2008年10月31日星期五

向台中出發

波比先生去o左哈囉喂 BBQ,
豬太一人的 dinner, 去o左元朗廣場斜對面的車仔麵,
$13 一碗有咁多樣唔同o既餸, 真係點捨得搬離元朗



之後去書店睇睇旅遊書,
係啊, 我o地 12 月又飛喇, 今之的目的地係台中, 點解係台中?
你睇o下呢個 website 你就會明白了


http://cingjing.com.tw/cjcjha/hotelbest/hotelbest.asp


此行一大吸引之處, 係去清境住好靚好靚的民宿,
見到 d 相, d 雲係o係你腳下o架, 實在太不可思議了!



o個度仲可以睇綿羊, 同埋有大片草原添!
冬天最凍的時候, o個度係會有雪o架~~~ 我真係唔知原來台中會有雪囉!!


另一 mission, 就係o係台中市飲飲食食啦,
台灣o既夜市實在係太吸引喇!


不過自由行一大問題, 就係我搵唔到一本好詳細介紹台中o既書,
買o左一本, 睇過兩本, 都係得好少篇幅, d 地圖又唔清楚,
交通指示更加係冇.... 台中又冇捷運, 我諗我o地都係不停搭的士居多~


而家仲搜尋緊好酒店, book 埋酒店就可以切實地 plan 行程了~

2008年10月27日星期一

Return to normal

呢幾晚係咁發惡夢, 真係好驚o既惡夢,
工作壓力太大嘛?!

今日終於都正正式式的 full team 工作,
嘩, 星期一3:30pm 就睇晒 d case,
我o黎o左半年都未試過, 實在係一大創舉!
師妹幫到手睇 in-patient, 相信大家都會舒服好多喇!!!

開始有時間整理一下做 therapy 的工作, 有好多o野可以睇深入 d,
而唔係日日趕清晒 d in-patient, 咁先係正常的工作 pattern 嘛!

所以我立志日日都要搭到村巴放工,
做一個煮飯的師奶先得!


終於都苦盡甘來嘛? :)

2008年10月26日星期日

至正 Hot Pot @ Home

上星期話同 HSBC 信用卡換o左個電磁爐, 今日去o左攞,
今晚即刻用o黎打邊爐先得!

今日下晝搵 cafe 飲o野搵唔到之際, 撞入o左一間o係新 B 仔對面街,
綿綿冰隔離舖的新開日本食材店, 叫做「小樽」,
入面有好靚o既裝修, 老闆絕對係有 taste 之人, 賣的都係日本入口的食材

最吸引的, 係凍肉櫃入面的原隻松葉蟹、蟹腳、超大帶子、海膽、大蝦...
仲有我o地都有食開o既日本烏冬, 調味料等等,
好似將 CitySuper 的最正貨品搬o左o黎咁!
元朗正需要一間咁o既舖頭呀, 有質素的日式食物, 元朗絕對有市場

見我o地拎住個電磁爐, 老闆介紹我o地買呢個火煱湯底 ($49),
辣味麵豉湯, 好正啊!


有菇有丸有日本蟹柳


滾呀~~~ 呢個爐好掂呀, 好快就滾起, 調教火力又好方便!
都未試過o係屋企打邊爐打得咁爽! (之前的爐好鬼死慢...)


戲肉所在: 老闆推介的安格斯雪花肥牛


我可以話俾大家聽, 真係超超超好味!!
係我咁大個女食過最好味的肥牛!
平時去酒樓食o既一 d 都冇得比, 小肥羊o個 d 我都覺得唔錯, 但都唔係佢o既級數!
入口嫩滑, 牛味十足, 雪花的分佈算平均, 一 d 都唔 "un",
YUMMY~~~


極力推介俾元朗人, 一定要試o下
我o地都會再幫襯啊!
有o左個爐咁方便, 即使我遲放工煮唔到飯, 都可以成日打邊爐了, 呵呵呵~

生唔生? 搬唔搬?

今日兩公婆討論著搬屋的問題, 如果趁樓市跌換樓, 其實係為咩呢?
因為好抵唔買就笨?
因為近 d 返工, 唔洗我來回搭 3 個鐘o既車?
換大 d 嘛? 而家六百幾呎又好夠住喎!
因為第時小朋友, 想佢有好 d o既校網? 我諗呢個係主要原因


再講到小朋友, 我話第時要請工人, 唔係邊個湊呀?!
點知波比先生話點都唔會請工人, 因為佢唔鍾意同陌生人一齊住,
你估我鍾意咩? 不過如果要生就一定要請o架喎,
再唔係就好似朋友的朋友一樣, 擺個女o係托兒所啦


波比先生話搵阿姨姨長幫手湊,
我話咁你為o左個校網你一定會搬出九龍,
你搬o左出去又點可以叫住屯門的阿姨幫手?
再者, 我覺得小朋友係自己要生的, 邊有可能生o左叫阿姨幫我湊?
所以我都係覺得自己俾錢請工人最 reasonable!
而且真係邊好意思咁麻煩人o架?!
阿姨而家不知幾 happy 成日周圍去玩, 咁辛苦先養大兩個表妹就o黎出晒身,
叫人幫你湊 B 攪到人o地想去玩都唔得, 我就冇咁厚面皮喇!


如果決定點都唔請工人, 真係要住近阿姨姨長, 咁即係繼續留o係元朗,
唔洗搬啦?


哈, 以上一切我一向心中有數, 不過原來波比先生一 d concept 都冇,
成日淨係諗住搬就搬, 唔知連帶有好多問題


講講o下, 生o左o既教同養都係好大o既問題,
最後的 conclusion, 傾傾o下都係唔生嘛?
哈, 似乎呢個問題係一個 loop, 好難搵到個 perfect 的方案
是否應該繼續二人世界?
安於現狀, 沒有沉重的供樓壓力, 鍾意幾時飛就幾時飛, 鍾意去玩就去玩



星期日想o係元朗搵個有靚咖啡的地方,
諗o左好耐.... 原來係冇.....
最後去了 McCafe, 竟然換到小丸子公仔, 好得意


2008年10月24日星期五

老富昌

呢個星期過得好唔容易,
波比先生繼續話好唔鍾意我呢份工, 因為見到我做到好辛苦,
比起上一份係辛苦好多, 但起碼係我鍾意o既o野,
但無可置疑, 的確對家庭生活有好大o既影響


星期五, 完成了一星期的辛勞, 我請你食返餐好o野,
少少補償平時成日都陪唔到你啦


2008年10月22日星期三

相識是緣份


朝八晚七的工作, 累死人.....


放工一個人, 走到麥當奴想吃限定的醬汁豬柳飽, 不過已經售罄...
不如吃開心樂園餐, 換個小丸子公仔, 怎料也換完了,
原來, 有些事, 錯過了就沒有了


一生人或許要錯過很多東西, 要後悔很多次, 還有沒完沒了的遺憾,
才明白什麼叫珍惜和把握,
有些東西可能很短暫, 但懂得珍惜的人, 即使失去, 都會無悔無憾的,
因為擁有著的每分每刻, 你都珍惜過, 真切地感受他的存在過,
總好過到失去才知重要的人, 永遠帶著悔疚過日子


回憶, 往往是最甜也是最苦,
好好整理過後, 埋藏在心中, 已是最幸福,
能共患難的, 是最羨煞旁人關係

2008年10月18日星期六

年尾炸彈第一擊

收到了 Laura 的請帖了, 超靚,
超鍾意呢種簡單花紋的西式請帖



星期四返學, 理論多於實用,
沒太大興趣聽之時, 拿出醫院的未成完工作做做做,
返工的時間實在唔夠用


星期五去學化妝, 畫o下畫o下幾好玩,
最攪笑係黐埋假眼睫毛, 自婚後都未試過化咁濃妝,
不過我都係鍾意唔化妝舒服 d



o係 HSBC 的獎賞天地睇o下有咩好換,
最終換o左兩樣好有用o既o野,
因為係 HSBC 的長期客戶, 用積分換禮品時有折, 勁抵!


呢個電磁爐, 用o左 12000 分 + $312 就換到喇,
仲有埋個煲送, 為入冬打邊爐做好準備, 諗起都興奮!



仲有呢個打蛋器, 用 25800分就換到喇!
我想要個打蛋器好耐咯, 可以用o黎整蛋糕, 正呀!!!



波比先生話取貨之後, 佢用o黎整 Cheese cake 俾我食喎,
大家拭目以待啦!

Enjoy our time

我o地有 2 張 $100 Pizza Hut coupon 就o黎到期,
於是今日就去o左 Pizza Hut 食 lunch


開心廣場的 Pizza Hut 新裝修完, 而家的 Pizza Hut 間間都裝修得好靚,
寬闊的座位, 時尚的佈置, 感覺似係高級o左好多咁


價錢呢亦到貴o左好多, 幾隻雞翼要四十幾蚊我覺得真係有 d 過份...
我o地叫o左兩個 Set lunch , 另加 $8 改酥皮湯



整體食物都算好好味啊, 而且愛呢間o既座位有陽光射入o黎,
坐o係度食個飯或者食個 tea, 都係賞心樂事!


埋單 $132, 如果唔用 coupon, 真係覺得偏貴啊~

2008年10月14日星期二

阿土麵線, 你試o左未?

近月常常見報的阿土麵線, 你試o左未呢?


我o地經過親都好想試, 但係都唔o岩時間,
或者放o左工都想坐低舒舒服服食餐晚飯o架,
所以一直都未有機會去試


今晚波比先生有節目, 我一個人去逛旺角,
哈, 不如去試o下了!


我叫o左 $12 的細碗裝, 冇加配料,
標準的配料只有兩三片大腸, 比起台灣的阿宗麵線實在遜色,
味道嘛, 真係好似阿宗啊, 掂啊!
最正係加埋 d 辣菜甫呀!
即使要好不顧儀態o係條街度畢畢畢, 還是覺得值得要試試呀!


唔怪之得佢長期都咁多人啦!



知道波比先生好恨食, 買o左一碗外賣添,
呢碗係中 size $15, 加蚵仔 ($6 得 3 小粒) 同埋 蟹肉 ($6 有一羹到),
由旺角運返元朗, 夠晒俾面喇掛!



如果你鍾意食阿宗麵線, 你應該要去試試啊!

2008年10月11日星期六

到此一遊之 JCCAC

日節目豐富, 先去了交收, 竟然賣得出我的 LX2, 為 LX3 幫補一下

之後相約青青食 lunch, 多謝青青送俾那 Burns Unit 小妹妹的玩具,
仲有馬氏伉儷請客的一餐, 你o地入o黎元朗的話, 一定要我請返呀!!

再去行黃金, 波比先生成日話想買部新電腦俾我, 仲話買 Mac,
但萬一如果我執相剪片整網頁的 (舊) software 唔 support Mac OS,
我想我會殺人的!
而且而家呢部都未壞, 唔好o徙錢了唔該~

之後我們整個 late afternoon, 就係花o係呢個地方


估唔估到o係邊呢?

賽馬會創意藝術中心由樓高九層的石硤尾工廠大廈翻新改建而成,可租用面積約110,000平方呎,
為藝術及設計工作者提供創作空間,冀成為社區內匯聚本地藝術及文化的中心。

 中心除設有供藝術工作者及藝術團體租用的單位外,也設有實驗劇場、藝廊、公共藝坊及工作室,供駐中心的藝術工作者及公眾人士租用。


入到去見到好多影友, 7 成都係手持 DSLR 的,
目的都在拍一下呢個咁有文化藝術氣息的地方

Let's get started!

入面每一個單位都有自己的主題,
畫畫的, 雕塑的, 攝影的, 造玻璃的, 造陶瓷的, 什麼都有


波比先生問我呢度攪咩,
我話:「藝術呢 d o野, 我o地呢 d 咁膚淺o既人係唔多明白o架喇, 哈哈」




白色中的一點綠色, 予人好舒服o既感覺



呢種樓層的數字, 好多好多年冇見過了!
穿過一層層的樓梯, 想起以前住公屋常常衝樓梯趕搭下面早 d 到的雙數電梯


腳踏衣車 + 電腦 = cool~


呢個單位好可愛


我都有枱上其中一本書


真係沖出來的相片



這是自製的針孔相機, 雖然我不明白它的製作理論,
但似乎好好玩! 而且牆上就係掛滿用佢拍攝的照片, interesting!




老香港回憶@JCCAC

最後到訪的一個單位, 其實係 GOD (住好 d) 所經營,
有賣街上 GOD 的產品, 仲有展出好多失傳的兒時玩意,
及見證了香港時代轉變的事物



有雀仔彈出o黎報時o既鐘, 仲有得賣嗎?




我小時候最愛的綠寶橙汁啊! 好記得o個種好似啫喱水的味道



髮型屋的轉轉燈箱



我同波比先生都大叫「我細個o個時有用過呢款擦膠呀」
綠色的部分係好似擦甩o既...






有好多微縮的場景, 手工超細緻!



exactly 係去飲的菜式








呢個大排檔好勁



連垃圾都整到咁似! 仲有紅櫈仔祝君早安的毛巾












對上一次見到呢個情景, 應該係讀中學時,
小賣部的旁邊, 好記得按樽有 5 毫子!



懷舊的風扇, 家中曾經有過一把




不經不覺地行o左成 3 個鐘, 尋回好多有趣而已遺忘的記憶,
一個好值得一遊的地方