豬欄生活: 7月 2013

2013年7月30日星期二

[愛住家菜] 韓式火辣牛肉鍋

因為未來兩日都唔煮飯, 所以今晚煮多D, 可以 for 帶兩日飯~

在一田買了 pack 和牛, 諗諗點煮好, 忽然間想起了韓式部隊鍋!!
於是買齊材料, 就煮返個韓式火辣牛肉鍋

個湯底是雞湯 + 韓式辣醬兩大羹 + 師妹在 Bali 買俾我的辣椒粉一大羹
加入韓式粉絲、木耳、支竹、大蔥、草菇煮 10 分鐘,
最後先加和牛淥一淥, 以免過熟,
食得喇~~ 睇張相好似唔紅, 其實有D 辣醬喺底未攪勻, 攪勻後又辣又香, yummy yummy!

2013年7月29日星期一

返工帶飯健康之選- 電蒸小飯盒

不經不覺, 工作多年, 帶飯亦很多年了~
因為醫院 Canteen 好難食/長期好多人/冇位/乜都賣晒/買到飯都起碼 1:20pm, 所以這幾年都很堅持帶飯
一年工作240日, 就食了 240次微波爐, 其實真係會唔會致癌呢??

尋日老公送了一個我夢寐以求的電動蒸飯盒仔俾我, 好開心 (不過當然係我提出佢買啦)
其實我知道有呢樣嘢好耐, 有個牌子叫「十度良品」有出呢D 蒸飯盒, 但係係大陸嘢仲要轉插頭, 實在唔敢帶返醫院用
有次經過日本城, 見到呢個 $188 的蒸飯盒仔, 比十度貴, 但起碼係三腳插, 喺得日本城賣點都有多少少保證掛
搵了兩間先有貨, 買到了, 好開心!

打開入面, 其實好簡單就好似烚奶樽器咁, 得一塊電熱板發熱, 加水蓋過個 area 就得

我今晚測試過, 由開機起計 20 分鐘就可以蒸好個飯,
熱辣辣, 香噴噴, 所有飯菜都好濕潤, 同微波爐的乾硬效果簡直係天壤之別!!!
一路蒸都唔會點噴水蒸汽, 係到最後開蓋先有, 可接受~
聽日就帶佢返工, 以後日日都有美味嘅飯盒食 lu, 諗起都好開心啊!

2013年7月28日星期日

[2013 沖繩夏日遊記] 沖縄美ら海水族館

吃完咖哩, 就揸車返酒店, 一路藍天白雲, 好美好美!

在酒店泊好車, 放低點行裝, 就輕輕鬆鬆行去水族館,
一入去, 有得影相, 波比先生又俾人氹到用 1000 Yen 買了.......
誰說女人的錢好好賺? 我告訴你波比太太的錢一點也不易賺, 但波比先生的錢就很易賺!!!

入場時, 將酒店包的入場劵遞給職員, 點知...... 佢每人退返 400 Yen 俾我哋,
因為 4pm 後入場是平 400 Yen 的, 但我真係冇諗過佢會退返差額, 日本人實在是老實得不可思異!!!

一入去是觸摸小水池, 有波比最後的海星, 有人玩得唔肯走, 記住唔可以拎出水面o架~

條海參原來俾人摸過後會縮埋一舊粗咗, 哈哈!

跟住係不斷的大魚缸, 有著不同的海洋生物~
雖然真係睇過 n 個水族館, 但每次到訪新的水族館, 都會發現未看過的, 世界是多麼大~

粉紅色的魚, 還是第一次見!!

如果日本要搵一種魚做國家之魚, 會唔會係佢呢??

最大的魚缸, 真係好震撼, 鯨鯊好可愛!!

就啱餵飼時間, 鯨鯊變了個吸塵機, 不停將水同食物吸入肚中, 第一次見到咁樣食嘢!

魔鬼魚都唔執輸, 有魚仔食!

離開了主場館, 去埋幾個小館, 海牛好可愛, 還睇咗一套紀錄海牛生 BB 的影片, 生命是多麼的奇妙~

仲有海龜睇, 好大隻~

最後是看海豚表演, 但係呢個時間對到正個夕陽, 又曬又熱都唔係好睇到......

2013年7月27日星期六

[愛行山] 衛徑3-4段

今日又有得行山了, 勁開心, 出發前都擔心好大雨, 不過開始行時又 ok

今日由油塘出發, 行衛奕信徑 3-4 段, 至黃大仙完結~
今次操練有成24 個人, 破晒紀錄, 好人強馬壯!
頭嗰段都唔難行, 教練仲叫我哋 jog 落山 =.=

見到維港景色, 可惜兩次行呢條路, 都係下雨天沒有最好的風景

大概兩小時, 我哋就去到井欄樹的小士多,
呢度的豬扒真係超超超好食呀!! 份量仲足足一大碗, 吃完超滿足, 又充滿能量!!!

再入第四段就辛苦了, 不停的山路, 之後仲落好大雨 *o*
梯級根本成了瀑布同河流, 水不停的湧下來, 兩隻腳全插在水中, 似行溪多過行山, 還不知會唔會俾雷劈!
全身都濕透了, 遮都吹翻了兩把, 好彩有 rain cover, 個背囊先力保不失~

上到飛鵝山頂, 見到超美的港九全景

有好多人特登揸車上去放模型飛機, 呢個阿叔好型啊!

與雲同行

之後全是石屎路, 好好走~

今日教練帶著我們 Girl Team, 順利六小時走完 21km, 比上年快了不少!

之後先去竹園體育館沖涼換衫, 沖完涼真係一億個爽, 終於唔洗發臭又 up 住
同師弟妹去旺角又 shopping! 哈哈, 又去 Overlander 朝聖囉~
跟住一齊再食嘢, 紅豆冰 yummy!!! 完滿結束了一日喇!

2013年7月25日星期四

[愛美食] 終於吃到的豚王

今天去了港島的醫院 training, 5pm 就散,
去了誠品一邊看書, 一邊等波比先生放工~

咁難得到 CWB, 梗要食好嘢~ 當人人都去了排一蘭, 我就反而去了食豚王, 開咗咁耐, 知道長期都好長龍所以冇機會食~
今次6:40pm 去到, 7:00pm 就有位了, 超感動!!
我排了幾分鐘後, 後面就出現長長的人龍, 太好彩了!!!

排隊時已圈定食乜嘢~

雖然都坐得幾迫, 但服務好搭救, 坐低冇耐麵就好快到~
濃濃充滿了膠質的湯底, 真係正到冇朋友!! 比日本的有過之而無不及, 唔怪之得佢一直都咁好生意啦!!
D 湯真係好味到飲晒都得, D 叉燒又唔肥, 啱晒香港人, D 麵係細麵, 有蛋香非常讚, 真係超水準!

然後去 Pacific Coffee Emporium hea 吓啦, 行去時見到 scan QR code 就有優惠, 是買一送一呀!!

$38 有兩杯咖啡, 本來好開心, 點知, 個拉花攪咩呀???
點知一飲....... 啞咗......... 竟是苦澀的難飲, 發生咩事呀?? D 豆過咗期呀??? 我真係未飲過咁難飲的咖啡..... 飲咗幾啖, 就成杯冇要了......

2013年7月24日星期三

被換電腦

星期三, 波比先生放半日假去睇波, 我就獨自買餸煮飯俾自己食,
一返到屋企, 遍地凌亂, 以為俾人打劫,
入到書房, 吓?! 做咩多咗部電腦!!!!?!?!?! 又係波比先生的傑作!

然後, 慣常地波比先生俾波比太太娥一輪, 有人話因為年頭我送咗部 notebook 俾佢所以佢要買返D 嘢俾我
我話明明我部 notebook 好地地又嘥錢買, 而家多咗部電腦都唔知點,
兩個人有兩部 desptop, 三部 notebook, 一個 server, 兩部 tablet, 真係好過份......

完美型人, 就是覺得咁大部嘢會睇壞眼, touch screen 功能更是無聊,
本來用 mouse 移動 1cm 就得, 哪有人會伸手去摔個 mon 10cm,
最憎用 Win 7, d 掣一 D 都唔 user friendly!
部嘢我只覺得適合用嚟睇 myTv....... 嗰日用來睇衝上雲宵係幾正!

唉, 下次我都係想要菜刀一把或高速煲一個~

2013年7月22日星期一

一田終於開了!

尋日同波比先生跑去屯門, 飲茶後閒逛在 V City 新開的一田,
真係發夢都冇諗過, 一田會開在屯門, 但失望的是它不開在元朗 Yoho midtown
而家搭十分鐘西鐵, 無論是過屯門定出荃灣, 同樣有一田同吉之島, 真係買嘢都方便好多!

入到一田, 人頭湧湧, 有好大個 BB 超市, 食的用的玩的都有, 媽媽們一定逛得好開心!

我們當然是為超市而來, 一D 都冇令人失望, 刺身呀, 肉呀, 海產呀都應有盡有,
我買了日式醬料, 又買了兩盒和牛
百零蚊, 定價算合理

不過可能我用在日本食和牛的 expectation 去吃, 入口當然高下立見,
但均勻的油花, 味道亦是很不錯~

行完一田, 開始覺得過萬蚊呎的瓏門或者都是物有所值,
有大商場西鐵總站在樓下, 就已經很無敵

2013年7月21日星期日

[2013 沖繩夏日遊記] Neopark 動物園 x CoCo 咖哩屋

第三天, 在 Resort 酒店一起身就見到彩虹, 超幸福的感覺~

酒店 package 原來只送了一天的早餐，選了今早去吃，我又失眠了，晨早七點就叫波比起身陪我去食早餐

餐廳在一樓，一入去，嘩嘩嘩，超級無敵大海景加落地玻璃，個 view 太正了

早到所以有窗口位，嘻，早起的鳥兒有蟲吃
食物嘛，中規中矩，係可以嚐到沖繩的菠蘿，又甜又多汁，好吃到暈
加上陽光與海景，有時間的話呆坐一個鐘慢喝咖啡也是嘗心樂事

吃罷早餐，時間尚早，與波比行行附近的海洋博公園啦, 順便認一認路, 今日黃昏會到水族館,
從酒店行過去, 真係超近!
早上藍天白雲, 看看海, 風景十分之美~

點知行行吓，收到一陣浮潛的 Top Marine 來電，問我喺邊，我話喺水族館嗰頭，佢話要我 9:30到，否則唔等我。。。

我即刻啞晒，因為之前聯絡明明話10:00am 集合，一路十冇叫過我哋要早半個鐘到喎，我揸車去要成個鐘，而家 8:45am, 咁你想我點??

於是就拿拿聲開車，因為冇 IC 行，我盡力地飛車，趕呀趕，竟然 9:35am到了，但問題又出現了，map code 顯示我們到了，但找不到店子，我停了車打俾佢，但又好難講到佢聽我位置。。。
於是把車子回頭駛了一段路，再邊行邊望，且。。。原來頭先停車個位咪係囉，一來俾佢網頁張相呃晒，個門口都完全唔同樣嘅!!!
二來佢舖頭招牌原來係冇英文，我一路都望唔到 Top Marine 的字眼，回頭行第二次時見到啲日文，腦海中讀出嚟先知原來呢個日文名就係 Top Marine....啞晒。。。。。

浮潛的介紹, 上一篇寫了, 提到我暈浪, 回到舖頭換埋衫都仲好想嘔.....
最後, 由波比先生揸了幾百米的車, 去了間都出名的元祖紅芋手信店行行, 等到唔暈先繼續行程

本來諗住呢d 店好遊客 FEEL, 點知意外地好行,
所有小甜點都有得試食, 試得波比不知幾開心, 試完就買咗幾盒紅芋批, 因為真係幾好食!