2010年8月31日星期二

Ready for Shanghai?

八月最後一天, 要開學的朋友仔聽日要加油啊

九月份, 有很多事情忙
要諗寫 thesis 的題目, 很煩.....
要攪一個 training 俾醫院的 staff, 好彩準備得七七八八,
去旅行, 都好彩已 plan 晒行程, 可以安心的倒數!

回想上一次去上海是 2007 年

day2044

那一次是陪波比先生出 trip, 我只逗留了兩日, 但瘋狂的吃了 N 咁多餐.....

day2062

一人一盤龍蝦仔, 想起都太 crazy!!!

day2081

同行朋友的介紹下, 吃了一家高級的本幫菜, 這叫晾衣白肉, 經典啊!

day2120

江石滚肥牛 - 在你面前掉D 牛去一大湯碗滾油入面, 滾熟佢! 真係絕呀!!

day2122

可惜今次得兩個人, 好多呢D 菜色都真係叫唔到呀, 點算呢?

2010年8月30日星期一

緊張兩星期

呢兩星期老細放大假, 我又變了 clinic i/c, 真係好大壓力好緊張......
每天總有D 麻煩的人麻煩的事要去處理, i/c 呢個位真係唔易坐.......
1/10 總算平安地過去了, 還有 9/10,
呢兩星期都唔可以準時走煮飯了~
還好, 波比先生今晚去踢波, 我可以慢慢行街市買定未來日子的餸菜

人開始大, 真的要注重健康,
身邊的朋友, 有時都忽然間話我聽因為無啦啦做了 body check, 竟然發現了很多 asymptomatic 的健康問題,
但如果唔去處理, 再老D 真係好容易有好多後果嚴重的病出現,
我可以做的, 起碼是令自己和波比先生吃得健康點, 這也是一個老婆應有的責任,
每日見到我的病人被疾病折磨, 我唔希望自己成了造就呢D 病的幫凶

現在即使食公仔麵, 都淥返幾條菜,
每個星期的菜單, 都諗過計過有不同的營養,
雖然暫時都未見到成效, 不過希望慢慢波比先生的身體還會更加健康, 任何讀數都在正常範圍啦!

這陣子, 醫院很多 Flu A 的病人, 出街都係要小心D!

2010年8月29日星期日

簡單的快樂

iPhone 真的令人很瘋狂, 之前我的 iPhone 3G 沒有 JB,
因為我都真係用來查字典、睇 PDF同上網o者, 唔想攪咁多嘢 (而且 JB 好似好複雜),
換了 iPhone 4 之後, 又見到波比先生 JB 完好似好正咁, 所以我都 JB 了!
嘩~~ 真係好正啊! 玩了一整日呢!
本身我已買了一個 Medical Dictionary, 而家又有好多 medical reference, 返工好有用呢!

要返返學的 weekend , 覺得好短,
今日休息在家 hea, 同埋同波比先生去咗睇<<劇場版-蠟筆小新-超時空我的新娘>>,
哈哈哈, 好無聊好抵死又好攪笑囉! 好睇過上年的<< 蠟筆小新-熱海大作戰>> 添!
開懷大笑了一輪, 我覺得我哋係一對好無聊又好快樂的小夫妻~

睇完戲, 周圍食飯都好迫人, 見有位就入了何明記, 都好似好耐冇嚟過喇!
嚟親通常都係食早餐, 其實佢係由自家製金絲麵起家,
叫了一碗雲吞麵, 麵真的很彈牙, 有些蝦籽添~
雲吞都好有水準, 塊皮好滑滑, 入面的蝦同豬肉比例剛剛好, 鮮味, 好食!

082901

2010年8月28日星期六

黑仔開學日

Master course 又開學了!! 開學日, 很黑仔.....
由元朗大馬路準備去西鐵站時, 忽然間行雷閃電落狗 ssssssssssssssssssss
有遮都半身濕晒...... 橫風橫雨企喺輕鐵站, 淋住雨等了五分鐘先有輕鐵.....

上到車, 件衫係可以扭得出水囉!
去到新元中, 無奈要即刻去買套衫換先返學, 攪到返學遲到 >.<
好彩開學第一堂, 只是交代了些 general 的事情~

今個 sem 上 Epidemiology 同埋 Statistics,
不得不讚讚這家醫學院的教職員真係好有料同教得好好 (只是行政有點混亂!), 聽起來很明白,
想到 undergrad 時堂 Stat 真係聽完都唔知聽咗乜, 真係好無奈!

今日我都出咗 iPhone 4 喇, 之前都猶豫了一輪換唔換,
但我部 3G 因為冇 upgrade 到 OS 4.0, 攪到愈來愈多 App 裝唔到,
所以, 長遠如果我繼續用 iPhone , 點都係要換機....
明明月頭波比先生出機時問過, 3G 仲可以 trade-in 到 $1790,
點知今日竟然得返 $1490, 唔係嘩.............
都冇辦法啦, 都係要 trade

轉了 iPhone 4, 真係好爽, 好快, 個 Mon 又靚!
波比先生仲貪玩同我一個喺廳, 一個喺房咁玩 Facetime, 真係啞咗!

2010年8月27日星期五

友好小聚

竟然忽然間約起, 忽然間又約得齊人, 幾個同學出來食飯,
是 iSquare 的 Panash, 食物唔錯, 環境好,
坐了足足 3.5hr 不停的吹水 (查實也有點唔好意思, 不過我哋都叫咗好多嘢食),
乜都講一大輪, 太 relax 了!

082701

082702

這個珍寶 Oreo 雪糕甜品真係好勁, 同杯凍奶茶一齊你就知有幾壯觀! 4 個人 share 才啱啱好!

082706

A Nice Dinner!

2010年8月26日星期四

師奶小記

平靜了兩天, 覺得香港人從未如此齊心過, 亦感覺到香港人的人情味,
香港, 還未算是一個各家自掃門前雪的地方,
我們生活在這裡, 至少有安定的社會, 安全的家, 廉潔的政府, 合理的社會規範,
要有感恩的心, 要懂珍惜我們有的~

去百佳購物滿 $88 + $19.9 就可以換到一款麥兜產品了,
換了個飯盒, 太開心, 今日用來帶飯, 是幸福的感覺!

082705

呢幾日煮了些家常小菜, 呢個麵豉醬茄子炆雞, 易整又健康~

082401

還有第一次在這個家蒸鯇魚, 以前在老家常常整,
但因為波比先生怕食魚, 我有六年冇整過呢個餸喇~
還好, 蒸的話唔會攪到成個廚房都好腥, 蒸完味道都 ok (查實都冇 skill 可言),
起碼波比肯食, 即係我以後都可以不時整吓, 幾健康好過食太多紅肉啦~

2010年8月24日星期二

黑色星期一

昨晚是香港人的黑色星期一,
點解可以有D 咁恐怖的事情發生.....?

睇到菲律賓警方落後的設備同埋冇步處的行動, 真係人神共忿!
今早再睇埋報紙, 原來昨午有兩次機會個槍手企晒出嚟都冇人去制服佢,
係D 警察見佢有槍所以怕死唔敢行動?
定係低估了他的危險性, 搵香港人的命去博, 純粹覺得佢唔會真係殺人,所以冇所行動?
遇難者, 真係好無辜.... 請安息

最令我覺得震撼的, 是當電視重播下午的片段, 團友無助的坐在窗前,
望著等著那無能的警方去救, 當時人還是生的,
到了夜晚, 槍手一輪掃射後, 窗簾微微打開, 已見到兩個再沒有動靜的團友..........好痛心......

生還的人, 喪親的人, 我們要祝福他們勇敢生活, 為他們祈禱~

2010年8月23日星期一

人靠衣裝

返工放工, 我都唔洗見咩人,
我又唔係 OL, 唔洗打扮返 office 鬥靚,
返到醫院, 更加有制服著, 所以平時真係會踢拖短褲返工

不過有時返工放工都會見到院內其他的同事,
有時搭車又會見到D 病人, 即刻要彈開D (你睇我唔到),
以免人哋覺得我好街坊好唔 Pro (話晒平時都係著晒白袍扮到好專業的嘛!)
所以, 我覺得喺嗰區工作, 千祈唔好喺嗰區住,
一陣俾病人撞到我買餸督魚旦喺街邊食雞旦仔就唔好啦......

醫生一樣好靠衣裝, 著得唔夠斯文, 真係會令人覺得好唔 Pro,
醫院內就係有個 Houseman , 人人都著晒恤衫西褲時, 佢竟然著運動褲 (仲要好舊的), T-shirt,
個頭又唔梳又唔剪 (好似日日都埋頭苦讀 look), 見到佢, 真係好啞...... 真係叫唔到一聲「醫生...」

反而女醫生, 通常都著得好靚, 高跟鞋小背心都有,
最抵死有個文員同個醫生講笑的話:「我唔該你唔好烏低身寫排板啦, 成日迫人睇埋晒D 唔想睇嘅嘢」
醫生:「咩o者, 邊個叫妳睇o者?」
文員:「妳估我好想睇呀, 我知妳事業線好深喇, 睇完真係要洗眼呀」
哈, 有時D 同事講笑真係好抵死的~

2010年8月22日星期日

Computer Expo 2010

又到了一年一度的電腦展, 繼上年一人買了一個 server 返屋企,
今年波比先生加大學同學又再度出擊掃貨!

一早十點就去到, 行得好舒服, 完全唔迫,
好似人流真係少咗好多, 但真係一年比一年冇嘢睇......
電腦展已經成為只係商舖促銷的地方, 但價錢其實無比街舖平, 很多只係扮減價....
已經冇晒當年D 龍頭大牌子, 一人一個大 booth 展示最新產品的盛況,
甚至有兩個頭位大 booth 都租唔出

最後我們都每個 family 買了一個家庭影院小設備, 哈!

082201

較特別的, 係見到連 notebook 都有得 3D 囉, 洗唔洗呀.........
仲有好多 3D 電視!

082202

之後去了雀局 gathering, 我的雀友真係太癲了, 成日食十三么 (雖然我都食到一鋪!), 好驚啊!

夜晚叫了外賣, 竟然連印度咖哩都有得外賣, 仲要好好食添, 讚!!

2010年8月21日星期六

龍蝦杯麵餐

最後一個暑假星期六, 先去了睇早場 3D 貓狗鬥多番,
都 ok 又緊張的, 但未算好好睇~

之後是 shopping 星期六, 為家中的食物日用品補給一下,
近來一直都心思思想買個烤肉爐仔, 即係可以放在餐桌上那種, 在家扮盛八燒肉!
但那種爐, 一是太大部太花地方去安置, 一是太小應該唔夠火力,
於是靈機一觸 - 何不買個 IC 電磁爐適用的平底鑊仔, 在家好似打邊爐的燒肉肉!

今日去千色店買咗個美亞的, 百幾蚊抵玩呀!! 不過要到星期一先有得試, 呢兩日太多活動~

又自煮午餐, 來個芝士蒜蓉焗龍蝦,  哈, 每人得半隻唔多夠喉!

082101

繼續清杯麵, 去日本一定要買呢D 寫住咩 「濃厚」、「豚脂」的,
否則不夠湯底不夠濃, 吃回香港出前一丁好了~

082102

2010年8月20日星期五

Family dinner again

今晚吃家庭飯, 為波比妹妹慶祝生日,
買禮物俾波比妹妹之餘, 自己也買了一對好鍾意的耳環,
之前睇中了, 但今天有減價才捨得買啊~

082001

席間談到一個親戚, 阿姨丈那邊的親戚總是很有趣,
我們不明白時下的年青人想什麼, 有的工作沒大志, 有的揮霍無度,
可能因為不需要養家的關係, 很多年青人, 就成了渾渾噩噩過日子的一群,
已經吃和住父母提供的, 但仍連自己也養活不到,
如果我有小朋友的話, 我很同意一個 blogger 所講, 絕不要對他說:「你放心, 我唔洗你養」之類的說話,
這句說話, 相信後患無窮!

2010年8月19日星期四

小朋友菜

今晚 Him Him 來我家到訪, 出名食嘢奄尖的他, 要諗煮咩俾佢食都幾傷腦筋,
最後煮了薯仔肉丸、蝦滑菜芯苗、鹵水雞脾豆腐,
全部都係林的, 唔洗點咬的餸菜, 至啱呢個小朋友~

食一餐飯都叫幾次先返嚟, 同一個小朋友食飯真係唔容易!

前兩日整了北海道 3.6 牛乳布甸, 上次整得太結實了, 今次整得啱啱好!
好滑滑, 入口好濃的奶香味, 哪管他是否脂肪超標, 食少少都叫人滿足!
超級市賣 $20 一小樽, 實在太呃錢了!

081901

2010年8月18日星期三

尋寶

今日第三次見了個淋巴癌的伯伯, 上一次同今次, 都睇住佢咳咗好多血痰出嚟.....
D 痰係大舊到....... total 可以裝滿一個小飯碗,
我不停叫他咳, 手執紙巾從他口中拉出濃濃的血痰, 一路拉一路拉都未見盡頭,
好似魔術師從帽子不停拉出絲巾一樣.......
過程中, 他又會吐出幾塊唔知喺邊度走出來的大血塊, 實在, 很恐怖.............
全身不同的地方都相繼出血, 癌症真的很折磨人.........

又有一個女士, 本來割了個腦瘤好成功, 眼見她就快出院, 點知忽然間又急轉直下....
後來才發現原來腦瘤又暗地裡擴散了,
而家安排去一間寧養醫院, 即是一些末期癌症病人去的最後一站, 實在變化得太快......
還望她的家人不要太傷心~

今晚波比先生又去踢波, 又一個人食咩好?
哈, 幫手清清屋企的即食麵同杯麵啦, 上次去日本買的, 都仲淨返 6 個呀!!!
煮了個烏冬聽日帶飯, 煩惱緊落咩汁之際, 在廚櫃尋寶時, 發現了呢一樽上年七月去台灣買的炸醬呀!
好彩未過期, 如獲至寶! 因為撈少少落任何食物, 都會變得辣辣地又好惹味!
去開台灣的話, 維力的調味料不可不買, 唔知而家香港有冇得賣呢??

081801

2010年8月17日星期二

瞓過龍

今個月, discharge 了很多夠期的 Pedi Cases,
我九月的時間表才可以剩餘幾個窿窿, 俾未來半個月要睇的 cases 覆診
少了一個人手, 實在一路都忙得要命,
可以話係得閒史唔得閒病, 老細同同事都病了, 好病還要死撐的返工

呢兩日更加是冧檔, 發咩神經每日幾十個 case referral!!!
放工搭車返屋企, 好攰, 第一次瞓到唔知醒落車, 搭了去總站 =.=!
本來一個人諗住買麥當當, 點知去了個荒蕪的地方, 冇車搭要行返屋企......
唯有自己煮!

雪櫃內冇太多食物的選擇, 就整咗包三文魚骨佢!
學 Ashley 話齋, 原來真係好油, 應該再煎脆 D 會好食D!
簡單的鹽和香草作調味, 已經好足夠~
不過食時要拎住成條骨嚟咬咬咬, 好攪笑, 只適合在家可以毫無儀態地大吃才夠爽!

081701

2010年8月16日星期一

遇見人的工作

我的工作, 每日都要見到好多唔同嘅人, 真係一D 都唔會悶,
接觸好多唔同嘅人, 每一日自己都在學做人處事, 每一日遇上這些人, 又有很多烏龍事...

今日一個病人, 見完了, 我說:「而家情況好好喎, 唔洗再返嚟睇我喇」
「唔該晒呀」
「唔洗客氣, 應該的」
「我可唔可以同你握吓手,多謝妳呀?」
(唔識反應! 點解咁大陣象要握手咁嚴重嘅?!) 「呀...好呀」
(握手中)「真係好多謝晒妳」
「你保重喇, 醫生開D 阿士匹靈要準時食啊, 最緊要唔好有下次(中風)」
「係呀係呀, 好啦, 有機會再見」
「吓, 唔好喇掛, 你見得我即係冇好嘢, 唔好再見喇」(笑)
「哈, 唔嚟呢度見妳啦, 喺出面撞到就好了」
「係呀, bye bye」

走近一個阿伯, 蹲下來與他說話,
阿伯大叫一聲:「小心呀」
「吓, 咩事?!?!」
「妳差D 整跌我個尿壺呀」
轉頭一看, 實在太驚險了, 盲鍾鍾的我差一丁點就把一個滿滿的尿壺傾倒在自己的褲子上 =.=!
好彩, 這個阿伯還懂醒目地大叫一聲!

又見了一個小朋友症, 第二次見, 爸爸告訴我, 原來一早已經和大陸人媽媽離婚,
爸爸很不滿, 說媽媽死都要霸住小朋友的撫養權, 因為一來綜援可以批多D,
二來爸爸要付的贍養費又要多D,
但最令爸爸不滿的, 是這個女人拿了兩家錢還不夠, 自己又外出秘撈, 掉低小朋友唔理,
小朋友發高燒都冇人理, 只靠一個又是來港生 BB 的大陸人阿姨睇住,
說自己要工作, 就唔帶小朋友嚟上堂, 爸爸覺得媽媽很不負責任, 但投訴無門...
爸爸付了錢, 但自己心愛的女兒竟得不到應有的照顧, 我明白爸爸會是多麼難受,
問到小朋友最鍾意邊個, 小朋友不加思索就答「爸爸」,
可見爸爸講的, 不是謊話~
這些貪得無厭的大陸人, 實在討厭!

2010年8月15日星期日

煲劇

一連兩日, 煲晒套<<下一站 幸福>> 喇!
這套台劇的橋段老土到爆, 絕症, 失憶, 富家子窮家女.......
但是老土, 又很愛看, 後期的每一集也覺得很催淚,
想發洩一下淚水的話, 是一個很好的選擇~

很多對白, 只可用國語才講得出口, 用廣東話的話實在骨痺得太難接受,
也就因此, 台劇可以好浪漫好成功~

下午在尖沙咀, 偶遇了捷榮的 Coffee Concept

081502

有很多種類的咖啡豆啊!

081501

點了 tea set 和咖啡, 悠閒的 hea, 就是星期天!
081503

2010年8月14日星期六

日式刺身大食會

嘻嘻, 因為仲放緊暑假唔洗返 Master course 住, 所以可以參加肥仔家的打牌 gathering!
原來放多一個星期咋, 26/8 我已經開學了~~

咁難得又 gathering, 一於食豪佢, 我哋就去咗尋日講嗰間凍肉店大掃貨!!!
去到肥仔家, 再叫多幾個外賣飯, 有D 白飯送吓刺身~

081405

睇上圖就知道 D 珍寶帶子刺身係有幾大隻啦! 一見到咁大隻, 唔洗諗即刻買咗!
個個都讚好肉厚, 好鮮甜呀~~ 太滿足喇, 喺香港真係未食過咁大又有厚的帶子,
板長的有咁大, 但薄一半呢~ 而家食兩隻都已經飽了一半!

081403

第二超讚的就係呢板海膽, 老細有另一款, 雖然話就話係馬糞海膽, 但好老實講到明係大陸養殖, 而且細好多!
呢款係加拿大的, 無論在香港在日本, 我們都未食過原片咁長咁大片的~
味道, 當然是讚啦~

081401

呢D 係用來整壽司嗰 D 玻璃蝦, 好爽脆, 一口一隻, 回味無窮!
一 pack 真係太多了, 多到食唔晒咁濟~

081402

翡翠螺其實我唔係好有興趣 (始終覺得螺類的質地好似橡膠!), 但都食了一隻咁多
波比先生話呢批算係好大隻 (起碼比以前佢食過的大), 而且鮮甜, 飯後佢不停話好食喎,
哈, 我覺得都 ok, 還未太懂得欣賞~

081404

開頭買呢D 刺身都有D 膽心o架, 因為始終未自己試過就買俾朋友食,
一陣唔好食或者食到大家肚痛就真係大鑊....... (本來想買埋生蠔添, 但真係太危險了)
不過好好彩, 大家都滿意, 下次還要 encore, 真開心~

2010年8月13日星期五

超開心之日式自煮大餐

woo~~ 一個星期又完結, 星期五通常都係無飯日, 波比先生打電話來問我出唔出街食, 我話:「唔得呀, 我已經 plan 好晒煮咩喇喎」
係呀, 而家一個星期之開始已 plan 好晒呢個星期每日食咩餸, 唔洗每日諗一次咁大壓力!
波比先生只好無奈又冇癮地收線,
其實, 呢個時候我已經有特別計劃 A!

登登登鄧!!!! 呢 pack 三文魚刺身係咪正到爆呢?!!!!
我哋屋企對面的工業大廈新開了一間日本食物批發店, 有超多刺身、牛扒、生蠔、炸物賣,
你講得出的都有咁濟, 今日放工就上咗去 shopping!
至衰佢唔收卡囉, 唔係肯定大出血! 不過我都決定咗聽日會再上去掃貨!

咁大 pack 又厚切, 都係 $108 / 磅咋, 食得太開心了!
(每次很想食三文魚, 但見到百佳的超薄切時, 真係咩 mood 都冇晒!)

081303

另外煮了燒鯖魚, 因為上星期同朋友食過一次, 超好味, 於是早幾日見到就買咗
幾好喎, 唔腥, 冇乜骨, 上下都好脆, 可以令都唔食魚的波比先生都食晒一大舊, 都算係咁!

D 串燒牛舌又係今日買的, $38/ 5 串, 絕對抵過出去食, 起碼都要 $2x / 兩串
最好係自己整, 可以燒/煎到好脆, 真係好好味, 仲有加D 日式燒肉汁, 真係絕配
出面食唔到, 通常都好求其整熟咗就算~

呢兩味餸冇乜 skill , 又快, 啱晒趕時間的c9 仔!

081301

還有一早安排了今日要食的日式冷麵, 其實那冷麵汁才是主角,
有咗佢乜都好食, 港女都變大廚呃得吓人, 哈哈哈!!

081302

有興趣睇睇間日本食物批發店的價目表的朋友可聯絡我,
元朗滿$300 免費送貨, 屯門/上水滿 $500免費送貨

今日買完嘢, 老細仲送咗包三文魚骨俾我, 唔好以為真係得D 骨唔知做咩,
其實係連埋唔少肉o架, 我見人哋通常用嚟焗, 都話好好味, 下次整完一定 post 上嚟!

2010年8月12日星期四

攰...

有同事放假, 今日真係好似打仗咁好多嘢做,
還有要應付無理取鬧的病人, 更有無理取鬧的醫生, 真係 EQ 低D都唔掂...

中午時候, 飲了一杯紅豆冰, 暫時忘記卡路理去放肆一下!

今晚第二次煮意大利飯, 咁熱天氣, 對住個爐煮 20 分鐘呢個飯, 真係滴晒汗......

081201

還有燒豬頸肉, 不過嫌燒得未夠脆, 因為同一批焗埋多春魚, 所以唔可以焗太耐囉~
下次要再焗耐D 先! 焗肉真係幾好o架, 原汁原味, 又唔油~

081202

明天的飯盒, 相信是明天又打仗的最好安慰獎~

081203

2010年8月11日星期三

回味。回憶

買到楊千嬅演唱會飛了,好開心,10月9日,有冇朋友都會呢日去呢?

我知道她唱咗咁多年都係走音,但偏偏唱片公司分配給她的歌,往往都係旋律優美,
林夕的詞,又往往講中晒你心中所想,
一些歌,一聽就會自然的勾起了過去的回憶,
所以這次演唱會,覺得不可不去

今晚真係不宜出旺角,因為一個人攪到成個旺角的交通癱瘓晒。。。

一名男子傍晚五時許,站在旺角亞皆老街近通菜街一幢大廈外牆的棚架,情緒激動,消防到場張開氣墊戒備,現場往大角咀方向的亞皆老街一度全封,到晚上九時後,警方重開一條快線,疏導交通。


受事件影響,旺角附近多條道路交通擠塞,包括亞皆老街、窩打老道、長沙灣道及馬頭圍道出現車龍,運旺角、九龍城、九龍塘一帶交通擠塞,部分巴士線要改道,運輸署呼籲市民乘坐港鐵,駕車人士改行其他道路。

我就係塞咗足足半個鐘,都過唔到一個地鐵站,
如果想跳,都可唔可以為己為人唔好喺旺角跳呢?
仲要由5點開始,我哋食完飯8點幾經過佢都係喺度爬緊棚架,
好多市民圍觀同拍照留念,仲有不少人鼓勵佢快D跳落嚟,相信係免得全旺角大塞車。。。
.
今晚忽然間想起了一間好多年冇幫襯的餐廳,就係新森林焗之專門店,
原來,有成六七年冇去過了,
那是我讀 U 做 part-time 時,經常幫襯的飯堂呀~

而家裝修靚咗,食物款式又多咗好多呀~
叫了軟殼蟹拼石斑鴛鴦焗飯,還有牛魔王鴛鴦焗飯,滿滿的醬汁,太開心~
仲有好多嘢想試,下次再 encore!
081101

2010年8月10日星期二

生活。保障

今日放工,竟然撞到好好人的醫務社工姑娘,和她傾了一個車程

話題離不開我們的病人,亦講到綜援問題,
有些好有骨氣的公公婆婆,生活拮据都唔肯拎綜援,即使好多病痛都唔攞,
社工話有時佢哋係要求呢D老人家攞綜援,佢哋都唔肯攞。。。
社工用了一個詞去形容佢哋,我十分認同,就係「好有尊嚴」

但係,社會上又有太多有手有腳的人,游手好閒攞綜援,簡直係社會的垃圾,
社工話呢D人,有D連用一粒棉花都 claim 到盡,佢都話太過。。。

另一個好悲哀的現象,就係呢班攞綜援的人,原來真係生活無憂之外,連病都好待遇過你同我,
第一,睇任何政府醫院所有科所有藥都唔洗錢,
第二,講到有D患癌的個案,社工話原來綜援的人任醫都唔洗俾錢,一用可以用二三十萬的藥都得,
相反普通市民,原來有好多藥都唔 cover, 一個 touch wood 你患了 cancer 又冇買保險,
要用二三十萬去醫,你醫唔醫?醫到山窮水盡?定等死?等奇蹟?

原來最好的保險,係唔洗自己買,
政府就嚟迫人用每月的薪水去買醫療保險,但綜援人唔洗俾錢買,已經有永久免費醫療,
太唔明白,點解我哋要自己買?努力的儲錢退休,生活究竟會比綜援人好得幾多?
我們有的,是尊嚴,但不是安享晚年的福利。

嗯。。。。。。

今晚煮了很多肉,
柱侯醬+魚露煮牛肉芽菜,幾香幾醒胃
蝦醬蒸肉餅,今次夠多蝦醬,夠味喇,啱晒送飯

081001

2010年8月9日星期一

吉之島買好餸

愛行屯門市廣場的吉之島超級市場同埋百佳 SuperStore,
太多美味的食材!

昨天買了鰻魚, 雖然比我喺元朗買的貴, 但真係嫩滑D,
今日就整了鰻魚蛋, 三隻蛋中抽掉了一個蛋黃, 冇咁高膽固醇健康D 呀!

080901

還有買了一舊手打墨魚滑, 加粉絲、翠玉瓜一齊煮, 落少少黑椒, yummy!!

080902

見到 Youtube 度有日本仔煮飯仔, 真係好勁呀!!! 勁鍾意佢炸蝦嗰一 part 囉!
有成個系列, 整 pizza 整蛋糕都有! 仲要超似囉~

2010年8月8日星期日

上海- 頭痕....

呢排趁 weekend 有時間, 就開始好好 finalize 一下上海九州之旅的行程,
話說去布吉嗰次, 明明好似已經好 well planned, 點知......
去到先發現呢樣冇帶, 嗰樣又冇帶...... 最大鑊係行程都唔記得print 出嚟, 真係唔知黐咗邊條線....
好彩喺機場已經發現, 又好彩有一個 soft copy 喺 gmail 度, 拿拿聲 download 返落 iPhone,
如果唔係, 我呢個 trip 都唔知點算.....

喺九州嗰四日, 我已經所有嘢都 plan 好晒了!
喺上海嗰兩日, 我命令波比先生攪掂佢, 成日催佢好快D 諗喇, 佢都係話:「仲有成個月, 放心」
我就話:「你估你最後唔係好似第一次去東京咁, 上網求其 copy 人哋D 行程交功課就算!?」

最頭痕真係去世博嗰 part, 幾廿個入口, 幾十個館,
又唔知邊個好睇, 又唔知點預約, 又要研究去邊度有嘢食....
睇到人哋的遊記都覺得好煩, 好複雜, 睇完都唔明......
見到人哋又熱又迫又要排隊, 呢個 trip 真係唔洗旨意帶部 DSLR 去!
睇嚟都係要我出馬, 唔可以靠那個馬虎的波比先生,
否則我驚我去到得「熱」同「等」兩個字, 會發癲同黑面!

今日去了屯門飲茶, 呢個海鮮沙律卷唔錯,
睇個名都估唔到原來佢用越式春卷皮喎, 仲有紫菜喺入面, 呢個配搭又幾 match 幾得意!

080801

仲有呢間酒樓我必點的桂花紅豆糕, 好想自己做桂花糕, 但要買到桂花先得, 唔知元朗有冇呢?

080802

2010年8月7日星期六

白蘋果

嘩, 明明話 iPhone 4 未有白色, 點解.........

080701

哈哈, 只係幫波比先生的 iPhone 換上了一個白色的機殼,
CyberCity 有售, $40 only, 抵玩呀! 真係幾迫真喎!

唉, 不過 iPhone 4 影相真係有D 唔掂, 係就係 500萬像又有得教對焦點,
但單單係白平衡衰咗已經完全唔得......
在白光下影相都仲 ok, 在有黃燈的室內的地方, 即使是微暖黃的燈光, 都攪成咁.....

080602

好努力執過 WB, 都至多變返係咁.....

080603

去到肥仔家影的, 簡直是慘不忍睹..... 成張相唔只黃, 係紅添,
呢張已經係執到盡的 version, 都係變得奇奇怪怪的顏色..... 有點令人失望........
或者唯有安慰自己: 另一種 color tone, 有另一種味道咁囉
080604

2010年8月6日星期五

你 iPhone 4 咗未?

是 Android Fans 的波比先生, 先前被我游說了換 iPhone 4,
剛好合約下個月到期, 而 one2free 的服務愈來愈差!!
所以決定了轉去 SMV 加埋訂 iPhone 4

上星期波比有同事在第一日已出了機, 聽波比先生的形容, 不停是靚同快~
今日終於佢都有機攞了! 放工飛過返元朗取機, SMV 一路愈來愈多人, 愈來愈多人放工前來取機~
後來的人要等得耐, 遇上一名周身掛上名牌的港女, 等嗰一陣就鬼死咁唔耐煩,
不停嘈嘈哄, 阿姐, 人人都係出機o者, 人人都係咁排隊,
妳又出 iPhone, 我又係出 iPhone, 妳好巴閉一定要做咗你先嗎?! 唔等得就聽日先嚟啦~
今日肥仔朋友等了 45 分鐘先取機都係咁啦~ 真係好頂唔順呢D 冇禮貌懶巴閉的香港人~

上年我由 one2free 轉去 SMV, 一路都真係好滿意D 服務,
今日負責幫波比先生出機的店員亦都係好好禮貌好 helpful!
因為下個月先約滿, 但係 one2free 又衰格都要收錢先肯幫你換 microSIM,
所以波比先生就寧願俾錢 SMV 賺, 今個月出了一個 SMV 的新 number, 飛線過嚟,
就可以即刻用到 SMV 的服務了!

取了機, 我們又猶豫賣唔賣咗去...... 因為今日收機價都有 $7200,
賣了再上 apple store 買返, 都有 2k 賺,
不過, 最後都沒有賣到 (嘻, 係賣唔出), 個天都注定呢部機要我哋用啦~

部機呢, 真係好快又好靚! 真係好爽~ 冇賣到自用絕對唔會後悔啊!
個 mon 靚到: 就好似係由以前的電視, 忽然間轉睇高清電視咁, 真係靚到無可再靚~

080601

波比太太會唔會轉?? 仍在考慮中, 或者有波比先生的玩吓就好了~

晚上去了朋友仔的荼毒大會, 4個朋友中, 2 個今日都買了 iPad,
波比先生好似魔鬼的不停叫人買 iPhone iPad, 真係敗家呀!

2010年8月5日星期四

麵屋一平安

今晚去了尖沙咀, 想食有名的麵屋一平安,
波比先生中午打去想 book 位, 點知 book 唔到, 打了去尖東的同名店舖, 又有位~

放工去到尖咀, 出了地鐵站冇耐, 就落傾盆大雨!!!!
平時日日都帶住把遮的我, 今日偏偏懶冇帶.......
我們兩人都各自買遮, 否則一定行唔到多過十步,
有遮, 其實都半身濕晒......紅雨......

好不容易, 先去到呢間位於幸福中心的麵屋一平安, 一入去.... 冇人嘅.....
睇 menu, 好少選擇, 除了招牌的拉麵同美麗華嗰間好似一樣, 其他美麗華有的食物, 好多佢都冇...
究竟, 呢間係咪我們本來想去嗰間嘅分店嚟o架???

講返食物, 兩個拉麵都唔錯, 絕對唔係港式日本拉麵,
不過要比較喺日本食的, 還是有點距離啊~ 湯底可以再濃一點就好了!
店內有好多日本人, 仲播埋日文電視, 頓時可以幻想吓自己身在日本~

080501

今日工作, 開始學習去兒科病房, 睇埋 BB 仔症呀! 真係一個好大的 milestone~
不過嚟得睇的, 都係D 好慘好多病的 BB,
BB 有病, 有D 父母就唔要佢.....
最衰格係有D 大陸人嚟香港生, 生完 BB 有問題就唔要佢, 掉低個 BB 喺香港要香港政府養....
其實我真係好唔明, 點解兩個父母都唔係香港人, 俾得起錢就可以喺香港生仔,
享受我們交稅而成的福利?
反而父母都是純正香港人的小朋友, 就偏偏因為呢D 大陸人霸佔了一些福利,
而攪到睇醫生, 做治療都比應該的慢?

這個香港太奇怪~

2010年8月4日星期三

我都今日放榜呀!

出成績喇!!
woo~~~ 應該聽日先出的, 今日手痕去 check 吓, 點知出咗喇!!!
兩科 A, 一科 A- 呀~
全年總計, 有 4 個A , 3個 A-, 總算都滿意啦! :P

希望下學期都 keep 到, 繼續努力!

波比先生買給我的獎勵, 自己加了紅豆蓉, 好美味!

080401

聽日要去食飯慶祝慶祝! (波比先生就最開心啦, 今年我讀書, 帶挈佢食咗好多餐!)

2010年8月3日星期二

粟米魚柳

今晚煮了粟米魚柳同埋鮮牛肉漢堡扒,
今次煮魚時, 破例先炸一炸會好食D, 但真係超唔健康, 睇住半碗油都被魚柳吸乾了,
轉眼就會過戶落我們的肚子........ oh....... 下次都係用返健康無油煮法好了!

080301

2010年8月2日星期一

夏日小涼伴

條街熱到溶的日子, 醫院內反而像雪房,
但病人出出入入, 唔開大D 冷氣, 空氣唔夠流通又唔得~

咁熱的天氣, 要整返D 開胃D 嘅餸菜先!
今次整咗呢個涼伴雞絲海蜇,
好開心終於都俾我買到支日本麻醬, 搵咗好多地方都搵唔到呀!!
加埋少少魚露, 唔洗再落鹽都已經超好味又醒胃!!!

080201

撈完咁大碟, 我諗住聽晚都仲可以食啦,
點知..... 俾嗰個大食的波比先生食晒!!

080202

呢個波比先生, 真係好為食! 佢一見到好味的食物, 就好似金魚咁唔知飽不停食!
成日我都要警告佢:「你飽就唔好夾硬食喎!」
「好味吖嘛」
「肥史你呀!」
「唔驚, 我一陣去跑步」
如是者, 其實每一日波比先生的食量都真係好驚人, 但佢又真係唔再肥返嗰度抵死,
所以我都奈佢唔何, 佢要食我都阻止不來~

還有黑椒牛柳粒, 以前常常把青椒煮得太林, 現在終於識控制火喉,
熟得來又爽爽地 (我不吃生青椒的!)

080203