Lovely Cupcake

今日返學, 又早了一個多小時下課, 實在太令人感動!

時間早了, 去旺角會合波比先生,
已經係連續四日都到旺角..... 真的怕怕那人多車多的恐怖.....

波比先生買了可愛的 Cupcake 給我, 單是外貌已經太吸引了, 唔捨得食啊~

再見十月

辛苦的十月總算捱過了, 放工的一刻太開心!

今日見了一個我好鍾意的肥妹 BB, 又介紹咗佢俾另一個 case 識,
係一個大佢幾個月的大 BB 哥哥, 大家都係 CI case,
兩個豆釘走埋一齊, 可愛死了~

放工趕去剪返個草菇頭先, 今次真係好草菇, 終於都剪晒D 翹出來的部分, 爽!

之後去了再賀肥仔 Sing K 之夜, 不過..... Neway 的食物真係好難食吓......

終於到手了

等了又等, 終於今日都拎到飛喇, 之前都仲有好多擔心究竟有冇問題~


太興奮了!!!

近來同一個好絕望的女病人做一個治療, (就係嗰D 我上兩日堂就俾幾千蚊去學的新穎療法)
我其實也對這個療法半信半疑, 因為唔太多 clinical evidence 證明佢有效,
佢係我第一個 full course 咁做呢個 treatment 的病人, 加上佢自己的努力,
本來前幾個月病情毫無進展, 到今日第 4 次見佢開始有D 成效,
大家都好鼓舞, 自己也希望透過同佢的 treatment , 自己再不斷於治療技巧上有進步!
加油!

港女對話

港女一詞,  大概帶點 negative 的意思,
以前還是聽人講/從網上看才知道「港女」的精神所在

今日返工搭車, 本身已經唔係好舒服有點暈車浪, 好好彩有位坐低,
正閉目養神之際, 聽到企喺我前面有兩位絕對係「港女」代表的對話,  詳情如下:

港女 A: 都唔知佢有冇攪錯, 周圍同人講我係佢女朋友
港女 B: 係呀?
A: 係啦, 我喺 facebook 度寫緊 single o架喎, 佢點會係我男朋友呀?
(嘩, 我係鄧嗰位男士慘囉, 如果呢個港女唔係做咗好多嘢令人誤會, 人哋點會咁講呀?
令我無限聯想佢曾經收過男士的好多禮物同埋同人食飯係人哋俾錢.....
即使人哋唔係佢男友, 佢點解唔直接同個男仔講, 而喺架迫滿人的公共交通工具好自豪咁講.....)

明明好唔想聽佢講嘢, 佢又繼續好大聲地高談闊論

A: 哎呀, 下個月我兩單朋友結婚呀
B: 阿邊個同妳唔熟都請妳呀?
A: 係啦,  真係蝕晒呀, 收咗佢張餅卡同利是, 我都仲要蝕成二百六十幾蚊呀
B: 今年好多人結婚喎, 點解咁多人結婚嘅?
A: 佢哋要求低咪早結婚囉~ 乜我哋唔靚咩?
B: 梗係唔係啦, 係我哋要求高o者
A: 又係喎~

A: 阿邊個個仔(小朋友)呀, 細細個就著 Polo 啦, 溝死女呀真係
B: 係啦, 搵到個醫生咁有錢嘅老公就真係好呀

短短幾段對話, 已經覺得受不了,
抬頭一望, 是典型的濃妝短裙 Gucci 手袋 look 的兩位港女,
真叫人毛骨悚然......

萬聖節,  唔洗去自己撞, 搭車見到D 咁優質嘅港女, 仲驚嚇過去黑色世界~

清貨

呢幾日, 將屋企放咗喺度好耐又唔用嘅嘢翻出嚟, 變賣家當為麥兜籌募旅行經費!

哈哈, 因為屋企真係太多太少用的物件, 放喺度又好似好嘥,
精明師奶覺得賣咗佢好似抵D

先有十幾廿本旅行書, 嗰D 我覺得我都唔會再去(短期內)的地方的旅遊書, 賣賣賣~

再有好多 Wii Game, 部 Wii 而家淪為我們的電子磅.....
好多 game 開咗唔夠 3 次, 又或者玩到爛, 又或者太難玩, 賣賣賣~!

仲有電腦: 小小的家庭, 有 1x desktop, 3 x notebook, 1 x netbook....
實在有點過份, 於是我打算賣掉 1notebook  同 1 netbook,
點知波比先生話:「妳做乜係咁賣晒我啲嘢呀?」
「D 嘢得個擺字, 一年都用唔到兩次喎」
「留住總有用得著嘅時候」
算啦, 放過你部 notebook 啦!

就嚟 11 月喇, 好開心, 有三個婚禮, 又有一個旅行, 勁期待!!
11月同12 月每個月返 16 日工咋, 太開心 (令自己忘記考試中)

Happy Birthday to Matt

今日去了 So So 的新居,  正式的 House warming!
打機打牌之餘,  大家不停的把那句:「打龍通」和「點解你要阻撓我」掛在咀邊,
笑死! (有睇過 shot shot manager 的話就會明白)

之後去了樓下的德記食飯, 賀埋肥仔生日, 嘻嘻哈哈太開心,
開心到..... 完全唔覺得聽日應該返工囉!

與 Sammi 過聖誕

闊別多年的 Sammi 演唱會, 唔知點解, 好想好想睇~

因為她是我們那個年代的歌手,
因為她的歌曲陪伴了我們走過很多日子,
開心的、傷心的、失落的.....
每一首歌, 一聽到總能令人想起過去的一些片段,
似曾相識但又差點忘記的片段

我對呢D 演唱會消息總是後知後覺, 開賣第一日才知, 第二日才嘗試打電話訂票,
當然, 打不通......
有人打了三日也不通, 更何況我冇可能坐在電話旁不停的打~

上 Yahoo 睇睇, 嘩,  D 飛俾人炒得恐怖,
$150 的賣 $400-500,
$280 的賣 $680-750,
$450 的最離譜可以賣 $1000-1700,
唔好去搶?! 錯!!! 係好過去搶!!! 炒演唱會飛真係好過炒股票!!!
真係貴得好~離~譜~

不過, 最後還是太太太想同 Sammi 過聖誕, 於是...... 還是敗了......

做人要有目標

今日返學, 主講的醫生一開始就對大家說:「今日我嘅目標係 5 點鐘落堂, 大家都放緊假吖嘛; 做人最緊要有目標, 好似我哋做 EMG 都要有目標先做!」
哈哈, 全場掌聲, 因為我們 3:30pm 才開始上堂的! 原定係要 6:30pm 先放學

雖然最後都 'overrun' 到差唔多 6pm 先落堂, 但有得早放總是好開心的!

呢位醫生係某醫院腦神經科的主管, 講書清楚之餘又幽默,
打了很多有趣抵死的比喻, 上得好開心~

因為早放, 去了 Taste 買晚餐返屋企同波比先生撐枱腳,
三文魚上面有鵝肝?! 有趣的配搭~

冬陰公之第二回

今日又睇醫生, 睇鼻敏感同腰痛,
近來條腰痛到一烏低身去睇病人都頂唔順, 拉病人同攪床又痛......
再加埋近期無啦啦成日一邊腳痺, 加加埋埋...... 又諗埋晒D 恐怖病例 (spinal cord injury?)
好彩, 睇完醫生, 原來只係D muscle spasm, 但都要抖抖抖, 唔好咁粗勞.....

今年, 真係好多病痛....

Happy Friday, 又整整大製作!
第二次整冬陰公, 今次搵到有舖頭買到晒正宗的材料: 南薑、香茅、檸檬葉、青檸,
今次又買咗好大隻的大頭蝦, 隻隻都有好多膏呀! 正呀!!
味道嘛,  真的比上一次好,  不過還可以再好一點! :P

無奈感

近來唔知做乜忽然間見到好多個 Myasthenia Gravis (重症肌無力症)的病人,
反而之前的一年, 我都係見得一兩個~

其中一個病人, 仲要係醫護人員,
對於這種無助的病症, 我的 specialty 都真係冇咩可做...
因為做任何的 muscle training, 個 patient 都會fatigue, 仲衰過唔做,
同病人解釋時, 我都覺得好無奈.......

我其中一類見好多的,  係鼻咽癌病人,
好經常見到的,  都唔知點解好似有D 精神問題........
同醫生傾開再睇吓書, 先知原來好多電療完的病人, 都會好大機會有某部份腦細胞壞死,
攪到語言、認知、專注力都好有問題,
唉, 真恐怖......
已經食又食唔到, 仲要攪到人都癲癲地, 醫好了個癌病, 又如何?

Firmware updated

原來 update 電子產品的 firmware 係好有用,
之前一路都懶得去攪, 但見橫掂部電話都轉台要 backup phone book, 所以就攪攪佢~

電話 update 了 firmware 又 update 了個 Opera Mini, woo~~ 快好多!
上網快, load 不同的 function 都快咗,
仲要相機功能都 enhance 埋, 自動對焦快咗, save 相又快咗, good!

跟住到部 LX3 相機, 今日又新出了 firmware,
update 了後真係好明顯改善了一向白平衡勁唔準的問題, 真係好大進步~ Good!

三色台的宮心計, 真係好香港版大長今!
但係當中都不乏好多做人處事的道理~
例如當你的工作做得好, 下一次老細又會想你做得更好,
在醫院的一個大community, 講每一句說話都好小心, 隨人俾人執住嚟要你負責任!
有時你想做D 嘢嚟令人和事都好D,  又會俾人話你唔好咁多事, 都係少做少錯, 沉默是福~

有個舊同事搵我, 問我係咪離開咗 HA?
吓,  之前我都聽聞過呢個咁無稽的謠言, 據聞仲講到言之鑿鑿,
吓....... 真係完全一D 都唔明點解可以無中生有嘅???
中咗六合彩的, 我都想唔洗做啊~

美好的一天

呢兩日醫院都唔太多 case, 可以有D 時間做 admin 嘢, 感覺良好~

小道消息: 我哋有可能被迫遷, 因為隔離 department 要 expand,
搬去 new wing 有新房? 但係可能係細好多? 看不清的未來.......

放工, 好難得的唔塞車返到元朗,
買餸, 竟然 $25 有半隻雞仲送多十蚊叉燒,
元朗的街市平靚正, 元朗又太多好味食店, 真係點捨得搬走!

咁急

今朝返到醫院, 聽到文員姐姐好忙咁打電話通知D 病人唔好嚟, 話有個 Audi 同事 sick leave,
食午飯時, 我先知道原來係好好人的大肚同事, 今朝忽然有生得的徵象要入院了!

原定仲有2 星期先放產假,
原定仲有4 星期先生得,
忽然間, 來個措手不及.......

原定安排好晒去私家醫院開刀生的,
忽然間, 因為情況已不可開刀生, 又早產咁多, 安全起見都係嚟咗我們這家公立醫院~

如果係我, 明明安排好了一切, 明明很怕要自己必個 B 出嚟, 決定好晒去開刀,
但忽然間話我聽冇得開刀, 毫無心理準備之下, 我肯定會 O 晒咀又驚又怕不知所措.....

放工去探同事, 未生得,
由我們三個未生過 BB 的人, 去安慰一個即將要生 BB 的人, 實在有點攪笑!
同事 & BB 您哋要加油啊~ 衷心希望同事聽日一切順順利利啦!

轉台

終於決定離開用了差不多十年的 One2free,
因為真係收得愈來愈差, 行大欖隧道係咁斷線, 又多咗好多地方收得唔好, 令人失望....

最後決定轉去 Smartone, $79 有千幾分鐘, 每日仲有 20MB 上網, 真係好抵!
One2free 我用 $88 每月先有 10MB 上網, 唔轉就奇!

波比先生又不停引我換電話, 我用慣要有筆有 keyboard 又影相要 ok, 睇嚟睇去都冇一部啱~
哈, 而且新聞話香港人換電話真係換得太快了, 製造好多電子垃圾, 我都係環保一點喇~

今日去飲茶, 有我最愛的桂花糕



有個舊同事今日結婚了, 恭喜恭喜~
她送來了東海堂的餅卡, 今日去換了幾件西餅,
隻熊仔好可愛又超好味呀, 濃濃滑滑的朱古力, 不過要兩個人 share 先冇咁漏~

二人大榮華

星期六, 兩公婆去了大榮華撑枱腳, 是最簡單又最開心的節目~



下晝又返學了, 不知不覺已開始 Sem 1 的第二科,
內容亦都愈來愈深, 真係專心少一秒都唔掂呀....

第一次遲了半個幾鐘先放學,
於是第一次豪俾佢, 搭的士去奶奶度食飯,
鬼咩, 搭巴士要成個鐘先去到(去到都食完了), 搭的士一舊水但只係 20 分鐘唔洗就到!
錢就係用來解決問題的嘛?

十年之會

大學同學都知我大學時代做過好多 Part-time,
其中一份做得最開心的, 就係做 Canon 的 promoter 姐姐~
因為做的時侯, 去過了不同的舖頭, 認識了不同的朋友, 又認識到人情冷暖,
其中在屯門市中心的豐澤時間很長, 認識了一班十年的朋友~

十年來大家還保持有聯絡, 是一件很開心的事~

今晚, 要為 Ernie 老師 farewell 了, 10 個月後再見喇, 到時要再約出嚟喪影!

我哋去了元朗的正記打邊爐 , 係上年我哋一齊上攝影班發掘到的好地方~
終於, Jimmy 都出現了, 因佢著力的運動減肥, 十年來從未見佢如此瘦過,
真係瘦得好誇張, 減咗幾十磅喎, 嚇死人!

同波比先生一樣, 佢都係做好多運動, 嘢就照狂食, 哈哈, 咁先痛快嘛!



跟住我哋去食綿綿冰, 嘩, 好失望......
份量大縮水, 同埋明明點咗的配料又冇咗/俾錯咗, 真係好唔掂..... 唔會再幫襯!



我哋 facebook 再見喇~

Counting down

仲有一個月就去旅行喇, 不停 remind 吓自己, 令自己醒神 D!

再諗諗出年三月又去邊好? D 日本機票係平呀, 但係D Yen 貴到o丫...... 0.88 喎!
今日「低」返D 都 0.85, 好 crazy!!
唔跌返低過 0.8, 都真係好難可以再去日本!

近來有時諗到好多嘢想寫, 但返到屋企, 就唔記得晒想寫嘅嘢, sigh.....

聽朝 9am 要見一個好 challenging 的 patient, good luck to me...
早抖喇~

真的入秋了

涼涼的秋風, 返工放工都感覺好舒服~

今日在醫院遇上了一個舊 case 和他的爸媽,
家長都是十分有學識有教養又任職高層的人士,
有一個自閉兒, 相信已經家長措手不及,
今日見到媽媽, 她頸上圍滿了紗布, 相信是有大事發生.....
但我沒有多問, 知道這不是合適的時間地點去問, 還希望媽媽保重~

人在疾病前總是無助的, 儘管你今日吃的花的享受的有多奢華,
在疾病前面, 還是人人平等~



呢排難食的 canteen 終於都出返呢個吉豬雞翼蛋飯喇!
終於都脫離俾錢食垃圾飯的日子! 不過帶到飯都當然係帶飯最好!

十月重生

九月病了整整的一個月, 不停的食藥, 瞓覺, 再食藥,
一整個月, 真的怕怕了.....

醫生話我錯過了病發頭48 小時去醫治, 那個病隨時又會再復發,
唯一可做的, 就是保持 immune system 強強壯壯, 減低復發機會~

今晚係停咗好耐之後, 第一晚落返去踩單車,
嗰隻衰佬o丫, 練到跑得幾鬼快, 要追住佢, 踩到我索晒氣!
正常都係人追單車嘅o者, 邊有單車追人!??!
好攰......

遲D 再有返D 氣力的話, 打算跑3 圈 + 踩3 圈, 唔知得唔得呢?
成個月唔郁之後, 條腰同 pat 粗咗成圈囉.....



報紙話有好多大陸入口的肉都有好多抗生素,
究竟, 我哋每日仲可以食D 乜?
唔通日日要去 Taste 同 Citysuper 買日本美國澳洲入口的食物先得?

因為近來搭村巴放工, 成日塞車, 塞到好夜先返到嚟煮唔到飯,
今日就試試搭鐵路, 哈, 原來都唔錯喎, 6:45pm 返到了,
簡直係感動, 從未試過咁早可以返到元朗囉~

探探大花白

去探 B 之前, 本來是想去大埔海濱公園影相的,
出門前才發現新買的長鏡頭原來係 62mm, 用唔到我 kit lens 的 UV filter.....
喺冇 UV filter 隔一隔塵之下, 真係唔敢帶佢出街, 唯有下次吧~

我們又太遲出門口, 又陰陰天, 怕去到海濱公園落大雨都唔知影乜好,
於是就臨時改去嘉道理農場探大花白豬



原來呢個時節都有唔少花, 可惜都未行到上去, 就開始落大雨了..... 掃興.....





好彩都見到一陣大花白, 但睇咗佢唔夠1分鐘, 佢就走返入屋瞓晏覺.....
佢一次比一次肥啊..... 肥到..... 拖住個肚嚟行......

仲有見到野豬先生, 走嚟走去好忙咁, 同大花白果然係唔同種.....



下次再嚟探你哋啦~

好開心探 B gathering

今日相約了 Cora 一齊去探 Sharon 的 BB, BB 好得意呀~
通常去探 B 呢, d 阿B 都係瞓瞓瞓,
但今次的 BB 瞓完就玩玩玩, 估唔到兩個月大, 可以有咁好的 eye contact 同 eye tracking,
仲有好好的 sound source orientation, 同埋有 Reciprocal vocalization, 兩個月咋喎??

哈哈, 生 B 同湊 B 真係一門好大的學問,
做我哋呢D 行業, 就會好知道有好多嘢唔洗太緊張~
現今的家長也該放鬆一點吧,



影 BB 原來真係好難呀, 因為佢不停咁郁.....
這是一個好好的理由, 去俾自己買一支大光圈鏡嘛?

Gather and gather

今日節目豐富啊~ 第一站係去同師姐慶祝生日, 買了我恨試好耐的東海堂北海道牛奶芝士蛋糕,
味道嘛, 好好好甜, 連我呢個鍾意食甜嘢嘅人都嗌太甜...... 食 2cm X 2cm 就好了~
不過牛奶同芝士味都好濃, 值得一試!



第二站當然係去返學啦, 因為早放學, 所以先可以 join 到波比同事的 BBQ!
對上一次 BBQ, 已經耐到唔記得係幾時.....



BBQ 地點係碧堤半島的會所, 有無敵海景同青馬橋景, 仲有海風又夠光猛, 正呀!
不過 9pm 就要收爐, 淨係透爐都攪到 8pm 先開始燒,
最後有好多食物燒唔切, 要拎返上同事家中烚嚟食~



上到同事家同柴犬玩, 大家都驚嘆點解佢會咁瘦......
佢見到人唔會興奮, 唔會撩人玩, 唔鍾意食嘢, 我行我素唔會聽你點,
仲有好鬼死驚青, 少少嘢都驚到跑去十呎遠.....
從多方面證供, 我好懷疑佢係一隻 A 嘅狗!



食埋未燒的食物, 仲有玩 Pictionary, 笑死!
最後去埋發記食甜品, 此行完滿結束了~

今期惡夢

呢排成日發惡夢

發夢自己之前的大病嚴重了很多, 因為喺醫院時不時都會見到嚴重到要住院的病人....
係好恐怖的.....

呢排又見到好多悲劇性重傷的病人, 跳樓的、中槍的、好年輕車禍的、最慘係喺大陸俾人仆頭打劫的、飲腐蝕性液體自殺的....
大陸這個地方, 真係很恐怖.....
見到佢哋創傷的後遺症和幾吋厚的手術紀錄, 令人心寒.....

還有見返一個幾年前教過佢的 A 仔, 而家好彩係我同事跟,
見完佢嗰日, 夜晚即刻發夢以前同佢上堂的片段

還有讀書的, 讀不完的書..... 令人擔憂......

夜攝

今日真的很 frustrated! 得我同老細睇 in-patients , 到3:30pm 我手上仲有7 個 case 未睇.....
睇的都是很複雜的 case, 仲唔知有幾多 case 會出 referral....
不過還感恩, 六點前算係要睇的都睇晒..... 但要 review 的就 review 唔到了......

放工約了波比家人食飯, 慶祝波比爸媽生日,
為了拍這張三色光的相片, 害得我送車尾.....



荃灣吃飯過後, 走了去公園那邊



拍拍青衣和汀九橋景



那裡還有中秋花燈未拆, 原來那裡有海風、有長椅、有星星、但月光不見了.....
飯後散散步是不錯的選擇!



明天, 10月10日, 除了是波比媽媽生日, 又是同我一齊讀書的師姐生日,
還有是好朋友 Habie 的大日子!
希望大家都有個美好的星期六~

份份報章的頭條<<忘了光纖, 但忘不了太太>>,
令人思想, 人勞碌了大半生, 最後的, 是為了什麼?
當你找到一個伴, 承諾與你過一生, 這就已經是很大的福氣和成就~

終於都敗了....

諗住只是「平平地」買部 DSLR, 點知用了個多月, 拍夠了千多張相片, 再俾人毒兩毒之後....
還是敗了家......



買了一支可以 zoom 得更遠的鏡頭!



但講到影食物(近嘢), 好難對到焦, 始終都係 LX3 好用好多~





就是它



帶你去曼谷好冇?



洗唔洗買個防潮箱呢? 又想買塊布嚟包住部機出街....
唉..... 相機真係一個好破財的玩意~

打冷, 正!

因為兩個同事都放大假, 呢兩個星期都會做到史......
今日太夜收工, 出了旺角食飯, 波比先生提議食打冷

樂園粉麵就食得多, 打冷呢邊都係第一次!
叫了 9 菜豬紅, 豉椒蟶子, 蠔仔餅,樣樣都好好味啊, 一定要再來!



回家路上, 見到佢哋!



主人話:「你自己玩啦」



於是肥老虎狗就兩手踏著滑板, 兩腳一撐, 滑行去了~ 好勁呀~
佢仲識四隻腳企晒上去咁滑, 仲要滑好遠, 真係好攪笑!



玩到一半, 傻狗已經喘晒氣, 忽然間跳離滑板, 停喺度史都唔郁~
佢個傻樣, 真係好爆笑!

補記: 長洲攝影美食團

2:30pm 我們出發了~ 在船上面已經急不及待拿出相機拍拍拍~



到長洲喇, 我們結婚後也很少到這個地方, 適逢中秋佳節, 那裡有很多有趣的事物~



還有很多可愛的動物仔, 我們的結論: 長洲的貓狗都生得很胖.... 太好食好住掛...



太愛這裡的美食了!



很 Holiday mood~



本來我們是來行山的, 但吃過甜品又慢行慢拍, 成五點都未走到上山的路,
所以放棄了, 轉戰早點食海鮮~

是否現在只顧大量的做遊客生意? 食物沒以前那麼好味道....

影友約會@長洲

繼上次去南生圍之後, 今次又約了 Ernie 老師,
還有她的朋友又有我的朋友, 一齊去了長洲又影又食!



拍了二百多張的相片, 還需要些時間整理



狂食狂拍嘻嘻哈哈, 實在太太太開心~



Ernie 老師的朋友好勁呀, 用的是 Canon 紅圈鏡/ 紅圈白鏡,
D 相真係好 sharp 好靚, D 色水真係冇得彈!

中秋夜@維園

中秋節, 我們去過青衣、沙田、黃金海岸,
今年, 去了從未去過的維園~



那裡人山人海~



真月亮和假月亮,
天公造美的, 今晚月亮又大又光, 好靚~



不過出乎意料, 呢度 so-called 的採燈晚會好唔掂, 原來只係幾個較大型又冇咩主題的花燈.....
相比起前年去青衣公園都有好多動物仔花燈, 完全唔得.... (見朋友去天水圍公園的都仲好過佢...)
係有D 迫唔到埋去睇的表演囉



最開心的, 就係有波比最愛的棉花糖,
相信有十倍利潤, 仲排晒長龍, 今晚呢個阿姐一定賺到笑!



行咗唔夠一個鐘就走了~



想去食南記, 點知執咗???
原來係搬咗去對面馬路, 係咁啱見到咋!
對上一次食, 已經係讀緊大學時了~
嗰時都淨係知佢春卷出名, 原來波比先生話豬腩肉都正, 不過湯底好似冇記憶中咁濃?
Anyway 都食得好滋味!



第一次用部機影夜景, 整體感覺都好滿意!
用 DC 的朋友, 相信都會好明白影呢D 夜景人像, 雖然已經特別的 mode 去幫你影,
但係唔閃燈就太暗,
用閃燈就得個人, 背景睇唔到,
鬼唔知有慢速同步, 但一係你手好定一係落腳架啦,
所以我即使已經係用 LX3, 之前影夜景人像都係好難影得好.....

但唔知係咪 DSLR 感光元件的緣故,
整夜景相真係好好多~ 用埋 Flash 都會見到D 背景, good 呀!

成日同自己講: 影夠 1000 張就可以俾自己「考慮吓」買鏡頭,
原來今日已經影到 970 張了, 嘻嘻!