豬欄生活: 3月 2010

2010年3月31日星期三

溏心蛋

去完日本, 日日都有食那兒的溏心蛋, 真的愛上了!
今晚試試整啦, 點知三隻蛋爆了兩隻 =.=!
不過好彩都做到溏心 effect!! 波比先生超愛啊!

終於都返工了, 冇想像中咁忙, 冇想像中咁亂, 太好了~

波比先生今日偷偷地去買了個聖安娜75 度朱古力蛋糕俾我呀,
話鼓勵我讀書喎, 唉, 肥死了~

2010年3月30日星期二

最後一日假期

今日的起心肝, 落樓下自修室讀書了,
同場還有兩個大概是中七的同學仔, 大家都要努力啊~

考完今次試, Year 1 就仲有一個 Semester 咋,
讀書都真係好嘅, 起碼唔會荒廢咗 D 時間~
如果我冇讀書, 呢一年的星期六我咪又係 hea 過晒一事無成~
要我自己拎 D 書嚟睇? 實在係太崇高的理想了.....

努力努力, 考完試又諗吓帶你去邊度旅行!

呢兩日喺屋企煮飯, 尋日煲咗波比先生喺日本時忽然間話想食的豬骨粥,
用真空煲嚟煲真係好綿呀!!

今晚整咗咸魚煎肉餅, 好多年前喺灣仔的一間茶餐廳食過, 超好味!
今日終於有機會整了, 咸香加脆脆的外層, yummy!!!!
還有韓式帆立貝粉絲, 辣辣地好開胃o架! 聽日帶大盒D 飯先~

2010年3月29日星期一

好彩今次一請請多幾日大假, 唔洗一返到嚟就返工,
而家個人仲超 holiday mood!!!! 完全覺得自己好似已經唔洗做咁!!!

其實我下星期六已經要考試, 之前有 7 日假期可以溫書嘅,
所以俾自己 hea 埋今日啦....... 聽日好開始讀喇..........
下下星期嗰科真係好好好甘囉, 兩個 file 的 notes.......... dying..........

呢幾日可以抖抖都算唔錯, 星期六睇了 Eason concert,
佢冇傳聞中咁沙聲喎, 不過好同意有朋友仔講, 唱慢歌時真係悶到我瞓著咁滯......
係去到快歌先醒神D!

好鍾意佢個電筒仔, 熄晒燈全場都一閃一閃, 好靚!

星期日就同兩家人食飯,
今日就打遊記, 好耐冇打咁多字嘅遊記喇, 真係要放假先咁好閒情逸緻~

今日又喺度做D 好放肆嘅嘢, 因為波比先生一句說話, 可能今年我哋又去多次日本,
不過詳細等我考完試再講啦, 專心呀, 心散怪!

Universal Studios Japan

星期四, 係去Universal Studios 的日子,
但知道又是下雨天, 很掃興....... 而且又擔心機動遊戲會好激, 差點點想打退堂鼓唔去......

一早我們便出發了, 搭阪神電鐵, 點知落錯站.... 好彩唔係嘥好多時間,
去到只是 8:45am, 門外已經有好多好多好多人排隊喇!

我哋排到 9:20am 先入到場, 即刻衝去玩 Spiderman 先!

之前玩過東京 Disneyland 同 Disney Sea, 比較埋 USJ, USJ 的遊戲真係較小兒科,

用好多 3D 嘢, 但唔係好大衝力/離心力的遊戲, 唉~ 啱我玩呀!!!
落雨可能冇咁多人, 大部分遊戲排半個鐘就玩到, 一日可以玩晒所有 game
( 除咗Hollywood Dream 冇玩, 係幾層樓高的過山車, 勁恐怖了!!!!! 我同事啱啱玩完話驚到喊!)

3月19日剛新開了個叫 Space Fantasy 的遊戲, 超好玩, 係咁多個 game 之中最刺激的, 其實就似 Dinseyland 的 Space Mountain, 加埋張椅會360 度轉!! 最多人玩!

玩之前佢會同你影一張相, 玩完你出到去就已經見到張相嘅 printout 加埋相架,
好似好靚咁...... 呢招真係奸呀....... 當你見到個製成品, 就會好想買......
於是俾了 1200 yen, 買了呢張 Mission completed certificate 啦~ 放喺屋企都幾靚嘅!

Show 方面就睇咗 Water world 爆破特技同埋史力加 4D show,
個 4D show 連櫈都會郁的, 好過 Disneyland 求其噴吓水就話 4D!
落雨所以冇咗 Peter Pan 個 show, 可惜......

食方面: 去了朱羅紀餐廳食 lunch, 一般啦, D 食物全部都凍嘅......

最好味反而係小食檔的火雞脾, 見到D 日本妹一人一隻係咁齒,

攪到波比先生好緊張咁衝去買, 又熱又啖啖肉, 正! 必試!

玩到夜晚, 好凍.... 飲品機的熱飲全部賣晒, 好誇張!

預早了 20 分鐘去霸返個靚位睇巡遊,
um..... 淨係得D 燈膽車行過....... 少了迪迪尼那份歡樂的感覺~

離開了, 有幸見到又搭到卡通列車!

回到難波, 波比指定要去食一蘭拉麵!
那裡的拉麵是自家製的, 充滿蛋香, 好正! 波比先生仲忍唔住食完要再替玉 (加麵) 添!

返到酒店, 嘆埋尋日喺黑門市場買的大大粒士多啤梨!

仲有喺神戶買的布丁 (不過發現原來我哋樓下都有呢間嘢的分店, O 咀...)

即食麵博物館

星期三, 我們去了即食麵博物館, 身為即食麵 Fans , 這個行程早已令人期待!

我們又搭了阪急電鐵, 去到池田站, 嗯, 又是下雨天.....
愛閒日的日子去旅行, 唔會度度都聽到廣東話, 唔會度度都好迫人, 可以慢行、細看~

街道兩旁的日式的小屋和庭園, 好靚~

去到即食麵博物館, 遇上了一團香港旅行團, 嘩, 好嘈.......
有D 香港人顧住自己影相, 真係幾失儀又唔理其他人的.......

我們俾咗 300 yen 自製杯麵, 太好玩了! 亦是好好的紀念品~
先係買個空杯, 然後喺杯面可以自由畫公仔, 跟住加入自選的湯底、配料和麵,

最後封口、包膠、入氣袋, 完成!

本來想即時買個杯麵食, 點知供人食杯麵的 area 封了為展覽場地, ayia.... 仲留晒肚添....
唔緊要, 我哋搭車返梅田先食啦!
臨走最緊要買個 1500 yen 的杯麵福袋, 入面有10 個限定版的杯麵, 抵呀!!

我們去到阪急三番街的 B1 層, 成層都係食店, 行了一圈, 決定去食咖哩飯,
因為嚟咗幾次日本, 都未食過地道的咖哩飯呢~

這家咖哩飯其實都幾辣! 但亦香甜好味~
炸豬扒雖然冇和幸咁出色, 但亦鬆脆而唔油膩~

呢個係限定的廣島炸蠔, woo, 新鮮的蠔果然好味過我屋企買的急凍蠔, 唔會有雪和腥味,
雖然唔大隻, 但都好滿意喇!
爬吓爬吓, 竟然成碟飯俾我食晒......

之後行咗幾間百貨公司同埋阪急三番街,
見到好大間 Kiddyland, 買了隻上次喺東京已經見過好鍾意的河豬公仔!

行到阪神百貨時, 噢, 不得了, 有好美味的燒帶子, 還有超巨型的燒帝王蟹賣,
價錢都好貴吓, 波比先生不好意思的開口問慳家老婆准唔准佢買,
唉, 難得去旅行, 俾你豪吓啦, 費是你返到香港埋怨我唔俾你食~
況且呢幾日洗錢已經洗到有點失控的地步, 見到D 價錢已經開始唔諗轉返到港紙即係幾錢~

因為已經拎住太多嘢, 所以要即刻返酒店, 好多梅田的商店都冇行了~
返到酒店即刻試試那帝王蟹啦, 嘩, 好好好得!!!
因為太大隻, 真係啖啖肉, 鮮甜, 不停滴D 蟹汁出嚟, 好過食松葉蟹好多呢~~

攤抖一陣, 我們又出發了, 穿過地下街, 行到去黑門市場,
那是一個日本街市, 有好多海產同水果賣, 價格相宜~

格完價後, 我們買了 1000 yen 的海膽, 好 creamy!!!

仲有 790 的 Toro!!!! 嘩, 那魚油浸滿口腔的感覺, 實在回味!!!

行完黑門市場, 順道行行電電城, 有好多漫畫店、CD店, 還有..... AV 店......
下一站是 Namba City 和大葉高島屋, 行了好靚的家品店, 真係乜都想買晒返香港!

兜了一大個圈, 我諗我哋行了 5 公里的路, 回酒店前不忘去地下街買個鰻魚飯,
又係第一次喺日本食鰻魚飯咋, 烤鰻魚還有少少香脆的外皮, 肉質唔似香港食到的霉,
覺得唔錯啊~

又係行咗好多路的一日, 攰死..... 天氣又凍,
雖然還可以外出走走, 但我們還是選擇了在酒店大覺瞓, 因為聽日要好早起身去環球影城!

豪食之開始

12:30 pm 行完動物園, 趕緊去三宮站吃神戶牛午餐, 免得又錯過營業時間!

我們去了一家好多網友推介的店, 有唔同價錢的 lunch set,
慳家老婆只選了最平的 set 試試, 敗家老公就選了最貴的 set , 仲話嚟到梗係食最好的......

落 order 後不久, 師傅就捧出食材介紹, 問我哋要幾多成熟,
之後就以純熟的手法, 在我們面前烹煮神戶牛了!

話咁快就整好, 我唔客氣了!
嘩, 今次比上一年在東京吉祥寺 Satou 吃的松板牛還要好味好多倍,
先食平價的牛, 我已經覺得好唔錯了,
再吃波比先生那貴價的牛, 嘩, 果然貴得有道理!!!
入口即浸出香香的牛油味, 肉質非常嫩滑, 係嫩到唔洗點咬, 可能冇牙到食到咁正!
太好味了!!!

不過食食吓, 舖頭竟然忽然間燒 fuse 停電, 成間舖黑晒!
我哋經歷了摸黑食和牛的過程, 真的很難忘.....

食完和牛, 我們就行三宮一帶的步行街,
本想行去到 Mosaic Mall 嗰頭睇埋夜景, 但真係太大雨又好凍, 凍到雙手雙腳冇晒知覺......
所以行完三宮加元町 , 同埋 Mint Mall 就走了~

步行街一帶有唔少咖啡店、甜品店、時裝店,
我們買了些甜品, 又食了一間神戶牛專門店的即炸牛肉薯餅, 又熱又脆, 像雪中送炭的感覺!

行完就搭 JR 返梅田, 嘩, 原來搭各駅停車要 40 min, 特急的班次就 20 min 咋! 差咁遠? 豬咗.....
下次真係要醒目 D, 因為之前去東京/橫濱/千葉都唔覺咁大分別呢~

返到梅田站, 我們在地下街買了這個旅遊書推介, 勁多日本人排隊買的芝士蛋糕!嘩, 真係好好食o架, 超級鬆軟, 入到口, 好似一陣風咁就溶咗,
雖然芝士味唔見突出, 但係牛油味搭夠~

返到酒店樓下, 見到傳說中的超級市場, 嘩, 入面的食物又平又抵,
190 yen 就有咁多帶子刺身喇, 香港點搵?

還有又多汁又鮮甜的士多啤梨呢~

黃昏我們去行了 Bic Camera, 又去玩人哋的相機同鏡頭,
仲有見到好多新科技電子產品, 真係乜都有, 咁都得?
行埋樓上的 100 yen 店, 又掃咗唔少食物~

之後就係去波比先生指定要食的若狹家刺身飯喇!
上次去東京的最後一日食過, 正, 知道大阪都有, 波比先生就嚷著「我要食我要食」~

日本的三文魚籽真係好食過香港嗰D 好多o架, 飽滿而新鮮~
香港食過的, 通常都又腥又 lup 晒, 唔得~

好犀利我哋爬晒兩大碗飯! 之後行行道堀頓的商店街,
well, 大阪真係冇咩手信好買, 應該話冇D 好代表性的手信~

歸家前, 再買了好 hit 的赤鬼八爪魚丸, 唔錯~

2010年3月28日星期日

神戶王子動物園

星期二, 整天都落雨, 有時仲落得好大, 咩 mood 都冇晒.....
想影相都好難影, 又暗, 又 dup 濕晒兩部相機, 不過濕都照影咋~

今日又過了神戶, 其實如果一早唔係買了 package 而是酒店機票分開 book,
應該住一晚在神戶, 會省卻好多交通的時間~

我們到了王子動物園, 今天搭車總算順利!
去到 10am, 是大熊貓餵飼時間, 即刻衝去睇先!

園內有兩隻熊貓, 兩隻都好活潑好可愛, 唔似香港嗰兩隻成日都唔郁!
佢哋先有蔬果食, 食完又有竹葉食,
你睇佢攤喺度一路食竹葉真係幾歎!!!
呢隻熊貓好醒o架, 好有技巧地淨係食晒D 葉, 留返D 樹枝, 你睇!

相反另一隻呢就係咁食樹枝唔食葉o架喎, 攪笑!
呢隻都好識歎呀, 坐喺個車呔度挨住o架!

動物園內還有很多可愛的動物仔, 馬/羊/野豬/長頸鹿/河馬/犀牛/樹熊/兔仔等等,
呢隻菇時又係好攪笑, 佢唔驚人, 仲會主動行埋你嗰度!

然後食你把遮, 好爆笑!

仲有我們最愛的 Polar Bear, 不過得一隻, 可能佢好悶, 不停行嚟行去!

仲有會唱歌的企鵝~

天色太暗, 有櫻花都好難影..... 後製之後只有幾張見得吓人~

北野異人館 + 六甲燒肉放題

遊完布引, 就行去附近的北野異人館, 那是一個很歐陸色建築的地方,
本來打算付費入三個館內參觀, 但一來行程已遲了,
二來異人館比我想像中小很多, 似乎沒什麼特別的東西看, 於是在門口影影相就算了~

經過一座神社, 我們入去看看,
忽然有個伯伯問我哋:"Where do you come from?"
"Hong Kong"
"I am also Chinese."
"Oh, really? Are you from China or Taiwan? Or Malaysia?"
"Canton"
"Uh...?"
"廣東呀, 哈哈, 我四代前嘅祖先係廣東人, 我未去過中國, 我D 中國話係喺日本學o架, 不過平時就講日本話多"
"哈哈哈, 咁啱嘅"
真係俾呢個伯伯嚇親!

神戶是一個很不錯的地方, 街道都有點西方的味道,
白雪雪, 有兩排樹, 冇乜高樓, 一路行好舒服的感覺!
有點似橫濱啊~

去返三宮站, 原定係食神戶牛漢堡的, 但係已經過咗 2pm, 舖頭都收晒工.....
行行吓, 又見到大阪出名的四天王拉麵, 橫掂都會試, 不如就今餐啦!
論麵質, 神座的較彈牙, 論湯底, 真係四天王的較好, 我們都喜歡較濃的湯底啊!
呢隻蛋, 仲溏心過尋日神座嗰隻呀, 好正!

下一站係去垂水站的三井 outlet, 好多人!
雖然話係 outlet, 但大部分東西其實都唔算好平, 不過我哋都買到鞋同埋 T-shirt!
去 agnes b. 只有超騎喱顏色的袋 (螢光綠/螢光粉紅),
有一個上年的款都 ok, 不過諗諗吓都係買返最新款好D, 所以冇收穫~

行完 outlet, 已經開始攰..... 搭咗差唔多成個鐘頭車返大阪,
第一次行心齋橋, 好多舖頭呀!
先去了 100 yen 店又掃杯麵、零食同飲品,
跟住就去 agnes b. 買袋, 好好彩還趕得切 8:30pm 百貨公司收工前去辦退稅的手續,
之後已經好攰, 又拎住好多嘢好重, 就快快去了食燒肉放題!!!

woo, 真係好興奮呀, 燒肉我哋喺北海道食過, 但放題咁 happy 還是第一次!
從網上找到了這間六甲燒肉的資料, 去到果然如網友所言, 老闆好好人,
好有禮貌地慢慢介紹食物, 佢的英文仲講得好好!!

放題是首先來一碟乜都有的拼盤, 佢逐一介紹每舊係咩肉,
食完呢 round, 就自己再點想要的肉類同件數,

每件的 size 切得啱啱好, 一口一件!!!
所有肉我哋都覺得好美味, 要講特別好的,
就是有點雪花的牛面珠, 同埋罐醃牛肋排, 那恰到好處的脂肪比例, 真係好好味, 好難忘!
如果我哋住多幾日, 我一定會再食啊!
店舖的抽風設備非常之好, 燒咗成兩個鐘, 一D 都唔覺得煙,
喺香港的盛八燒過, 煙到好想走.....

美滿的星期一就此完了~

2010年3月27日星期六

大阪神戶遊的開始

我哋返來喇! 老實講, 真係好唔捨得返嚟, 因為仲有好多地方未去, 好多嘢未食.....
真係後悔點解唔搭早機去.....
此行在很多不安中完成, 因為日日都擔心天氣的轉變, 猶豫了很久究竟行程應否作出調動,
最後在天公不造美下, 除了星期一是天晴, 日日都又落雨又凍, 凍到史......
最後一日影櫻花, 天晴了一小段時間, 算幸運了吧!

來個簡單的遊記, 太多相去 Facebook 睇啦, copy 來 Blogspot 真的很很很煩!
這裡較多文字的描述

今年比結婚周年正日遲了一個星期才去旅行, 因為想更大機會看到櫻花

星期日, 搭了 CX 的下午機去大阪, 吃了個咁多次坐 CX 機之中, 最難食的飛機餐.....
是白烚魚+ 白飯冇汁....... 我同波比先生講:「好似我醫院 D 病人食嗰 D 病人餐.....」嗯......

到了大阪, 比原定時間早了點, 希望趕得切 9:25pm 的機場巴士,
所以我拎了一件行李後, 就派波比先生等第二件行李, 自己先出關去買巴士票,
點知因快得慢..... 波比先生因為沒有與我一起, 被關員攔住, 要佢自己填一份報關表,
攪到仲嘥咗好多時間, 出到來, 見住架巴士走, 嗚.......

唯有安慰自己, 可以去買埋張大阪周遊卡, 唔洗過幾日周圍搵啦~

去到酒店, 嘩, 被安排住在頂層 31 樓的房間, 景色超美!
(不過只係第一晚睇到夜景, 之後日日落雨, 玻璃窗只有水珠......)

房間係咁多次去日本中最大的! 真係同之前喺酒店 website 見的相片一模一樣,
又新又靚, very good! 推介這間 Hotel Monterey Grasmere Osaka 呀!

Settle down 後去了道堀頓行一轉, 吃了神座拉麵,
得十度都冇嘅情況下, 食一碗熱辣辣的拉麵, 太美好了!
我們就是為了那溏心蛋而來的!

之後還吃了本家八爪魚丸, 正呀!
已經 12am , 所有舖頭都關門了, 只好去行行激安之殿堂,
一行就掃咗唔少零食, 不過後來發覺買貴了.......
旅行就係咁嘛, 快快手買又可能買貴,
行多幾間格價咩, 後來先發現之前已經係最平, 但已經冇時間再返去嗰個地方買了.....

星期一, 一早起身就去新大阪站, 轉車去神戶,
想買大阪的八達通卡 ICOCA, 去到地鐵站先發現冇得賣...... 一定要去 JR 站買,
都幾唔方便, 搭地鐵用到但係地鐵站買唔到.....

去到新大阪站, 想搭山陽新幹線啦, 係 Yahoo Transit 教o架, 話搭一個站就到新神戶,
點知去到想買飛, 同個日本姐姐完全溝通唔到,
明明係 620 YEN 的車票, 個牌都寫住, 但佢不停話冇得賣, 要我哋買 1450 Yen 的車票,
吓?? 搭一個站嗰 20 分鐘, 要百幾蚊港紙??? 唔係嘩......
嗰一刻, 好無助又無奈, 唔搭呢架車, 唔通又要返梅田轉其他車???

團團轉了一輪, 好彩原來呢個大站有得搭阪神電車都去到神戶, 但比原先的行程轉折了....嗯....
去到三宮再轉神戶地鐵山手線, 先去得返到新神戶站,
搵呀搵, 終於都搵到了搭吊車的站了!

不幸的事又發生喇, 之前明明特登上網 download 定入場八折的 coupon,
仲好開心覺得好抵咁俾人啦, 點知 Print 少咗一頁.......... 唔係嘩......
嗰吓真係十級無奈, 因為呢個景點係純粹因為有 coupon 先貪得意嚟睇吓o架咋,
而家冇 coupon, 究竟去唔去到??

最後我哋見都一場嚟到了, 都去啦......
先搭呢架吊車上山, 沿途睇到成個神戶市的景色, 好壯觀!