2009年6月30日星期二

靚衫可以唔買

旅行唔可以唔去!!!

繼師弟去完 19日歐洲, 鬼妹同事又去東京掃貨,
豬太狠咗好旅行好耐.....
尋晚忽然間發現啱時間又啱價錢的機票,
今日的起心肝問 i/c 俾唔俾我放星期一上午, 點知佢理所當然的話:「梗係得啦, 放半日冇理由唔俾你放呀」
於是.......

波比伉儷下星期五又飛喇! 放工就飛, 飛完返嚟下晝又即刻返工,
都係為咗舖旅行癮, 原來真係好難搣得甩......
多謝波比先生又陪我去旅行呀!

我們在一起一週年, 去了台北,
我們在一起七週年, 再去台北,
緊張又興奮! 希望 book 酒店都順順利利啦, 因為都幾 full 吓呀~

2009年6月29日星期一

半小時菜色

每天放工踏入家門至煮完飯, 通常會用半個鐘,
喺短時間內又洗又切又醃又煮, 要好好的 multi-tasking,
所以每一日搭車放工, 都會諗定洗乜先煮邊樣先咁~

嘻嘻, 今日有豬肉釀冬菇同豆腐, 加豉椒同柱侯醬炆一炆, 正呀!

062901

2009年6月28日星期日

希望妳幸福

Best friend 暑假時要去北海道影婚紗相了, 今日叫埋我一齊去揀衫,
重遇另一位會做姊妹的舊同事, 哈哈, 5 年冇見,
佢話:「哈, 睇妳個樣就成熟咗好多, 但係一開聲, 都係咁o靚妹喎」
哈哈, 係咩??

作為一個女仔, 結婚一生人一次, 當然係事事都緊張的,
第一次試穿上嫁衣, 那種興奮又期待的心情, 相信是畢生難忘~

人人對婚紗的審美角度都有唔同, 同行的四人都有唔同的意見,
最後的, 還是希望妳選擇自己喜歡的, 和妳自己選擇了而相信自己不會後悔的, 同揀老公一樣~

062801

希望朋友影到一輯好靚好靚的婚紗相返嚟啦~

2009年6月27日星期六

極力推介之 Cafe Muse

雷暴警告下, 去了尖沙咀, 國金的頂樓埋了在雲層裡~

Victoria Harbour

為的是睇詹瑞文的 talk show, 於是喺文化中心的 Cafe Muse 食 lunch~
網上好多人讚, 1pm 去到已經得返最後的兩個位,
午餐有一款自選主菜, 出奇地樣樣材料都好新鮮!

Cafe Muse

咖哩海鮮簡直係非常之有驚喜, 所有海鮮都唔係急凍貨,
以預咗食急凍魷魚的心情, 去食了一件新鮮仲好彈牙的魷魚, 實在喜出望外!
個蒜蓉包可以話係我咁耐以嚟, 食過最好的! 一咬就鬆脆得全溶於口中, 加埋咖哩汁真係超正呀!

Cafe Muse

跟餐有自助的沙律、湯、甜品、糖水,
本來都係以一段的心態去食, 點知又係好有驚喜, 因為每一樣都整得好好食, 好有水準,
絕對唔係粗製濫造~

Cafe Muse

咖啡糕有好濃的咖啡香, 最開心係有我好鍾意的麵包布甸!!!!

Cafe Muse

最後來一碗紅棗雪耳龍眼糖水, 真係好好味!!! 雖然飽都要食晒!!

Cafe Muse

食完飽得過份...... 行行海旁, 見到忠僕號, 可惜冇時間上去睇睇~

忠僕號

詹 sir 今次的港男港女 show 比上一次的好, 雖然都有悶場, 但好多位真係好好笑又好抵死!
食完又玩完, 好滿足~

再見開心大樹

在大樹下等人、等上堂、影畢業相, 相信你和我都經歷過~

happy tree

收到 HKU 的 e-mail, 這一棵陪伴過你和我成長的開心公園大樹要 bye bye 了~

25d690215aaa17078104c8ffc627069c

再見喇~

2009年6月26日星期五

蟹之初體驗

有朋友仔問我係咪好少煮飯, 因為好耐都冇 post 過煮飯仔的相片,
梗係唔係啦, 而家一個星期都 keep 到煮三次嘅, 有時係懶先唔煮o者~
不過近來冇乜新菜式, 都係普通家常便飯, 所以都冇影相~

今日有大製作呀, 梗係要出返個 post!

登鄧! 自家製咖哩炒蟹!!!
嗚謝街市阿姐幫我開咗D 蟹, 返到嚟洗乾淨再斬件就得,
不過原來D 蟹都幾難斬, 我要磨完刀先斬得開~

味道嘛, 嘩, 原來食新鮮自己整嘅蟹係咁好味, D 肉質真係好鮮又滑,
原來出面酒樓食的, 點都冇得比~
食到一隻隻的肥蟹鉗, 嘩, 好滿足~~

crab

嘻嘻, 下次要試吓整奄仔蟹或者膏蟹先!

2009年6月25日星期四

I love dessert

因為遲咗放工, 出旺角食飯, 來了一杯滴滴咖啡, 唔錯唔錯~

滴滴咖啡

本來想去食糖百府的雪片冰, 點知勁多人....
去了對面的石磨坊啦, 焗西米布甸都 ok

西米焗布甸

呢個椰汁紅豆蓉涼粉真係好正呀, 如果你鍾意食紅豆就一定啱你!

椰汁紅豆蓉涼粉

食完甜品,人都開心D~

2009年6月23日星期二

客式燉蛋

法式燉蛋都聽得多, 客式燉蛋你食過未?

父親節當日去食客家菜, 套餐就有呢一款甜品, 好好奇係乜東東?
一打開, 嘩.......

客式燉蛋

是類似紅棗水加咗隻荷包蛋咁嘅樣, 真係有點攪笑......

老細新過咗個 Pakistan 嘅 CI 妹妹 case 俾我, 呢D 少數族裔真係有點難攪.....
明知佢就嚟讀 SCCC 都係要學中文, 但阿媽又只識講 Urdu 同好少英文,
而家好彩有政府的翻譯嚟一齊上堂, 唔係都唔知點上......

上堂就好攪笑囉....... 因為有翻譯, 我大部分時間都係講英文,
但到去到教佢的單字時, 知道佢第時返學都係要學廣東話, 所以我又用廣東話,
" Put the ball here, 「擺」, good job"
但阿媽又繼續同佢講 Urdu...... 唉.......
我係阿女的話, 都唔知你哋班人 ki li ku lu 講乜, 好 confused......

2009年6月22日星期一

Flowers @ Waterfront

仲有第二篇的花花篇, 炎炎夏日, 花兒笑得燦爛

flower1

flower2

flower3

flower5

flower4

flower7

flower6

可惜 LX3 zoom 唔到遠, 隔著圍牆遠影唔到想影的花~

flower9

2009年6月21日星期日

熱溶了的 Waterfront

看看這相片, 猜猜今日豬生豬太去了哪裡?

062108

再來一張, 太太太美的藍天白雲了!

062107

還有很多人在放風箏, 好夏天啊! 這是大埔的海濱公園!

062102

很喜歡這心形的樹葉

062110

062109

行了不消一會, 三十幾度的氣溫, 我們已經熱溶了
雖然知道係明搶的 $20 支可樂, 但都要到室內過冷河先不致中暑......
見到很多 model 在拍照, 還有人在拍婚紗照, 實在耐力可嘉!

062106

由大埔走入屯門, 與 Daddy 慶祝父親節,
食完飯都係七點幾, 竟然仲見到晚霞, 好靚~

062111

好開心今日影咗咁多靚相, 亦多謝最怕熱的波比先生陪我周圍走流了一公升的汗水~ ^3^

分享

早幾日提過的 92 歲婆婆過身了, 是星期五的事...
身體機能的退化, 無疑令她過著很辛苦的日子, 離開未尚不是一種解脫,
但我還是想著她過去一個月的日子是怎麼過, 是不是她的家人有心將她置之不理,
想到她曾經叫我一聲的「唔該, x 姑娘」, 她的聲音還言猶在耳, 於是眼淺的我......

每一個病人都有他/她的故事, 愈知得多, 有時是令人愈傷心的......
老細剛剛 pass 咗一個鼻咽癌 case 俾我, 29 歲人, 係呀, 只係 29 歲.......
已經退化到好差的地步, 可能隨時都唔喺度嗰種~
冇人冇物, 說不到吃不到, 可以用什麼理由去說服他生存下去?
佢嚟, clinically 我其實冇咩可以做到, 或者只係同佢傾吓偈, 令佢好過一D

每一日都有太多呢D 遭遇, 平時冇咩人可以講,
剛剛同舊 supervisor 講起, 佢會好明白好有共嗚~ 因為佢係一個好有心的治療師~

2009年6月20日星期六

告吹

嗚, 呢兩日睇緊去旅行的機票, 都差唔多考慮完,
點知今日上網一睇......... 可能平價的機位已經賣晒, 無啦啦, 貴咗幾百蚊, 即係唔洗去.......
只係差一晚, 簡直係晴天霹靂........ 無奈與失望........

今日攪埋網上報稅, 嘩..... 點解出年要交咁多稅嘅?! 諗起就肉痛.......

夜晚去同波比爸爸食父親節飯, 波比先生送了一部好新的 PDA phone 俾佢,
有人成晚都笑到合唔埋咀咁滯,
哈哈, 波比先生從來都係最識扮乖氹人開心的大朋友

阿華在 facebook 的留言, 竟然令到有朋友以為我 preg 咗, 實在是太大的美麗的誤會了~

2009年6月19日星期五

Super Gathering

hehe, sooooooo happy to see you all tonight in this wonderful gathering!
With the most interesting sharing of your work and life, and lots of laughter.

All of you are super therapists in my heart, with your passion, love, knowledge and skill devoted to your work.
Though we can't change others' attitude towards work, at least we have tried our best everyday.

Keep on working hard and playing hard! Looking forward to the next gathering~~~

061910
061907
061906
061903

2009年6月18日星期四

近況

呢兩日收到讀書時醫院的 supervisor 的電郵, 談談近況,
佢問到我第時如果有機會, 會唔會轉 cluster?
其實呢個問題我都有諗過, 而家返工係好遠好遠, 仲遠過去機場!
但係都一年了, 又喺呢度建立了唔少屬於自己嘅嘢, 轉環境又要由頭做起?
真係要好好考慮, 一切隨緣啦~

嘩, 今日去隔離病房, 睇咗兩個 suspected H1N1 cases,
而家其實分分鐘周街都係, 差在你有冇去 check o者~
今個星期我搭車返工都日日戴住口罩喇, 嘩, 車上必定會遇到 D 咳又唔冚口嘅人囉,
都係保護自己最緊要!

放工, 去了買小禮物俾兩位聽日會見面的壽星女,
最怕那些過份熱情的 sales :「買滿 $400 可以入會喎, 買多樣嘢就夠啦」
吓, 我真係唔明白入會嚟做乜, 因為我絕對唔係嗰D 會每個月掉成千蚊上自己塊面嘅人,
入會儲分 sorry 我真係做唔到.......... 因為我係一個好懶打理自己的師奶囉~
我都明白經濟不景 sales 好想做生意, 但我講咗 10 次話我唔會再買多D 嘢為入會, 佢仍然死纏不休.....
真係要攪到好似你唔幫佢買嘢係你對佢唔住咁先安樂

2009年6月17日星期三

2009年6月16日星期二

點解會咁?

時晴時雨的天氣, 令人摸不著

Sky

2009年6月15日星期一

我都好想放假....

呢幾日個人終於都有覺好瞓, 又食得返落D 嘢, thanks God~

i/c 話有同事想放 29-30/6, 問我多唔多 case 可唔可以睇到 in-patient,
嘩....... 我都好想放呢兩日, 連埋7 月1 日有五日假呀.......
但又係佢話佢要開會又要假期前清 case, 唔好請假, 我先唔敢放, 而家又.....

望住個時間表, 好冇好似上年咁, 八月尾放呢?
睇返上年去北海道的相, 好好好想去多次呀!

夜晚同朋友食飯, 希望朋友的大 project 順利完成啦~
有時D 嘢, 就係要 balance risk and benefit, 肯博一舖的話, 或者會得到好多,
但我還是個保守的人, 生活上唔鍾意 take risk,
安安穩穩, 簡單又開心就好了~

2009年6月14日星期日

Travel Expo

美好的星期天, 豬生豬太出城, 去了會展第一次參觀 Travel Expo!

Travel Expo

好多好多唔同地方的攤位呀, 睇到真係好有衝動想即刻去個旅行!!!
真係未試過一次過睇咁多唔同地方的旅遊相片同資料, 有D 真係從來唔知道係咁靚~~
不過我哋去得太遲, 已接近尾聲, 好多資料已經俾人攞晒 lu~~~
Anyway, 都拎咗D 地圖, 實有一日會有用嘅!!!

之後去 Pacific Coffee, 嘆買一送一的咖啡, 正呀!
望著旅遊資料, 真係好心動.......

Travel Expo

行行玩具街, 行行 Sogo, 簡簡單單快樂的一日

E2 Response Level Activated



噢, 尋晚收到 e-mail, 醫院的 Emergency Response Level 升到 E2 (最緊急級別),
係 SARS 以後第一次升到去呢個級別, 不過暫時仲未知 OPD 的運作會有咩影響,
最 worst 嘅會係停晒一切非緊急的 out-patient 服務,
文員話6 年前 SARS, 一個 patient 都冇, 靜到耳仔 wang wang 聲........
唔知今次會係點呢?

2009年6月13日星期六

炎炎夏日

炎炎夏日, 係咁倚喺街度行吓都熱到想溶.......
入完屯門食 lunch, 就心思思去埋元朗的甜心鮮果園,
本來係想食炒冰的, 但見到鮮什果甜品咁吸引, 都係改變主意~
全部生果都好新鮮啊, 仲涼透心添, 正!!!!

甜心鮮果園

好難得今朝瞓到 8:20am 先醒, 仲瞓埋晏覺, 瞓返成個星期需要嘅時間!

2009年6月12日星期五

終於都到 weekend 喇~~~~ Hurray!!!

今日醫院得我同 i/c 兩個人, 朝早已經見到成廿個 referral, 真係嚇親!!!
好彩開 turbo 之後, 一晝睇咗 10 個 case, 不過有 4 個都係肺癌 case,
當不停地親手幫病人抹去鮮紅/紅黑的血痰時, 就會好體會到疾病之前, 人人平等,
無論你的背景過去, 得了這個病, 結果還是一樣

慶幸下午的 referral 唔太多, 兩個人好快就睇晒, 仲可以準時收工~

放工後約咗人交收, 喺網上買咗間玩具屋, 係我舊 workplace 都有的一間玩具屋, 已經絕版了多時!
$60 買到真係好抵, 不過就少少舊啦~
但真係好重好重! 交收完去旺角食飯再托返屋企, 手快要斷的感覺...... 點喺返工時間再托返醫院呢?

夜晚食飯, 坐隔離枱的女仔係咁咳! (=.=!)
仲同我醫院 D patient 一樣, 咳到好勁痰聲, (上星期出旺角食飯又係咁喎!)
嘩...... 真係好心啦........ 成年人都咁唔識做, 又唔戴口罩,
我同波比先生極速食完快D 就了!

2009年6月11日星期四

「邊有病」

停課十四天的消息, 相信係今日最大的新聞,
唔再係喺 NGO 的我, 停課對我沒有什麼影響,
不過相信影響了好多人的暑假旅遊 planning,
如果要老師小朋友都遲放暑假的話, 實在掃興,
未考試的, 或者考剩一兩日的, 都有點不知所措,
近來好多父母都會特登請大假同小朋友溫習, 以為痛苦的溫習日子快要過去, 點知.......
都唔知仲讀唔讀好.......

唔返學的確可以避免大規模擴散,
但係又有好多冇乜知識的父母, 帶病的小朋友週圍去......
早幾日我先見到個女, 一入到嚟係咁咳!
我:「媽咪呀, 阿女係咪病呀?」
「唔係, 係有D 咳同痰咋嘛」
「吓, 有咳同痰仲唔係病」
「唔係, 可能係今朝食咗朱古力o者」
「但係阿女咳得好犀利吓喎, 唔係一兩聲喎」
「係有D 咳同痰咋嘛, 都唔係病」
「媽咪呀 , 好人好者係唔會有痰咁咳o架喎, 有痰即係上呼吸道有問題, 先會製造D 痰將D 病菌外來物帶走」
「佢都冇發燒」
「佢有發燒我就即刻要佢走添喇, 佢嚟到係咁咳又唔帶口罩, D 飛沬噴晒落張枱, 咁下一個小朋友入到嚟, 容乜易又傳染第二個小朋友呀? 妳唔為第二D 小朋友諗, 都為自己個女諗吓啦, 佢病都最好喺屋企休息啦, 妳打電話嚟話我聽, 我幫妳改期會好D 囉, 而家迫住要我帶晒口罩面罩同佢上堂, 佢又學得冇咁好, 係妳蝕咋」
「佢都冇去過邊度, 唔會病嘅」
「(真係啞咗) 媽咪呀, 佢日日都有返學o架, 返學有小朋友就有機會染病o架啦」(心想一句: 唔係化)


雖然上上吓, 我都忍唔住除咗口罩淨用 face shield,
有好多時, 就係咁樣硬食D 菌....... 講就講得惡o者 , 但小朋友咁遠嚟到, 我又唔會真係要佢走,
但再多D 咁嘅無知阿媽, 真係唔知死幾多人!

2009年6月10日星期三

精明師奶

星期三要做 endoscope, 企到 2:20pm 先做完放飯...... (=.=) 好彩今朝食咗包打底......
去到 Canteen 時, 同平時一點鐘的墟冚情況截然不同!
哎呀, 早知等多 10 分鐘叫下午茶餐啦!

收到醫管局送來, 每個員工一盒的口罩,
Vaccine 就未有喇, 口罩頂住先啦~

Mask

呀, 原來晏D 去街市, D 檔口臨收工前乜都平好多!!!
上星期買咗隻魷魚都要 $20, 今日見到 $22/ 4 隻細, 或者 $18 已經大過我上星期嗰隻........
覺得自己好豬..... 做個精明師奶都真係唔容易o架!

好想煮蟹食, 但係唔識劏, 有冇人可以教吓我?

2009年6月9日星期二

七年前

七年前的今日, 我們第一次見面, 之後, 兩個世界開始重疊了,
想起那傻更更的肥仔面孔, 點都覺得好攪笑~
嗯, 轉過眼就七年了!

為咗慶祝呢個七年紀念日, 老婆呢排又勁失眠好攰 (係呀, 早幾日失眠到朝早七點幾喺度洗廁所囉),
今晚唔煮飯, 去食我最喜愛的泰國菜,
有我最最最愛的冬蔭公, 個炒大頭蝦就好最食, 好多蝦膏添呀!!!

泰星

都話「姣婆守唔到寡」...... 幾個月冇去旅行的我, 忽然又好想離開吓香港!
不過呢排風頭火勢, 唔洗旨意請到假!
係想搵個星期六日去玩吓o者, 短短地諗緊長隆動物園好冇囉~ 得一個 weekend 真係唔去得邊~

唉, 見到D 北海道團咁鬼平, 真係好好好想去呀......

2009年6月7日星期日

又有書讀呀!

今日 web surfing 嘅時候, 心血來潮睇吓近來有冇 counseling course 讀,
點知真係搵到 ! 仲係喺我個 Master course 開學前就應該讀晒, 於是就亳不猶豫地報咗喇~

不過呢D 短期課程我之前喺 HKU SPACE 都上過唔少, 師資都幾參差的!
有好的導師真係會教到嘢, 但又有D 淨係嚟吹吓水呃飯食, 上完都唔知上咗乜.....
希望今次的導師係前者啦~ 亦希望學到嘅嘢真係可以應用喺我工作上面, 幫到一D 病人同家屬~

尋日去完師姐到, 聽見佢話想買多D 可以坐到人仔入去嘅車,
咁啱前排我見過千色店有, 今日就去買咗兩 set, 一 set 送俾佢哋, 一 set 自己用!
一 set 都係百幾蚊咋, 唔知點解用 HSBC Visa Card 簽賬仲可以平 $10, 真係好!

New toy car
New toy car

你睇消防員哥哥幾英!!
New toy car

嘩, 我仲見到出返絕版咗好一段時間的 Mickey Mouse 汽水機呀, 可惜二百幾蚊好貴呢!
仲有森林家族的傢俬仔真係超靚,可惜成百蚊先得幾粒囉......

2009年6月6日星期六

天下父母心

今日一早就去了師姐的 Clinic, 做過膠同掃瞄女工,
聽到師姐們做 case, 係真的好實在的 Training 感覺,
幾難攪的小朋友, 去到佢哋手上都聽聽話話, 她們就是魔術師呀~

佢哋做 Private clinic 係要收錢,
我醫院個令我好嘔血的同事之前又係做 Private clinic, 分分鐘仲收得貴過佢哋,
相比之下........ 唔太識分好與壞的家長就係咁白白送錢人洗囉~
成堂亂嚟唔知做咩o架, 做完個評估都完全講唔出個小朋友能力有幾多歲o架!
畢到業就可以掛個名出嚟, 做乜都得, 冇質素可言, 只要呃得到家長就得囉~ 吹咩~

師姐們推介我睇一個港台節目 -->香港電台電視部「天下父母心」

為提高公眾對兒童發展障礙的認識,"衞生署兒童體能智力測驗服務"與教育局及香港電台電視部合作,製作了一連十集的「天下父母心」,分享有關父母照顧有發展障礙的兒童及青少年的家庭個案。節目由五月三十一日起,逢星期日晚上七時三十分於亞洲電視本港台播放。誠意推介這輯節目給你和你的同事、家人及朋友。敬請屆時收看。(註:節目播出後,可瀏覽http://www.rthk.org.hk/special/parenting2009,重溫節目內容。)

睇咗上一集, 真係幾好喎~
希望社會人士對呢D 小朋友有多D 認識, 唔好以為係佢哋曳或懶, 唔好用歧視目光睇佢哋,
佢哋其實可以好簡單, 好天真同可愛~

2009年6月5日星期五

2009年6月4日星期四

佳人餐廳

波比同事推介了一家在旺角火車站天橋下面的餐廳, 話 Pizza 頂呱呱!

Set dinner 頭盤有沙律同焗蠔, 估唔到係超肥美的蠔啊!

主菜係羊鞍, 嘩, 味道同肉質都好得, 個汁仲好好味!

佳人餐廳

貪心地叫咗個大 Pizza, 只係 $45, 真係大到食唔晒, 仲要係超超超足料呀!
每一啖, 材料都從芝士下必出嚟, 餅焗得好脆, 真係好正!

佳人餐廳

不過睇門面裝修, 就完全唔成正比..... 好土的茶餐廳餐牌, 好土的裝修~
廚師據聞係前酒店大廚, 唔怪之得食物都咁有水準~
而家香港的餐廳都講裝修, 如果佢裝修得靚D, 換埋D 靚D 嘅碟, 其實應該會吸引到更多人幫襯~

2009年6月3日星期三

送別

今日去了腫瘤科病房, 一大班家人圍住一張床, 大概都知咩事,
家人逐個逐個入嚟同病人道別, 叫他安心上路,
連小朋友都叫咗入嚟, 一臉無知的小朋友, 只知要按大人吩咐去講「公公, 再見喇」
最後有人話「佢死咗喇.....」, 之後就是痛哭的聲音.....
心中很震撼

人走到最後一刻, 究竟會在想什麼呢?
床邊的人到了呢一刻, 又會想什麼?
很多要說的話, 但願一早說了就好, 不要待到最後一刻~

肺癌的病人, 到最後一刻很多都是呼吸愈來愈困難, 直至最後一口氣,
家人目睹這個過程, 實在太難受.......
雖然唔食煙嘅人都會有肺癌, 但真係勸勸你身邊的吸煙人士, 戒煙好了~

2009年6月2日星期二

My Pager

平時喺醫院我有一部醫院內先用到的手提電話,
但因為做了 Infection Control Coordinator 的緣故, 今日起要陀多一部 Call 機~
唔只返工, 放工都要帶喺身, 不過當然唔 expect 會有人喺 non-office hour 成日 call 我啦~

My pager

Call 機, 記得喺我中三四時有過一部, 好記得係透明藍色的~
我都唔係好記得點解我會出部 call 機, 大概係人有我有掛?
而家真係好難想像, 嗰個年代大家都未有手提電話,
只可以靠 Call 機聯絡, 覆 Call 又要周圍搵一蚊電話, 冇帶 Call 機更加係斷六親咁......
而家嘅科技, 實在進步得太快了~~
3豬電話, 以前真係諗都未諗過呀!

嘩, 呢幾日係咁失眠, 可能又係壓力大的緣故, 一早真係 6am 醒咗完住瞓唔到.....
於是就搭 7:10am 的車返工, 撞到以前 Red Cross 的阿 Sir,
明明大家平時都係搭 7:30am 班車, 問佢:「咁早呀?」
「係呀, 瞓唔著..... 妳又做乜咁早?」
「吓 , 我又係瞓唔著喎」
大家都「唉.......」

2009年6月1日星期一

六月。希望是好開始

踏入六月了, 師弟放三個星期大假去歐洲, 羨慕 C 人咯!
八月就輪到師妹又係去歐洲呀, 十月就鬼妹同事去澳洲, 真係攪到人心郁郁好想飛.....
好一陣子都唔敢買 U-magazine 喇, 好驚睇到D 旅遊介紹, 又吊住條癮好想去旅行.....
我忍忍忍, 我的十一月希望快D 到!!!

今日精明的 i/c 將師妹調返落嚟, 將某人調咗去第二度,
師妹返返嚟真係好好多呀, 起碼今日的四十幾張 referral 都清得晒吖!

今日見了我其中一個的 CI 大 BB, 上上吓堂, 佢竟然痾臭臭 (好彩有片的),
哈, 真係服咗佢, 都唔知好嬲定好笑........