2012年3月23日星期五

我要飛喇

今個星期完結了, yeah~~~
星期三約了好朋友食飯, 沙爹王的芝士燒蝦是必叫, 超好食!

IMG_2197

完成了重要任務~ 一個人的晚餐, 去了麥當當慶祝,
極度不滿麥當當而家的排隊安排, 永遠唔知邊條隊係俾錢, 邊條隊食拎嘢食!
D 人好似好忙, 但效率奇低, 排完一條去得好慢的隊俾錢, 又要等廚房整包,
我想話, 我從來都唔覺得佢而家所謂即刻新鮮整的包, 比以前的好食囉!
買一個餐, 足足等了十五分鐘, 仲要係唔算多人喇喎, 真係想鬧人!

試咗新嘅磨菇足三兩, 個汁係好食, 等得幾片磨菇, 重點係塊漢堡煎到乾硬化!
見到咁嘅情況, 真係想投訴!!!

032201

好了好了, 聽日飛喇~ 好開心~~
海鮮海鮮, 我們來了!!!

2012年3月18日星期日

告別麻雀枱

差不多每個月, 我們和波比的大學同學都會一聚,
但相信我們有好一段時間要告別麻雀枱了, 因為當中的一對 couple 要生小寶寶~
新生命的來臨, 實在令人感到幸福美滿~

今日我們打埋最最最後的十二圈, 聽日 BB 就要出世了,
哈哈, 真係好大好大的肚子啊~
希望 BB 健康快樂, 一家人開開心心~

2012年3月17日星期六

我們的五週年

時間過得真係快, 我們結婚五年了~ 有這麼久了嗎?
回想起那天, 很開心的一天, 真的要特別謝謝勞苦功高的兄弟姊妹和攝影師~

我們的婚禮不盛大, 覺得婚姻比婚禮重要,
要維繫和珍惜實在不容易, 幸好我們尚算做得不錯~

同我同日結婚的朋友仔, 都生晒小朋友了, 有的已生咗兩個添~
哈, 我真係大落後~ 但實在真係未玩夠呢~
而且覺得, 這個年頭生小孩實在是太恐怖的事, 乜都要爭爭爭.....
還是等等再看看這世界會變成怎樣, 再作打算

wedding

起身, 用了麵包幾整麵包, 原來D 提子係唔可以放面焗 25 分鐘咁耐, 會燶的.....

031701

跑了 10km, 睇了一套戲, 夜晚去了 Langham Hotel 的 Main St. Deli 食飯~

031705

招牌的漢堡包, 那像瀑布流動的藍芝士, 太正了

031706

個扒反而普普通通, 有點硬...........

031704

行了 CitySuper, 買到份禮物仔送俾波比先生
再到 Agnis b. Cafe 食甜品, 蛋糕咖啡都很有水準, 絕對值得再幫襯~

031707

2012年3月16日星期五

一週食記

足足一星期冇 update, 係因為返工攰到放工想即刻撻落床度瞓.......

俾學生激到我噴完血再噴火, 我直情叫佢:「你咁樣簡直係嘥緊我嘅時間, 同埋病人嘅時間, 你乜都未準備好的話, 洗唔洗停咗你個 placement, 等你準備好先再嚟?」
我同波比先生講:「好彩你老婆唔係做老師, 否則我晚晚帶D 學生功課返屋企改, 晚晚都嘔血, 嘔嘔吓應該好快死!」

再俾個春虫虫到冇得救的文員激到想死, 三個幾月都成日做錯嘢, 話俾佢聽, 佢第一個反應仲要係唔認!
我哋放工開會開到 7pm, 傾點樣令佢唔好再錯

算罷啦, 呢個星期已過, 忘記佢! 倒數返多 5 日工就放假!

星期一, 又去了南翔, 原來四喜烤麩係好好食o架!

01

星期二, 一個人的晚餐, $16 有大大粒雲吞, 好滿足~

02

星期三, 同波比去了食稻荷拉麵, 不過不是傳說中咁好食

03

星期四, 去久違了的板長食壽司, 食完幾百蚊都唔飽......

04

於是去了溏苑食甜品, 但係個窩夫都唔係熱嘅, 味道 ok 啦~

05

個 Tiramisu 就真係好好食, 有酒店水準!

06

星期五, Family dinner, 長發酒樓做緊 $78 龍蝦伊麵, 嘩, 大隻到同我喺街市買百幾蚊幾的一樣大,
好多肉, 爽又甜, 超讚~

07

2012年3月10日星期六

椰絲吉士包 x BBQ

今日約了波比同事 BBQ, 我就整D 嘢食帶去,
整了鹵溏心蛋同芝士軟包, 同事都讚好味道~

仲有試整波比鍾意食的雞尾包, 不過雞尾包D 餡好多牛油/糖, 好肥,
我就改良了, 用吉士加椰絲咁整, 包完餡仲有D 喞面, 嘻嘻~

031002

BBQ 超多嘢食, 波比同事整的羊架真係一流,
仲有德國腸、扇貝、燒薯餅、熱溶芝士點薯皮, 好食到冇朋友!
常常記掛著當年巴西燒烤的波比, 買了菠蘿去燒, 哈哈, 好味~

031001

2012年3月9日星期五

我們的秘密約會

星期五 Happy Hour! 哈哈哈, 我們一班 80後同事秘密約會食飯去~ 人少少, 講嘢都方便D~
有同事揸車, 就去了西貢食泰菜, 一落車, 想起了西貢菠蘿包, 即刻走去睇吓收咗工未,
見到 $17/ 3個大特價, 抵抵抵! (平時要 $8/個菠蘿包的!)

030901

同事介紹去一間叫「旺泰」的泰菜, 坐得舒服, 食物味道非常之好!!!

030902

一班人吹吹水, 呻吓工作事, 嘻嘻哈哈了成晚, 好開心!
食埋糖水, 大家11點先捨得走~

2012年3月8日星期四

再訪漢和

今日忙到成三點先有飯食.....
好彩預咗今日會咁辛苦, 一早已約定波比夜晚去食韓燒獎勵吓自己!

又來到旺角的漢和, 上一次來是新開張, 唔多人,
今次超旺場, 滿座又迫又有點嘈.......
不過食物都繼續算唔錯, 由小吃食到甜品, 超滿足!

030801

2012年3月7日星期三

新一代

我同幾個同事都係第一年帶學生, 大家都異口同聲地嘔晒血.....
是年代不同了嗎? 學生唔用腦的嗎? 見佢哋交嘅嘢, 寫嗰時真係照 copy完全唔經大腦o架喎, OMG!
我的朋友都知道, 我做嘢一係就唔做, 一做就要做到最好
但這年代的90後出實習, 係咪求個 pass 畢到業就算? 冇諗過第時真係要做一個好的 therapist 去幫人?
只係貪圖一份人工高福利好的工作? 完全 hea 做?
這幾年出來的, 就是這樣的人, 有些家長告訴我, 在坊間一千幾百蚊睇一次, 做得不知所謂......

我努力去幫我的學生去學習, 希望佢哋將來可成為一個好的 therapist,
但問題係佢哋又有幾想學好呢?
改嘢改到火的時候, 老公一句: 洗乜為佢哋做咁多o丫?
唉, 真係對自己 EQ 的訓練~

唉, 都係煮個好餸仲實際!
今晚用泰式辣椒膏、香茅檸檬去煮蝦, 呢個配搭好開胃呀,
喺呢個悶熱冇胃口的日子食, 實在唔錯~

030701

2012年3月5日星期一

六月之旅

contract 完又要清假, 研究過好冇去九州豪斯登堡睇花, 點知花季 4月11日就完...... 去唔切.....

再諗諗有邊度好去, 不如去高雄、墾丁、阿里山啦,
呢D 上山又下海的旅行, 真係趁萬一生仔前有得去就好去喇~

6月第三個星期, 打算去8 日, 高雄入台北出, 呢幾日忙於睇民宿, 聯絡包車司機, 睇機票等等~
睇到D 介紹好正呀, 真係未出發先興奮!


前日同尋日, 行山加跑步 20 多公里, 今日對腳超酸痛.......

上星期吃過超美味醉蝦, 尋日搜尋了好多食譜, 配合家中現成的調味料, 造了這個醉蝦,
雖然沒有用糟鹵, 但係用魚露、冰糖、水、紹興酒這配搭, 味道更出色, 更合我想甜甜地的口味~
波比一個人差不多食咗半兜! 好彩仲有D 可以聽日拎返工請同事食~

030501

2012年3月4日星期日

喇沙

多謝小師妹, 在外地時買了一包喇沙醬料俾我,
尋晚用咗嚟煮米線, 不過唔記得咗落鹽, 淡咗D D,
喇沙配海鮮, 好 match 呢~~
哈, 好期待仲有 20日就去沙巴, 可以吃吃很地道的喇沙了! 諗起都流口水!

030401

2012年3月3日星期六

盪失路之元荃古道亂咁行

見今日比前幾日較好天, 捉咗波比先生去行山!
冇地圖之下, 膽粗粗挑戰元荃古道, 那是一條可以由荃灣行到元朗的山路,
荃灣行到元朗, 聽落實在有點驚嚇! 不過網站話都係大概 15km o者, 就諗住試吓啦~

搭西鐵去到荃灣站, 就開始行, 行去荃威花園, 跟住就有路上山了!

01

先係一條好攞命的千級樓梯....... 行到滴晒汗!

02

去到半山, 居高臨下見到荃灣的景色了, 可惜今日都仲係多雲大霧啦

03

山中有小屋, 真係有人住o架, 波比問: D 人究竟點落去買嘢呀? 日日咁行?
06

上到山的一大半, 見到更廣闊的景色了!

09

上到石龍拱, 滿地都係牛屎........

15

本來呢度係睇風景的最佳點, 可以望到青馬橋的全景, 但係今日太大霧了, 乜都睇唔到.... 失望....
我們行在雲霧間, 實在有趣

16a

點知行行吓, 有D 唔對路....... 網站所講的地標, 我一個都見唔到.....
仲愈行愈陰深, 行到一D 要撥開樹葉先行到的小徑, D 路好爛..... 實在膽心......

19

後來我們發現真係行錯了...... 在田夫仔那裡, 我們應該向北行 (黃色點點), 就可以返到元朗,
但我哋一路都見唔到指示, 只是跟大路行, 行行吓就去咗南面 (閣下在此)嗰度.....
睇到呢張地圖, 真係 o 晒咀......
我們已行了三個鐘, 如果而家先由"閣下在此"再行返上北面, 要行多三四個鐘囉.....

22

好猶豫行唔行到, 行咗少少上去, 去到好高的山頂, 見到YOHO Town!!
嘩, 但係見到嗰種遠法, 實在唔敢行囉......

23

我們唯有向返南行, 去深井好了~

25

落到深井, 實在太感動了!!!!
有得坐, 有嘢食喇! 這間全記茶餐廳好得呀, D 炸雞脾係用黑椒同埋香草醃過的, 超好味!

28

真係有點激死人呀, 如果唔係行錯路, 其實已經行到返元朗了!
我們一路都係跟大路行, 都唔知錯咗喺邊....
D 山路指示太唔清晰了, 應該改善吓啦!

2012年3月1日星期四

12 年聚餐

有一班朋友, 識咗 12 年, 哈哈, 借慶祝之名出來大吃一餐

030101

又想當年一番, 講起我們相識時, 都係十幾歲,
十幾歲這個時代, 實在離而家好遠~

大人了, 其實愈來愈難再識到知心友, 反而舊朋友, 始終是最知心的~
可幸我工作的地方, 近年不斷有新血加入, 大家都好玩得埋, 都是好好的朋友~
有傾得埋朋友的工作地方, 其實又好難得~ :D