豬欄生活

Delonghi EOC2017 整麵包

2012-02-15T20:37:00.000+08:00

尋晚部焗爐好忙呀, 除了焗雞同埋燉蛋, 還第一次用來整麵包!
就係我之前所講, 掉晒D 材料落去, 等兩個鐘就有得食嘅麵包~

跟機的 Manual 附有麵包 recipe, 用了佢嘅朱古力包 recipe 試試

放入爐, set 了全自動焗麵包 programme, 佢會自動攪攪攪

攪攪吓, 就會變成一團, 然後就會發酵個幾鐘
不過其實我見佢嗰種攪法, 都估到麵包應該唔係自己搓咁好食了,
佢停止的一刻, 個麵糰似乎都未起筋

到了今朝起身睇吓, 嘩, 焗好了!!! 發成了勁大個麵包~ 夠我食三日囉!
味道嘛 , 老實講, 麻麻地啦, 冇筋性, 變咗好似我成日整的免搓包的質感, 很鬆散,
不過唔洗郁, 唔洗洗好多廚具, 咁方便就有麵包食, 算啦, 食麵包都係為了充饑嘅o者, 我又冇乜所謂~

下次可以用佢的 semi-auto mode, 佢負責搓同發酵, 然後我自己再分割同包入餡料, 整菠蘿包都好方便了!

10 個年頭情人節

2012-02-14T23:30:00.000+08:00

今日其實放假, 但返了醫院執嘢, 本來諗住執半日好走啦, 點知攪攪吓, 5pm 先走!
證明我間房表面上整齊, 但一翻開D 櫃桶同 file, 真係亂到冇朋友..........
這一日也花得值得, 所有嘢都執好了, 好開心呀~ 返工做嘢都醒神D!

踏入同波比先生相識 10 個年頭, 又是情人節, 煮大餐~

急急離開去買餸, 買了隻雞, 新焗爐開幕了!!

最後幾分鐘冇睇火, 點知就係咁....... 燶咗少少........
俾大家睇吓最靚的美腿啦, D 皮又薄又脆, 好正呀~

點少得心形漢堡扒!

波比話要食蒸扇貝, 無啦啦有個中菜~

仲有甜品呀, 係焗焦糖布丁

不過D 焦糖唔係好深色, 而且覺得太肥了, 都係唔好落咁多~
好滑呀, 波比讚好 yummy~
願大家日日都係情人節, 同另一半開開心心~

情人蛋糕

2012-02-13T23:00:00.000+08:00

明天是情人節, 老公買了這兩件可愛的花花蛋糕回家, 氹老婆開心,
朱古力味好夠濃, 讚讚讚!

明天放假, 等我煮返餐大餐俾老公食啦!

焗爐到

2012-02-12T23:18:00.000+08:00

今日波比先生就開心啦, 公司有 Function, 約咗陳豪, 有咖啡飲又有好嘢食~

之後我們 join 埋, 去 TST 食 Paisano's Pizza, 好大件呀, 睇住師傅轉轉轉新鮮造, 特別好食!

唔該晒波比, 幫我搬咗新焗爐返屋企了, 超超超開心啊!!!
好多掣, 好 pro 呀!!! 有燈有對流風, 太好了~

呢個就係用來整麵包的兜, 早一晚放晒D 材料入去, 教埋 timer , 就可以每朝有新鮮麵包食了!
不過屋企仲有幾片方包, 所以今日未有得整住

去了聯邦食晚飯, $78 的片皮鴨真係抵到爛, 不過就好肥好多油囉~

過冬雀仔

2012-02-11T23:00:00.000+08:00

今日跑咗去南生圍, 10km
見到好多好多來過冬的雀仔, 幾百隻都有! 最攪笑係第一次唔係喺動物園見到鴛鴦

去了 Chow Chow Cafe 吃個悠閒午餐, 返屋企瞓食瞓
因為尋晚好夜先瞓呀, 下星期開始帶實習學生, 自己都要做一點準備呢~

入伙了!

2012-02-10T22:30:00.000+08:00

忙了足足一星期, clinic 大部分嘢已經執好了,
我間房都執好了, 嘩, 真係從未如此整齊過囉~ 往後的好多好多年, 就會喺呢度渡過了~

很勞氣

2012-02-08T22:00:00.000+08:00

話過這 blog 盡量唔寫勞氣事, 唔帶工作入嚟,
不過今日實在很勞氣, 成個儲物室內基本上得我一個人做嘢,
抹塵, unpack, 爬高踎低把一件又一件的大大小小儀器工具玩具上架,
一個人清了十幾箱加十多袋物件,
與我同 grade 的同事人人都應該幫手,
但同事就在偷懶, 叫佢做嘢就唔知蛇咗去邊, 出現就施施然地執咗少少就收工,
再叫佢做老細吩咐的工作, 佢又藉詞唔做!
但然後在老細面前又扮到好似做咗好多嘢咁~
真係大開眼界!!!

仲有個文員又係激到我嘔血!!!
已嚟咗兩個月, 仲日日做錯嘢!

同老公傾咗成晚, 點解會有D 咁嘅人, 老公還是叫我睇開D~
但我真係頂唔順點解D 人咁懶, 或者係我太心急, 真係睇唔過眼D 人做得咁慢咁冇效率, 於是乜都係自己做
最後, 所有在儲物室的堆積箱和袋, 都俾我清走晒了, 我負責的地方, 地下已有返一條路行,
見到咁都開心D~
向好嗰方面睇, 差唔多九成的櫃都係我執嘅時候, 我就最清楚所有嘢放喺邊喇!

搬喇!

2012-02-07T21:19:00.000+08:00

嘩, 今日搬 office , 攰得想死, 返 8:30am , 即刻開始指揮呀、搬呀、抹櫃呀、unpacking 呀......
一路到 6:30pm, 全日只係飲咗 1.5杯水......
老公問點解我要做埋呢D 咁嘅嘢? 冇辦法, 我們係細戶就係乜都要自己做, 老細今日都同我一齊做清潔抹塵擔擔抬抬

仲要好嘔血, 俾兩個好食懶飛的阿姐激死, 攪到今日連環鬧人, 火滾!

新的房間, 雖然再沒有窗戶, 但很大很光猛, 多謝老細的安排~

超辛苦的一日, 去了食意粉屋獎勵自己, 食物很好, 充滿力量, 聽日再努力呀!

蘿蔔炆牛肋骨

2012-02-06T20:57:00.001+08:00

今日好攪笑, 我又參加畢業禮, 有得早放, 好!

今個星期正式搬 office, 都唔洗旨意有得準時放工, 於是今日去掃定幾日的食材先~

今晚煮了炆牛肋骨, 不過時間關係, 炆得未夠火喉, 唔知過一晚會唔會好食D呢?

我又懶咗一星期冇跑步了, 今日為了有 quota 食湯圓, 去跑了 7km,
元宵佳節快樂~

渣打馬拉松相片 - 加加油及慶功

2012-02-05T22:23:00.000+08:00

今日老公跑渣打半馬拉松一組, 8:45am 起跑, 一程西鐵就到起跑點, 實在好方便~

我搵咗個有利位置影相, 開跑, 衝呀~~~~~~~~~
好唔容易先見到波比, 不過用了長鏡, 佢太近我反而 focus 唔到

Star war, haha!

當D 人走晒, 我就搭地鐵去灣仔馬師道天橋轉入駱克道的位置影相,
企足個幾鐘, 影咗成 800 張相呀!!

著住鯊魚衫跑全馬, 實在毅力可嘉!

見到好大年紀的伯伯都跑全馬, 超勁呀!!!!

波比 10:30am 就到, 但我都見唔到佢, 係忽然佢在鏡頭中閃出, 真係啞咗..... 又係朦查查........
我追去 CWB 搵佢, 都好唔錯呀, 1hr47min 完成了半馬,
有人仲話自己只係 hea 跑, 冇發過力, 怕第一次跑半馬會抽筋唔敢盡力喎~

如果係 9:20-10:30am 落橋的朋友, 快D 去我 album 睇吓有冇自己嘅相啦~
http://www.flickr.com/photos/12728356@N05/

咁辛苦, 梗係要食返餐好的!
想食豚王/魂拉麵, 點知兩間星期日都唔開,
最後去了一風堂, CWB 店果然唔洗等位, 太感動!!!

之後去了中環的 Le Creuset, 用 Promotional price 買了一 set 心型碗仔, 超開心!

然後去 City Super 買食材, 今晚食大餐慰勞吓跑畢半馬的老公
海鮮火雞火腿 Pizza, 新鮮多料超美味!

肥美三文魚腩, 超正! 仲有燒雞半隻, 大滿足~

看來, 我應該要勤力返D 練習, 希望今年年尾, 有能力陪老公跑到半馬!

馬拉松麵包

2012-02-04T21:23:00.002+08:00

聽日就係渣打馬拉松的大日子, 老婆要為老公準備高碳水化合物的食物, 迎接半馬拉松的比賽

最好不過, 就是香蕉 + 朱古力 + 麵包的配搭, 哈哈, 三種都是馬拉松必吃的食物
用了 Carol 的香蕉麵包食譜, 把半隻香蕉壓成蓉, 混到麵糰中

中間再捲了一層朱古力同香蕉粒, 這麵包果然較有嚼勁,
不過香蕉味不夠濃啊, 下次要放多D 香蕉先得!

聽日我會喺馬師道落橋至到駱克道搵個位影相, 希望見到大家啦! 加油加油!

冇飯開的一週

2012-02-03T21:53:00.003+08:00

搬 office 在即, 日日忙到嘔電, 日日連晏D 嗰班村巴都搭唔到, 好陰公......... 日日都冇得煮飯, 令我心情暴躁!

呢排真係有出街食恐懼症, 街上的食店, 間間都愈來愈貴, 同時又愈來愈難食,
前日去了元朗鄉村小廚, 同一個撈金邊粉, 由好好食變到好難食, 嗰晚真係好灰, 辛苦完一日仲要食垃圾!!!

不過有一日在旺角的雲南米線店, 米線就唔好食喇, 個水晶皮蛋反而幾得, 食我搵咗一排的透明色溏心款,
冇咁重皮蛋味, 但好滑滑~

尋晚去了太子一間叫「點喜來」的點心店, 好的服務, 食物也很是滿意:
黑糖馬拉糕, 好鬆軟呀!
菠蘿叉燒包, 個皮唔夠脆, 似係翻叮過
炸兩就食得多, 用腸粉包住春卷食過未? 幾得意啊!
仲有凍冰冰, 食糯米飯, 很開心, 如果大碟D 仲好!

今晚, 其實都夜到煮唔到飯, 不過屋企有冷飯, 就快快手手買了黑椒豬扒,
清了雪櫃的德國肉腸、午餐肉、火雞肉火腿, 炒呀炒, 變成了好美味的炒飯呀~~

人大了, 覺得每日辛苦工作, 都係想兩個人有餐安樂茶飯食o者~

年初七 - 同事拜年

2012-02-01T21:39:00.000+08:00

講咗幾年, 今年終於攪得成來我屋企拜年了!

共有5個同事來到, 一齊整麵包, 睇吓我D 同事幾有創意!

每人整咗兩個包, 有三個人即刻食晒, 哈哈, 大家都體會到即刻出爐的麵包有多好味道!

一齊玩 card game, 笑到死!

又叫咗外賣壽司, 仲有自己煮咗兩個意粉

因為大家食包食到飽, 所以 plan 了仲有兩個餸都冇煮了,
煮埋薑蔥桶蠔, 一人一隻啱啱好!

本來發咗個麵糰打算整 pizza, 冇整到, 用了來整合桃包~

非常開心的一日, 不過真係超攰, 以後都係唔好喺跑完比賽的日子請人上來了,
趕到死, 全日未停過................

好好玩 - HA 新春長跑

2012-01-29T22:03:00.000+08:00

哈哈, 今年第一次參加了 HA 新春長跑, 係非常好氣氛, 攪得好好的香港比賽!

比賽前, 有非常詳細清楚的地圖, 指示, 訓練熱身小貼士
集合時, 所有 counter 都非常之 smooth, 唔會有排等

比賽前, 一齊做熱身運動,

開始了, 有好足夠的工作人員, 沿途指示同打氣,
因為係大規模賽事, 有埋警察封路同維持秩序, 係我跑過三次城門河中, 安排得最好的一次~

我想話, D 人真係超超超勁! HA 真係卧虎藏龍!
起跑後, 係咁俾人過....... 但我都已經算係兩個月超懶練習後, 見得人的速度了!
我今個月只跑了 7 次, 仲要次次都係6分30秒/km 咁慢, 傷後一路都做唔到快的速度,
點知今日俾人帶住跑, 無形中又谷到D 小宇宙出嚟, 頭 4km 都係少過 6min/km, 之後就 keep 到6分多少少咁, 但一上斜就要抖抖行吓~
估唔到今日暖返好多, 跑到唔夠 3km, 熱到我好後悔著咗條長褲......

頭幾公里, 真係好辛苦....... 見到咁長的城門河, 有排見到到折返點, 就諗點解我要攞苦嚟辛.....
都係要過咗 4km 跑順咗, 就一路 keep 到個速度, 穩定地跑到返嚟~

全程 11.46km, 用了 1hr 8 min, 算是好過我預期了!!!

第一次跑超過 10km, 到最尾嗰 1km 真係跑到麻目咗冇晒感覺.......... 但原來, 我真係完成了!!
今日對腳又酸又軟......

波比參加了家屬組, 本來都諗過佢會唔會呃到半個獎返嚟,
佢 48min 完成, 但係家屬成人男子組個冠軍............. 41分鐘.............. 黐線o架, 有冇咁快呀?!
不過今次都係俾波比備戰渣馬的好好經驗, 因為有人大安主意冇縛好鞋帶,
又被人影響了速度, 今個星期日唔好喇!

年初六 - 慶生 Party

2012-01-28T23:00:00.000+08:00

又放假又放假, 真係開心~
今日去了波比大學同學家拜年, 打牌 (哎呀, 又交咗好多學費...)
仲有去食飯慶生, 食咗好多美味的上海菜@湘川滬, 還有 Das Gute 的超讚蛋糕, 好滿足~

初四啟市

2012-01-27T00:52:00.001+08:00

今日開工了, 新年新紀錄, 今日睇咗 22 個症, 覺得自己愈來愈摩打手

咁凍天時, 最好係食煲仔飯了,
今日有點時間, 用了薑蔥去醃雞, 好香! 好似 SSP 高登斜對面檔薑蔥雞翼咁嘅味~
用上了美心臘腸 (本來買來整芋頭糕的), 加瘦版其實都好肥...........
這個臘腸薑蔥滑雞什菌煲仔飯, 又香又熱, 好正呀~~ 不過係D 飯濕咗D D, 下次要留意吓~

上星期睇 Jamie Oliva 教整鯖魚, 原來一路煎一路按平佢落鑊, 煎出嚟就會脆好多!

年初三 - Mizuno 發財跑 x 打邊爐

2012-01-25T23:50:00.001+08:00

年初三, 是老公第二年參加 Mizuno 發財跑, 今年佢都幫我報埋名, 但係...........
今日真係好好好凍呀, 癲o架, 得 7 度!!! 凍死人呀~~~~
如果唔係俾咗錢, 我諗我會唔去囉............
6:10 am 出發, 7:45am 先到山頂, 寄完行李已經冇時間熱身, 好彩戴了手套同頸巾,
8am 開跑, 有幾百人, 好好氣氛呀!
唔跑都唔知道, 原來山頂咁樣走一圈, 睇晒港島四邊的風景, 係好好好靚呀~
我呀, 都算龜速完成, 因為有好多上斜位, 而且天氣太凍, 吸D 冷空氣真係好辛苦呀~

跑完有紀念 Tee, 仲有得同財神影相, 哈哈哈~

比賽都係志在大家開開心心, 賀吓新年, 如果唔係咁凍, 一定仲好玩!
之後去咗翠華食個超豐富早餐, 好爽!
跟住就行 City Super, 買了很多食物打邊爐~

下午係我的舊 case 來我家拜年, 自從識整麵包之後, 個個朋友來我家的活動都係整麵包!
原來天氣太凍, 整包係有問題的, 愈搓愈乾啦, 搓極都起唔到筋啦, 發酵發唔起啦......
攪咗好耐, 好彩製成品都 ok~

小朋友整了菠蘿包, 我今日又新嘗試, 用了 Carol 的奶油吐司食譜, 加埋咖吔醬,
造了這個扭紋咖吔包, 聽日做早餐真開心!

傍晚, 接到朋友的電話, 本來我們約過今晚去佢屋企燒嘢食, 但佢最後冇 confirm 我, 我以為攪唔成啦,
點知佢打俾我問我做乜仲未出現, 我真係啞咗...... 這就是用 Whats app 的誤會了, 佢以為我話過得就一定會自動去......
最唔開心的係波比啦, 因為佢恨咗去呢個朋友屋企燒嘢食好耐o架喇.......

不過好彩, 今晚我哋都有得打邊爐, 否則我應該要同佢搭的士去朋友度囉~

今晚打沙爹 + 麻辣湯底, 在 City Super 買的牛舌好得呀, 原來用牛舌打邊爐係好好食的! 好重牛味, 又爽口~
豬就 ok 啦, 上次在吉之島買的爽D~
仲有街市買的什菇、墨魚滑、手包韮菜餃、白魚蛋都一流~
鳴謝老公咁鬼凍出去買嘢, 仲有幫手洗碗~

開心的五天假完了, 聽日又要回到現實世界捱騾仔了...........

年初二 - 帶著蛋糕去拜年

2012-01-24T09:21:00.000+08:00

今日很忙碌啊, 會去 4 個單位度拜年,
上次見到波比堂家姐個仔時, 應承咗佢今日整蛋糕俾佢食, 於是就大量製作, 請埋其他朋友~
整了我最拿手的合桃香蕉朱古力蛋糕呀, 是用新鮮香蕉整,
即日食, 食之前用微波爐叮 20 秒熱辣辣咁食最正呀~~

和別人分享自家造的食物, 很開心的感覺~

新年最怕的事, 係連續 n 日要食中菜, 波比家點的中菜, 冇牛唔炸唔甜唔多汁,
其實永遠都係得蠔油味的雞豬魚...........
所以今日去 euro go go 食個西式的 tea, 超滿足~ 肉醬薯蓉仲有辣雞翼, 讚讚讚!

今日見到幾個小朋友, 都係好鍾意講嘢嘅小朋友, 都係食飯唔專心的,
我監督住親戚個仔食飯, 其實算是成功, 但我同老公都頂唔順 99 對小朋友的方法..............
心想生個仔的話, 真係好閉........

Hea 之年初一

2012-01-23T22:23:00.000+08:00

哈哈, 龍年到, 希望今年事事順景, 多謝朋友們 whats app 的賀年 msg~

今日好得閒, 因為波比妹妹不在香港, 我哋唔洗年初一走幾轉, 奶奶嗰邊的親戚可以聽日先去
今日去了我嗰邊的親戚度拜年, 未到 2pm 已經食咗 3 餐......... =.=

下午仲有時間瞓晏覺, 爽到暈~

夜晚去奶奶家食飯, 4 個人, 其實唔洗整咁多餸呀............ (即使唔係新年, 都係有咁多餸)
因為我體會到, 一個人要預備咁多嘢實在唔容易, 其實家常便飯, 簡簡單單就可以啦~

第一次整年糕

2012-01-22T22:50:00.003+08:00

今年奶奶又俾咗一底美心蘿蔔糕我哋, 但今年整得好差, 太削, 不停出水,
一切開一煎根本爛晒...........

尋日喺聖安娜見到呢個大吉麵包, 好攪笑, 不過味道就一般啦, 唔夠多蕃薯蓉, 個包又唔夠鬆軟.... 當係應吓節咁就好

今日又完成了一個心願, 就係整賀年糕品,
我好鍾意食芋頭糕, 本來立心今年想整芋頭糕的, 但呢兩日已經好攰了, 所以最後都係冇整到
因為整芋頭糕好大工程呀, 又批又切又攪又蒸.......

今朝起身, 想消滅咗尋晚煮餸剩的半盒椰汁, 忽然間諗到整椰汁年糕
我用了為食貓的食譜, 好簡單咋! 所有材料我屋企都有, 話整就整~
今次太好了, 終於都可以一次過消耗埋我買咗好耐又用唔著的糯米粉, 真係一石二鳥!
我加了罐北海道十勝紅豆蓉落去, 就成了椰汁紅豆年糕喇!

不過, 脫模嗰吓真係好頭痛..... 我已經好狠地掃咗好多 Olive oil 喺個兜, 但係蒸完出嚟想脫模,
根本脫唔到, 黐到一 pat pat 呀........
於是我雪凍佢先再脫, 原來好好多, 不過脫完都見到一邊就 ok, 另一邊就已經俾我 '了' 到一忽忽咁.....

雪到夜晚切開, ok 喎!! 切到已經等如成功了, 之前整中式糕次次都衰晒, 真係好有陰影.....
我偷食了一件, 呢個年糕好煙 un 呀, 我將 300g 糖減到得 120g 都好ok, 300g 真係甜史又肥史了!!!

下午去了跑 10km, 真係大鑊呀, 今個月練得好少好少....... 但未來一星期有兩個比賽囉
得 10 度的天氣, 上太平山頂跑, 會係咩感覺呢? 到時我話俾大家聽~

夜晚, 去了旺角人氣的 Don Don 屋食飯, 烏冬很滑, 牛肉很嫩, 不過份量得好少, 男人食一定唔夠...

呢個滑蛋真係正到冇朋友!!! 是香港難得的水準~
吉豬就 ok 啦, D 肉都 un un 地~

食完都好似唔多飽, 再戰麥當當, 老公話要請我飲杯新出的咖啡, 佢估我一定鍾意喎
這個 Nutty Mocha 真係好好飲呀, 老公都未見過我飲 McCafe 飲得咁快~
好濃的朱古力同埋榛子味呢, yummy!!!

呢個 Dark chocolate cake 都幾好, 有足足兩層的朱古力呀, 不過甜咗少少~

非常滿足的一日呀~

希望大家龍年行好運, 最緊要身體健康, 心想事成,
人人加人工, 餐餐有好餸~ 恭喜恭喜~

第一次大鑊煮團年飯

2012-01-21T22:00:00.000+08:00

今日係年廿八, 過得非常充實~
平時返工, 好想瞓晏D, 本來一心諗住今日要瞓到自然醒, 點知竟然仲早過平時就醒咗, 慘.....
咁食完早餐, 八點鐘就開始大掃除, 上星期已經洗咗D , 但今日都仲係好多嘢清潔, 做足5 個鐘!!

最艱鉅的洗廚房我一人包辦, 嘩, 好耐都冇見過個焗爐咁乾淨囉~
所有嘢都冇晒漬, 真係好開心~
仲有要抹窗啦, 波比算係好乖幫手抹咗好多塵, 成間屋都乾淨晒~

哈, 波比話應該要多D 叫朋友上嚟, 因為我會勤力D 清潔,
係呀, 因為今晚同初七都有人嚟, 我先抹到咁鬼乾淨, 往年有時求其抹就算了~

食完 lunch , 波比陪我去買餸, 買了超多餸呀~ 因為從英國回港過年的波比表妹 x 2 會上來食飯~

嘩, 今日係一個創舉, 我一個人煮了六個餸的團年飯~ 好開心好有滿足感~

今日整了溏心蛋, 可惜只係少溏心效果~
新菜色 - 台式鹽酥雞, 嘻嘻, 係跟台灣買回來的食譜整的, 平時兩個人就唔會炸嘢喇~
味道都幾似, 不過我用半煎炸不是全炸, 未做到台灣的超酥效果添~

泰式蝦餅, 用了椰汁同埋冬蔭公香料去醃, 點魚露食啱啱好~

行行吓街市, 波比先講表妹鍾意食魚, 咁啱又見到一間三文魚專門店有三文魚骹賣, 好少見的
有時去日式食店都有呢味鹽燒三文魚骹賣, 呢個位置的魚肉好滑, 又多魚油, 夠晒 Omega 3 呀~

仲有炆咗幾個鐘的麵豉醬金沙骨, 本來想整豬軟骨的, 可惜買唔到啊~
已經落咗好多醬, 都好似唔多夠味, 可能太多水了, 下次要整得好D!

還有屋企對面買的帶子刺身同埋美國珍寶蠔呀, 4個人都食得好開心呢~

飯後, 教表妹整蛋撻, 今次都係由搓皮起做, 其實要將塊皮鋪得平均入個模度, 都好有技巧的~
第二批做到半熟效果, 加埋波比整的 Latte 做飯後甜品

大表妹的一杯, 用朱古力畫了 Angry Bird , 哈哈哈, 好似呀!!

好開心的 gathering, 招待朋友上來吃吃飯, 飲杯咖啡, 真係賞心樂事~

團年飯

2012-01-20T22:00:00.000+08:00

今晚同波比一家加親戚食團年飯, 但超失望,
平時去開的長發酒家, 小菜一向都幾好食,
點知今晚人多叫了個十二人餐, 食物勁 hea 勁難食, 個沙律卷簡直要用不知所謂來形容!!!
成二千幾蚊, 食咗D 垃圾落肚, 真係一肚氣!!

波比表妹的男朋友替波比從英國買回來了很多特別口味的 Nescafe Dolce Gusto 的 capsule,
很犀利呀! 很多是香港都冇得買的口味呢!
聽晚要多謝表妹, 煮返餐好嘅請佢哋食先!

賀年小吃 - 黑芝麻合桃酥

2012-01-19T21:32:00.000+08:00

過年前的工作天, 見到不同的病人, 感觸良多~
有瘋瘋癲癲的大陸阿媽, 真係唔係講笑, 比睇報紙大鬧醫院嗰D 仲癲, 長期要有個石Q 睇住佢....
所有醫護人員對住佢已兩個多月, 大家真係 EQ 低D 都唔得!
有臨過年前過身的老人家, 她的家人一定很傷心,
呢排來來回回睇咗幾個末期癌症的病人, 忽然發現的, 冇得醫, 在醫院過新年, 出院無望......
我望住佢, 感覺到人生的無奈...........

今晚波比出咗街, 我就自由活動了!
先去了辦年貨, 仲有三日就過年, 好似乜都未攪咁..........

返到屋企, 食咗個合味道杯麵, 嘩, 真係超過一年冇食過喇, 係趁波比唔喺度先會食d 唔健康嘢~

跟住整餅, 應該係整酥先啱!
翻兜了前幾日整的合桃酥, 不過今次減油, 用黃糖, 仲加了黑芝麻

大量生產呀, 聽日送俾波比 family

um, 不過今次好似冇上次咁鬆, 唔通因為我減咗油?
哈, 健康同好味有時真係好難平衡~

冬日羊腩煲

2012-01-18T21:45:00.003+08:00

星期一, 睇人 blog 知道原來羊腩煲唔係好難整, 就一於試試啦~

第一次去街市買羊, 我覺得俾人呃囉,
去到大橋街市入去轉右的一檔肉檔, 大大隻未寫住有黑草羊, 諗住擔啦,
問佢幾錢斤, 佢話 $110, 都幾貴, 我話要半斤羊腩
點知, 佢一秤完, 話我聽 $95, 我話「吓?我要半斤喎!」, 真係啞咗囉, 好似屈人要咁,
咁佢再懶係切返D 出嚟, 就話 $75, 其實真係任佢 up 囉!
到佢切, 我明明話要腩, 點知覺得佢俾咗脾我, 仲要係急凍的,
返到屋企煮完, 舊舊都係骨, 應該有 $50 都係骨囉,
所以我平時真係好唔鍾意去街市D 肉檔買嘢, 覺得檔檔都好唔老實, 呃得就呃!!!
急凍的, 早知我去凍肉店買啦, 真係好無奈囉~

好彩, 我買多咗 $30 腩排放入去煲, 否則真係冇肉食...........

第一次整, 算是好似街外的味道, 不過落多咗糖呀, 攪到甜咗D, 下次識喇~

今晚再用個汁嚟打邊爐, 真係超正呀!!!

前幾日行吉豬島, 見到有台灣的白苦瓜賣, $20/個, 加埋之前在台灣買的農場蜂蜜,
炮製了這個台灣蜂蜜白苦瓜汁, 其實.......... 好難飲, 都唔似台灣飲咁清甜嘅? 不過健康指數搭救~
加了好多蜂蜜, 肥肥肥..........

超開心 cooking day!

2012-01-16T19:12:00.003+08:00

今日放大假, 相約了大學老師再煮嘢食~

一見面, 好多嘢都想整, 不過都係簡單為主
造了這個合桃酥, 是跟韋太的<懷舊小食2> 的食譜整, 嘩, 好食到震, 超超超鬆脆呀!!!
仲要好易整, 易到你唔信, 真係一定要試吓~

等緊發麵糰之際, 我們吃個 lunch, 是糙米粥同埋年糕,
老師煮的食物, 全部都健康到爆, 這就是她不老之謎嗎?
哈哈, 我讀大學時, 同而家相比, 佢個樣真係一D 都冇變到o架!!! 羨慕死人!

之後整麵包, 佢有麵包機真係好方便, 麵糰已經整好晒, 我只需整個菠蘿皮就得,
老師的女兒都有幫手搓皮, 同小朋友一齊整嘢食, 係好開心的~
焗好了, 嘩~ 金金黃黃, 吃得好開心~

超健康的老師, 今日剛好買了一批有機蔬菜, 從袋中掏出每一種食物就話要送給我試試,
吓, 點得o架, 有機菜實在太貴了!!!
兩個女人推來推去, 最後成功推走了一大盒士多啤梨, 不過還是避不過帶走了三條三色蘿蔔

還有很很很新鮮的車厘茄~

老師實在太太太客氣了~ 好彩今日我都帶了些食材送俾佢~
老師又買了廚房新玩具, 哈哈, 又睇得我心癢癢, 不過唔會買啦, 廚房冇位喇~
兩個愛烹飪的女人走在一起, 很容易變得很敗家, 哈哈哈!

方形 No knead bread

2012-01-15T23:00:00.000+08:00

嘩, 今日的相對濕度是 98-100%, 大霧到望出窗口遠D 都睇唔到........
抽濕機抽出來的水, 多得恐怖!!! 還好這段日子沒有外遊, 否則屋企必定發晒霉

星期天, 難得不用返奶奶屋企食飯, 自己下廚
用了 No knead bread 的 Master recipe, 整了這個方形的法包
不過, 很難脫模!!!! 因為 recipe 沒有油份............. 下次都係就咁焗好D 啦~

加了南瓜子, 有很獨特的香味

用來配上波比飛佛的特製磨菇湯, yummy!

烘脆了的包, 成了和牛漢堡!

還有牛扒同薯角, 呢款惠康牛扒, 之前咪讚過唔錯嘅,
點知有一次波比話佢同事話呢款落了化學的物質,
我也看看包裝盒背後的標籤, 哎呀, 乜原來真係落咗兩種化學添加劑, 可能因為咁先至會咁鬆囉,
以後都唔會再買喇~

飯後又整 Latte, 但真係打極都打唔到最理想的奶泡.............
嘻, 今日去烘焙店敗家時, 買了朱古力 topping, 擠了隻小熊, 一樣飲得開心~

這個週末, 本應要大掃除的, 但尋日太累了, 今日實在冇精神去執屋, 聽日努力啦, 好彩攞定大假!

大囍日子

2012-01-14T23:30:00.000+08:00

這兩日是超好日嘛! 今日也是波比妹妹的大日子~
第一次飲新人的茶, 在教會行禮坐第一行, 除自己結婚外, 第一次坐主家席

波比兩兄妹都係好的人, 不過兩個都被父母縱得太離譜,
我不得不在日常生活中發現到太多波比的港童行為, 妹妹更甚,
我這個做阿嫂的, 只希望佢會識得多一點從別人的角度去睇, 多一點顧及別人的感受, 為人著想~
世界上有好多窮人, 飯都冇得食要餓死, 我們不要浪費食物,
又有好多人, 衫都冇得著, 我們沒需要件件都是買名牌衫,
量力而為, 量入而出, 其實沒需要去租樓而可以買到一個物業

雖然是返教會的, 又接受了婚前輔導, 但我不明白, 為什麼很多很基本的東西也沒改變過來.....
聖經上的教誨, 是唯唯諾諾得個知就可以, 還是要身體力行的呢?

我最自豪的, 是波比經過我多年的改造, 現在港童行為已減少了很多~
如果我史咗, 佢都基本上可以自己照顧到自己囉~

中場休息, 去了 Holly Brown, 嘆一杯特濃的朱古力雪糕, 滿足了我發作了一星期的朱古力癮~

途經海港城, 遇上 Chocolate Trail 2012, wow~

自我獎勵

2012-01-13T22:00:00.000+08:00

這星期的總結, 又是「忙到嘔」,
放工後, 決心要獎勵吓自己

這款石板街甜筒, 上面的古古力好好食! 好多棉花糖, 食完好滿足!

早幾日則買了這款Chocolate Truffle, 講到Truffle, 以為好好食
點知, 食落是有色無味的朱古力雪糕, 啞咗......

煮飯次數不多, 出街食, 去了旺角的七喜, 果然好食, 及第粥很足料, 食材很新鮮,
炸雲吞內蝦同豬肉比例合宜, 脆卜卜好正呀~ 不過糭就麻麻地~

累

2012-01-12T23:28:00.001+08:00

嘩, 呢幾日返工, 攰到史咗......
醫院的工作, 總是無止境的, 遲食飯遲放工是例牌的事..............放工實在很累很累..........

在病房內見到一個外國人醫生, 是新來的
佢好驚訝點解我們的醫院可以忙成咁, 佢喺外國, 應該一日係幾十個八個症的嗎?
見到佢悠閒的睇牌板速度, 仲要一路睇一路飲返杯咖啡........... 真係完全唔會有公家醫院的醫生做得出........
在病房工作的, 大家往往都忙到成個癲婆咁......
香港同外國醫院的做事方法太多唔同了, 所以點解有人咁反對請外國的醫生, 是可理解的

前排有一日冇早餐食, 屋企又冇雞蛋, 隨便在網上找個無蛋蛋糕的食譜,
加了紫心蕃薯做了這個無蛋蛋糕, 質感很像中式的蒸蛋糕呢~

改良版台式肉燥

2012-01-08T21:29:00.002+08:00

嘩, 今日擺咗個大烏龍.............. 晨早搭咗兩次的士, 頻頻撲撲, 驚魂未定.............
我自己都 O 晒咀.............

我見 HSBC 獎賞錢購物網, 竟然有我部 Dream Oven 賣, 仲要超抵, 由 $2388 減到 $1681, 好想換....

波比之前都計劃過送部麵包機俾我, 不過俾我 ban 咗, 因為真係好貴, 又要搵位放, 廚房真係冇位了~
佢星期一至五又唔食包嘅, 得我食, 整嚟有點嘥氣,
不過呢個焗爐真係好勁呀, 所有我想要的 function 都有齊晒, 好方便就整到麵包, 唔洗攪餐史得我食,
佢用電子 timer, 唔驚我會焗燶嘢 (而家部焗爐個時間掣係擰, 只可調教好 rough 的時間, 有時就係多一分鐘就燶晒......)
最犀利係整麵包、 pizza、jam 都得

嘻嘻, 搵到師妹收留我而家個焗爐了, 我可以買新喇~
雖然而家呢個有不足之處, 不過都真係好好用, 好有感情的, 要送佢俾人, 真係好唔捨得,
不過為佢搵到主好人家, 我都開心的, 佢呢一年來, 真係好叻, 幫我整咗好多好食的麵包蛋糕雞翼意粉呀~

今日用了新食譜去煮台式肉燥呀~ 要好食真係要多D 功夫~
豬肉用鹽糖豆粉醃啦, 蝦米冬菇浸軟,
先爆香蒜蓉、乾蔥碎、蝦米、冬菇, 加肉碎炒炒炒,
加入適量老抽、蠔油、紹興酒、五香粉、花生醬、冰糖 (哎呀, 到寫 blog 呢一刻先發現我冇加冰糖..... 又失憶了........),
太乾的話加入適量的水, 慢火煮 8-10 分鐘即成~

有了蝦米冬菇, 真係香好多呀, 同埋今次煮得真係有點醬的質感~
平時放工整的話, 就冇咁多時間準備咁多材料了~
聽日有肉燥雞翼飯做 lunch, 好嘢~

芝士蛋糕

2012-01-07T22:30:00.000+08:00

還有半舊 cream cheese 剩, 今日整埋佢, 都係用返 Christine 的食譜整穩陣D!

攤梳化, 吃一啖熱辣辣軟綿綿的芝士蛋糕, 太好的感覺~

今日陪波比去參加一個跑步活動, 感覺像............ 送小朋友去興趣班然後自己遊蕩等放學的家長.......
去了邊行街邊等, 好多人, 人人在辦年貨~
竟然俾我在一田超級市場搵到失傳好耐的楊協成咖吔醬, 勁開心, 買了三罐, 因為真係好好食o架!

This is a good day~

2012-01-06T23:00:00.000+08:00

星期五可以準時放工, 搭上村巴順利回家, 是我的 good day~
咁凍~~~~~~~~~ 來個自家邊爐就最好了! 成個街市的人, 都係買嘢打邊爐呀~

今次整冬蔭公湯底, 很簡單, 打到最後連湯喝十分美味:
水, 濃湯寶一粒, 三個蕃茄切大件, 一棵香茅切斷搣開, 冬蔭公醬一大匙, 辣椒粉適量, 鹽一小匙~

今晚去到海鮮檔, 人人都買象拔蚌, $30 有 4 隻, 好彈牙又鮮味!

還有好大隻的花甲, 好好味~

小祝福

2012-01-05T23:08:00.000+08:00

有一位好好人的護士姑娘結婚了, 今晚放工特意去買禮物,
其實都行過好幾次, 都唔知買乜好...........

見佢同我一樣鍾意煮吓嘢食, 就去買了些可愛有用小廚具俾佢,
呢塊豬豬砧板, 我超鍾意呀~~~~
可惜我已經有了一塊都好可愛的小白兔砧板了........... 冇藉口再買啦............
唯有幫佢找個好主人啦~

好開始

2012-01-04T22:02:00.004+08:00

尋晚攪到成 7 點先放工, 今日醫院反而冇咁忙, 竟然有點時間去 review case,
那是奢侈的, review 完對幾個病人都帶來了一些改變,
平時忙到死, 睇得晒一日的新 case 都偷笑了~
真係好抱歉, 對好多病人根本都未能做到 best continuous care, 老細不停的 fight 人手,
無奈的百萬年薪的高層就不停話冇錢, 但又用埋晒D 錢去好多好大喜功的地方...........

見到病房有時病人就多到喺走廊不斷加床, 但望勻就只有兩三個同事, 個個都低頭在忙~
不停有病人在叫, 有家人在問病情, 真係鄧佢哋好辛苦呢.........

今日話咗要準時走, 離開時天仲未黑的感覺太好了~
有時間整吓好菜: 日式胡麻醬三文魚滑豆腐

仲有冬蔭公醬炒牛肉三色椒, 原來用冬蔭公醬炒餸係好正的!

火

2012-01-03T23:33:00.000+08:00

2012 的開工日, 很火!
因為有D 「專業人士」鍾意霸埋我們的專業的東西去做, 但又其實唔識做, 完全亂嚟!
俾我見到真係把幾火!!!!! 簡直係自上次見識了佢哋教「猜包剪揼」都可以成為一堂的「治療目標」後, 又一鉅著!

但今次是玩到一個在 ICU 的 BB, 自己唔識睇又想偷我哋師, 仲問返我轉頭佢咁嘅問題會唔會好!
最過份是根本唔識就亂 refer 個 BB 做一個不必要又要食好多幅射的檢查, 你話我嬲唔嬲~

佢哋最叻, 就係自己唔識做, 又在醫生家長面前扮到好識做, 將我講嘅嘢扮晒係佢識嘅嘢咁 summarize 一次出嚟!
今日個家長問佢D 問題, 佢一D 都唔識答,
講解剖學, 你熟定我熟?! 我把家長的問題一一解答了~ 勁暗寸佢那答咗等如冇答的答案~
但其實我都知好蝕, 因為俾佢偷聽晒我點答家長~

同老細傾返, 我都覺得蠢咗, 點解要應承同佢一齊睇個 B, 嘢就我做, 彩就佢攞~
不過, 我的出發點係制止那不必要的幅射檢查, 如果唔親身上去, 好難有 evidence 去制止,
我可做的, 就是終於都制止了,
不過醫生既然懵懵吓一開始叫佢睇唔叫我睇, 咁我都唔會爭住做~
不過我要祝個 BB 好運囉~ 唉............. 真係激氣咗成日呀~ 點解有D 人可以咁o架???

日式芝士蛋糕 x 西日晚餐

2012-01-02T23:14:00.000+08:00

今日跟了一個日文的食譜網站, 做了一款芝士蛋糕,
不過芝士味不夠濃, 只有濃蛋味, 同埋好濕, 麻麻地~

上次到大學老師家, 她教我煮茄汁意粉醬, 今日用了差不多的方法去煮加入自己的改良法,
三個蕃茄切粒, 加一大湯匙蒜蓉炒香,
加入黑椒、喼汁、茄汁、鹽、糖、水, 中細火煮 15 分鐘成茄醬狀,
加入三色椒、西班牙腸、蝦仁煮至煮, 埋獻即成~
平時冇時間就用即食意粉醬多, 有時間咁自己煮會健康D呢~

仲有又焗薯蓉同三文魚骨, 很健康的一餐~

假日農場 x 芝士焗西班牙腸薯蓉

2012-01-01T22:30:00.000+08:00

看了小婉子去假日農場的相片, 我們今日都去了

農場在上水, 我們在上水火車站打的入去, 個網站話的士大概 $30, 但我哋確實搭咗 $50 仲知司機一定冇兜路, 我已經覺得有點被騙了......
入場費 $60/人, 入到去見到好多一人大細, 仲見到醫院的同事添!

有很多適合小朋友的遊戲, 但通通都不適合我們呀, 我們只想來探探肥豬
見到一片田, 有很多植物

見到羊咩咩, 即刻想起了宜農牧羊場呀!

見到肥豬了, 好可愛, 又肥又圓, 比嘉道理的靚仔, 又超為食呀!
$5 買了飼料, 其實只有兩塊麵包皮.......... 真係好呃錢囉...........

之後有牛睇

仲有兔同埋鼠

臨走時見到肥豬在瞓覺, 果然係豬, 食完就瞓......
這地方有小朋友的話來, 應該會幾開心的, 不過真係覺得地點太遠同埋收費有點唔合理!

回家煮飯, 整咗芝士焗西班牙肉腸薯蓉
好易整, 烚了薯仔壓成薯蓉, 蔥同肉腸切粒炒香, 混入薯蓉中, 加鹽加點牛油,
放在焗兜內, 鋪下一層芝士碎, 220度焗爐焗 20 分鐘至表面金黃色就 ok 喇!

滿滿的一層芝士, 成屋芝士香呀!!! 每人 KO 了一大兜~

今日地產經紀打嚟, 催促我哋快D 放咗而家層樓,
um............ 那個內園單位我們覺得 ok, 但又不至於超鍾意, 我們家是有陽光的開揚景觀啊,
內園即是樓對樓, 少了陽光, 又好似有幾十對眼望住你咁, 其實, 我們未必太習慣這感覺....

而且, 業主開價雖然根據前陣子的成交來說, 是「合理」,
但我們用了幾間銀行的網上估價, 都估唔足價喎, 差成 30 萬!
明顯的, 銀行的估價已有點回落, 但唔急放的業主又企硬那超賺的高價位, (所以近期得好少成交?)
如果我們用業主開的那個價去買了這單位, 我絕對相信很快這物業會變了負資產!

又當看看這屋苑的歷史成交, 其實一年多前, 差不多的單位比而家平六七十萬呀,
證明這一年, 樓價升得太多太不合理了~
所以嘛, 我們又不趕著換樓, 不用那麼心急了, 看看樓市會否如人人所講在 2012 年下調到較合理的水平啦,
我們絕不是無知的望樓價要跌一半, 那是沒可能的!
如果下調至 09-10 年的水平, 其實都合理很多~

2012 第一焗 - 絕頂美味之丹麥吐司

2012-01-01T18:48:00.001+08:00

2012 年, 計劃好了要焗好好味的麵包,
大家知道近來 openrice 大熱那間 BO-LO’GNE 博洛尼亞有款招牌貨叫丹麥麵包嗎?
人人食過都讚好食, 我們早幾日行經, 都好想試試, 點知一睇價錢, 啞咗!
單點麵包要三十幾蚊, 焦糖香蕉多士(只是麵包上加幾片蕉) 要 $57! 一塊包加兩啖意粉又要六七十蚊, 好過去搶...... 但仍然有很多人來朝聖

其實這款丹麥麵包在 A1 Bakery 或一些日式麵包店都有得賣, 都係三四十蚊一大個,
係好多香港人唔識, 以為得博洛尼亞先有,
而亦都可以自己整, 我都見過唔少 blogger 整過, 不過一路都知道佢要用好多牛油, 好唔健康, 所以想食但一路都冇整,
今日心癢癢, 見 Carol 老師都有教, 就膽粗粗跟著做, 因為實在唔捨得出去咁貴食一塊~

http://tw.myblog.yahoo.com/carol-jay/article?mid=174431

我家本來沒有方包模, 諗過幾次都冇買, 因為......... 廚房冇位喇!
今日還是去敗了個返來, 咁又要整多D 喇~
Carol 老師的教法很詳細清楚, 我把牛油減至 100g, 不過我控制牛油的軟硬度不太好,
又沒有依足所有步驟去雪完先搓長 (因為太花時間了), 所以牛油開頭就太硬, 後來就溶了, 搓搓吓底層仲穿了........... 哎呀...............

左邊是第二次發酵前, 右邊是發酵後

上面很快上色, 真係要小心睇火呀, Carol 老師教的冚錫紙方法亦很有效~
焗好了, 漲到好大個呀, 好開心!

切開睇睇, 嘩, 好多層呀~~~ 不過如果同 Carol 的相比, 好明顯我的冇咁酥, 應該是減了牛油的關係~
整完先發現, 同我之前整酥皮一樣, 其實一路焗, 會好多油溶咗流返曬出嚟,
好彩咁啱我個方包模下底係有幾個窿的, D 油出晒嚟, 原來沒有想像中的肥膩呀!

切片後我再烘一烘, 一件搽了蜜糖, 嘩嘩嘩, 不得了, 是超好吃的 Honey Toast!!!
我覺得它的味道, 似甜品多過似麵包~
另一件夾上滑蛋, 又是超美味! 每一口都又脆又有軟的部分, 充滿了牛油香, 波比先生都大讚呀!!!
這種丹麥多士拼炒滑蛋, BO-LO’GNE 賣緊 $60! 超搶錢是嗎?
下次有時間, 一定要再整呢款包呀~

2011 帶著問號的完結

2011-12-31T23:30:00.000+08:00

2011 年最後一天了, 執屋執咗一朝, 都只係執好了間書房..... 每一年, 也儲了很多垃圾........

和波比先生去食譚仔, 之前食過一次元朗的分店, 因味道唔好冇再幫襯,
今日俾多次機會佢, 哈, 又好食返D, 原來尖椒皮蛋超超超正呀!

然後, 我們又去了睇樓, 其實已有一個心儀屋苑, 港鐵站出唔洗三分鐘可以入到屋苑,
一個低層內園單位, 間隔比我們家實用, 因少了好多大窗台, 都幾滿意的~

不過回家後, 再一次同波比先生傾傾將來的計劃, 其實買唔買樓, 又好受我轉唔轉工影響,
唔轉就有需要搬(搬近醫院唔洗返工咁辛苦), 轉就反而未必需要搬去嗰區喎

轉唔轉工, 又有好多因素影響, 工作性質、返工時間、人工、長遠的穩定性、究竟會唔會生小朋友呢 (又唔係你話生就生得出),
每一份工都一定有點 pros and cons, 世界沒有完美的,
哈哈, 我份人唔知算唔算諗得太多, 我仲諗埋其實根據前輩經驗, 打份工真係好難養自己退休,
如果轉工而可以多儲錢, 然後投資買樓收租的話, 其實係咪可以早一點舒舒服服安心退休,
唔洗做到 55 歲仲要踎櫈仔呢?

但轉工的話都一定要返星期六全日, 陪少了波比先生一整天, 捨得嗎?
兩公婆一世人, 又有幾多相對的日子呢? 無人知道的~ 我明白到珍惜相聚時間的重要性~

今天有太多的問號了!

雖然今日很很很想偷懶, 整個十二月也很懶很少練跑,
但最後都堅持了跑 2011 年最後一次步, 因為要完成這七個月來的 500km! 好嘢~

展望 2012 年, 希望大家事事順利, 身體健康, 開開心心~

2011 年收爐之作

2011-12-30T21:30:00.000+08:00

今日係全個月唯一一日搭到村巴放工的, 終於有時間煮吓好餸!
多謝師妹從 Hungary 帶回來送我的辣椒粉

今晚用來煮雞, 辣椒雞腿肉, yummy~

有點時間, 本想整咸魚煎肉餅, 忽然想到煮煲仔飯咪仲開心 :D
買埋馬蹄, 整咗個馬蹄咸魚肉餅煲仔飯, 嘻嘻, 仲要係有飯焦的~ 煮起時成間屋都香噴噴!

仲有半包馬蹄剩, 於是在網上找找馬蹄沙的食譜
所有材料我屋企都有喎, 就 go go go!
原來很易整, 我還加了些台灣小芋圓, 成了這個七彩馬蹄沙, 去跑完步返嚟食, 很開心~

每年一次的霸王山莊

2011-12-29T22:36:00.000+08:00

多謝霸王山莊, 每年十二月都會寄張 100 蚊 coupon 嚟賀波比生日,
今晚又去了, 食物實在太滿意, 小籠包皮薄, 包工好, 多湯汁,
擔擔麵的湯夠晒麻醬味, 不過辣咗少少,
水煮牛肉還是第一次叫, 原來好好食, 麻同辣都好強勁, 牛肉同芽菜都好入味, 辣到變晒孖膶腸咀~

食咗四樣嘢, 不過其實好似唔多飽..... 於是仲去埋食甜品!
近來不停好想食麻蓉湯圓, 這間整得唔錯呀, 流晒出嚟, 很滿足~

聖誕派對 - 親戚篇

2011-12-27T21:12:00.000+08:00

最後一日假期了, 點解放假係過得咁快o架.........

今日做了一件有趣的事, 就係睇樓! 開始認真想想換樓的事了~

晚上很開心, 同波比阿姨一家人去了食洪水橋新開的 King Ludwig 德國餐廳,
那裡空曠的露天座位, 加上西式加聖誕的佈置, 實在令人完全覺得置身外國呀~
食物也很讚呢! 先來牛肝醬拼麵包, 還有德國燒豬腩, 很脆很正!

薯餅拼大蝦帶子, 海鮮都係新鮮爽脆~

嘩嘩嘩, 波比至愛的德國腸拼盤呀, 平時我哋兩丁人一定食唔到, 好味, 不過都幾咸

還有主角的燒豬手, 咁多人分真係啱啱好, 平時得兩個人叫, 真係好難食得晒!
阿姨一家都話好正又好好 feel 呀!

我爭俾錢失敗了, 唯有請食甜品, 好識食的阿姨介紹了對面馬路的一間甜品店,
紅豆沙河粉, 哈~

聖誕派對- 我的 U-mate + 大學老師篇

2011-12-26T23:00:00.000+08:00

今日繼續 gathering, 約了我的大學同學又去探 B, 很開心很齊人呀!!!
哈哈哈, 我還是第一次在日頭打邊爐, 一路食一路傾吓偈, 不亦樂乎!
同學間又有喜訊了, 可喜可賀~

還很多謝朋友準備的生日蛋糕, 我們中有 4 個十二月的壽星女呢!

如果唔係要趕下場, 實在很想留多陣傾多陣!
下場就是去大學老師屋企, 除了我同波比, 還有我醫院的師兄同事, 佢咁啱又係大學老師的下屆師弟, 所以大家都識, 就一齊去喇~
哈哈, 又是很開心的 gathering, 大學老師同我一樣, 好鍾意整麵包, 日日都整那種,
又同我哋一樣, 剛買了部咖啡機, 於是就一齊研究沖咖啡同埋整嘢食,
由兩點幾整到七點喇, 老師整咗好多食物, 樣樣都好健康少鹽無添加, 勁!!

老師每次都係好關心我幾時生仔同埋男同事有冇拖拍, 哈哈~
見到一家四口的 family, 實在很溫馨, 這完完全全就是有一個家的感覺, 同二人世界又好唔同呢~
很欣賞老師的教女方法, 沒有谷佢哋學十樣嘢, 樣樣都要俾佢哋自己做, 唔好令佢哋變港童~

老師雖然已經係一間診所的老細, 自己都有做 case, 但佢同我有D 想法都好似,
就係當自己到四五十歲的時候, 真係好難仲坐住張矮櫈仔做 case 咁做到退休
我同老師傾到 Career 問題, 究竟應該短視的轉返一份人工高的工作?
還是長遠點看, 人工低但是做得長的工作? 實在很難選擇~
我諗好大個問題就是取決於預算的退休年齡, 會唔會想轉 part-time 等因素, 實在是很難計的一條數~

聖誕派對- 波比 U-mate 篇

2011-12-25T23:30:00.000+08:00

Yeah yeah yeah, 聖誕正日, 開 party!!!!

上年選址在我們家, 今年就去了其中一位朋友家,
朋友們邀請我下廚, 實在多得大家賞面, 好彩冇失禮!

我們 2pm 出發, 帶了4 大袋食物同調味料去,
打了八圈牌, 我就開始煮呀煮~

這個迷迭香慢煮雞腿是跟電視學的, 我之前都諗唔到一隻留皮的雞脾, 點先可以令醃料入味,
原來是可以輕輕分開皮肉, 把已炒香調好的調味料塞入去, 有塊皮包住, 調味料唔會漏, 把雞醃得好入味呀!!!
煲底墊了加拿大薯仔、蘿蔔、洋蔥, 煮雞時滲出了雞汁, 把配菜加上鮮味~

因為有一個朋懷孕, 我們帶來的所有海鮮刺身佢都唔食得..........
所以特地準備多一個熱盤, 是日式牛肉鍋, 因為是臨時加的, 叫了波比先生去樓下街市買材料 (老婆掛住打牌), 點知就出事了!
波比買了超多的份量, 每種食物都是我計劃中的兩倍份量, O 晒咀!!!
有牛肉、金菇、豆腐, 簡單又健康呀, 不過我未煮過咁多人咁大煲,實在唔識點計調味料的份量,
第一煲淡咗 D D, 第二煲會濃味返D~

還有尋日醃定的孜然羊架~

我們從屋企對面的日本批發店, 帶來了很多日式食物, 有三文魚、生蠔、毛蟹、海膽、帶子、玻璃蝦、翡翠螺、味付八爪魚等等, super tasty!!!

有朋友好識食, 生蠔變焗蠔 (不過冇影相呀), 我加了蒜蓉、煙肉、車打芝士去焗, 哈, 唔知好冇味喇~ 因為我嗰隻係生食~

最後甜品時間, 有朋友買了超大粒超甜的美國士多啤梨呀, 真係好好食!
仲有幫我同波比先生慶祝生日, 好好味的 COVA 什果蛋糕, 多謝晒大家~

平安夜之係咁整係咁食

2011-12-24T22:17:00.002+08:00

放四日假, 太開心了~
甜睡一覺後, 起身跑步, 睇 Mission Impossible, 超緊張冇冷場好好睇!

之後去了食元朗的成記, 係一間好出名的大排檔, 連少年食神都會特登揸車入嚟元朗食, 你就估到有幾堅!
佢用的豬扒好新鮮, 唔似一般的餐廳用雪藏貨, 好有豬味,
甜豉油汁加埋少脆的豬扒, 真係太太太正喇, 真係好耐都冇食過咁好食的豬扒飯呀!!!!
10 個 Good!
見伙計做到冇停手, 超好生意, 仲每日 3:30pm 就收工, 唔憂做程度令人完全嘩然~

之後就同波比先生買嘢, 聽日會去朋友屋企開 Party, 我要負責煮嘢食,
買了雞同埋羊架, 羊架係去元朗一間好出名的凍肉店「兒泰興」買的, 唔肥 very good~
佢仲有鵝肝賣添呀, 有機會要試試~

今日係咁整嘢食同食嘢, 聖誕大餐有牛扒、紫心蕃薯同埋日式咖哩什錦

飯後就大量生產薑餅人, 往後幾日的 gathering 要送俾朋友

仲整了薑餅朱古力士的, 配上波比整的即磨咖啡, 好美滿的 dessert 呀~
大家聖誕快樂!

又一個 trip

2011-12-23T21:30:00.000+08:00

長假前的星期五, 忙忙忙!!!
安樂地清晒所有 case, 安心放假~

收到師妹送的 hand made 朱古力, 真係好有心~

我報咗一個喺新加坡的 course, 終於都 confirm 攪得成~
而家要 book 機票酒店, 點解新加坡D 酒店咁鬼貴o架!??! 仲貴過我去日本!!!
波比先生會做高級伴讀書童, 嘻嘻~

聖誕派對- 同事篇

2011-12-22T22:33:00.000+08:00

好開心啊, 多謝老細全力贊助的聖誕 party!
仲有同事的愛心蔬菜、千層糕、超甜士多啤梨、雪糕 puff! 吃得太滿足太開心~
我造的薑餅人, 同事都超喜歡超開心呀~
還有一塊是特意送俾一個聽日出院的病人, 希望佢出院後開開心心重新開始新生活~

做冬日, 我們冇得放早, 準時放工已經很好~
諗住搭到第一班的村巴啦, 點知司機一定好趕返屋企喇, 都未夠鐘就開走了車, 我真係啞咗囉......
唔想企成粒鐘, 咁就搭巴士啦, 嘩, 迫人到呢, 沿路個個巴士站都幾十人勁長龍,
好多人都上唔到車, 真係慘呀.........
香港這個地方, 真係愈來愈擠迫了............我們這些住得遠的人, 每一日都要迫車返放工,
常遇到迫唔上車的情況, 九巴港鐵又唔加班次, 很多人都有家歸不得.............

今日波比早放, 幫我準備晚餐,
整了燒豬手, 第一次整到脆皮喇! 原來要督好多窿!

嘩嘩嘩, 你睇吓, 脆到呢!!!

很滿意

屋企邊爐 x 自家製薑餅人

2011-12-21T22:11:00.000+08:00

老公今日 Home Office, 佢負責買嘢打邊爐,
真係睇少眼都唔得, 無監管之下, 有人買了澳洲牛同黑豚, 仲話驚唔夠食買埋蒙古羊..........

今次用了濃湯寶, 加入辣椒干同埋川椒粒, 還有少少四川麻辣醬, 成了呢個麻辣火鍋,
冇出街食的咁一層油, 但都有刺激的辣味, 正呀~ 兩個人食晒成盒響鈴咁滯!

食完飯開工, 整薑餅人, 仲記得2002 年同波比過第一個聖誕節, 就是送他薑餅人了~
但咁多年都冇再整過~

焗完肥o都o都~

點上朱古力~

再準備唧花用的 icing sugar, 原來用保鮮袋唧花都幾好啊!
用斑蘭油同埋士多啤梨糖漿, 調成紅色同埋綠色

呢批薑餅人係聽日開 Xmas Party 時送俾同事的, 每個都有佢哋英文名的 initial
本想再畫D 花, 但好似唔多夠位, 都係以簡潔為主~

入埋袋, 完成了, 超開心呀~~~~

波比先生都有幫手打蛋的, 所以送兩舊俾佢玩, 佢畫的薑餅人............ 係泳裝定係底衫呢?
一見到我就好想笑~

檢討

2011-12-19T21:55:00.004+08:00

話說大學找了我同幾個同事幫手做 part-time research,
我們初步答應了後, 有人事部的人聯絡我們講返個價,
我一聽到個價, O 晒咀, 少得可憐...... 甚至我覺得少得有點侮辱囉!
我想話, 我不如去做補習, 都分分鐘高人工過佢, 但佢而家係要 professional service 啊!
我心中暗叫:「黐線!」
我第一個反應係唔簽, 等我諗諗先~ 同幾個同事傾起, 真係有點火滾!

個價係點計? 似乎係用我哋人工除返個 hourly rate~
係, 我都知我係廉價勞工...........
我今日忽然覺得, 自己應該要檢討吓, 我係咪時候應該轉返份人工高D 嘅工?
我每日做緊嘅嘢, 同多我兩萬蚊人工嘅同事一樣, 我做咁多, 為乜呢?
常有朋友問: 妳點解唔自己出來做呢? 好賺好多喎!
我都真係要諗諗呢個問題~ 其實出嚟每日做兩三個 private case, 都好過我而家嘅人工......
不過當然客源, 又係一個問題~

今日上午去一間醫院, 下午返自己醫院, 睇了 19 個 case, 就係咁辛苦都唔知為乜?!

唉, 講吓整麵包會開心D!
尋日身痕, 又整手搓包, 加了斑蘭油整斑蘭麵包, 不過冇加椰汁, 怕麵糰丸濕呀, 所以其實有色無味

切小件後, 壓平, 灑上可可粉同杏仁, 捲起切開, 再放到戚風模中第二次發酵

焗起了~ 這次又很軟熟啊~ 不過味道不太夠~

反而整了個雙重芝士包好滿意,
上面有 parmesan cheese, 入面有 cheddar cheese, 又香又軟少咸, 造早餐好開心~

第二年的石崗 10km

2011-12-18T16:06:00.003+08:00

話咁快又一年喇! 今日係第二次陪波比先生參加 Kappa 石崗 10km 的比賽~
今年冇上年咁凍, 天氣好好添!

9:30am, 起跑了!!!

我也隨著跑手輕輕鬆鬆的跑了 7km, 有一段要上好斜的山坡, 嘩, 真係想死, 我都係行上去咋!
去到最高點, 望到錦田八鄉一帶~

落斜後, 竟然有個湖在山巒中~

還有一些秋葉

跑得開心得滯, 預錯咗時間返轉頭, 攪到我在仲有 2km 時已經俾回程的波比先生超前了~ =.=!
攪到冇得同佢影衝線相添............
呢個比賽好好, 風景靚, 又冇其他人影響賽事, 不過係要跑上斜嗰吓好係嘢, 所以我先冇參加~
一到終點, 就有一包麵包、蕉、梨、朱古力, 仲有水, 真係好呀~

波比今次跑第 10 名呀!!! 不過年齡組別只是第 6, 攞唔到獎, 唔緊要, 下年再快D!

回到家, 煮了日式麻醬撈拉麵, 拼太陽蛋炸蝦肉丸, yummy~

2012 年的旅遊大計 x 超正「魂」拉麵

2011-12-17T22:30:00.000+08:00

嘻嘻, 話咁快就年尾, 又係時候 plan 吓來年的行程
似乎成了習慣, 我們會在 3 月, 6月, 10-11月去旅行
看看左邊! 我們 3 月的結婚五週年之旅已經成行了~
我當然又想去日本, 但啱啱去完, d Yen 真係貴到唔係講笑.......
暫時唔想又出血, 唯有去個東南亞之旅,
睇來睇來, 不如去沙巴o丫, 見小婉子講得咁正! 於是訂機票訂酒店都順利完成了~
諗起有海鮮食就興奮了!

6月未定, 不過應該係九州/ 北海道, 睇吓邊度的機票平,
11月就去台灣, 希望報到太魯閣馬拉松, 再去花見幸福探吓小動物~

今日難得我又出城, 去了銅鑼灣,
多謝搵食能手的介紹, 我們去試了一間新開的日本拉麵店「魂」,
那是日本人師傅, 店內只有十多個座位, 好彩我們到時剛好有兩個位,
每個位有一塊板隔住, 即刻令人想起日本的一蘭拉麵!
同一蘭一樣, 有張紙俾你剔, 拉麵的軟硬, 湯底的濃淡, 都可以自選~
日本人師傅煮麵的手勢, 同我哋喺日本見到的真的一樣

好了, 我的豚骨拉麵, 嘩~~~~ 我選了濃味湯底, 唔算油但味道十分好, 真係同喺日本食的味道一樣,
叉燒唔肥, 合乎健康! 最正係那味付玉子, 超溏心, 比我們在日本吃過的有過之而無不及!
我俾 98分!

波比叫了「太極」, 是有黑黑的墨魚汁,
仲有見唔見到有舊好似 ssssssss 的東西, 上面有D 金泊?
那是蟹膏啊, 嘩, 唔係講笑, 超濃蟹味, 同平時喺板x壽司食到的簡直是兩回事, 之前我從來唔覺得那些所謂蟹膏有咩味囉............
這餐拉麵, 非常之滿意

隔離有一家人, 小朋友吃完一碗唔肯走, 嚷著要吃多一碗,
那父母不知道日本的替玉(加麵)係要留返湯底的, 已把湯喝完, 但又似乎唔想俾正價要多一碗拉麵,
於是用職員講就咁俾麵個小朋友, 唔洗湯都 ok,
點知老闆超好人, 煮好了一碗麵, 有湯, 還送多半隻溏心蛋俾小朋友,
這些就是日本人的好心嘛! 香港人呢...........

晚上, 再同屋企人食飯, 客家好廚的梅菜扣肉太好吃了, 又唔算太多肥膏呀, 攪到我食咗好多飯呢! 肥!!!

大阪最終回 - 箕面公園行山去

2011-12-17T09:40:00.000+08:00

最後的一天, 得一個上午, 選擇了一早去行山, 吸吸新鮮空氣, 亦想看紅葉
我們七點幾就出發, 在梅田站(阪急線)搭阪急宝塚本線通勤準急到箕面的箕面公園站, 不用 30分鐘, 快過返工!

8:22am, 一出車站, 就有地圖, 我們的終點係行到一個瀑布, 來回都係幾公里

行咗 1/3 路, 我們轉了左, 以為有個咩瞭望台, 點知被騙, 愈行愈陰深, 滿是泥和枯葉的路, 好難行.....
行到上去, 唔見瞭望台, 只見一個對著山放聲高歌一曲的大叔............

折返, 終於到見得返平路, 先冇咁驚!
藍天綠樹, 超好的天氣!

沿路所見的, 都是中老年人, 晨運的放狗的, 還有練跑的, 太酷了吧, 一早在跑山!
我笑說: 嘩, 人哋跑山都快過你跑平路喎, 好勁呀!

有 Monkey? 見唔到添

沿路又有些古老的店子

終於, 去到瀑布了

瀑布前有幾排椅子, 可以坐下, 聽聽瀑布水聲, 感受濺過來的水花

行山的過程, 令人心情開朗, 不過可惜呢度的紅葉比萬博還要少, 實在來得不合時呀,
我見過別人的照片, 沿路兩旁都變了紅色的, 美極了!

回程吧

返到梅田站, 去了旅遊書都冇介紹的梅田食街, 那裡有很多好地道的舖頭, 都是本地人光顧
我們選了一間吃咖哩的, 不停的有人排隊, 應該唔錯掛

只是 880 Yen 就有咁豐富的午餐了, 好開心
那蛋實在很很很滑, 炸蝦同漢堡肉都好好食, 炸豬扒就 ok 啦

波比的炸豬扒肉積靚D, 其實我們並不太餓, 但好吃得吃光了!
吃飽就最後衝刺買手信, 買了兩個 Rikuro 芝士蛋糕返香港呀~

準點的搭機場巴士, check in 完行 Duty Free, 見到超多有名拉麵店的拉麵, 連香港大排長龍的一風堂都有,
買了兩個俾阿姨做手信!
我們自己就買了博多拉麵, 返嚟食咗真係好正呀!

大阪之旅全卷完, 多謝收看! :D

Day 6 @ 萬博紀念公園 x 燒肉放題

2011-12-17T08:23:00.000+08:00

第六天的大及之旅, 去了大阪市東北面的萬博紀念公園
那絕對是一個超讚的地方, 拍友必到呀~
從梅田搭大阪市営御堂筋線到千里中央(北大阪急行), 行去千里中央駅(大阪モノレール)搭大阪モノレール・門真市行, 到万博記念公園下車, 全程 40 分鐘到

一出站, 廣闊的視野, 見到黃黃啡啡的秋葉

這是萬博紀念公園的地標, 有很多大阪手信都用這個公仔啊!

今天帶了腳架, 公園內冇乜人, 可以慢慢行, 盡情地拍拍拍
這是遊園小火車, 不過我們還是喜歡慢慢行慢慢看

終於見到第一棵真正的紅葉了! 其實這裡有一個楓樹林, 如果時間合適, 整遍的紅葉一定美極了,
可惜只是十月尾, 只見到零星幾棵, 有機會的話, 一定要11月尾再來過呀!

見到小學生旅行, 佢哋的衣著 so smart!

這裡的指示很清晰很好, 我們向西走, 上到一個塔上, 就有天橋一路行,
在樹林中高架的橋上行, 兩邊就是樹葉, 太好的感覺~

這紅綠交錯, 很美呀~

行到橋的最終點, 上一個暸望塔, 遠眺四邊的景色, 心曠神怡

去到公園的最西邊, 是一片波斯菊的花海, 今年去唔到北海道, 在這裡見到花海也叫人太興奮

有很多日本人拍友 set 晒好強勁的大機影影影

在這花海中停一停, 坐低食個日式炒拉麵, 很滿足

我們又繼續走, 到處都是那麼美

走到公園的北口, 有一間小 cafe, 吃了我們的便當午餐

然後進入北面的日本庭園, D 湖水靚到呢~

估唔到這個公園行了四個多小時, 好彩今日的行程不趕 (好彩沒有去京都, 我諗呢度比京都的景色更美)
搭 Mono Rail 再轉車, 直去難波

到難波, 我們去返上次酒店樓下那間大超級市場, 掃了很多咖啡杯麵
之後行心齋橋, 在 Tokyo Hand 見到好多烘焙用具, 如果我發咗達真係會搬晒返屋企!
沿著心齋橋筋行了很多舖頭, 不過都買唔到嘢, 係波比先生買到個跑步用的腰包仔~
行到六點幾, 去放題了, 上年來大阪吃過六甲燒肉, 話過一定要再返兜,
不過今次來到.......... 唔......... 我覺得食物差了, 沒有上次嘩一聲的好食感覺..........

第六日完了

香軟排包 (附食譜)

2011-12-16T20:38:00.000+08:00

今日放假, 太悠閒自在的一日了~
早上洗衫執屋, 然後去跑跑步, 在閒日的日子, 路上不太多人, 感受一下陽光與清新的空氣, 實在很寫意~
在元朗公園見到旅行的學生, 放狗的人,
聽見運動場內校運會的廣播聲, 我的中學也是在這裡舉行校運會的, 想起了很多難忘的片段, 在「那些年」一番~

然後, 去買橙買飯盒買麵粉, 回家造麵包
大家有看到生果日報的報導嗎? 吃街外的麵包, 真令人愈來愈不安心.....
http://hk.apple.nextmedia.com/template/apple/art_main.php?iss_id=20111216&sec_id=4104&subsec_id=11867&art_id=15898485

還有另一報導

我很喜歡吃排包, 愛那又香又軟的質感, 第一次自己造, 很興奮
我今日自己試的食譜:

• 高筋粉 250 克
• 細砂糖 45克
• 奶粉 10克
• 吉士粉 10 克
• 快速乾酵母 4 克
• 蛋黃半隻
• 暖牛奶 110 克
• 湯種 60克
• 牛油45 克

我有一本書, 書中教用我的 kenwood 打蛋器配螺旋頭都可以搓到麵糰, 唔洗人手搓,
但我之前試過唔得, 舊麵包好難食, 所以一路都冇再試
今日隻手太攰 (尋日工作關係攪到對手好攰又痛), 於是又想試吓用機搓, 點知, 得咗喎!!
我諗係因為我上次整得太細個麵糰, 所以好難用機打, 今次的麵糰 size 就可以了, 太開心喇!
用機打到差不多, 再用手搓五分鐘到就 ok, 好好的薄膜, 好感動, 唔洗搓到手都跛!

放在微暖焗爐內, 發酵了兩個鐘,
取出, 分割成10 份, 排氣, 滾圓, 鬆弛了 20 分鐘, 再造型同第二次發酵 45 分鐘

其中一份加了 parmesan cheese 造圓型去焗, 180度焗 14 分鐘就得喇!
好滿意呀, 又香又軟的芝士包仔!

有4份麵糰加入黑芝麻粉, 拉長鋪在模具中, 我冇正統的長方形麵包模呀, 用了個圓型蛋糕模去焗咋
焗好撕開, 好香黑芝麻味, 那一絲絲的質地, 很成功的象徵啊~

最後的幾份麵糰焗了原味, 嘻嘻, 但係已經食飽飯未試到味, 快D 到聽朝啦, 好想食呀~ :P

十二月的開心事

2011-12-15T23:30:00.000+08:00

我呢度似乎開始變成週記了........ 因為工作很很很忙, 老細放假我又要做 deputizing i/c...........
冇一日準時放工..........

不過十二月總是令人開心的,
星期一同好朋友加波比先生去小肥羊打邊邊, 係今年第一邊!
不過, 而家的食物差了很多, 湯底也差了很多, 談不上有一點的麻辣味, 實在很難再幫襯!

尋晚是腳傷後第一日跑返, 點知........... 完全不在狀態..........
估唔到停了只是二十日, 影響會那麼大,
又跑得慢, 又好快就喘晒氣, 之前是跑到 4-5km 先要第一次停吓抖抖, 尋日跑唔到 1km 就氣喘心跳, 真嚇人..........
我要努力 train up 返喇, 下個月要跑 11km 的比賽呢!

今日很開心, 是波比的好朋友結婚大日子, 看到別人開花結果, 總是令人感動,
波比同肥仔今晚做 MC, 全場氣氛超好, 很多爆笑位, 波比一班同學的歌曲演出更是一絕~
我拿了肥仔的 5D MarkII 影相, 一路影都忍唔住一路大笑~
Four Seasons 的服務真係超超超好, 仲好過 Grand Hyatt, 食物亦是超水準呀, 由第一道菜好食到甜品, 實在超超超讚~
希望新婚 couple 幸福快樂~

星期日煮好餸

2011-12-11T21:46:00.001+08:00

今日得 8 度, 晨早起身去睇波比跑步比賽,
這次在上水跑 15km, 只是這樣的天氣, 令我覺得所有有出席的跑手已經很毅力可嘉!
我已經遲咗去, 都食咗半個鐘頭風, 吹到雙手都冇晒感覺~
下星期還有石崗 10km, 希望暖返DD~
我的腳傷也算好了很多, 未來幾日應該可以跑返喇~

近來師奶仔最喜歡的事, 就係睇 MAY 姐有請,
之前都有在書店睇過 MAY 姐的三本烹飪書, 不過好多菜色都幾複雜同埋要好多時間去整,
唔太啱我平常半小時煮好餐飯的速度,
但近來教的菜色有d 幾簡單, 好多都想試試整呀! 希望工作可以冇咁忙啦~

呢個冬陰公係跟 MAY 姐的方法, 爆香了蝦頭用來餚個湯底,
我放在真空煲由佢煲了兩個鐘, 再加上同事從 Cambodia 帶回來的香料,
一試味, 真係好好味!!! 好味過我之前煮的兩次呢! 酸辣香得宜!
除咗食冇嘢叻的波比先生, 令我靈機一觸煮個粉絲, 加入酸酸辣辣的湯中同吃, 正呀~

還有孜然羊架呀~ 今次買的羊架好正, 好夠嫩! 波比大讚好好味~
之前次次都係喺佳寶買, 質素原來好唔得呀~
後面還有我超鍾意食的炸薯皮, 太豐富的晚餐~ :p

又老一歲喇

2011-12-09T22:30:00.000+08:00

今年生日冇假放, 因為有好多讀緊 Master 的同事要放假讀書, 前兩年大家讓我在這些日子放,
今年都好應該我讓同事放返~ 終於, 是不用對著書本的一個生日了!

師妹窩心的送上了小蛋糕, 很 sweet~
還有工友嬸嬸在醫院的聖誕 buffet 中, 拎了些小食甜品俾我 (我帶咗飯冇去食), 令我一個人的午餐開心一點點~

回家, 波比話今晚要煮大餐俾我食喎~~~~
生怕佢會整爛晒我D 廚具, 所以整個過程要在我監督下進行! (有人早兩日先整爛嘢!!!)

亦都有點後著, 我都係整定個芝士焗波士頓龍蝦先!

不過我覺得熟了一點, 下次唔洗焗咁耐,
個鉗好正呀!

這是波比出品的和牛漢堡及自家薯蓉

還有黑豚漢堡呀~

哈哈, 係咪燶咗D 呢? 不過心意無價啦~ 一年都冇一次係佢煮飯俾我食喎, 唔好咁高要求~
飯後再有即磨的 Cappuccino 同埋 Amanda cake 做甜品, 這個生日飯很不錯~

生日願望: 希望自己同屋企人都健健康康, 開開心心啦~
多謝好朋友們的祝福 ^3^

Dream Cake

2011-12-08T22:14:00.001+08:00

多謝老公, 為我帶來了我的 Dream Cake 做生日蛋糕

Chocolate Tart & Plaisir Sucre
小巧而精緻, 好過買個食唔晒的大蛋糕呀

嘻嘻, 到十二點先食得

今日撞到一個冇見好耐的好好人村巴司機叔叔,
佢見到我, 第一句話我...............肥咗(好傷心呀)
第二句問我有小朋友未?
唉~ 我知喇知喇有仔趁嫩生, 但我實在未有呢個打算,
或者, 等多一兩年, D 樓多跌多一兩成, 等我可以換層醫院隔離嘅樓, 我會諗諗 :P
醫院隔離有個屋苑, 其實睇睇吓都唔錯,
不過元朗太好住, 淨係 D 嘢食都令人好難搬得走.....

多災多難十二月...

2011-12-07T13:10:00.001+08:00

上星期先整親腳, 尋日又病到就史咁.........

一早就覺得有D 反胃嘅感覺, 跟住就肚痛, 頭痛, 發燒..........
全個人好辛苦, 放工後, 半死的彎住腰咁行在元朗搵醫生睇, 八點後想睇醫生, 原來好艱難.....

返到屋企, 頭痛發燒是最辛苦的, 換了三張退熱貼都未退到燒, 還在想自己要唔要去急症室

好彩有老公的照顧, 加上喪瞓了 12小時, 到今日終於都開始退燒了
但仍然想嘔, 食唔落嘢..........
繼續等食藥, 等瞓, 再食藥, 再瞓..........

本來今晚是一個好同事的 farewell dinner, 但去唔到了, 好可惜..........

芝士香草法包 - 超超超脆!

2011-12-05T22:14:00.001+08:00

波比很愛法包, 成日問我幾時整返第一次那種 no knead bread 俾佢食
於是又跟著 Jim Lahey 的食譜去做, 不過今次有D 亂嚟, 其實我發覺 no knead bread 的成份份量不太重要,
多D 少D, 都會焗到的, 唔似整蛋糕要好準~

今次加了小麥粉同香草, 整了這個芝士香草小麥法包, 一路焗, 香草味滿了整間屋

氣孔都唔錯, 一讚的係個皮, 真係超超超脆, 脆到好似食緊燒肉咁, 咬落去卜卜聲呀!

早陣子自家製了一樽香草蒜蓉牛油, 塗在包上, 超好食呀~
尋晚焗起麵包時, 雖然食飽飯, 但都忍唔到口食完一件又一件~
有機會大家也試試做個人化的 no knead bread 啦!

今晚好開心呀, 放工去探了好朋友, 恭喜晒小寶寶 x 2 出世了! 嘻嘻, 太鄧妳開心喇~

仲有同另一好朋友食飯, 試了新開的西餐廳, 唔錯唔錯~

我隻腳個傷口, 都仲係係咁流膿, 有咩解救呢?

Day 5 之奈良俾鹿咬

2011-12-04T09:42:00.001+08:00

馬拉松完畢, 我們順道在中之島走走, 大阪剛剛辦緊一個水都節, 以中之島一帶的河邊攪好多活動
河上有一隻超大的鴨仔, 好可愛!

附近還有很美的花圃

之後我們返酒店沖涼換衫, 再出發到奈良,
不過今日係全個旅程最唔好天的一日, 落到好大雨, 又凍.......

大概 1pm 去到奈良, 排咗 45分鐘食一間好出名的釜飯「志津香」
哈, 我會話係日式煲仔飯

點解要排咁耐? 你話係咪絕頂好食, 我又會話未係,
不過超凍的天氣, 有熱辣辣的飯, 飯中浸了菇及鰻魚的味道, 是很暖很舒服的配搭~
鰻魚很鮮很嫩滑, 這就是要排隊的地方掛~

煲底仲有飯焦, woo!

行到入奈良的寺一帶, 見到鹿, 開頭都好開心, 直至買了一包鹿餅就是惡夢!!!
當鹿群見到我手上的鹿餅, 不停的撞我、爬上我身要吃, 有一隻仲喺我後面突襲!!!
狠狠的咬了我大脾一下, 痛得我驚慌大叫!!!!
我連忙將鹿餅掉俾波比先生, 根本就唔可以一塊塊餵, 全 pack 掉晒俾D 鹿先可以脫險, 太恐怖了!!!

呢個女仔就係好似我咁俾鹿圍喇!

落住雨, 都冇乜心情拍照

路上有很多鹿 ssssssss

呢塊牌應該放喺入口啦.....

我們一路行, 繞了春日大社一圈, 不過呢度嘅指示好差, 行行吓在有 GPS 的情況下都迷路了!
足足行咗 3km 路先出得返去..........
又落雨, 又凍, 不停行又濕的沙石地 >.<

這裡除了廟同鹿, 沒有太多東西值得行,
心想京都也該差不多, 所以今日不愉快的經驗, 令我索性取消了明天京都的行程, 我唔想又係行廟....

返到大阪直到難波, 好耐冇見喇!!!
本來今晚打算去食風風亭燒肉, 點知去到............. 執咗............ 仲要係尋日先執, 真係 O 晒咀......
周圍行都唔知食乜好, 去食個本家八爪魚太打底先!
而家佢搬咗去對面, 仲有舖位有得坐呀, 好好呀~

諗住去食味之時計台啦, 點知..........又執埋!!!! 唔係化.........
好彩忽然間俾我醒起有天下一品在附近, 就去了試試

佢D 湯底好杰, 杰到............. 好滯咁................

不過它的豬肉鹵得好好食呀~

本身諗住食大餐的, 點知冇得食, 食完拉麵還心有不甘, 於是又買了甜品自我安慰一下..........

老公生日快樂 - 榛子脆脆斑蘭戚風蛋糕

2011-12-03T20:21:00.001+08:00

今日才是老公的生日, 不過佢有好朋友結婚佢要做兄弟, 所以全日都冇得一齊過~

今日呀, 我都好多嘢做, 整理尋日D 相啦, 幫成個衣櫃換季啦, 執屋啦,
去咗門診洗傷口, 傷得最深嗰個位, 流膿流咗三日都未停過, 不過算係少咗D,
我去俾姑娘睇睇, 主要想知道個傷口有冇問題, 點解咁多日都未停, 好彩姑娘話個傷口而家都算乾淨, 應該會慢慢停
其實..... 出去呢D 門診洗, 同我自己洗真係冇乜分別........

今年想第一次整生日蛋糕俾波比先生, 之前睇過唔同的蛋糕班, 款式都唔太合心水,
於是一路諗住整佢鍾意食的芝士蛋糕, 點知尋日已經食過了~ 諗嚟諗去都唔知整乜好.........
今朝忽然間諗, 不如整斑蘭蛋糕? 唔, 不過又要買個戚風模, 真係冇地方擺....
好彩, 俾我搵到原來可以淨係買中間嗰條柱o架, 拼落我個 7" 模啱啱好

我是跟 Christine 的食譜去做, 佢的食譜好好呀, 簡單清楚易明, 同埋成功率好高!
http://www.christinesrecipes.com/2009/06/pandan-chiffon-cake.html
今次打蛋白, 係好難得地打得成功!!!

焗焗吓, 先發現我睇漏咗要落油.............. 大鑊..............
個模又要冇掃油, 史喇,一陣都唔知點甩模..........
焗好了, 焗的時候脹到差不多雙倍咁高, 不過出爐後唔洗十秒就平返~
我有睇過人問唔用戚風模得唔得, 我諗真係唔得o架,
如果冇咗中間條柱, 佢一鬆弛返就會中心下陷了, 而家都係有條柱撐住咋~

甩模過程實在艱鉅, 因為係一個完全冇油的蛋糕........
已經非常好彩, 冇甩到嚴重一忽忽~
上面塗了榛子脆脆, 榛子脆脆斑蘭戚風蛋糕完成了!!!
wow, 好似好好味, 但係我仲未食得呀, 要等波比返嚟先食得~
我試了另外焗的一小杯, 味道唔錯呀, 不過完全冇油, 當然少咗D D 香味~

已踏入 12月4日的 1am, 波比回來了, 一同切蛋糕, 這是專屬他的私人蛋糕啊!

蛋糕的質地很軟綿綿, 似乎落唔落嗰三羹油都沒有太大影響~
很香的椰汁及斑蘭香味啊, 好正呀~~
面頭那些榛子脆脆都係為靚而落, 因此都幾甜, 有點蓋過了蛋糕本身的味道, 但都係好好食的, 似食緊金莎~

這是我第一次造生日蛋糕給波比先生呀, 嘻嘻~
希望以後每年也造一個~

畢業禮 x 老公生日@ Clipper Lounge

2011-12-02T23:00:00.000+08:00

好開心好開心, 等咗好耐的畢業禮終於都到了!
明明好早起身, 都攪到好遲先出門口, 因為又要化妝, 又要洗埋個傷口先行得!
話時話, 我從未覺得 Panadol 係咁偉大, 我前晚對腳痛到瞓唔到, 尋日就食咗一粒先瞓,
對腳真係痛少咗好多!!! 起碼只係間中痛醒, 已經算好好~

出門口一路去大學, 都仲係間歇性痛, 不過已經冇尋日咁無時無刻都痛喇,
去到大學 9:15am, 換衫再始影影影~
多謝老公送俾我的麥嘜~

老公坐到有利位置, 幫我影到上台的相呀~
之後去百萬大道同同班同學會合, 跟住係頒獎儀式, 從非常敬重的 Prof. 手中接過獎項, 是難以形容的開心~ :D
我初時以為只係有張獎狀, 點知仲有成個獎座, 嘩嘩嘩, 好意外~

我們唔熟悉 CU 的景點, 只是上了那天人合一的景影了幾張相, 但因為冇人揸機, 我哋用腳架實在影唔到那合一的效果

攪到成 1pm 先走, 出到旺角已經是差不多 2pm, 餓死波比先生了~
去了風月堂食餐好的, 再搭 970 返 HKU 影相~

我一直有個心願呀, 就是要同波比先生儲齊一 set 畢業相,
我的 Bachelor 畢業, 他的 Master 畢業, 到現在我的 Master 畢業相, 要去返同一 set 景影一次,
然後 merge 埋整返 set 「當年今日」的相片,
哈哈, 我的心願今日終於都達成了, 這樣的人生, 實在沒有什麼遺憾

HKU 很多地方都在裝修, 有D 地方影唔返喇,
就嚟有地鐵站出口, 學生們真幸福呀~
我們一起想當年, 那讀書時候的感覺, 很令人回味~

閒日來真好呀, 所有景點一個人都冇, 唔洗爭!!!

多謝老公今日咁辛苦, 幫我拎住咁多嘢仲要負責影相~

5pm 離開, 去圭中環的冬日節影聖誕樹

還有好靚的 Tiffany 木馬~

之後去了文華東方的 Clipper Lounge 食 buffet, 慶祝老公生日呀!!!
上年太遲訂, 訂唔到位, 今年再訂, 個電話打極都冇人聽, 不過 send e-mail book 就好快有人覆!
今日咁辛苦, 波比先生食了足足一打生蠔, 大致回本了! 哈!

火炙三文魚, 正!

今個月係海鮮主題, 質素同種類都好令人滿意~

那有窿窿的芝士, 很卡通片!

熱盤都唔錯, 但又唔算好突出, 三文魚扒同埋燒牛肉係推介~

最重要的甜品時間, 慕思居多, 蛋糕款竟然比想像中少, 但全部都是上佳的質素~

最驚喜的, 是經理忽然間送上了生日蛋糕給波比先生, 好感動呀~~~
係我 e-mail booking 時講過係我老公生日,
最令人開心的是, 送上的是我們都很愛的文華東方 cheese cake,
在很多很多年前, 我買過了第一次, (唔記得係咪為了慶生) 拎到入去東涌等波比放工, 坐在東薈城一齊食, 我們都太記得這 cheese cake 了,
奈何文華餅店咁早收舖, 我們係唔會買到的, 所以已經 n 年冇食過, 好多謝酒店的安排, 很窩心~

最後食埋松露朱古力加咖啡, 美好難忘的一日完結了~

老公生日快樂呀~

洗傷口

2011-12-01T23:00:00.000+08:00

今日對腳痛到史, 左腳腳踭腫了似雞蛋, 右腳那一大片擦損, 無時無刻都在痛, 似不停被火酒「乸」的痛

看了 staff clinic, 姑娘好好人, 好細心幫我洗傷口,
要「了」返藏在傷口內那些沙石出嚟 (尋晚個醫生真係洗得好唔乾淨), 那過程實在超恐怖.....
係用鉗, 夾硬去刮開個傷口, 刮到沙石鬆可以掃/夾出嚟, 真係痛到想喊.............
不過洗完, 真係乾淨晒!

要日日去D 街症門診洗傷口呀, 醫院唔做呢D 嘢~

家吓行一步痛一下, 唉~~~
聽日畢業禮, 打算上兩個山影相, 可以嗎?

受傷....

2011-12-01T05:36:00.001+08:00

尋晚跑步時, 在很窄的行人路上閃避一架單車而 PK 了.......
一隻腳損了一大片, 另一隻腳扭親, 跌完仲有D 眼前變黑的休克徵象....

返到屋企用凍開水洗了傷口, 但洗唔乾淨, 最上的位置仲有好多沙石,
想去醫院急症室, 但恐怕咁樣一去, 冇四個鐘都返唔到嚟, 覺都冇得瞓.....
於是出了市中心搵醫生睇, 一間多人到要等一個鐘, 另一間冇人, 原來..........
係個操大陸口音的女醫生應診...... 但唔洗等都照睇啦.........
洗傷口, 有點求其, 其實都洗唔晒D 沙出嚟...... 仲有打咗D 破傷風針囉~
個姑娘好似仲有經驗過個醫生, 教我自己去藥房買嘢洗, 唔洗俾幾百蚊嚟診所洗

感恩, 十點幾的時候, 仲有一間藥房未收工, 可以買到點所需物資,
又感恩, 回家後打電話去 book 醫院的 staff clinic, 竟然聽日有得睇 (「竟然」是因為醫院的 staff clinic 通常都要排兩三日啊)
問一個同事嘢, 佢好好人的叫我痛就唔好返工, 佢幫我睇D 門診 case,
但係我今日約咗個住大陸唔會搵到佢的 case 囉, cancel 唔到, 所以史都要史返去睇......

5am, 隻腳的傷口好「乸」, 痛到瞓唔到.......

第一日準時放工

2011-11-30T20:05:00.001+08:00

成個 11月, 得今日可以準時放工搭到村巴返屋企, 唔洗天都黑齊先有得走嘅感覺太好了!
希望下星期同事真係可以返到工, 唔洗日日大家做到死啦.............

成個 11月, 都冇正正經經煮過一餐飯咁...........
夜晚出街食, 返到屋企又要煮D 嘢聽日帶飯, 我食了肉醬撈麵 + 丸 + 蛋 + 蟹柳已經好多次了!
食到有恐懼症 *o*
夜收工, 真係冇乜 QOL 可言......

今日好了, 煮咗和牛什菌炒飯, 孜然雞翼, 豆苗~
兩個人在家吃個飯, 就是很滿足!!!

第二堂日語

2011-11-29T23:14:00.001+08:00

近來懶於 update blog, 因為工作太忙太攰了....... 有時返到屋企真係連電腦都唔想開......

寫吓食啦, 前幾日終於第一次食澳洲牛奶公司, D 蛋真係好滑, 好有蛋味,
唔知點解, 而家一般買到的蛋, 有時真係好懷疑係咪假蛋, 點解冇了一份蛋香味嘅??
不過個叉燒通太咸了, 值唔值三十蚊真係見人見智~

今晚學日文前, 去咗食泰妃雞, 個海南雞飯都仲 ok,
個咖哩羊腩完全唔掂呀, D 咖哩希到好似水咁, D 羊腩真係過份, 全部唔係肥就只有骨冇肉!!
攪到食完好似冇食過咁, 要再去食街邊嘢!
雖然之前都鍾意食, 今次之後永久 blacklist 了呢間嘢! >.<

第二堂日文, 學到好多讀音上要注意的地方, 兩個鐘好快就過~

Chocolate Espresso Whole Wheat Bread x 自家 Cappuccino x 老公燉蛋

2011-11-27T22:06:00.001+08:00

星期日，又是整麵包日，今日又整 No knead bread
http://www.allfoodsnatural.com/nutrition/food/666-chocolate-espresso-whole-wheat-bread.html

之前用開高筋粉整包，今次試吓用中筋粉（因為食譜係用中粉的），
點知出嚟真係似蛋糕多過似包。。。下次都係用返高粉好了！
很濃的古古力味啊～

下星期六是老公生日，率先拎咗份禮物返嚟俾佢　：Ｄ
上次上完拉花班，心郁郁覺得都係要整返部 Espresso Maker 先可以享受到真正咖啡滋味，
於是二話不說就去買了！嘻～

今日真係由磨咖啡豆、整 Espresso、打奶泡、拉花逐個 step 咁整，
我整咗第一杯，不過拉花失敗，冇影相了～
有了第一杯的經驗，第二杯無論打奶泡定整 Espresso 部份都掌握得好Ｄ！

由波比拉的，哈，未成型，不過上次老師都話，起碼個面整到有白色都算成功了～
咖啡機呢Ｄ玩意又係好敗家，買完部機，仲要改裝／買個拉花壺，
又會不停想試唔同的咖啡豆，＄＄＄！
但真係一定好飲過蒸餾咖啡機同埋雀巢企鵝仔沖的囉～　但每次又其實飲了一杯全脂鮮奶落肚，好肥呀～

今晚有人竟然整甜品俾老婆食啊！嘩！簡直係受寵若驚！
這是鮮奶燉蛋，算係燉得好滑啊，估唔到的好味道喎～：Ｐ

我們的大阪馬拉松

2011-11-27T07:18:00.000+08:00

完成了和歌山之旅, 我們搭南海電鐵返大阪了~
返到酒店放低行李後, 就即刻又出發, 要去 pick up 聽日馬拉松的選手包~
我們出地鐵站, 同上千人一齊行去 expo center, 當中仲見到唔少香港人

這個馬拉松的安排真的非常之好, 去到竟然有講廣東話的工作人員接待我們這些香港跑手,
好快對完 identity, 拎到選手包, 行去下一個場館, 是馬拉松 Expo 呀!!
有齊晒贊助商的 counter 可買今次馬拉松的紀念產品

Mizuno 的衫褲都好靚呀, 不過之前都講過, 起碼 5000yen 一件衫, 過萬 yen 一條緊身褲, 真係唔捨得買~

不過 Super Fans 波比先生又點忍得手, 最後佢買了兩件 Tee
左邊那件很攪笑, 係話你聽如果你跑完 42.192km, 可以食返D 乜嘢大阪名產去補充返卡路里

仲有飲品同地捫蕉的 booth, 是高原培植的地捫蕉, 哈哈~

再去下一個館, 好多非贊助商的 booth, 有波比好鍾意的 asics
睇吓D 女裝幾咁靚, 女跑手的衫簡直係一種 fashion~

見到有個 booth 有D 特價, 我同波比各買了一件長袖衫, 仲有毛巾同埋俾扁平足人用的難墊

這就是我的選手包了, 件衫的質地好正, 仲有條磁石紀念手帶呀~

之後去了對面 ATC Town 又買到衫, 話時話, 有時日本減價起嚟, D 衫同香港差唔多價錢~

瘋狂地 shopping 完一輪, 返梅田食蛸之徹, 係自己燒的墨魚丸同大阪燒呀, 恨咗玩好耐!
有人會幫你倒晒D 材料入去鐵板度

跟住就要靠自己努力去反佢, 唔好睇香港D 小丸子檔D 阿姐反得咁易, 原來好有技巧o架!
哈哈, 大家見遠D 嗰 6 粒就係俾波比'了'到爛晒.....

最後, 老細睇唔過眼, 出手幫我哋反, 嘩, 佢一反靚好多, 似返粒球狀囉!
大阪燒其實係已經整好, 不過放喺鐵板上慶住咁食,
我還是第一次在日本食大阪燒, 原來本體主要是蛋而不是麵粉漿, 入面有的是蔥而不是椰菜....
仲有其實係蛋夾餡夾蛋, 而不是撈堆一齊去煎,
那麼............. 香港食到的其實完全不是大阪燒............

最開心的, 是買了我們很掛念的 Rikuro 芝士蛋糕, 那輕如無物的口感, 香港實在找不到~

10月30日, 是我們期待以久的馬拉松大日子, 住梅田的好處, 就是搭 JR 去大阪城很方便
一出站, 人山人海

寄了行李後, 有點雨, 令人擔心,
好彩, 天公造美, 雨一陣就停了
我同波比先生不同起步區, 各自起行

等咗成半個鐘先起步, 三萬多人, 行去起跑點都行咗十分鐘

今日的路程, 係由大阪城向南跑, 去到一帶就轉右, 經過心齋橋, 跑返去中之島, 全程 8.8km
另外有 42.195km 的全馬, 要跑到去港區

起初我一路跑一路影相

因為實在太好氣氛, 很多人為你打氣, 同高木直子講的一樣, 有人會遞食物給你的!

頭 6km 都跑得好 hea....... 之後唔敢再貪玩, 認真點跑, 尾 3km 其實可以做到 5分幾/km,
8.8km 原來沒想像中長, 很快到終點喇!

一返到去, 又是星級的招待, 先有人派毛巾, 再有人派水, 然後派食物,
絕對唔洗好似香港咁等好耐先有得攞~

估唔到, 每人有一個紀念獎牌!!!! 實在係太太太開心了~ 點解咁好o架?!

我同波比都完成了, 好開心~
波比今次竟然跑 16 名, 佢話佢到終點時, 前後都冇人, 兩邊的市民為他打氣, 從未試過的英雄感, 哈哈!
我呢, 二千人中跑八百幾名, 56分幾完成, 如果唔係開頭 hea 跑, 應該會再好D!

我們為跑全馬的人打打氣! 哈哈, 這個畫面, 十足十高木直子畫的一樣!

有好多好攪笑的人!

睇返大會刊物, 有過千個年過七十歲的老人家跑全馬啊! 太厲害了!!!
唔知幾時我哋都有能力跑一次呢?

後記: 換完衫之後, 我們俾人一個華人電視台捉咗去做訪問,
起初我都唔想做的, 我的普通話太爛了......... 真係失禮死香港人...........
點知記者的盛情難卻............於是我們就用我們很爛的普通話去做了這個訪問,
還剛收到記者小姐的 e-mail, send 返訪問條 link 俾我,
其實我只是想略盡綿力, 告訴不同地方的華人, 其實日本現在沒有什麼可怕, 這已是我們第六次來了~
我不敢說這裡沒有幅射的影響, 不過我們只是去7 日, 如果我們都有受影響的話, 咁日日居住的人咪仲驚?
再者, 我在醫院見到太多好地地一個人都會患癌症, 要來的始終要來,
平時保持健康的生活態度, 應該好過避去一次日本~

當然有很多朋友仍然對之而卻步, 但我都有好多朋友開始去返日本旅行了~
這地方人民好, 清潔, 安全, 在東南亞實在很難找一個可取代的地方~

和歌山市(二): 黑潮市場

2011-11-26T18:06:00.001+08:00

離開和歌山城, 我們搭巴士去了黑潮市場, 入面有很多刺身壽司店

D 鮑魚洗唔洗咁大隻呀.........

我們挑了個海傍露天的座位

開餐!!! 有波比先生期待已久的海膽飯!!!
不過老老實實o丫, 都係覺得唐戶市場的好食D~
因為呢度似係個人工的遊客區, 而不是唐戶市場般根本是個魚市場, 即捕即劏

什錦壽司, 非常好味!!! 香港始終好難食到呢度的鰻魚~

1000 yen 的大 Toro, 成個 trip 的高潮, 超讚!!!

呢度每日有三場劏吞拿魚 show, 去之前要上佢網頁睇定時間表
http://www.kuroshioichiba.co.jp/daikaiya.html#page3

解體完, 有仲 D 請現場觀眾試食, 賺呀!!!

之後外出走走, 呢度有好多小食攤檔, 如果唔係食飽咗, 有好多都想試試

最後都忍唔住買了個薯餅, 大割引 50 yen 超抵!!!

隔離是 Marina City, 有酒店有機動遊戲, 不過成 1400 yen 入場費仲未計玩遊戲要逐樣俾錢, 唔抵

有好多人在這裡放狗, 哈哈, D 日本人同D 狗狗裝扮到好靚o架

和歌山市(一)：麺屋ひしお。和歌山城

2011-11-26T08:22:00.001+08:00

好了，又繼續遊記喇！就嚟唔記得o架喇！

離開 Adventure World, 我們搭 5:20pm 的巴士，直往和歌山市，要足足三小時的車程。。。
玩咗成日，在車上大睡一覺，不過其實都不是瞓得太好

超準時的 8:10pm 到達總站，日本的巴士總是超級準點的！
我們在和歌山市逗留也不夠 24小時，所以找了一間只要夠近鐵路站的酒店就可以～
ワカヤマ第１冨士ホテル　很不錯，近車站，清潔，員工很有禮貌很 helpful~

已是九時多，我們要醫醫肚，其實和歌山市是個有點舊的小市鎮，晚上路上一個人都冇，烏燈黑火。。。。
好彩之前做定功課，搵咗一間出名又未收工的麵店，哈哈，是高木直子介紹的！
佢出名在自家製的醬油啊～

店內有點懷舊的感覺

我們叫了兩個拉麵，嘩，特濃的醬油，還有很多肥膏浮面，這碗麵應該有二千卡路里。。。

嘻嘻，一嚐和歌山拉麵，很美味，此行又多了一點圓滿的感覺

這桶炸雞也很讚，雞肉很 juicy 很滑啊！

每晚最開心的甜品時間，是雪糕 package~

第二天, 遊覽和歌山市, 其實這裡沒什麼景點, 人人都是去和歌山城同埋黑潮市場
由我們的酒店行去和歌山城, 不過一公里路, 大清早這樣散散步, 很寫意

希望在這裡看到紅葉, 但未有見到

上到天守閣, 遠眺和歌山四面的風景, 這是向西的海岸

向東的山巒

城內走走, 有些樹有些湖, 見到有人跑步, 如果我們有時間在這裡跑跑就好了~

行行行, 終於見到一千零一兩棵已轉色的楓樹,
其實這裡有個楓林, 如果我們遲幾個星期來, 一定美極了!

開心上堂第二天

2011-11-25T22:00:00.000+08:00

哈哈, 第二天的 workshop, 上得好開心, 很有得著~
完整地看了一次開 tracheostomy 的過程, 實在太恐怖了!
想起我入醫院工作, 開頭的時候一見到D trach case 真係好驚, 每次一要開條 inner cannula 出嚟睇就仲驚~
哈, 不過工多藝熟, 而家真係合埋眼都識整, 不過有時血淋淋咁, 都仲覺得有點核突囉~

辦這個 course 的醫生、護士都真係超好, 好為病人著想, 這個部門一定是 happy team~

開心上堂日

2011-11-24T22:00:00.000+08:00

畢業多年, 俾錢上過了無數好廢的 course, 難得今日上到個超好的 2-day course,
由 ICU 同呼吸科醫生主講, 講了很多我想學好耐的東西,
最攪笑係輪流出去同個假人公仔插喉, 醫生話:「俾得幾千蚊, 梗係要出嚟自己玩吓, 冇理由你俾錢嚟睇我插喉呀!」
見識到好多平時唔會見到的儀器工具, 大家雞手鴨腳超爆笑~

仲有一星期就畢業禮喇! 用兩年換了這張入場劵~

老公的驚喜: 我一路都唔捨得買的 Paul Lafayet 蛋糕!!!!

左邊那舊好食D, 因為朱古力很滑很濃, 入面是有兩種味的蛋糕,
右邊的只像是一大舊的松露朱古力, 沒那麼多層次~

震撼

2011-11-23T20:44:00.001+08:00

今日在 BB 深切治療病房, 我見過了一對父母最難下的決定

我在看一號床的 BB, 聽到二號床 BB 的父母一邊哭一邊對 BB 說話,
原來那是一個正準備被醫生拔喉的 BB,
相信那是無計可施, 在 ICU 可做的只是維生, 維持著那心跳監測儀的讀數,
但根本只有讀數, 不是一條有靈魂的生命, 拔喉, 或者是讓這個寶寶得到解脫

一個媽媽懷胎十月生下一個寶寶, 現在要決定不讓她痛苦地生存, 那是一個絕對最痛苦的決定

在隔離床, 我間接地目睹了整個過程,
最難過的是嫲嫲說了很多遍: 「妳唔洗掛住我哋呀, 我哋會掛住妳就得o架喇。妳會去到一個冇晒痛苦嘅地方, 嗰度係一個開心樂園, 冇晒憂愁o架。妳永遠都係我嘅好乖孫, 妳唔洗掛住我o地呀」
由拔喉, 去到心跳監測儀發出警號聲, 去到醫生 certified death.........
全家人哭得眼睛都腫了, 我是個路人甲, 但也覺得很難過...........

這幾個月在兒科的深切治療病房同兒科病房進進出出得很多,
見過了太多醫生都束手無策的 case, 見過了很多滿面只有愁容的媽媽, 很很很可憐...........
別的媽媽可以帶 BB 周圍去, 玩 playgroup, 開生日會
我們這裡的 BB, 只有在很高圍欄的病床裡渡過每一天, 有些自出世後, 從沒有回過家, 一直住在醫院,
媽媽每一天, 就只是伏在病床邊, 照顧病寶寶
所以, 有一個健康寶寶的朋友, 真的要很感恩, 這對很多父母來說, 已經很奢侈~

第一堂日本語

2011-11-22T23:26:00.001+08:00

今日好開心, 等咗好耐, 終於都上第一堂的日語初班了!
班中只有 4 個同學 (有一個缺席添), 可以好多機會發問, 練習,
講錯咗寫錯咗 , 老師都可以即時糾正, 非常之好呀~

雖然第一堂又係由頭學過五十音, 但係對某D 音的發音, 可以執正D, 是我一直覺得需要的~
希望我會努力繼續學落去啦~

破紀錄之 Mizuno 城門河 10km

2011-11-20T21:08:00.000+08:00

大阪馬拉松回來之後, 懶到史, 一星期只是跑得一兩次, 太忙太多節目了~

今日參加了 Mizuno 城門河 10km 比賽, 覺得沙田真係一個好好跑的地方,
上次可口可樂健樂跑是由馬鞍山跑到沙田方向, 今次剛好相反, 由沙田跑去馬鞍山,
我們 6:30am 就出發了, 去到 7:20am,
8:00am 波比的組別先起跑, 我就 8:08am 起跑,
一出發, 我已經叫自己唔好跑太快, 驚後勁不繼呀, 點知D 人太勁了, 係咁俾人過, 過到我都好擔心會好後,
於是好努力跟住人的速度跑, 嘩, 黐線的, 我竟然可以 keep 住少過 6 min/km 的速度係咁跑,
完全冇諗過囉, 從來都未試過的快!!!! 平時練跑, 冇人喺前面激勵住自己要追, 真係唔會谷到D 小宇宙出嚟! :P
呢次真係跑得超辛苦呀, 最後的 2km, 真係想史.........

最後, 大會時間我係 59"50' 跑完呀!!!嘩!!!! 真係完全估唔到會快過一個鐘囉~
太開心了~~~ 在我的組別跑廿幾呀~
波比先生就在佢嘅組別跑第 10 名, 個男子組冠軍是黑人, 癲o架, 31"35' 跑完 10km!!!

比賽完, 去了荃灣睇<<那些年>>, 真係好好睇, 我覺得個女主角激似<<假如愛有天意>> 個女主角囉~
那些年, 你試過因為一些賭氣的說話, 一些誤會, 一些沒有說的話, 而錯失了一段愛情嗎?
那些年, 那種曖昧的開始, 叫人最懷念嗎?
那些年, 想起時覺得自己實在太幼稚嗎?
那些年, 有太多的無疾而終, 想起時會覺得太可笑, 到最後, 還不是可以找到自己的另一半, 那些年其實何用太著緊~

睇完戲, 去了荃灣廣場旁的「普洱」食飯, 這裡的焗飯很不錯, 不過台式飲品就太過化學味道了

好好玩之團購拉花班

2011-11-19T18:01:00.001+08:00

今日好開心, 去參加了團購的拉花班

上星期上咗個超廢麵包班之後, 今日的咖啡班相比起來真係天壤之別!
導師 Bruno Koo 非常之專業, 講解得非常清楚, 亦有足夠時間俾大家慢慢試~

這塊是可以用來攪咖啡的餅乾, 好有趣!

導師沖了一杯正確濃度的 espresso 同埋一杯好似 McCafe 咁水汪汪的 espresso, 用得夠唔夠咖啡粉, 原來非常影響效果

導師原來有在我們超愛的 Holly Brown 工作過, 原來我們常常在舖內見到那拉花 video 中人就係佢!
佢的示範, 好似上 youtube 睇的咁「好似好易就拉到」

之後到有導師指導下拉一杯

其實真係好難啊~ 我見有D 拉花班要同學用洗潔精泡先練習下, 其實不無道理呀
要控制 constant 的 flow rate, 實在不容易

導師同同學仔的

之後是自己一個人拉一杯, 導師唔想出手幫, 但最後都係個個都要幫
幫完都........ 係衰咗, 唯有用朱古力補救...........
哈哈, 有心學的話, 真係一定要用好多時間練習呀!

唔好淨係睇拉花, 講吓佢D 咖啡, 質素都好好, 係完全唔洗落糖都入得口那種香醇厚滑

波比玩完好開心, 如果佢下年再攪 training course, 我們都一定會再報呀~

我有時在想, 老咗退休, 買間村屋地下連花園, 波比煮咖啡, 我就焗麵包蛋糕,
招呼朋友歎歎下午茶, 有多好 :P

開心海鮮賀聖誕 + 畢業相第一擊

2011-11-18T21:30:00.000+08:00

見我呢幾日冇 update, 就知這個沒有老細的星期忙得要死......
好彩, 這星期終於都完結了, 也沒大事情發生, 感恩!

今日同 fresh grad 師妹都帶了畢業袍返醫院, 完成一日工作後, 開開心心周圍捉人影畢業相!

我仍然覺得戴了那頂帽很樣衰....

很開心的四圍影, 可惜有同事 sick leave 啊, 未齊人~
師妹的熊仔超 cute 呀! 佢件袍係同師妹嗰件一樣顏色的, 仲有刻咗 HKU 2011 同埋佢個名的,
而家的畢業生真幸福~

夜晚是老細提議的賀聖誕 gathering (哈哈, 因為我D 同事太難約, 所以明明賀聖誕的活動, 咁早要舉行)
全 team 有10個人到, 是很好的成績了!
去了西貢上次食海鮮那間舖頭, 超級大餐, 多謝老細~

之後再到滿記食糖水, 飽死了~

拎袍喇!

2011-11-15T21:40:00.000+08:00

今日放工, 急急腳去大學拎畢業袍~

好彩去到仲早, 唔算多人, 好順利地拎到了~

不過發現, 我而家的男仔頭戴起畢業帽時........... 好醜樣囉...............

唉................ 忽然間好後悔點解剪到D 頭髮咁短, 好想留返把長頭髮呀...............

Plan 緊去影畢業相, 睇返我 bachelor 同波比 Master 畢業時影的相, 覺得自己真係老咗好多了~

那時候的, 就是青春~

讚 - 漢和韓國料理

2011-11-14T20:57:00.000+08:00

今晚約了好朋友食飯, 波比先生遇上好有 quota 的人, 梗係要求去食大餐,
去了旺角胡生社行的漢和韓國料理, 很讚啊!

地方大, 座位非常寬敞舒適, 抽氣夠好, 唔會食到一身煙~

見到食物枱, 嘩嘩嘩~ 好豐富呀~
多款韓式小食, 不同口味的豬牛羊魚雞, 肉質同醃的味道都唔錯,
炸物, 魚生都源源不絕供應, 絕對唔洗搶的!
仲有幾款湯, 幾款糖水, 豆花, 雪糕, 甜點, 真係多到食唔晒呀~

最好的是不限時, 可以同朋友開開心心一路傾一路燒~ 推介呀!

2011 asics 10km

2011-11-13T11:14:00.001+08:00

上年的 11月13日, 波比先生參加了人生第一個長跑比賽, 就是 2010 asics 10km
2011 年11月14日, 是第二次參加這個比賽了!
波比都有問我跑唔跑, 我一聽到要上落斜就驚驚, 唔好攪我了........... 我嚟做攝影師啦
照樣 6000 人, 人山人海~

我們 7:30am 到達, 上年波比話企得太後, 人太多開始好難跑, 今年講定要早D 去起跑線等,
點知因為去個洗手間, 排了 15 分鐘..........
佢出得到嚟, 又已經排到好後了........... (似乎仲後過上年)

起跑喇, 加油加油!

望咗成一分鐘, 先見到波比擠過起跑線

今屆的冠軍是紀嘉文 (Thomas 沒有來), 32"34'

嘩, 呢個比賽D 人好好好犀利!!! 少過 40 分鐘完成的, 我數過有二百多人
波比回來了!

42"27' 呀, 比上年快了 7 分鐘, 很不錯啦!
睇吓幾時可以快過 40 分鐘~

很廢的麵包班

2011-11-12T21:30:00.000+08:00

今日去咗上一個團購的麵包班，真係嘥我時間超呃錢!

去到一個麵包工場, 9 人一班，
教整牛角酥同埋法包, 根本個麵糰已經搓好晒，我喺兩小時入面，掂麵糰的時間不夠兩分鐘！
佢乜都係用機搓，根本教唔到你搓粉的技巧

牛角酥部分，我只係負責捲埋佢同掃蛋漿…
法包就只係整形同界花
我整開麵包都仲好 d, 其他未整過麵包的人，一 d 都唔明白要做乜，唔知點收口同搓長，個導師根本一 d 都冇教手勢的要點， d 同學唔知道，係咁搓，搓到冇晒氣泡，變了硬麵條…
佢講"鬆弛"、"排氣" 等專用名詞, 唔整開麵包的同學真係完全唔知佢 up 乜囉!

喺完全混亂同欠缺清楚講解之下，上了個半鐘
再要等半個鐘焗法包，中途我已經好想走囉… 我返去睇書睇網頁都仲清楚過佢！
雖然只是一百蚊, 但我覺得根本一D 都唔值囉~
最後拎了製成品就即走喇！

呢個班真係好廢，似係參觀麵包工場多過係上堂囉…

返到屋企, 試吓個法包
食入口真係想講粗口, 硬到o趙唔開, 我 xyz!&^(#%
我用 No Knead Bread recipe 整的好食過佢多多聲!!!

牛角包.................. 一食入口成口都係油, 根本落得太多酥油了,
係鬆, 但係成口油的感覺, 我食半個都怕怕............

攪到我晚飯都冇時間食, 真係好後悔 join o左囉............

星期六的下午茶 - 藍莓芝士蛋糕

2011-11-12T16:51:00.001+08:00

前兩日在 Das Gute 買了個 Tiramisu, 吃罷有點意猶未盡, 這兩天也很想吃芝士蛋糕,

尋日去了 Starbucks, 買了藍莓芝士蛋糕吃, 食完好想自己整~
想起那本好好的<<香港人氣甜品>>有教整 American Cheese Cake 喎! 今日就走去買材料整喇!

食譜內的成份是 cream cheese, egg, unsalted butter, 但我其實有點懷疑咁嘅成份焗完究竟凝唔凝固到....
於是唔多心安之下, 係咁倚加咗D 麵粉, 又加咗吉士粉增加香味~
焗好了!

灑上古古力粉, 鋪上藍莓, 完成了!

e~~~ 呢個 recipe 真係幾得喎, 好滑呀~ 不過我覺得甜咗少少, 下次可以減糖~
三點三用來做 tea, 整多杯 Nestle 企鵝仔咖啡, 歎呀~

Day 3 - 白浜 Adventure World 攻略

2011-11-12T08:37:00.001+08:00

這篇遊記實在擱置了很久, 因為 Adventure world 太多相片要整理了!
不逐一 insert 入 blog post 了, 因為實在太太太麻煩,
請有興趣的朋友移玉步, 到我 flickr 的相簿睇相啦!

反而想談談遊園攻略篇!
去之前, 一路都諗住係一般的動物園, 慢慢行就可以,
直至睇到一篇 blog, 先知道原來園內有好多特別體驗活動可以預約, 又有好多動物餵飼時間,
http://www.aws-s.com/english/info/schedule/index.php
去之前, 真係要做足功課, 睇時間表, 睇清楚邊D 要預約邊D 唔洗, 有D 要收費有D 又免費,
揀選自己想睇的項目, 再夾時間取捨~
最後, 我都定了一個豐富的行程~

其實我們住的三樂莊有免費 shuttle bus 去 Adventure World, 但係 9:36am 先開車,
那裡 9:30am 就開門了, 於是我們選擇了自己搭明光巴士去, 因為要一開門就衝入去預約體驗活動!

一去到, 真係好大鑊, 點解咁多人o架?! 閒日嚟o架喎.........
但都要先搵 coin locker 寄了行李, 因為我們心急, 其實 locker 分好多大小尺寸, 其實可以用小一點的 locker, 會平D!

之後即刻衝去排隊, 好彩尋日已經在白浜 Bus Center 買了票, 還有折扣, 3600 yen 一位~
但我們前面已經有幾十人, 是每條隊都有幾十人...........
相片中有 1,2,3,4,5,6 的 counter, 就是預約體驗活動的, 每項都有名額限制,
我們很後悔, 我們似乎排錯了隊....... 一開場時我們的隊入得很慢, 而又離預約熊貓幕後體驗的 1 號 counter 太遠, 當我跑到過去時, 已剛剛截了 30 個的名額 , 好好好好失望呀..............
一心諗住同熊貓玩, 而家冇機會, 要等下次了 :(

唉, 好彩都有 contingency plan, 就係 book 咗去餵海豚囉.............
如果大家去, 真係提議大家要早D 到排到入場呀, 我諗 9am 去到實冇死

我覺得今日的行程真係好精彩呀, 一浪接一浪!
預約完畢, 已經是 9:40am, 我們要跑去睇 9:45am 的熊貓仔仔餵奶時間~
見佢拎住個有熊貓公仔的奶樽啜啜啜, 真係好 kawaii!!!

這兩隻幼熊貓超好動, 好多古怪有趣表情動作, 睇我大人細路都好開心!

除了幼熊貓, 還有幾隻大熊貓在室內的位置, 要睇相簿啊~
原來日本有熊貓的三個動物園, 我們都去過晒了! 嘻嘻!

之後又衝呀, 去睇波比最最最愛北極熊

北極熊餵飼時間, 佢游去食舊肉呀!

超可愛的紀念品店, 樣樣都好想買囉!
最後, 我們買了一些日文字粒, 砌了一個有我們名字的門牌~

中間的時間, 去睇了企鵝海獅等等不同的海洋生物

之後去搭小火車遊 Safari
那是一個野外放養動物的區域, 可以搭免費的小火車, 或者租車, 或者行去睇動物~
其實地方不算大, 我覺得唔洗花錢租車, 可以先搭一次小火車睇睇區內的情況, 再自己行一圈~

要讚讚的, 是小火車速度夠慢, 讓我們真的可以睇到動物,
唔似得長隆動物園的完全趕收工 feel, 快到根本影唔到相!

睇完 Safari, 上到去是機動遊戲區, 可惜每一項都要付費的, 可以話係完全冇人玩!

之後我們去到小動物區, 完全冇諗過.......... 呢度會有豬!!!!
用 100 yen 買了蔬菜去餵肥豬, 好開心呀~~

12:30pm 是預約了海豚體驗活動的時間,
要聽佢叫 number, 哈哈, 我有限的日文又有少少功用了!

有職員幫我們拍照, 日本人的服務真的冇得彈!
我們聽訓練員的指示, 做手勢去指揮海豚, 同海豚握手、唱歌、叫佢反身、噴水, 好得意

仲會餵魚魚俾海豚食~

哈哈, 海豚食完, 我們都要醫吓肚, 這裡有很多餐廳同 food court, 這個什錦刺身飯也很不錯呀!

食完飯, 又去餵河馬, 都係第一次咁咁咁近接觸河馬先生, 佢個口好攪笑 XD

有河馬 burger 囉!

之後睇企鵝巡遊, 不過原來得幾隻.......
佢哋好攪笑, 真係識路o架喎~

還睇咗兩個海洋動物的 show, 因為看過太多次了, 所以未覺得太特別, 唔洗一定睇都得

三點鐘, 我們決定自己行一次 Safari, 其實半小時都行完了

很好天, 很喜歡這照片!

這麼近啊~

最令人 impressive 的, 是我們躲在塔內, 很近距離睇獅子

離開動物園前, 我們再去探探北極熊一家人, 左邊的是爸媽, 右邊的是仔仔,
這是第一次, 我們一同見到三隻北極熊

玩到 5pm 收工我們先離開~ 很開心的一日呀~
如果有小朋友的話, 嚟呢度一度會好開心的~

當 GODIVA 朱古力遇上麥包

2011-11-11T07:53:00.000+08:00

我真的將前幾日提過那排 GODIVA 朱古力, 塞進了麵糰去造麵包, 哈哈哈!
麵糰雪了三日, 始終會較為實淨, 焗出來沒有那麼鬆軟, 變得很 chewy

Caramel Apple Chocolate 溶了, 配上沒什麼甜味的麥包, 甜度剛剛好! 這個其實似甜品多過似麵包~

上面放了新買的脆卜卜入爐朱古力

辛苦的一星期又過去了, 同事不停的 sick leave........... 返工的同事都忙得要死..........
下星期老細放假, 又係我最 frustrated 的日子..........

唉, 今晚點都要去食餐好的, 去元朗的正記大排檔, 嘩, 人山人海,
客人數量多過元朗任何一間酒樓! 坐滿成條街真係壯觀!

食了最唔健康的蠔餅同椒鹽瀨尿蝦,
仲有要等足一個鐘的煲仔飯 (趕時間真係唔好叫!), 滑蛋牛肉甜豉油, 就是最簡單又美味的組合!
我下星期都要煮煲仔飯啊!

翡翠拉麵小籠包

2011-11-09T20:53:00.003+08:00

今日波比先生下午要去開會, 開完會竟然來了醫院接老婆放工~
哈, 都是第一次有人接放工啊 (返醫院計)

既然佢一場嚟到, 我都冇理由返屋企煮飯啦,
咁就去了本區搵食, 時間早, 竟然可以食到翡翠拉麵小籠包, 實在太開心, 因為平時閒閒地門口都有三四十人等位!

本來想叫擔擔麵, 點知波比在 openrice 見到有人推介水煮牛肉麵,
嘩, 果然正喎~ 牛肉湯 + 麻辣汁, 好好味!

有名的小籠包, 皮好薄, 餡好鮮味又唔肥, 仲充滿湯汁, very good!

鱔糊炒拉麵都好正, 鱔處理得好好呀~濃油赤醬的味, 很滿足~

是近來難得很滿意的一餐外出用膳~

日式蕃薯包

2011-11-08T21:16:00.000+08:00

哈哈, 今次的蕃薯包, 係咪有幾分似喺 A-1 Bakery 買到的呢??

話說我成日都見到我個小朋友 case, 在 waiting area 等睇我時, 拎住舊日本蕃薯吃得津津有味!
我一路都好想知道日本蕃薯即係咩味呀?
哈, 前兩日行街市, 終於都第一次買了來試試!

原來日本蕃薯不是太甜, 較實的質感, 最有趣的是.....
它明明是蕃薯, 但味道像栗子!!! 哈哈哈, 是真的!!!
當我整了這個包讓波比先生試, 叫佢合埋眼嚐真味道, 他也說很像栗子的味道!~

吃過 A-1 蕃薯包的朋友, 都應該知道它面頭有層啡啡的粉,
我看了書, 原來是麵粉加可可粉, 今次跟著做, 果然外貌有八成似!
用了 No Knead Bread 的 recipe, 麵包的密度很高, 要咀嚼很久, 很飽肚的!
不似街上的膨漲劑麵包, 吃了後肚子仍完全空洞感.............
我問波比先生做乜今日攪到咁晏先出門口, 佢話淨係食個包都食咗 10 分鐘!

今日落雨, 唉, 醫院好忙遲咗走, 忽然間想到不如又試一試另一種回家的方法, 今次是巴士加鐵路~
論時間實在冇乜賺, 不過可以去到荃灣的楊屋道街市買餸, 再搭西鐵返屋企~
原來楊屋道街市的蔬菜很平, 比元朗的還要平!!
不過肉的選擇唔多, 買肉我還是喜歡到超級市場慢慢揀~

做了這個蒜蓉焗三色椒茄子

拌勻後, 顏色好豐富, 又好健康啊~

藍芝士南瓜籽脆麥包

2011-11-07T21:55:00.002+08:00

又到星期一, Monday Phobia 發作, lunch 後要整返支咖啡提神!
估唔到呢款咖啡又幾好飲喎, 似乎是便利店內最好飲的咖啡! 又濃又滑~

還有病人姐姐請的 GODIVA 朱古力, 不過我成日覺得 GODIVA 的朱古力太甜了......
咬了一口........ 不如用嚟放入麵包入面做餡, 應該會好D!

嘻嘻, 今日又整麵包~ 要返工的日子當然係整免搓包啦, 今次係整得最最最好食的一次呀! (真係忍唔住要讚一讚自己)
因為今次是先把酵母浸到起泡先放入麵糰, 然後發酵了 12 小時~

今次整新的 combination, 面層有南瓜籽同埋芝麻, 烘得夠, 所以皮是很脆很脆的,
其實真係應該要烘得耐先好食, 奈何前幾次整, 都係趕返工前的時候,
第二次發酵不夠, 焗的時間倉卒, 所以原來都未達到像今次的最佳效果~

外皮脆之餘, 入面又很軟綿綿喎, 真係好得!
入面有超濃的藍芝士, 令整個麵包都充滿香味, 但藍芝士的味真的很強勁, 很羶!!!
哈, 相信唔係人人都接受到, 但呢個組合的味道真係好夾, 超好食!

跑到上山

2011-11-06T21:25:00.000+08:00

波比先生幫我報咗名, 參加 Nike Running Club 的 training course, 今日是選拔的 selection run~

哈哈, 我呢個元朗村姑都好耐冇過過海了~ 對上次已經係書展~
在西環的泓都樓下集合, 要跑上山!!!
吓?! 我都係去到先知! 真係死得咯..........
我初時以為係至多由德輔道上到高街咁一條斜路, 點知唔係! 係跑成公里的斜路, 救命呀!

仲要係跟住成 40 個好強的男子組跑, 跟住佢哋的速度, 攪到超辛苦,
上完斜就橫隔膜抽住痛....... 好痛咁死返嚟!
睇返時間, 吓?! 斜路都用到 6'12"/km, 唔怪之得痛到想死了............

今日, 終於都過了 400km 的大關!

跑得咁辛苦, 希望抽得中上 training 啦~

跑得咁辛苦, 梗係要慰勞吓自己, 去了西環有名的祥香園歎杯奶茶先!
坐低那一刻, 太感動~

之後同老公叮去中環搭地鐵, 我哋好似 n 年冇咁浪漫過了~
想當年仲讀緊 U, 我在圖書館讀書讀到好夜的時候, 波比先生會來接我, 然後一齊搭叮叮~

夜晚去了運動家敗家, 買了成千蚊的跑步服裝同鞋,
嗜好呢家嘢, 真係好花錢.......

手搓流心朱古力包 + 海鮮 BBQ

2011-11-05T23:00:00.000+08:00

哈, 好耐冇整手搓麵包了, 不過看了 Carol 的 Blog, 忽然間很想很想吃軟麵包~
之前整的免搓包係就係超方便, 但質感始終同手搓包唔同的~ 不會有那一絲絲的質感~
今朝見有點時間, 就的起心肝整一整了~

我用了 Carol 的一口芝士軟包的食譜, 把芝士粉換上可可粉,
Carol 的方法不用中種或湯種, 對我這些即興造麵包的人來得方便
她教用撻麵糰的方法, 要 200-250 下, 嘩......我又搓到滴晒汗 (但又抹唔到.....),
很攰, 不過相信絕對可以減 byebye 肉~
原來撻的方法, 比我之前上麵包班的搓法更好, 今次真真正正搓到滿意的薄膜~

第一次發酵, 看看那內藏的氣泡!

不過見個麵糰唔多發, 哎呀, 勁驚D 酵母死咗囉............
好彩, 後來都發咗, 不過我覺得脹大的程度不是預期中多~ 都是我懶, 沒有先把酵母開水
中心放了入爐用的鈕型朱古力~

攪咗足足三個鐘, 終於整好了~ 不過趕出街未試食住~

今日去了舊同學的婚禮, 每次去人婚禮都是開心和感動啊~

之後去了二德惠敗家, 又買了很多造麵包的配料~
還去了報名學日文! 是的, 我下定決心要學習日文了!
因為碩士讀完了, 醫院內部的考試也考完了, 我終於都可以安心花時間去學些自己喜歡的東西~
識點日文, 真係去旅行時方便好多呀! 今次去就係啦, 起碼有D 車站名識睇識讀,
唔明的可以查日文未典, 問人幾多錢, 人哋答返我日文都知人講乜! 真係 very good 呀!

睇咗好耐網上的 comment, 都冇一面倒的話邊間好,
有睇過 HKU SPACE 同 CUHK 的課程, 感覺上有保證D, 不過有排先再開班
所以今次搵咗間細細間的日語中心, 睇吓好唔好, 同埋佢D 時間幾夾我,
我又唔想星期六日要特登出九龍學, 星期一至五又驚波比冇飯食,
而家呢班, 我可以約波比食完飯再去上堂, 太好的安排了~
學一年其實都要過萬蚊呀, 之前都有諗過工聯會的 $440/3個月, 不過覺得老師真係有點 hea.....
所以都係寧願貴D, 希望真係學到嘢, 唔會嘥我時間啦!

返到屋企, 可以歎個下午茶了! 嘻嘻, 這次的包包真的唔錯呀~
而家知道其實連我日日食的嘉頓方包都原來加了很多防腐劑、乳化劑、膨脹劑.........
真係覺得應該要自己整多D 麵包食呢~

今晚好 happy, 去了波比同事家 BBQ, 就是在我們家對面的村屋~
嘩, 有自己的花園, 種了很多菜同香草呀~~ My dream farm!
最勁的係自己種了洛神花, 屋主還請我喝了一杯洛神花茶, 正呀~

有可愛的小狗, 陪我們玩了一個晚上!

今晚 BBQ 勁咯! 有我們負責買的海鮮, 有扇貝同埋美國珍寶蠔呀! 又新鮮又好味!

屋主還自家醃了羊架, 非常嫩非常好食!

其他食物多得不能盡錄, 我們買來的大蜆啦, 牛扒啦, 蕃薯啦, 也是十個正!

超開心的一晚~

Day 2 續 - 千疊敷, 三段壁, 三樂莊日式料理

2011-10-27T22:00:00.000+08:00

在白浜的景點不多, 旅遊書介紹來來去去都是那幾個~
我們先去了千疊敷, 那是被幾百年海水侵蝕到一層層岩石的石灘

去和歌山之前, 知道巴士班次很疏, 很多人要自駕, 但其實我覺得唔需要的!
只要用心看看 google map, 其實由海灘走到三段壁都只是 2.4km 的路,
等得車嚟, 我們都已經行到去了!
於是今日全程都是靠雙腳去行~

行到去, 見到小食手信店, 哈哈, 衝入去我買了雪糕, 波比買了咖啡,
對著海, 一邊吃一邊欣賞天和海, 樂透了!!!

感恩的真是太好的天氣

慢慢落到石灘

一層層的石, 很壯觀

石上還有.......... 天然生曬海鹽!

之後再行行行, 去到了三段壁, 但呢度其實冇咩睇, 得後面嗰個崖
一係就要俾 1200 yen 入去睇山洞, 但我們又不是太有興趣, 沒去了~

有趣的是有間手信店, 老闆一家人太熱情的招待, 不停遞上食物給我們試食,
但...... 我對手頭先摸過D 岩石都仲未洗手, 佢就把食物放到我的掌心 (我又唔好意思拒絕),
於是, 硬食了..........
老闆識少少廣東話, 好攪笑, 仲打九折俾我哋, 於是就買了一盒好好味的帆立貝做手信

回程時, 經過前排曾志偉來拍特輯住的酒店, 見到 Tama 貓貓的巴士, 好可愛~

之後去了崎之湯浸溫泉, 那是個很有趣的溫泉, 根本是在海邊的石灘挖個洞造成的

俾了 400 yen 的入湯料, 發現我們沒有帶毛巾, 就要俾多 200 yen 買毛巾, 再要俾 100 yen 租 locker,

入到去, 勁勁勁簡陋............ 得幾個冇鎖的木 locker 放衫褲, 洗頭水沐浴露乜都冇的..........

平時去日本, 我也衝破不了要脫光光浸溫泉的感覺...... 但這個溫泉實在有趣, 就豁出去了!

對住個海脫光光 (=.=)........... 之後就衝進溫泉內~

共有三個泉, 逐個浸, 行到最近海的那個泉, 一路浸一路有D 浪打入嚟, 哈哈, 好正!

(Quote 朋友影的相片, 溫泉就係喺有木板嗰度喇!)

浸完溫泉, 我們返酒店抖一抖, 又出動~
我們是要去睇日落的, 要行 1km 左右去看円月島, 點知計算錯誤, 冇諗過日本四點幾就已經日落....
我們一路急步走, 但太陽落得超快........ (太陽伯伯趕收工..........)

我們明知不夠時間去円月島了, 只好行到海灘盡頭拍拍照

5pm, 已經落到水平線, 唔係化............. 有機會去的朋友, 千萬記住要早D 到呀!

唉, 入黑後冇嘢睇, 唯有去 shopping~
白浜海灘附近其實都幾荒蕪o架, 不過好彩有間大型超級市場同家品店!
好彩咋, 我發現忘了執入行李的東東, 都一一買到~
之前睇人哋 blog , 見到日本有呢款 Millefeuille 的 Haagen-Dazs 賣, 試了, 入面有好多層, 好得意好好味呀!

Shopping 完返酒店, 7pm 食飯~
太喜歡溫泉酒店這種「貪心的晚餐」, 即是一次過可以食到十幾種食物, 啱晒我們這些貪吃豬! 嘻~
之前在箱根也住過一次溫泉酒店, 那次的食物是生的多, 今次反而較多熟食, 仲有好多都係睇住佢整~
左上的釜飯, 是在我們面前即席煮的, 熱辣辣香噴噴, I like it! 其實前菜小點也很對胃口~

再來有海鮮湯, 同埋自己煎的豚肉
我們的 Set, 仲有飽魚呀!!
放了在一個兩層盒子的上層, 服務員倒了水進下格, 「咋」一聲就冒出很多蒸汽,
蒸鮑魚, 很鮮味啊!!

還有魚料理, 那像魚蛋的芋頭仔很好吃~

甜品是芒果布丁, 很美滿的終結~

飯後, 我們本來想去海灘放煙花的 (白浜的例牌活動), 但同服務員雞同鴨講, 都唔知去邊度買煙花,
最後只在海灘繞了一圈就返歸了, 聽日要早起, 去睇動物啊!

Day 2 - 白浜とれとれ市場、三樂莊

2011-10-27T12:13:00.000+08:00

第二天, 一早就要起身了, 今日要去和歌山呀~

早餐是這個 Yamasaki (即香港都有的山崎麵包) 的北海道芝士蛋糕, 又軟又香芝士味, 次次來都要吃~

趕呀趕, 搭 7:50am 的巴士, 成 11:12am 先去得到白浜呀.......
好彩坐一個鐘就有得落車去洗手間同買吓嘢飲~ 再瞓吓, 上吓網, 三個鐘也不是想像中的長~

到了白浜, 第一站是とれとれ市場

不過其實有點失望, 得好少攤檔好少選擇, 我們想吃刺身壽司, 其實只有兩三間
可能上次去本州的唐戶市場實在是太正了, 這裡完全比下去....

Anyway, 都買到好吃的食物, 但又不似唐戶市場的特別同美味~

一讚的是大 Toro, 1000yen/5片, D 油份真的很多~

食完嘢, 市場內仲有手信店, 見到有「井出商店」的拉麵禮盒, 係和歌山一家很有名的拉麵店,
但行程內沒有機會去食, 所以波比買了兩大盒回香港
不過後來發現原來機場 Duty Free 都有囉...... 早知唔洗拎咁遠........

之後搭明光巴士, 去到白浜ﾊﾞｽｾﾝﾀｰ (Bus Center) 站落車, 終於買到了一路擔心著的回程車票!
點解咁擔心? 話說聽日去 Adventure World 玩, 玩完要由白浜去和歌山市的酒店,
玩完只有 5:20pm 一班車去和歌山市, 搭唔到的話, 我都唔知點算......
好彩, 買到了! 不過到搭車時, 發現原來架車係冇人的........... >.<

買完巴士票, 行去酒店, 大概是 800m 的路程, 沿著海行, 風景很美!

去到酒店只是 12pm, 未准上房間住, 於是放低行李就去玩了~

酒店望落嚟的風景好舒服呀~

2011 大阪馬拉松、和歌山、奈良遊記起動

2011-10-26T23:00:00.000+08:00

Hello hello! 我們回來了!!!
關西之旅在感恩的心下, 順利、美滿的完成了~
這次有太好的體驗, 太美味的食物, 太好的人和事了,
我們還很努力的振興日本經濟, 荷包嚴重出血啊..........

日本 311 地震後, 我們都猶豫了一會應不應該來, 但幸運的我們沒有放棄, 否則定會很後悔!!
有趣的在我們出發之前幾天, 不約而同的聽到朋友親歷其境的說「我有個朋友去完日本, 返嚟發現幅射超標, 要落仔/五年內唔生得仔......」等云云
乜 pre-pregnancy check-up 同埋 routine 的產科檢查會 check 幅射的嗎?
哈, 我們只覺得得啖笑........ (後來在日本時, 睇到生果日報都有報導呢單嘢, 已有醫生澄清是謠傳)
我們都已經有幾個朋友去咗日本了, 大家都忍不住遊日的引誘嘛, 哈~

好, 開始了~
10月26日, 晴, 我們今次搭香港快運的大阪航班,
之前搭過一次去北海道, 那次經驗不太好, 坐得我腰很很很痛.........估唔到今次好 ok 喎!
去程可以 online check-in, 所以成 10am 先去到機場都得,
飛機是 3-3 的細機, 今次我醒了! 用張毯墊住條腰, 果然 4 個鐘的機都冇腰痛~
空姐的服務好好, 搭搭吓飛機, 機師竟然開咪叫我哋望吓左邊, 嘩, 有火山爆發呀!

食物我們都很滿意啊, 老老實實, 比近幾次搭國泰的還要好食!
(波比不忘 recall 上次搭 CX 的石頭麵包...........)

哈哈, 還有例牌的 Fortune Cookie

落機, 好少人, 好快過到關,
入境後, 本想去買未來幾日的車票, 但完全搵唔到別人講的 JR 綠色窗口/ JTB,
於是就先去到梅田再算~

今次在大阪住的, 是 Hearton Hotel Nishi Umeda
我分別在 Hotel Club 同 hotels.com Book 咗 4 晚, 是就啱佢有減價先 book, 大概 HKD600 一晚,
佢的位置好方便, 大阪 JR station 櫻橋口出, 穿過梅三小路就到~

論房間質素, 其實冇上次的 Hotel Monterey Grasmere Osaka 咁好,
這裡是很 standard 的 semi-double room , 即係開個喼之後就冇位行嗰種,
上次 Monterey 的 semi-double 又大又有 view 睇~
不過 Hearton 好在位置真的太方便, 附近又多商場同食店, 上次 Monterey 就要行較遠先有嘢食啦~
波比話, 佢鍾意今次呢間多D (因為太貪吃)

一 check in, 酒店職員就將我訂了的 b-mobile micro SIM card 轉交俾我~
我是透過一位網上 seller 買的, 呢張 SIM card 一個月內可以無限上網, 冇得打電話,
不過要由日本手機開通, 所以自己買根本攪唔掂, 有D 錢都係要俾人賺,
不過我用完 7 日, 可以轉售俾其他一個月內會去日本的人 (波比同事已認頭),
其實 HKD 200 用到 7 日, 抵啦~
不過, 呢張卡只有300kbps 的上網速度, 原來對用慣 3G 的香港人來講, 真係好慢......
慢到有點當年的 modem feel......
但有得用總好過冇, 用 google map 睇地圖, 用「乘換案內」 App 查詢車次時間,
用 google translate 翻譯睇唔明的日文餐牌, 搭長途車時解悶, 這都為我們旅行帶來了無限的方便~

Settle down 後, 我們先要去買好多車票, 去了買 ICOCA 卡, 去了買到和歌山的明光巴士車票,
不過發現被網上的人誤導, 根本 JR Green Window 同 JTB 都冇得買, 係要去到 JR Express Bus Station 先有,
我們行了好多冤枉路, 浪費了很多時間......

之後已經是差不多七點了, 去行了大丸同阪急百貨, 買了成包紙巾咁大的帆立貝!

仲有好味壽司!

同波比至愛的咖啡 (此行我們每日都起碼三杯咖啡)

買完食物, 繼續行梅田的地下街, 發現自己完全的迷路,
以我這個 orientation 好好的人, 都會迷路...... 這裡實在太大了!
我們一路想搵一間 INGS 百貨, 但搵極都搵唔到..... 到想放棄之際, 俾我見到 INGS 的日文指示牌!
唔係化, 這間嘢改個英文名, D 路牌又用日文字, 玩咩......
唉, 最後都去到, 波比超開心, 因為入面有兩層都全是賣跑步裝備的!!
日本的跑步用品很 pro, 但也很貴....... 一條跑步緊身褲索價15000 yen......
乜都冇的短褲仔都要 3000 yen, 嘩..........
但日本女仔的跑步裝真係好靚好靚囉, 但都是太貴, 買唔落手~
見到很多 Osaka Marathon 的紀念服裝, 不過等埋去 marathon expo 先買啦~

之後去了睇夜景, 本來想去空中庭園睇的, 但出發前睇書發現在我們酒店附近的 Breeze Breeze 33/F 可以免費睇夜景啊!
雖然不是 360 度的 view, 但已經很滿足~

十時多, 去了叫出名的龜王拉麵

這裡的湯底不是主打, 麵很彈牙, 很有蛋香, 肉更是代表作,滷得很入味, 又有點烤過的香味~

多次吃日本拉麵, 都未食過豬軟骨 (我之前還以為係咪香港版拉麵先會用豬軟骨做配料)
今次第一次食到, 很難忘, 那是已經炆到軟骨成透明o者喱狀, 太強了~

自家海鮮餐

2011-10-22T06:58:00.000+08:00

星期六, 一早又醒咗........
於是 finalize 關西之旅的行程, 印晒所有嘢,
非常充實的行程, 太興奮喇!

10點鐘去了跑步, 唔知係咪今日太熱, 我同波比先生跑完返嚟都好唔舒服,
波比跑跑吓嘔, 我就又頭痛又全身發滾..........
兩個人都要食藥再瞓咗陣先好D.......... 都唔知係咪中暑呀!

夜晚約了阿姨食海鮮, 差D 唔舒服到要考慮唔去食, 但又訂晒大閘蟹所以都係去啦, 好彩六點零已經冇咩事~
我們去了三聖買海鮮, 我住咗屯門元朗咁耐, 還是第一次見識三聖的海鮮檔,
果然又大隻又新鮮呀!

買到去阿姨屋企, 有阿嫲同埋工人整, 我都有幫手刷鮑魚

今晚超多餸呀, 這是從九龍城訂返嚟的大閘蟹

嘩, 好正呀~~~ D 膏又香又滑, 果然同我平時喺街市買的差好遠!

超大隻的扇貝, yummy yummy!

我負責炒的豉椒蟶子, 因為新鮮嘛, 所以很鮮味爽口, 炒了兩大盤, 哈哈, 好滿足的海鮮餐!

朱古力脆皮包 x 元朗的德國佬

2011-10-21T06:06:00.000+08:00

考完試, 終於可以過返D 正常生活,
今朝一早又整麵包, 是沒牛油沒雞蛋的健康脆皮包, 加了朱古力實在開心

仲有幾日就放大假, 要好好清埋手頭上的工作,
最難攪就係我手頭有好多個 BB 仔 case, 要趁放假前全部都睇一 round 先, 但我又唔多夠時間...
不過好彩而家我已經係熟手技工喇, 哈哈~

今日睇完個 B, 放返佢入箱度, 一打開條毛巾.................... 屎..............
點解D 屎會必晒出嚟o架................ 好彩我有戴手套同埋著晒保護衣o者............
跟住就獻出了我人生的第一次 - 幫 BB 抹屎屎喇~

今晚可以同老公一齊再慶祝了!
睇 openrice 知道元朗新開了間德國餐廳「德國佬」, 一向愛吃德國豬手香腸的波比先生又點可以放過!
七點幾去到, 嘩, 雖然位置偏僻但係好多人, 證明應該唔錯掛~

點餐後, 有兩個據聞係自家製的香草麵包送上, 味道實在好, 夠鬆軟又很香的香草味! 這是元朗沒有的美味~
千層麵是很用心去做, 在其他餐廳食過的有時都好 hea,
呢度的有肉醬同埋茄子餡, 加了不同的香草同香葉, 千層麵的軟硬度適中, 一啖中有齊不同的美味, 很讚!

最期待的豬手出場了, 份量果然好多,
不過其實較為失望, 太咸同埋個皮燒得太硬了, 沒有白飯去送一送的情況下, 實在咸得有點難以下嚥,
最後, 我食了兩件都放棄了, 波比食完都話食到個口痛.......
暫時來說, 還是最愛珀麗灣 Oma's Kitchen 的豬手呢, 講起又想去食喇~

Exam finished

2011-10-20T06:02:00.000+08:00

n 咁多日冇寫 blog, 證明了這星期的考試實在是多麼令人憂慮
星期四, 終於考完了, 應該冇問題掛! 真係鬆鬆鬆晒喇~~
希望這是我職業生捱的最後一個考試啦!
年紀大了, 太多考試實在令人吃不消~

今晚本來很想同波比先生去慶祝, 但係波比先生返了大陸做嘢, 好夜先返到落嚟,
於是就去了一個人的麥當當晚餐慶祝,
之後就發揮女人的本色 - shopping 慶祝!

在 Das gute 買了一件朱古力蛋糕, 佢D 蛋糕都貴貴地, 平時都唔捨得買,
今日要獎勵吓自己, 先揀了一件最後的朱古力味~

嘩, 係超超超好味, 朱古力是完全合心意的濃郁味道
慕絲層好滑, 底層的開心果蛋糕的開心果味非常突出, 成件蛋糕都好正呀~ 值得再買~

杏仁朱古力千層酥

2011-10-16T07:28:00.001+08:00

整嘢食, 我覺得係好好的減壓方法~

前兩星期咪去咗學整千層酥嘅, 今日試試在家整,
貪食之餘又想健康點, 減了 40% 的牛油, 所以造出來也是意料之內的冇咁酥化,
上面的杏仁, 又唔可以一早入爐 (會燶!), 中途先放上去, 又唔可以黐得住舊酥, 有咩解救呢?
整了 20 條, 哈, 唔好兩日內食晒呀~

超 stressful 之 weekend

2011-10-15T22:12:00.001+08:00

這個星期, 工作忙, 又要準備一個考試, 真係咩 mood 都冇晒......

成個星期都冇跑步.....
今日去跑返多D 先, 成 10.5km 呀~

成個星期都冇飯開, 出街食咗勁多唔健康的食物,
今晚一個人, 煮咗個減肥什菜湯嚟飲, 質飽D 自己, 唔好食咁多零食

是大壓力嘛, 個心又卜卜跳,
iPhone 有個 App 可以 check 到 heart rate, 係好準的,
38bpm...... 真係慢得有點嚇人!

近日好吃

2011-10-13T21:20:00.002+08:00

呢幾日好忙, 日日都冇煮飯.........

出街食, 發現了元朗美食
近來都話好想搵到正宗的擔擔麵, 發現了原來元朗紅 van 站旁的「上海麵家」做得很好,
濃濃的麻醬, 肉醬是有乾蔥炸菜蝦米的, 很是我心目中的味道, 一個人吃了很多!
仲有四大粒雲吞, 只是 $26, 平靚正!

另外睇了 openrice, 發現元朗有一間好正的四川菜叫「一品紅」
兩個人貪心的叫了個例牌水煮魚 ($98), 一大盤的辣油, 很恐怖!!!
魚做得唔錯, 下面仲有不同配料,
真的很很很很辣, 咀唇係完全充晒血...... 變了孖膶腸........
我仲發現我辣到髮尾不停的滴汗, 好恐怖! 未試過食辣食到咁........

見到剩返的麻子, 你會 feel 到呢盤嘢有幾勁!

仲有川京涼粉, D 粉好滑滑, 配辣汁一流!!

椒鹽鮮魷也很讚啊!! D 炸蒜蓉用來撈飯一定超正!

呢間店還有很多想試的菜色, 下次一定要約埋嗜辣的朋友再會一會佢!!

十月免搓包之三 - 無花果玉桂提子包

2011-10-10T18:16:00.000+08:00

最後的一部分麵糰, 攪攪新意思, 做了這無花果玉桂提子包

之前成日見D 書都有用玉桂, 不過擔心很難用完一包所以一直都沒有買,
今次終於都買了, 玉桂的香味真的很獨特又很很很香,
焗完之後, 成個廚房同客飯廳都是玉桂味~

不過呢兩日D 腸胃好唔舒服, 又嚟肚痾......
今天是本年度第二日的 sick leave, 睇完醫生就去了會所讀書,
又見到好多幼稚園小朋友等校巴時瘋狂地走嚟走去,
D 阿媽阿婆工人就係咁好勞氣地叫D 小朋友唔好走, 很是有趣~
如果我生個仔, 也會是同樣地激心嗎?