2011年4月30日星期六

Wii Fit 功能大發掘

今日算乖地在家做 Powerpoint, 那是我六月份要去 Master Course 講書的 ppt,
其實真係好緊張, 內容要精確, 要 comprehensive, 又要希望唔好令大家瞓著,
1.5 小時的堂, 準備得不容易!

整完 ppt, 還要出 5 條考試的題目,
嘩哈哈, 好似好好玩! 放心, 我都唔會出得太難的~
讀書是求知識, 我只希望我的課堂後, 令大家有點得著, 令到對病人有更好的了解同關顧~
一個考試一百分, 但對病人冷漠不尊重的醫護人員, 我覺得是沒用的

近來發覺自己肥咗好多, 冇呃你的, 雖然你哋個個見到我都問: 點解見你 facebook 食咁多嘢都唔肥?
其實那是假象!!!!! 我肥在下半身, 腰 pat 腿不停橫向發展,
著稍貼身的長褲時, 褲管被蘿蔔小腿啜住了, 那感覺實在太恐怖!!!

怪自己吃得太多自己煮的餸吧,
又怪晚上飯後總吃太多甜品零食吧,
波比先生一星期買兩三次雪糕糖水俾我 (住元朗的福利!), 今晚又食紅豆沙了, 上星期有次半夜食榴槤飄香.....
點會唔肥...........

Ice cream

於是又開始做吓運動, 由三月中開始因為忙讀書, 所以沒有跑步,
星期一放假時去跑跑, 嘩, 完全不在狀態得過份, 未夠 1km 已氣喘得好辛苦, 史喇.........
之後完全是半行半跑的完成了 5km 的路程 (不過隨即去了酒店食 buffet...)

沒有外出跑步又想做做運動, 於是從梳化底執返那部封塵已久的 Wii Fit 出嚟,
好努力地做了三十分鐘的運動

01

這個繁體中文版的 Wii Fit Plus, 玩了不到兩三次呀......
手多多按入去不同的 Menu 看看, e~~~ 好攪笑呀, 原來有D pre-set 咗的運動 program 幫你達至特殊功效!
嘩~~~ 提臀、上臂緊實、收腰  ---> 我都好需要囉!!

02

於是跟著 program 又做了一 round , 哈哈, 好玩~~

03

做運動實在很需要恆心, 自問是一個沒恆心的人啊......
眼看波比先生由一個 180磅的大肥仔, 減到去得返 14x 磅,
呢期仲練緊老鼠仔同六舊朱古力, 又真係有D 成果, 真係有點慚愧..........

2011年4月29日星期五

好久不見

今晚一個人, 即慶去找兩位舊同事師姐食飯,
其中一位好好好耐冇見了,
邊吃著日本餐, 邊談個不停, 很開心的一個晚上~

01

又有三日假, 卻有兩個 deadline 要趕...... 諗起都頭痛............

2011年4月28日星期四

泰式蝦餅

今日得三個人返工, 估唔到三個都有帶飯, 第一次一齊喺 Department 食飯盒,
有時真係好唔想落去 Canteen 迫, 都唔明點解長期都咁多人, 多人到搵個位都難

01

在病房睇咗個阿婆, 做測試時指住佢隻杯問佢:「呢隻咩嚟o架?」
阿婆:「麥兜」
見到杯上原來有隻麥兜, 哈哈哈, 忍唔住爆笑, 點解連阿婆都識得麥兜嘅?
到我老咗又 Demented 嘅時候, 會唔會我乜都唔記得, 淨係記得麥兜呢?

今晚整泰式蝦餅呀, 好成功, 不過唔記得買檸檬葉, 否則會更加泰風味!
042801

飯後飲一杯老公沖的咖啡王, 歎~~

2011年4月27日星期三

即食麵試食員

如果有「即食麵試食員」這個工作, 我想我一定會應徵!
因為我太愛吃即食麵了! 哈!

今晚又是一個人的晚餐, 有機會試試日清這款新的日式即食麵 (等波比先生不在家才有機會食, 因為又唔想佢咁唔健康)

042701

味道不錯啊!  不過其實與出前一丁的豬骨濃湯麵有點似~

042702

波比先生的日本同事話大阪其實冇影響, 食物同水都安全,
哎呀, 太心動了~~~~~

睇睇別人網上的遊記, 看到那拉麵同芝士蛋糕同魚生,
好想去埋和歌山同埋白濱, 去動物園探動物,
去體驗一下日本的馬拉松的氣氛同熱鬧, 實在愈講愈吸引...........
又中毒...........

老公, 點o者?

2011年4月26日星期二

Jamie Oliva 牛扒

假期完結, 返工忙忙忙!

今晚煮牛扒, 用 Jamie Oliva 的醃法

042601

效果算是唔錯了, 不是貴價的牛扒, 出來都唔會 un, 味道亦夠香草味

042602

不過牛扒真係一分錢一分貨, 要好味的真係要買貴D 嘅先得~

快用完一支油同一包米了, 證明老婆都好勤力煮飯呀! :P

2011年4月25日星期一

Buffet @ L'Eclipse

woo, 呢個復活假真係肥史了!
尋晚食完海鮮, 今日又去食 buffet!

是朗廷酒店的 L'Eclipse , 食物很不錯啊!
其實有超多海鮮, 但因為尋晚先食過, 今日完全提唔起興趣,
每樣食一小件/ 半件就好了

042501

因為甜品才是主菜!

042502

Movenpick 雪糕 + 超脆甜筒, 好好好正呀~~


042503


今日收到了大阪馬拉松的 e-mail , 我們的 application 都成功了!!!
但係猶豫緊去唔去好, 日期是 10月31日, 仲有半年, 到時日本會好D 嘛?
5月尾之前要決定了, 其實我不太擔心現時的幅射,
老實說, 那零點幾的幅射量, 我每個星期做 x-ray exam 都食多幾十倍,
不過係唔知近期會唔會仲有大地震再有更大的天災, 再有更大的人禍, 考慮中

map

睇報紙見到日本旅遊業的苦況, 其實真係想去振興一番返~

2011年4月24日星期日

西貢海鮮團

與同事會合, 出發去街市的檔口買海鮮,
這檔叫德記的, 很老實, 海鮮都好靚, 買了 $1290 十人的份量, 抵!

11

今晚有 6 種海鮮, 先來白灼花螺, 好鮮甜的味道!

20

勁正之椒鹽瀨尿蝦, 那不是一般的椒鹽, 而是像落了七味粉之類的調味, 又辣又惹味,

22

仲要係好大隻, 好好肉的瀨尿蝦 , 食到唔停得口!

23

超正之椒鹽鮑魚, 近期最 hit 之食法! 咁整好食過清蒸好多倍呀, 朋友們一定要試試!
24

豉椒蟶子, 好滑!


25

花雕蛋白焗肉蟹, 送飯一流

26

薑蔥桶蠔, 反而是今晚最失色的一味~

28

老細慷慨地話要請呢餐, 大家當然反對,
最後讓老細請滿記甜品

29

30

太美滿的美食之旅~

短遊西貢

復活節第二重點項目, 就係今晚的同事海鮮團,
特地早點入西貢, 想在海傍睇狗仔,
點知大塞車, 兩個幾鐘頭先入到去, 元朗去西貢真係好好好遠

落車第一時間衝去買菠蘿包同奶茶, 係一間好出名的舖頭, 成 40 人排緊隊

奶茶茶味香濃

01

這是宇宙最強之脆皮菠蘿油! 全香港冇第二間咁好食!

02

好好天, 海旁一帶好迫人

03

見到啡色的、黑色的、仲有白色的鬆獅狗
可愛暈了!

06

佢好乖咁趴喺度, 其他小狗攪佢佢都唔理, 真係好似隻獅子呀~~
07

呢幾隻八哥同老虎狗 (櫈底) 好似上次嚟都見到~ 一個字「傻」!

10

大的小的, 好多唔同品種的狗狗, 睇得好開心!

2011年4月21日星期四

復活友聚

Yeah~~ 放復活節假了!!!
第一個慶祝活動, 就係同 U-mates gathering!
其實都係今個月先約, 估唔到約到咁多人, 有D 朋友都好耐冇見添, 真係好開心呀~~~

042103

話咁快, 畢咗業愈來愈多年了,
我們 gathering 的話題都不斷轉變中,
開始講到生仔這個環節, 要生的話, 都係時候了嘛~
再過多幾年, 會變成 BB gathering 嗎? :P

當要為將來打算,  近來認真都睇吓醫院附近D 樓, 但這個瘋狂的樓市實在升得太快,
今日打去 agent 問吓: 「唔該我想問吓 xx 屋苑而家有冇 3.3m budget 嘅單位呀?」
Hard sell 的 agent:「呢排 D 單位好搶手呀, 上星期先又賣咗幾間, 而家去到 3.5-3.7m 喇 (即是呎價 $7000), 妳知啦, 政府打擊樓市又冇效, D 息口又低, D 錢又貶值, 人人都趕住入市, 所以真係剩返好少靚單位咋」(講到唔買就走寶咁, 聽完真係要好擔心係咪入市入得太遲咁.............)
我:「咁呀, 咁 yy 屋苑又有咩盤?」
Agent: 「yy 屋苑都好少 3.3m 呀 (呎價 $6000), 有一間嘅, 不過都係低層, 但裝修得幾好架」
我:「咁呀...... 我再諗諗先, 唔該晒」

以上都係講緊五百幾呎的單位,
呎價 $7000, 我覺得買到當年般咸道一帶的老牌港島豪宅,
點解只係平民區, 要 $7000 呎......
住得細咗, 又貴咗成截, 如沒有太強烈的理由, 想換樓原來好好好難...
Well, 這個人人都話差不多摸頂, 但又見唔到跌市原因的樓市, 令人有唔洗睇的無奈...

2011年4月20日星期三

Cooking show

醫院內的畫展, 好多相片都好有水準!
原來好多大醫生都係攝影發燒友,
原來醫管局內有個攝影的 interest group, 不定期舉行外拍活動, 我要參加呀!

042001

一個人的晚上, 一邊吃東西一邊睇有線 TLC 台的 cooking show, 歎~

2011年4月19日星期二

$2.5 的幸福味道

今日放假呀, 本來係預嚟寫 paper 的, 點知寫完咯, 今日就可以 hea 過!

咁悠閒嘅假期, 梗係要整D 鍾意嘅食物先得!
之前一早已買好晒整蛋撻的材料, 係冇咁嘅時間去整, 今日終於都一嘗所願了~

蛋撻係好便宜的食物, $2.5 已經令人有好幸福的感覺,
星期一至五要工作實在難有機會嚐嚐 (晚上吃完飯再吃的話似乎太肥了),
所以一到星期六日, 我就會嚷著要波比先生買俾我食, 其實我係一個蛋撻狂!
如果外國人問香港有咩代表食物, 我會亳不猶豫地答: 蛋撻囉!

根據食譜開了蛋漿, 較困難的係印餅皮,
首先屋企哪裡來一個合適撻模大小的圓形印?
好好彩, 俾我搵到一隻口徑較大的杯, 印起來比實際需要只係細少少,
跟住到鋪餅皮了, 實在唔懂得有咩技巧可以鋪得平均之餘又唔會穿,
我都係以唔好穿為大前提, 有點求其的總之塞晒張餅皮入去就好了, 哈~
鋪好晒, 倒入蛋漿, 還加了朱古力粒入去其中兩個度 (偷笑!)

041901

放進焗爐度焗 , 好彩我睇住火咋,
食譜話 250 度焗 15 分鐘, 但焗到 11 分鐘時, 其中一個竟然膨漲再爆開, 嚇死我了, 幾驚其餘 5 個連環一齊爆!!
即刻熄咗個爐, 開門散散熱, 再用低溫去焗

我覺得如果下次再焗, 用 180-200 度好了!

我覺得差唔多, 就熄火了, 因為已經見到一個二個變得脹卜卜, 好似街買嗰D 咁!

041902

小心翼翼地脫模, 成功了! 我整嘅第一個蛋撻呀~~~~~~

041903

最熱辣辣的時候食, 滑滑的蛋心, 真係好正呀!

041904

不過當然仲有有待改善的地方, 例如 recipe 的成份令味道較甜, 而蛋香我覺得可以再濃一點,
下次一於減糖, 用多一隻蛋, 有機會到波比放假再整過, 希望老公都可以食到新鮮出爐的老婆蛋撻~

有時幸福很簡單, 一件蛋撻我覺得比一件 COVA 蛋糕還要好味道~

2011年4月18日星期一

扭計話要食之酥炸桶蠔

波比先生很愛海鮮, 常常嚷著叫我整蠔俾佢食,
生蠔我就鍾意, 熟的蠔我反而覺得好腥, 食兩啖就會好想反胃......

本來今晚有人話唔返來食飯的, 點知又忽然間返喎, 冇咩準備之下, 不如炸嘢喇,
因為尋日炸完春卷有一大鑊油剩~
咁講講吓, 就決定咗整酥炸桶蠔啦!

先去街市買一桶蠔, 呢款有密封的蓋, 感覺上好似可靠D~

041802

準備好大陣象的炸物材料 (要洗嗰吓真係幾痛苦, 所以冇幾何炸嘢就咁解)

041801

D 蠔勁勁勁大隻, 有我個飯盒咁長 (驚訝!)

041803

話咁快炸好了, 特地買了吸油廚房紙, 因為真係好油呀, 吸咗我成半鑊油 (汗!)

041804

手掌咁大的, 好巨呀~~~~

041805

我只可以食兩隻細的, 食完一隻, 已有反胃的感覺 (=.=!) 真係好鬼滯!!!
見到波比先生夾起最大嗰隻, 真係大到嚇親人!
希望我倆聽日唔會肚痾啦, 哈哈!

2011年4月17日星期日

相處之道

元朗的餐廳, 真係多到點都食唔完,
造訪利華麗意大利餐廳還是第一次, 因為位置在馬田那邊, 離我們家實在有點遠啊!
巧合地一落樓, 竟然有去嗰邊的小巴, 實在太幸運! (否則成三十度的天氣行過去都幾係嘢!)

去到已差不多兩點, 好彩有位,
叫了兩個 set lunch, 先上湯, 係受波比愛戴的磨菇湯, 煮得不錯!

02

白汁焗石班飯 - 好濃奶香同芝士香的白汁, 有炒飯底, 製作認真!
石斑真的是石斑 (點解咁講? 因為我覺得好多餐廳的「石斑」, 其實只是不知名的魚柳), 正呀!

03

呢間餐廳出名食安格斯牛, 不是亂吹係咪都話安格斯的, 真係有證明嗰種, 不過是晚市供應, 百幾蚊~
我們點了美國穀飼牛, 肉質唔錯, 不過煮得過熟了..... 沒有肉汁............
伴碟那薯菜實在有點 hea..... 真是只是幾舊烚薯仔.........

04

整體感覺是不錯的, 希望下一次再來會試到滿意的牛扒~

昨晚聚會談到一些很深入的課題, 如夫妻相處之道、何為尊重對方等等,
兩公婆, 其實床頭打交床尾和, 嬲不過半日,
哈哈, 雖然朋友看我們都是恩愛夫妻, 但我同另外兩位太太都話「兩公婆點會唔嗌交, 冇可能」
只係嗌完, 攪清楚事情, 解決事情就好了~

揀得做另一半的, 照計待人處事的價值觀也會很相似,
如果去到冷戰的情況, 其實已經好大件事, 一定係有人做了太錯不可原諒不可接受的事情
這樣嘛, 不好怪人, 只好怪自己有眼無珠睇錯了一個人, 或者有人改變了,
因為原來有人覺得咁樣做係冇問題, 而另一個就覺得好有問題~
當價值觀太截然不同的時間, 其實兩個人該怎樣相處呢?

2011年4月16日星期六

House Warming and BBQ 之夜

今日上了好友的新居 House Warming, 仲有一班朋友, 好熱鬧!

花了很多時間心思去裝修的新居, open kitchen 超靚同正!
同朋友一齊「靚太廚房」, 準備今晚的食物,
一邊洗洗切切一邊的傾偈, 是女人好開心的活動!

不過唔好處就係唔可以煎炸嘢, 要煎隻蛋都要上樓上的天台

07

上到去, 嘩, 好正, 有個好 resort feel 的帳蓬同籐椅, 後面更是一個 SPA 池

05

九龍的中心點, 四邊全九龍的景致一覽無遺

06

等齊人就開餐了!

08

有個 Grill 爐燒呀燒, 即燒即食, 一邊又在帳篷下吹吹水, 不亦樂乎!

09

朋友好開心請到個好工人, 煮嘢得非常唔錯!

10

大蝦、M5 和牛、鵝肝, 正到冇朋友!

11

12

遇上月圓, 賞月談心一流!

13

還有我同朋友買上去的雪糕蛋糕, yummy!!!

14

很開心的一晚, 期待下一次的靚太廚房!