懶閒坐喺度睇雜誌的話, 我唔介意D out-patient 放飛機,
但事實唔係咁囉~ 勞氣!

健康住家飯

老公前晚去了奶奶度食飯, 幫我執咗一個飯盒,
嘩, 叉燒、鮑魚、走地雞、魚片、冬菇、通菜, 很美味!
最重要的是不用吃那難食 canteen 的飯,
有時成個飯啲汁真係咸到死, D 餸成浸油喺底, 好恐怖.......
如果我仲要喺度食多廿幾年飯, 日日咁食, 一定會高血壓.........

所以, 煮得到的, 我都希望自己煮飯帶飯~

前兩日上 Master, Biomedical sciences 的 Professor 講了些有趣的 research findings,
原來食橙/香蕉 (有 Potassium), 山楂, 辣, 都有助放鬆血管同減低高血壓的風險,
哈哈, 我都要常常買定D 生果喺屋企先得!

跑步 - Day 8
唉, 早幾日好似整親隻腳, 膝頭哥對上同側邊都有D 扯住痛.....
呢兩日戴了個護膝好似好 D
所以唔跑得耐, 3km 咋

慶功第二擊 - Seafood Station

今晚約埋好朋友, 一齊再慶祝, 她終於都完成了漫長的 Master course 了, 恭喜恭喜!

本來想食 buffet, 但睇嚟睇去, 都冇一間好啱心水,
於是決定不如去食海鮮, 起碼質素有保證, 唔似食 buffet 可能俾埋D 垃圾食物你咁~
第一次去尖東的海鮮站, 訂了枱要 8:30pm 先有位
一早上網做定功課食咩好, 好快就落晒 order,
先嚟大蝦沙律 - 全鮮果的沙律, 仲有鮮芒果汁, 真係好唔錯, 不過得三隻大蝦, 多D 人就唔夠分



之後是龍蝦湯同蒜蓉包, 真的有龍蝦肉的, 好味!



今晚推介之一 - 生蠔!
嘩, 真係好得, 好新鮮, 有淡淡的海水味, 好 creamy!!!! 食多兩隻都仲得! 可惜要留肚試其他嘢~



再來兩隻焗蠔, 一隻芝士牛油焗, 一隻薯蓉焗, 兩隻都咁好味!!!



嘩, 超大兜龍蝦伊麵, 好芝士呀, D 伊麵超好味 (當然都好肥....),
龍蝦都 OK, 不過呢個價錢係咪應該起碼有兩隻龍蝦呢? (而家D 酒樓食龍蝦其實都好平)



另一必食推介 - 蒜蓉粉絲蒸蟶子!
嘩嘩嘩, 真係未食過咁大隻蟶子, 係成隻正常 size 嘅碟咁大隻, crazy!!
完全好食過大酒樓同西貢嗰D 好多, 因為火喉教得啱啱好,
原來蟶子係可以咁滑漏的, 真係好難忘! 下次必定返兜呀!


有熱茶提供, 消消滯最啱!



成餐都好滿意超滿足, 食物絕對有質素, 唔怪之得佢咁好生意!!
Highly recommended!

516 快快投

對政治的東西, 自問不是個太熱衷很關心的人,
冇錯, 請辭那班人的做法可以話係過激, 可以話係浪費公帑,
但唔辭都辭了, 嗰一億公帑都用了,
如果唔去投票, 豈不是更令一億白花??

建制派的人唔派人嚟參選, 即係唔俾自己有輸的機會, 多聰明!
只要投票人數都少, 他們就可以大大聲聲判成個請辭為死為不成功, 他們就是雙羸了!

大家想看他們和煲呔過兩日在報紙表現風騷的踩公投撤底失敗嗎?
不想的話, 快快去投你神聖的一票啦!

慶功第一擊 - 品味 cafe

看見這些佈置, 會想到是元朗的一間小小店子嗎? 很像 SOHO 區的 cafe~



今日來個慶功第一餐, 去咗呢間一直都覺得有點貴的品味 cafe
佢個位置勁偏僻, 如果唔係成日喺 yl.com 賣廣告, 我諗都冇咩人識去~

好彩我哋較早去到, 如果唔係, 要等位!! 咁旺場??
呢度掛名係意大利餐廳, 裝修簡潔但好舒服, 真係好似離開咗元朗咁!

賣的當然是西餐, 我們點了兩個 SET LUNCH, 先有忌廉湯
(o依死囉, 乜影得我咁黑嘅?? 早兩星期跑步囉..... 再曬多幾次會變賓賓, help!!!)



等食時間, 波比先生例牌打機~



主菜來了, 這是燒牛仔骨, 沒太多的醬汁, 但可以好好嚐清楚牛肉的味道,
一個字: 「 Good」, 燒得有點香口, 牛仔骨的肥瘦剛剛好, 入口不是肥膩但有點牛油的香味~



波比先生的蜜糖芥末羊柳, 唔, 似乎過熟了一點~


咖啡反而係咁多樣嘢最掂的~

總結來說, 都唔錯, 不過同甜甜咖啡屋相比, 波比說都係鍾意甜甜, 因為食物的味道會濃一點 (又大份一點?)

終於都出成績喇~~~~~~~~~

等咗足足 4 個星期, 終於都出成績喇!!!

竟然, 諗住死梗嗰科有 A!!! Thankssss God!
反而覺得容易嗰科, 因為誤解了兩條題目, 白白送了 5% 的分數, 攞 A-,
整體都好滿意了~~~ 算係不枉我花了整個復活節假期冇得玩去溫書~~~ 太開心~~~~~

去邊度慶祝好??

跑步 - Day 7
今個星期偷懶咗好多日添,
因為有人食完飯 8:30pm 就瞓覺, 所以冇人陪我跑囉~~

跑了 7 個圏 = 4.2km, 而家D 天氣都仲算OK, 有D 風,
再熱D , 嘩, 唔知會係點??

跑吓步呢, 出一身汗, 好似皮膚都好D,
瞓覺係絕對好咗, 可以一覺瞓到天光, 可以發少D 惡夢,
仲有近來頭痛的次數都少咗,
不過, 係跑姿問題?? 呢兩次膝頭哥痛..... 痛咗好多日都未好啊~

多事之春

這個春天, 很多事,
不信風水的, 都要問一問:「係咪風水唔好? 點解咁多壞事情發生在這個工作地方的人身上?」
還希望快點雨過天青!

HA 真的好嘢, 醫院要開新病房加新床, 但係又唔俾錢請人,
叫我哋 prioritize d case 去做喎 (= 除返開每人見少D 囉), 這就是政府的醫療政策, sigh......

好肉緊

在中風病房, 睇緊一個 patient, 那個好型的中風病房 Director 醫生走過來,
好肉緊的一路搖個病人一路講 (肉緊到好似睇電視要搖醒個昏迷病人咁):
「阿伯, 你做咗手術之後, 記住一定要食藥o架, 唔可以唔食o架, 你冇晒藥你要出聲先得呀!!!!」

事緣那個伯伯, 兩邊上腦的血管都好塞, 冇血到腦隨時冇命,
之前同佢做了血管支架 (即係類似通波仔的手術),
但手術後係要長期食藥去避免血塊再凝固再塞條血管的,
但阿伯就係論論盡盡, 食藥食得唔足, 攪到真係又中風入嚟, 今次仲有命都真係好彩咋!
醫生見到可能好痛心, 點解呢D 明明可以避免到的發病竟然又發生,
所以真係好似緊地對伯伯訓話了一輪,
會為病人勞氣的, 操心的, 其實真係好好的醫生~

唉, 今日純粹路過一個尋日睇完要佢插喉的病人,
竟然發現佢醒返好多仲對答到, 好彩真係撞到咋,
我寫咗排板話如果佢醒返D 再 call 我嚟睇佢, 但今日又冇人 call 我喎!
即刻 review 佢, 即刻通知 MO 唔洗插,
否則婆婆就慘了......

尋日婆婆除咗自己個名乜都講唔到, 今日見佢佢的對答真係好攪笑:
「醫生話唔俾我食嘢咯, 妳偷偷地嚟餵我呀, 因住俾醫生鬧呀」
「哈哈哈, 係醫生叫我嚟嘅」
「係咪o架? 佢哋個個都話醫生話唔俾我食o嘢喎」
「梗係真啦, 醫生就係叫我嚟睇吓准唔准妳食嘛, 我尋日嚟睇過妳呀, 不過妳好眼瞓呀, 叫都冇反應」
「咁妳大聲D 叫o丫嘛」
「我好大聲o架喇」
「咁妳拍吓我o丫嘛」
「驚妳痛o丫嘛」(尋日真係拍佢都唔醒)
「係咩」

康復了

上年的三月, 俾了數千元去上一個 course , 學習一個用電流治療吞嚥的療法,
對這個療法, 我還是半信半疑, 佢 so-called 的 Evidence-based research 還不盡是 evidence

這一年, 我試了落兩個病人身上, 竟然有出奇好的效果,
不過, 不是 control study, 不是 ABAB design,
冇人可以 rule out 有幾多成係 spontaneous resovery,
但過程中, 我深深感受到病人自己的努力, 同家人的愛和照顧實在有莫大的幫助~

嗰一個婆婆, 如果係無兒無女, 俾人掉喺老人院冇人理, 相信佢會插住條喉終老了,
佢的情況已經 chronic, 大概沒太多 spontaneous recovery 可言,
但佢有兩個好錫佢的女, 仲請咗兩個工人返嚟服侍佢,
兩個女的堅持, 我們就試了這個療法, 每次都成棚人陪婆婆嚟,
一路做, 竟然慢慢的見進步, 又多得家人用心的在家跟進,
上星期替她做過 X-ray, 嘩, 情況好到出乎意料之外, 我睇住個 x-ray 都有點目瞪口呆~
最後, 可以除喉了,
另一個做這個療法的 case, 亦都剛在上星期除喉了,
一年多後的今日, 覺得我俾的幾千蚊算是物有所值!


難食的 canteen 近來有呢個炸雞脾飯, 簡直係我的最愛!!
真係超好食, 似返係人食嘅嘢囉!

大塞車之煮唔到飯

今朝睇錯鐘起錯身...... 以為 6:50am, 起身準備好晒早餐, 坐低一睇,
吓??? 5:50am 咋?! 唔係嘛....... 但冇可能唔食D 早餐啦,
所以, 成朝勁眼瞓......

唉, 落雨天真係點返屋企好呢?
搭港鐵又多人又濕又迫, 好多時冇位坐要企到返嚟,
搭村巴但係又大塞車, 今晚本來仲諗好晒煮咩餸, 點知塞車攪到成 7:30pm 先返到元朗嚟, 唔洗煮啦...

唉, 有時真係好懷念以前 5:15pm 放工, 6pm 返到屋企的日子,
而家平均都要 7:30pm 先買好晒餸返到屋企,
不過以前返 5.5日長短週, 而家返 5 日,
邊樣抵??? 好難計~

冇飯煮出街食, 去了食越南嘢,
呢間餐廳竟然入了 U Magazine 我最喜愛的 100 間餐廳 (不過覺得都係俾咗錢居多),
之前一路都未試過佢的越南滴滴咖啡, 今日忽然想起就叫咗,
woo~~ 真係唔錯喎, 有一種唔識講的香味 (聞落有點似椰香), $20 算ok!

曬死人的球賽

天文台又話今日會落雨嘅??
嘩, 曬到死呀, 今日仲要係波比先生公司球賽的第二回,



當一班男同事在球場上拼過你死我活, 一班老婆/女朋友就在場邊乾蒸....
今次帶了大光圈的鏡頭, 影得比上次好好多!



今年出線唔到, 下年再努力啦!!

比賽完畢, 去了朗豪坊吸冷氣風乾返自己,
仲有好好味的 Euro Go Go 下午茶!


晚上當然係再母親郵飯啦~

跑步 - Day 6

前晚雷雨交加, 今日竟然好天出太陽仲好曬!
跑 + 行了 5km, 熱到爆~~~~ 再熱d 真係唔知點跑~

元朗公園嗰邊的環境真係好唔錯, 住嗰頭應該都好舒服!
元朗的居住環境其實真係好好, 只係返工遠咗少少, 但喺市區真係好難搵到咁多青山綠水~

上星期波比先生影的幾張 PANORAMA, 呢個 function 真係幾好用喎!







夜晚我要返學, 波比先生負責買晚餐, Taste 的壽司好正啊!
如果之後 YOHO Midtown 真係開一田就好了, 一田的壽司都係好正的!